1, 2. (a) Fakamooli fēfē e Isaia 60:22 he magaaho nei he fakaotiaga? (e) Ko e heigoa e manako mogonei he fakatokatokaaga ha Iehova he lalolagi?

“KO E tokogahoa to eke ia mo tokoafe, mo e maga fakateaga to eke ia mo motu malolo.” (Isaia 60:22) Kua fakamooli mogonei e tau kupu ia he magaaho nei he fakaotiaga. He 2015, ne 8,220,105 he tau fekafekau ha Iehova ne fakamatala e tala mitaki he Kautu he lalolagi katoa! Pehē e Atua hagaao ke he tupu ki mua he tau tagata haana: “Ko au ko Iehova to fakaave au ke eke ke he hana ni a aho.” He matutaki atu e magahala nei, to lahi e gahua ke taute e tautolu oti. Kua taute nakai e tautolu e tau mena oti ke fakamatala mo e fakaako atu e tala mitaki? Tokologa e tau matakainaga kua fitā he fekafekau ko e tau paionia tumau po ke fakakū. Falu ne hiki ke he taha matakavi foki ke lagomatai e gahua fakamatala, ka e gahua malolō e falu ke talaga e tau Fale he Kautu.

² He tau tau takitaha, kavi ke he 2,000 he tau fakapotopotoaga ne fakatū. Kua manako e tau fakapotopotoaga nei ke he tau motua mo e tau fekafekau lagomatai. He tau tau takitaha, totou  afe e fekafekau lagomatai ne lata ke eke mo tau motua mo e totou afe e falu matakainaga taane ne lata ke eke mo tau fekafekau lagomatai. Maaliali ai, “kia fakamakai nakai noa ke he gahua he Iki,” ti nakai ni ke he tau matakainaga taane, ka e pihia foki ke he tau matakainaga fifine.​—1 Korinito 15:58.

3, 4. Ko e heigoa e kakano he holo ki mua fakaagaaga ki a koe?

³ Totou 1 Timoteo 3:1. Ne nava he aposetolo ko Paulo e tau matakainaga taane ne “foli” ke eke mo tau leveki. Ma e tagata ke hokotia ke he taha mena ne mamao, kua lata a ia ke eketaha mo e fakaloa atu e lima ke moua ai. Manamanatu la mogonei ke he matakainaga taane kua manako ke hokotia ke eke mo fekafekau lagomatai. Mailoga e ia kua lata a ia ke eketaha ke fakaholo ki mua e tau mahani faka-Kerisiano haana. Ti, he mole e kamata haana ke eke mo fekafekau lagomatai, kua fakatumau a ia ke gahua fakamalolō ke hokotia ke eke mo leveki.

⁴ Falu he tau matakainaga kua taute e tau hikiaga he tau momoui ha lautolu ha kua manako ai ke lahi e mena ke taute he fekafekauaga ha Iehova. Ma e fakatai, liga manako a lautolu ke paionia, gahua he Peteli, po ke lagomatai ke talaga e tau Fale he Kautu. Onoono la tautolu ke he lagomataiaga he Tohi Tapu ke tumau a tautolu ke holo ki mua fakaagaaga.

5. Maeke fēfē he tau fuata ke fakaaoga e tau malolō ha lautolu ke he fekafekauaga he Kautu?

⁵ Lahi e mena ka taute he tau fuata he fekafekauaga ha Iehova ha kua maō mo e hakahakau a lautolu. (Totou Tau Fakatai 20:29.) Falu matakainaga taane fuata he Peteli ne lagomatai ke lomi mo e taute e tau tohi mo e tau Tohi Tapu. Tokologa e tau matakainaga taane mo e fifine fuata ne talaga e tau Fale he Kautu po ke lagomatai ke fakafoou ai. Falu ne foaki noa ke lagomatai ka tutupu e tau matematekelea pauaki. Ti tokologa e paionia fuata ne fakaako e vagahau kehe po ke o atu ke he falu motu ke fakamatala e tala mitaki.

6-8. (a) Hiki fēfē he taha fuata e onoonoaga haana ke he fekafekauaga ke he Atua, ti ko e heigoa e fua? (e) Maeke fēfē a tautolu ke ‘kamata mo e kitekite kua mitaki a Iehova’?

⁶ Kua fakaalofa a tautolu ki a Iehova ti manako ke foaki katoatoa e tau malolō ha tautolu ki a ia. Ka kua liga logona hifo a tautolu tuga e matakainaga ne higoa ko Aaron. Manako a ia ke fiafia he fekafekau ke he Atua, ka e nakai logona hifo e ia e fiafia. Pete he fano a Aaron he tau feleveiaaga mo e gahua he fonua tali mai he tote, pehē a ia, “Ahumate e tau feleveiaaga mo e gahua he fonua ki a au.” Ti ko e heigoa ne taute e ia?

