MA E TAU HOA
3: Fakalilifu
KO E KAKANO
Ko e tau hoa ne fefakalilifuaki kua fakaalofa ke he taha mo e taha pete ka nakai fetaliaaki. “Nakai pipiki mau e tau hoa nei ke he manatu tokotaha ni haana,” talahau he tohi Ten Lessons to Transform Your Marriage. “Ka e tutala tumau a laua ke he tau mena ne taufetoko ki ai. Fanogonogo fakalilifu a laua ke he onoonoaga he tau hoa mo e kumi puhala ke fakafiafia e tau faahi ne ua.”
MATAPATU FAKAAKOAGA HE TOHI TAPU: Ko e “fakaalofa, . . . nakai kumi e ia hana tau mena.”—1 Korinito 13:4, 5.
“Ke fakalilifu e hoana haaku kua kakano ke loto fakaaue ke he tau mena uho ne taute e ia ti nakai manako au ke taute ha mena ke moumou e logonaaga haana po ke fakamauaga ha maua.”—Micah.
KAKANO NE AOGA
Ka nakai fai fakalilifu, ko e tutala he vahāloto he tau hoa kua kamata ke putoia e togā, fakafiufiu, mo e vihiatia foki—ko e tau mahani ne talahau he tau tagata kumikumi ko e tau fakamailoga ne kitia tuai to fakahiku ke tau vevehe.
“Ko e tau tala fakahukia, fakateaga, po ke vaiga hagaao ke he hoana haau ka utakehe e mauokafua mo e falanaki haana ti moumou e fakamauaga ha mua.”—Brian.
MENA KE TAUTE E KOE
MANAMANATU HIFO
Utahetua e tutalaaga mo e tau gahua haau ke he taha e faahi tapu. Ti hūhū hifo:
-
‘Lagafiha e tuhituhi e au e hoa haaku, mo e lagafiha e nava e au a ia?’
-
‘Ke he tau puhala fe ka fakakite e au e fakalilifu ke he hoa haaku?’
TUTALA MO E HOA HAAU
-
Ko e heigoa e tau gahua mo e tau kupu ka lagomatai a mua ke logona hifo e fakalilifu?
-
Ko e heigoa e tau gahua mo e tau kupu ka taute a mua ke logona hifo kua nakai fakalilifu?
TAU PUHALA
-
Tohi hifo tolu e puhala kua manako a koe ke moua e fakalilifu. Tala age ke he hoa haau ke taute pihia foki. Feutaaki e tau mena ha mua ne tohi mo e gahua ke fakakite e fakalilifu he tau faahi ne kitia e mua kua lata.
-
Tohi hifo e tau mahani ne nava e koe he hoa haau. Ti tala age ke he hoa haau kua loto fakaaue lahi a koe ke he tau mahani ia.
“Ke fakalilifu e taane haaku kua kakano ke fakakite e puhala he tau gahua haaku kua uho a ia ki a au ti manako au ke fiafia a ia. Nakai ko e mena lahi mahaki tumau; falu magaaho ko e tau mena ikiiki ne matutaki ke fakakite e fakalilifu mooli.”—Megan.
Fakahiku, nakai ko e logonaaga haau ko e tagata fakalilifu a koe po ke nakai; ka ko e hoa haau ka logona hifo e fakalilifu.
MATAPATU FAKAAKOAGA HE TOHI TAPU: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka.”—Kolose 3:12.
