Ko e taha anei he tau mena loga ne tuhituhi he tau fī ha Iesu ki a ia mo e tau tutaki haana. Fakamaama he Fakatufono faka-Mose e mena ka fakakelea aki e tagata, ma e fakatai, ko e gagao pela, lepela, po ke aamo e tagata po ke manu mate. Foaki foki he Fakatufono e tau hatakiaga ke he puhala ka liu e tagata ke fakameā. Taute e mena nei puhala he poa, koukou, po ke pīpī.​—Levitika veveheaga 11-15; Numera veveheaga 19.

Ko e tau akoako Iutaia ne iloa ko e tau rapai ne lafi e tau matafakatufono ha lautolu ke he tau fakatufono nei. Talahau he taha tohi kua lafi he tau rapai e tau matafakatufono loga ke he puhala kua nakai meā e tagata mo e puhala ne taute e ia e falu ke nakai meā. Fakatū foki he tau rapai e tau matafakatufono ke he tau vahega koloa mo e tau mena ka meā mo e nakai meā mo e tau faiagahau kua lata e tau tagata ke muitua ke liu meā foki.

Hūhū e tau fī ha Iesu ki a ia: “Ko e ha nakai omaoma ai hāu a tau tutaki ke he tau kupu toka tigahau he tau tagata i tuai, he kai mena a lautolu mo e tau lima nakai holoholo.” (Mareko 7:5) Nakai hagaao e tau Farasaio ia ke he mahani meā mitaki he holoholo e tau lima to kai. Fakatū he tau Farasaio e matafakatufono ato kai e tagata, kia liligi e vai ki luga he tau lima haana ko e vala he faiagahau. Lafi he tohi i luga ko e tau rapai ne “taufetoko foki ko e tau polu fe ka fakaaoga ke liligi aki, ko e vai fe kua lata, ko hai ka liligi, ti hoko ki fe he tau lima ne kua lata ke holoholo.”

Tali atu fēfē a Iesu ke he falu matafakatufono foki nei ne taute he tau tagata? Pehē a ia ke he tau takitaki lotu Iutaia: “Kua lata mitaki ni e kupu ne talahau e Isaia kia mutolu e tau tagata fakavai tuga ne tohi mai, Kua fakaheke mai e motu nai kia au ke he tau laugutu ha lautolu, ka ko e tau loto ha lautolu kua fakamamao ni kia au [Iehova]. Kua tapuaki noa mai a lautolu kia au, kua fakaako atu e lautolu e tau puaki he tau tagata. Ha kua toka e mutolu e puaki he Atua, ka e taofi e tau kupu toka tuai he tau tagata, ko e fuifui he tau kapiniu, mo e tau kapiniu inu, katoa foki mo e falu a mena loga pihia kua eke e mutolu.”​—Mareko 7:6-8.