⁷ Ne eketaha a Aaron ke totou tumau e Tohi Tapu, tauteute ke lata mo e tau feleveiaaga, mo e tali ai. Kamata foki a ia ke liogi tumau. Lagomatai he tau mena oti nei a ia ke holo ki mua fakaagaaga. Maeke a ia ke iloa mitaki a Iehova ti kamata ke fakaalofa lahi ki a Ia. Ko e fua, ne fiafia lahi a Aaron. Ne paionia a ia ti lagomatai e falu ka tutupu e tau matematekelea pauaki, mo e hiki atu ke fakamatala he falu motu. Ko ia mogonei ko e motua ti fekafekau he Peteli. Fēfē haana a logonaaga ke he moui? Pehē a Aaron, “Kamata e au mo e kitekite, kua mitaki a Iehova. Ha ko e monuina haana ati logona e au e fai fakalagoaga ki a ia ti omoomoi au ke lahi e mena ke taute he fekafekauaga haana mo e fua mai foki e tau monuina loga.”

 ⁸ Pehē e salamo: “Kia kamata e mutolu mo e kitekite, kua mitaki a Iehova.” Lafi e ia: “Nakai fai mena mitaki ke nonofogati ai a lautolu ne kumi kia Iehova.” (Totou Salamo 34:8-10.) Ē, ka foaki katoatoa a tautolu ki a Iehova, kua logona e tautolu e fiafia mooli ha kua iloa ai kua fakafiafia e tautolu a ia. To fakamooli e ia e maveheaga haana ke leveki a tautolu.

9, 10. Ko e ha kua aoga ma haau ke moua e aga “amaamanaki”?

⁹ Liga manako a tautolu ke lahi atu e mena ke taute he fekafekauaga ha Iehova. Ka e kua ka leva e fakatali ha tautolu ke he kotofaaga pauaki he fakapotopotoaga po ke ke hiki e tau tuaga ha tautolu? Liga lata foki a tautolu ke fakauka. (Mika 7:7) Pete he liga fakaatā e Iehova e tuaga ha tautolu mogonei ke matutaki, maeke a tautolu ke iloa tonu to lalago tumau e ia a tautolu. Maeke a tautolu ke fakaako mai he fakafifitakiaga ha Aperahamo. Mavehe e Iehova to fai tama a ia, ka kua loga e tau tau ne fakatali a ia ato fanau a Isaako. He magaaho ia, ne fakauka a Aperahamo ti nakai galo haana a tua ki a Iehova.​—Kenese 15:3, 4; 21:5; Heperu 6:12-15.

¹⁰ Mooli, nakai mukamuka ke fakatali. (Tau Fakatai 13:12) Kaeke ke manamanatu tumau a tautolu ke he tuaga mo e tau fakahogohogo manava ha tautolu, to logona hifo e tautolu e loto lolelole. Ka e lata a tautolu ke fakaaoga e magaaho ke fakaholo ki mua e tau mahani ne kua lata a tautolu ke leveki aki e tau matagahua pauaki he fakapotopotoaga.

11. Ko e heigoa e tau mahani fakaagaaga ka eketaha a tautolu ke feaki, ti ko e ha kua aoga ai?

¹¹ Feaki e tau mahani mo e tau lotomatala kua lata ia koe. He totou e Tohi Tapu mo e manamanatu fakahokulo ke he tau mena ne totou, maeke a koe ke fakaako ke pulotu, ke manamanatu mo e fakakakano fakamahino, mo e taute e tau fifiliaga mitaki. Lata he tau matakainaga taane ke moua e tau mahani mo e tau lotomatala tuga anei ke leveki aki e fakapotopotoaga. (Tau Fakatai 1:1-4; Tito 1:7-9) Ka fakaako e tautolu e Tohi Tapu, maeke a tautolu ke moua e finagalo ha Iehova ke he tau mena loga. He tau aho takitaha, maeke a tautolu ke fakaaoga e mena ne fakaako e tautolu ke taute e tau fifiliaga kua fakafiafia a Iehova. Ma e fakatai, to iloa e tautolu e puhala ke fehagai mo e falu, puhala ke fakaaoga e tupe, mo e puhala ke fifili e fakafiafiaaga mo e tau mena tui.

