1. Pete he kamata fiafia e fakamauaga, ko e heigoa ka fakafehagai mo lautolu ne mau? (Kikite fakatino he kamataaga.)

KO E magaaho fakamua ne kitia he kitofaitaane e kitofaihoana fulufuluola haana he aho mau, kua nakai fai fakaotiaga e fiafia he hoa. He fakatū kapitiga a laua, ne tupu lahi e fefakaalofaaki ha laua ti manako ke mau, mo e mavehe ai ke fefakamooliaki tumau. He mole e aho mau ha laua ne kamata e moui tokoua ha laua, kua lata ia laua ke taute e tau hikiaga ke nonofo fakalataha tumau. Ko Iehova ko e Tufuga he fakamauaga kua manako ke he tau hoa takitaha ke fiafia mo e kautū e moui faitaane mo e faihoana ti tuku age e ia e fakatonuaga pulotu he haana a Kupu, ko e Tohi Tapu. (Tau Fakatai 18:22) Pete ia, talahau he Tohi Tapu ko e tau tagata nakai mitaki katoatoa ne mau to fai lekua, po ke “matematekelea ke he tino.” (1 Korinito 7:28) Fakatote hifo fēfē he tau hoa e tau lekua ia? Ti maeke fēfē he tau Kerisiano ke kautū e fakamauaga?

2. Ko e heigoa e tau fakaalofa kehekehe ne lata ke fakakite he tau hoa he fakamauaga?

 ² Fakaako he Tohi Tapu ko e fua aoga lahi e fakaalofa. Ka e kehekehe e vahega fakaalofa ne kua lata e tau hoa ke fakakite he fakamauaga. Ma e fakatai, lata a laua ke fakakite e fakaalofa hofihofi ti pihia mo e fakaalofa loto fakavihi. Ti ka fai fanau a laua, kua mua atu foki e aoga he fakaalofa he vahāloto he tau tagata he magafaoa. Ka ko e fakaalofa ne fakavē ke he matapatu fakaakoaga ne omoomoi e fakamauaga ke kautū mooli. Fakamaama he aposetolo ko Paulo e fakaalofa nei he pehē a ia: “Kia takitokotaha a mutolu gotoa mo e fakaalofa atu ke he hana hoana, tuga e fakaalofa a ia kia ia ni; ka ko e fifine kia fakalilifu a ia ke he hana tane.”​—Efeso 5:33.

3. Kua lata ke mauokafua fēfē e fakaalofa he fakamauaga?

³ Tohi e Paulo: “Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia, mo e foaki mai e ia a ia ke eke mo hukui māna.” (Efeso 5:25) Muitua e tau Kerisiano he vahā nei ke he fakafifitakiaga ha Iesu he feofanaki tuga he fakaalofa a Iesu ke he tau tutaki haana. (Totou Ioane 13:34, 35; 15:12, 13.) Kua lata e taane mo e hoana Kerisiano ke fefakaalofaaki ti makai a laua ke mate ma e hoa ni haana. Kaeke ke hagahaga kelea e tau lekua he fakamauaga, falu ne liga logona hifo kua nakai mauokafua e fakaalofa ha laua. Ko e heigoa ka lagomatai a laua? Ko e fakaalofa ne fakavē ke he matapatu fakaakoaga ke “fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti.” Ko e fakaalofa pihia kua “nakai tuai oti.” (1 Korinito 13:7, 8) Lata e hoa ke manatu na taute e laua e omonuo. Mavehe a laua ke fakaalofa e taha ke he taha mo e fefakamooliaki. He manatu e mena nei ka omoomoi e tau hoa Kerisiano ke kumi e lagomatai ha Iehova ti gahua tokoua ke fakamafola e tau lekua.

4, 5. (a) Ko e heigoa e matagahua he taane ko e ulu he magafaoa? (e) Lata ke fēfē e onoonoaga he hoana ke he tuaga he ulu? (i) Ko e heigoa e tau hikiaga ne lata he taha hoa mau ke taute?

⁴ Fakamaama e Paulo e tau matagahua he tau hoa takitaha he fakamauaga he pehē: “Ko e tau fifine kia takitokotaha mo e omaoma ke he tau tane ha mutolu tuga e omaoma ke he Iki. Ha ko e tane, ko e ulu he hoana haia, tuga a Keriso, ko e ulu he ekalesia haia.” (Efeso 5:22, 23) Nakai kakano e mena nei kua mahomo atu e taane ke he hoana haana. Hagaao a Iehova ke he matagahua uho lahi he hoana, he pehē a Ia: “Kua nakai mitaki ke tokotaha e tagata; to eke e au māna e lagomatai ke lata mo ia.” (Kenese 2:18) Lata he hoana ke lagomatai e taane haana ke eke mo ulu magafaoa mitaki. Ti lata he taane ke muitua e fakafifitakiaga fakaalofa ha Iesu, ko e “ulu he ekalesia haia.” Ka taute pihia he taane to logona hifo he hoana e haohao mitaki ti mukamuka lahi ke fakalilifu mo e lalago atu e taane haana.

⁵ He mau a Cathy ki a Fred, pehē a ia: “He mogo ne nakaila fai taane au, ne leveki ni e au a au. Hiki he fakamauaga a au he fakaako ke falanaki ke he taane haaku. Nakai ko e mena mukamuka tumau ka kua fetataaki lahi a maua ko e hoa he fakafehagai he puhala ha Iehova.” ^[1] (Kikite tala he fakahiku.) Pehē a Fred: “Ko e taute he tau fifiliaga kua  nakai mukamuka ki a au. He fakamauaga, ko e manatu he tokoua e tagata kua lafi atu ke he paleko. Ka ko e kumi e takitakiaga ha Iehova he liogi mo e fanogonogo fakamitaki ke he manatu he hoana haaku, kua mukamuka lahi he tau aho takitaha. Logona hifo e au ko e matakau mooli a maua!”

6. Eke fēfē e fakaalofa mo “pipi haia ke fakamaopoopo ai” ka tupu e tau lekua he fakamauaga?

⁶ Na mauokafua e tau fakamauaga ka maeke e tau hoa ke “fefakaukaaki . . . mo e fefakamagaloaki.” Ha kua nakai mitaki katoatoa a laua to igatia a laua mo e mahani hepehepe. Ka tupu e mena ia, maeke a laua ke fakaako mai he tau hepehepe ha laua, fakaako ke fakamagalo, mo e fakakite e fakaalofa ne fakavē ke he tau matapatu fakaakoaga he Tohi Tapu. Ko e fakaalofa nei ko e “pipi haia ke fakamaopoopo ai.” (Kolose 3:13, 14) Maeke he tau hoa mau ke fakakite e fakaalofa nei he mahani fakauka mo e totonu ti nakai “talahaua e kelea [po ke tau hepehepe] ke he taha.” (1 Korinito 13:4, 5) Ka taufetoko, lata e hoa ke eketaha mo e fakamafola fakamafiti ato oti e aho. (Efeso 4:26, 27) Kua lata ke ha ha i ai e mahani fakatokolalo mo e loto malolō ke talahau “Fakamolemole he fakahukia e au a koe,” he taute pihia to lagomatai ke fakamafola e tau lekua mo e fakatata fakalahi e tau hoa mau.

7, 8. (a) Ko e heigoa e fakatonuaga he Tohi Tapu ke he tau fakafetuiaga mahani fakataane mo e fifine he fakamauaga? (e) Ko e ha kua lata he tau hoa he fakamauaga ke fakakite e fakaalofa hofihofi?

⁷ Tuku mai he Tohi Tapu e fakatonuaga mitaki ka lagomatai e hoa ke hako e onoonoaga ke he fakafetui he mahani fakataane mo e fifine he fakamauaga. (Totou 1 Korinito 7:3-5.) Latatonu he taane mo e hoana ke manamanatu ke he ha laua a tau logonaaga mo e tau manako. Ka nakai fakaalofa hofihofi e taane ke he hoana haana, liga uka he hoana ke fiafia e magaaho kua fakafetui a laua ke he mahani fakataane mo e fifine. Lata e tau taane ke “fakalataha . . . mo e iloilo” ka fehagai mo e tau hoana ha lautolu. (1 Peteru 3:7) Nakai lata e fakafetuiaga mahani fakataane mo e fifine ke peehi malolō ka kua lata ke fakatotoka mitaki. Fa mahani e tagata taane ke gahuahua mafiti ka e nakai pihia e fifine. Ka e lata ke hako e magaaho he tau logonaaga ma e taane mo e hoana.

⁸ Nakai talahau he Tohi Tapu e tau matafakatufono pauaki ke he tau vahega mo e tau fakakaupāaga he fakaalofa hofihofi kua fakakite he vahāloto he taane mo e hoana. Ka kua fakakite foki i ai e fakaalofa hofihofi. (Lologo a Solomona 1:2; 2:6) Ko e tau hoa he fakamauaga Kerisiano kua lata ke fakaalofa hofihofi ki a laua ni.