12. Fakakite fēfē he tau matakainaga he fakapotopotoaga kua mahani fakamooli a lautolu?

¹² Gahua malolō he ha kotofaaga ne kua tuku atu ki a koe. He magaaho ne liu talaga he tau tagata he Atua e faituga, ne manako a Nehemia ke he tau tagata taane ke taute e tau matagahua kehekehe. Fifili e ia a lautolu ne mitaki e tau mahani. Iloa e ia na fakaalofa e tau tagata taane ia ke he Atua mo e to gahua fakamalolō a lautolu ke taute ha gahua ne tuku age ki a lautolu. (Nehemia 7:2; 13:12, 13) He puhala taha ia he vahā nei, ko lautolu ne mahani fakamooli mo e gahua malolō to mitaki e tau mahani mo e liga foaki fakalahi age falu matagahua.  (1 Korinito 4:2) Ha ko e tau matakainaga taane po ke fifine a tautolu, kua lata tumau a tautolu ke eketaha ke he ha gahua kua tuku mai ki a tautolu.​—Totou 1 Timoteo 5:25.

13. Maeke fēfē a koe ke muitua ke he fakafifitakiaga ha Iosefa ka ekefakakelea he falu a koe?

¹³ Falanaki ki a Iehova. Ko e heigoa haau ka taute ka nakai mahani mitaki e falu ki a koe? Maeke a koe ke fakamaama ki a lautolu e logonaaga haau. Kaeke ke papale tumau e koe a koe he peehi kua hako a koe, to holo ni ki mua e lekua. Maeke a tautolu ke fakaako fakalahi mai he fakafifitakiaga ha Iosefa. Ne ekefakakelea he tau lafu haana a ia. Pikopiko e tau tagata hagaao ki a ia, ti tuku a ia he fale puipui ha ko e mena ne nakai taute e ia. Ka e falanaki a Iosefa ki a Iehova. Ne manamanatu a ia ke he tau maveheaga ha Iehova ti fakatumau a ia ke mahani fakamooli. (Salamo 105:19) He tau magaaho uka ia, ne feaki e ia e loga he tau mahani mitaki ne lagomatai a ia fakamui he tuku age ki a ia e gahua aoga ke taute. (Kenese 41:37-44; 45:4-8) Ka taute fakakelea he falu a koe, liogi ki a Iehova ma e pulotu. To lagomatai e ia a koe ke fakatumau e fakatotoka mo e ke fehagai totonu ki a lautolu ka vagahau a koe ki a lautolu.​—Totou 1 Peteru 5:10.

14, 15. (a) Ko e ha kua lata a tautolu ke mataala ke he puhala fakamatala ha tautolu? (e) Maeke fēfē a koe ke hikihiki ke he tau tutūaga? (Kikite fakatino he kamataaga mo e puha “ Makai Nakai a Koe ke Fakaaoga e Taha Puhala Kehe?”)

¹⁴ Tala age a Paulo ki a Timoteo ke matutaki  ke fakaholo ki mua e puhala ne fakamaama e ia e tau Tohiaga Tapu. Pehē a Paulo: “A koe kia koe ni [po ke, mataala], katoa mo e hau a fakaako atu.” (1 Timoteo 4:13, 16) Fitā a Timoteo he fakamatala ke he loga e tau tau. Ti ko e ha kua lata a ia ke holo ki mua? Iloa e Timoteo na hiki e tau tagata mo e tau tutūaga. Manako a ia ke he tau tagata ke fanogonogo tumau ki a ia, ti kua lata a ia ke matutaki ke holo ki mua mo e hikihiki e puhala ne fakaako a ia ki a lautolu. He fakamatala a tautolu mogonei, lata ia tautolu ke taute pihia.

¹⁵ He falu matakavi, mailoga e tautolu kua tokologa e tagata ne nakai haia i kaina ka fakamatala a tautolu mai he taha gutuhala ke he taha gutuhala. He falu matakavi liga haia e tau tagata i kaina ka e nakai omai a lautolu ke he tau gutuhala, liga nakai maeke a tautolu ke huhū atu ke he fale tokoluga ne nonofo a lautolu. Ka pihia e fonua ha mutolu, maeke nakai a koe ke fakaaoga taha puhala ke moua e tau tagata?

16. Fakamooli fēfē kua lauia mitaki e fakamatala ke he mena ne ha ha i ai e tau tagata?

¹⁶ Tokologa e matakainaga ne fiafia he fakamatala ke he mena ne ha ha i ai e tau tagata. Ma e fakatai, o atu a lautolu ke he tau tuaga leluē, tau tuaga pasi, tau makete, mo e tau paaka ke moua e tau tagata ke tutala ki ai. Liga kamata he Fakamoli e fakatutalaaga mo e taha tagata hagaao ke he vala tala ne tupu foou. Po ke liga talahau he Fakamoli e taha mena mitaki hagaao ke he tau fanau haana po ke hūhū hagaao ke he gahua haana. Kaeke kua fiafia e tagata he tutala, liga talahau he tagata fakailoa e manatu he Tohi Tapu ti hūhū ke he manatu haana. Na manako e tau tagata ke iloa lahi e Tohi Tapu.