9. Ko e ha kua nakai hako ke logona hifo e manako feuaki mo e ha tagata ne nakai ko e hoa mau ha tautolu?

⁹ Ka malolō e fakaalofa ha tautolu ke he Atua mo e katofia, to nakai fakaatā e tautolu ha tagata po ke ha mena ke fakatauhele e fakamauaga ha tautolu. Falu ne lolelole po ke fakakelea e fakamauaga ha lautolu he hufia ke he tau fakatino telefua. Lata ia tautolu ke totoko e fakataki he tau fakatino telefua po ke ha manako feuaki kelea. Lata  foki a tautolu ke kalo kehe he taute ha mena kua tuga e kalahī ke he tagata ne nakai ko e hoa mau ha tautolu kakano kua nakai mitaki e mena ia. Lata ke manatu e tautolu kua iloa he Atua e tau manatu mo e tau mahani oti ha tautolu. To lagomatai he mena nei a tautolu ke fakamalolō e manako ha tautolu ke fakafiafia a Iehova mo e ke fakatumau e fakamooli ke he tau hoa ha tautolu.​—Totou Mataio 5:27, 28; Heperu 4:13.

10, 11. (a) Aga mo e mahani fēfē e tau vevehe? (e) Ko e heigoa ne talahau he Tohi Tapu hagaao ke he nonofo kehekehe? (i) Ko e heigoa ka lagomatai e hoa he fakamauaga ke nakai mafiti e nonofo kehekehe?

¹⁰ Ka nakai fakamafola e tau lekua hagahaga kelea, maeke e falu hoa ke fifili ke nonofo kehekehe po ke tau vevehe. He falu motu, molea e hafa he tau hoa ne tau vevehe. Mooli, nakai tupu tumau e aga nei he fakapotopotoaga Kerisiano. Ka e loga e hoa Kerisiano ne hagahaga kelea e tau lekua he fakamauaga ha lautolu.

¹¹ Tuku mai he Tohi Tapu e tau hatakiaga nei: “Aua neke fano kehe e hoana mo e hana tane, kaeke foki kua fano kehe, kia nofo noa pihia a ia po ke fakafeilo mo e hana tane; aua foki neke mavehe e tane mo e hana hoana ni.” (1 Korinito 7:10, 11) Falu hoa ne liga logona hifo kua kelea lahi e tau lekua ha laua ti lata ke nonofo kehekehe. Ka e fakakite e Iesu e lata ke nakai uta fakateaga e nonofo kehekehe he fatiaki e ia e talahauaga he Atua he kamataaga hagaao ke he fakamauaga ti lafi e ia: “Ko ia kua fakalataha he Atua, aua neke vevehe he taha tagata.” (Mataio 19:3-6; Kenese 2:24) Ti manako a Iehova ke he tau taane mo e tau hoana ke tumau e nonofo tokoua. (1 Korinito 7:39) Igatia a tautolu mo e manatu kua fai fakalagoaga a tautolu ki a Iehova ma e tau mahani ha tautolu. Lagomatai he mena nei a tautolu ke fakamafola fakamafiti e tau lekua neke hagahaga kelea lahi.

12. Ko e heigoa ka takitaki e hoa mau ke manamanatu ke he nonofo kehekehe?

¹² Ko e ha e falu hoa ne fehagai mo e tau lekua hagahaga kelea lahi? Ma e falu, nakai ko e mena ne amanaki a lautolu ki ai he fakamauaga ha lautolu ti hogohogo manava po ke ita e logonaaga ha lautolu. Fa tupu e tau lekua ha ko e kehekehe e tau puhala ne feaki po ke fehagai e tau tagata mo e tau logonaaga ha lautolu. Ko e tuaga vihi mo e tau matua fugavai po ke taufetoko ke he puhala ke fakaaoga e tupe po ke feaki he tau fanau ka fakatupu foki e tau lekua. Ti kua mitaki ke kitia kua maeke e laulahi he tau hoa Kerisiano ke moua e tau tali ke he tau lekua ha lautolu ha kua fakaatā e lautolu e Atua ke takitaki a lautolu.

13. Ko e heigoa e tau kakano kua latatonu ma e nonofo kehekehe?

¹³ Liga ha ha i ai e tau kakano kua latatonu he hoa ke nonofo kehekehe. Ko e tau tuaga fakahagahaga kelea tuga e nakai leveki pauaki, tafolo fakakelea, mo e fakahagahaga kelea lahi e moui fakaagaaga ko e tau kakano ati fifili e falu ke nonofo kehekehe. Ka  fai lekua hagahaga kelea lahi, kua lata he tau hoa he fakamauaga ke ole ke he tau motua ma e lagomatai. Lahi e iloaaga he tau matakainaga taane nei ti maeke ke lagomatai e hoa ke fakagahua e fakatonuaga he Atua he tau momoui ha laua. Ti ka ole e tau hoa mau ki a Iehova ma e agaaga tapu haana, maeke he mena ia ke lagomatai a laua ke fakagahua e tau matapatu fakaakoaga he Tohi Tapu mo e ke fakakite e tau mahani faka-Kerisiano. (Kalatia 5:22, 23) ^[2]​—Kikite tala he matahiku.

14. Ko e heigoa ne talahau he Tohi Tapu ke he tau Kerisiano ne mau ke he tau hoa ne nakai tapuaki ki a Iehova?

¹⁴ Fakakite he Tohi Tapu kua fai kakano mitaki ma e hoa ke nonofo tokoua pete ne taha he tau hoa kua nakai tapuaki ki a Iehova. (Totou 1 Korinito 7:12-14.) Ne “fakatapu” e hoa nakai tua ha kua mau ke he fekafekau he Atua. Ko e tau fanau he hoa kua “tapu” mo e ha ha ai i lalo he puipuiaga he Atua. Fakamafana e Paulo e tau hoa Kerisiano: “Ha kua iloa fefe e koe ko e hoana, to moui hāu a tane kia koe? Ko koe foki, ko e tane, kua iloa fefe a koe to moui e hoana hāu kia koe?” (1 Korinito 7:16) Ha ha i ai loga e fakafifitakiaga mitaki he tau taane mo e tau hoana Kerisiano ne lagomatai ha lautolu a tau hoa ke eke mo tau fekafekau ha Iehova.

15, 16. (a) Ko e heigoa e fakatonuaga kua tuku age he Tohi Tapu ke he tau hoana Kerisiano ne nakai ko e fekafekau he Atua e tau taane? (e) Ko e heigoa e tuaga he Kerisiano “kaeke ke fano kehe a ia kua nakai tua”?

¹⁵ Fakatonu he aposetolo ko Peteru e tau hoana Kerisiano ke omaoma ke he ha lautolu a tau taane, “kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau. Ka kitekite age a lautolu kia mutolu kua nonofo fakatekiteki mo e matakutaku [fakalilifu].” He nakai tutala hagaao  ke he tau taofiaga haana he tau magaaho oti, liga lagomatai he hoana e taane haana ke talia e kupu mooli ka fakakite e ia e “loto mahani molu mo e mafola, ko e koloa uho haia ki mua he Atua.”​—1 Peteru 3:1-4.

¹⁶ Ka e kua ka fifili e hoa mau ne nakai tua ke nonofo kehekehe? Pehē e Tohi Tapu: “Kaeke ke fano kehe a ia kua nakai tua, kia toka a ia ke fano kehe ai. Nakai fakatupa e matakainaga po ke mahakitaga ka pihia; ka kua ui a tautolu he Atua kia mafola ai.” (1 Korinito 7:15) Pete he liga moua e mafola he nonofo kehekehe, hagaao ke he Tohi Tapu kua nakai atāina e hoa Kerisiano ke liu mau foki. Kia nakai lali a ia ke peehi e hoa haana ke ua fano. To fai magaaho ti liga fifili e hoa nakai tua ke liu mai ti manako ke liu pipi e fakamauaga. Liga to eke e hoa nakai tua mo fekafekau ha Iehova he mogo i mua.

17. Ko e heigoa e mena kua lata ke tuku fakamua he tau hoa mau Kerisiano?

¹⁷ Ha kua nonofo a tautolu he fakaotiaga he “tau aho fakamui” to fehagai a tautolu mo e “tau aho uka.” (2 Timoteo 3:1-5) Ko e kakano ia ati lata a tautolu ke puipui e fakafetuiaga mauokafua mo Iehova. “Kua gahoa e tau aho kua toe,” he tohi e Paulo. “Kia tuga he nakai fai hoana, a lautolu kua fai hoana; . . . Ko lautolu kua toto e tau mena he lalolagi nai tuga he nakai toto fakalahi ki ai.” (1 Korinito 7:29-31) Nakai kakano a Paulo kua lata he tau hoa mau ke tiaki e tau hoa ha lautolu. Ka e ha kua nonofo a tautolu he tau aho fakamui, lata ia tautolu ke tuku fakamua ha tautolu a tapuakiaga ki a Iehova.​—Mataio 6:33.

18. Ko e ha kua maeke he tau Kerisiano ke moua e fakamauaga fiafia mo e kautū?

¹⁸ He tau magaaho uka nei, loga e tau fakamauaga ne kaumahala. Ka e maeke nakai ke moua e fakamauaga fiafia mo e kautū? Ē, kaeke ke fakatumau ha tautolu a fakatata ki a Iehova mo e haana tau tagata, fakagahua e tau matapatu fakaakoaga he Tohi Tapu, mo e talia e takitakiaga he agaaga tapu ha Iehova. Ka taute e tautolu e mena nei, kua fakalilifu e tautolu e mena “kua fakalataha he Atua.”​—Mareko 10:9.