17, 18. (a) Liga mauokafua lahi fēfē a koe he fakamatala he mena ne ha ha i ai e tau tagata? (e) Ko e ha ne logona hifo e koe e aga ha Tavita he fakaheke ki a Iehova kua uho he gahua a koe he fonua?

¹⁷ Liga uka a koe ke kamata e tau fakatutalaaga he puhalatū mo e tau tagata ne nakai iloa e koe. Pihia e logonaaga ha Eddie, ko e paionia i New York City. Ka e moua e ia e mena ne lagomatai a ia ke mauokafua. Pehē a ia: “He tapuakiaga magafaoa ha maua, ne kumikumi e au mo e hoana haaku e tau tali ke he tau totokoaga mo e tau manatu he tau tagata. Hūhū foki a maua ke he falu Fakamoli ma e tau manatu lagomatai.” Onoono lahi atu a Eddie mogonei ke fakamatala ke he mena ne ha ha i ai e tau tagata.

¹⁸ Ka fiafia lahi a tautolu ke he gahua he fonua mo e holo ki mua e puhala ka tutala a tautolu ke he tau tagata hagaao ke he tala mitaki, to kitia he falu e tupu ki mua he tuaga fakaagaaga ha tautolu. (Totou 1 Timoteo 4:15.) Ti liga lagomatai foki e tautolu e falu ke eke mo fekafekau ha Iehova. Pehē a Tavita: “To fakaaue au kia Iehova ke he tau aho oti kana; nakai noa e fakaheke he haku gutu kia ia. To fiafia haku agaga kia Iehova; to fanogonogo ki ai a lautolu ne matematekelea, ti fiafia ai a lautolu.”​—Salamo 34:1, 2.

19. Ko e ha kua lata ke fiafia e fekafekau fakamooli ha Iehova, pete he ha ha a ia he tau tutūaga nakai atāina?

¹⁹ Pehē foki a Tavita: “Iehova na e, kua fakaheke atu kia koe hāu a tau mena oti ne eke; kua fakamonu atu foki kia koe hāu a tau tagata tapu. Kua vagavagahau a lautolu ke he lilifu he hāu a kautu, mo e talatalahau ke he hāu a malolo; Kia fakailoa atu ke he fanau he tau tagata hana tau gahua malolo, mo e lilifu  he fulufuluola he hana kautu.” (Salamo 145:10-12) Ko lautolu oti ne fakaalofa ki a Iehova mo e mahani fakamooli ki a ia ne ha ha i ai e manako malolō ke tala age ke he falu hagaao ki a ia. Ka e kua kaeke ko e gagao po ke fuakau ti nakai maeke a koe ke lahi e magaaho tuga he manako haau ke fakamatala he taha fale ke he taha fale? Manatu tumau kua fakaheke a koe ki a Iehova he tau magaaho takitaha kua vagahau a koe hagaao ki a lautolu ne takatakai ia koe, tuga e tau nosi po ke tau ekekafo. Kaeke ko koe he fale puipui ha ko e tua haau, maeke agaia a koe ke tala age ke he falu hagaao ki a Iehova, ti fakafiafia he mena ia e loto haana. (Tau Fakatai 27:11) Fiafia lahi foki a ia kaeke kua fekafekau a koe ki a ia ka e nakai fekafekau e falu he magafaoa haau. (1 Peteru 3:1-4) Pete foki he tau tutūaga uka lahi, maeke a koe ke fakaheke a Iehova, fakatata lahi tumau ki a ia, mo e holo ki mua fakaagaaga.

20, 21. Ka tuku atu ki a koe e falu gahua he fakatokatokaaga ha Iehova, maeke fēfē a koe ke eke mo fakamonuina ke he falu?

²⁰ To fakamonuina mooli e Iehova a koe kaeke ke tumau e fakatata lahi haau ki a ia mo e eketaha ke fekafekau ki a ia. Liga he taute e falu hikihikiaga he fakaholoaga haau po ke puhala moui, to moua e koe e tau magaaho loga ke lagomatai e tau tagata ke fakaako hagaao ke he tau maveheaga ofoofogia he Atua. Liga maeke foki a koe ke lagomatai fakalahi e tau matakainaga haau. Ti manamanatu la ke he lahi mahaki he fakaalofa he tau matakainaga ka kitia e lautolu kua gahua malolō a koe he fakapotopotoaga!

²¹ Pete ni kua fiha e leva ne fekafekau a tautolu ki a Iehova, maeke a tautolu oti ke matutaki ke fakatata lahi ki a ia mo e ke holo ki mua fakaagaaga. He vala tala kahau, to fakatutala a tautolu ke he puhala ka lagomatai e tautolu e falu ke holo ki mua.