1, 2. Ko e ha kua lata ia tautolu ke fakamahani e falu ke taute e tau kotofaaga fakateokarasi?

KUA gahua lahi a Iesu ke fakamatala hagaao ke he Kautu. Lahi foki e magaaho ne fakamahani e ia e tau tutaki haana. Fakakite e ia ki a lautolu e puhala ke fakaako mo e leveki e tau tagata he Atua. Ne fakaako e tau tutaki ke eke mo tau leveki ke takitaki e tau mamoe ha lautolu. (Mataio 10:5-7) Lavelave lahi a Filipi he fakamatala, ka e fakamahani foki e ia e tau tama fifine haana ke taute e gahua taha ia. (Gahua 21:8, 9) He vahā nei kua lata foki a tautolu ke fakamahani e falu. Ko e ha?

² He tau fakapotopotoaga he lalolagi katoa, tokologa a lautolu ne foou kua nakaila papatiso. Ko lautolu nei ne foou kua lata ke fakamahani. Lata a tautolu ke lagomatai a lautolu ke maama e kakano kua mitaki ke totou mo e fakaako ni e lautolu e Tohi Tapu. Ti lata foki a tautolu ke fakamahani a lautolu ke fakamatala mo e fakaako atu e tala mitaki. Ko e tau matakainaga taane ne nakaila leva e papatiso kua lata ke fakamahani ke maeke a lautolu ke eke mo tau fekafekau lagomatai mo e tau motua. Ko lautolu oti he fakapotopotoaga ka lahi e mena ka  taute ke lagomatai a lautolu ne foou.​—Tau Fakatai 4:2.

3, 4. (a) Matutaki fēfē e Paulo e fakaako he tau Tohiaga Tapu mo e fua mitaki he gahua he fonua? (e) Ato fakamalolō e tautolu e tau tagata fakaako ha tautolu ke kumikumi ni e lautolu e Tohi Tapu, ko e heigoa ha tautolu kua lata ke taute?

³ Kua lata e tau fekafekau oti ha Iehova ke totou mo e fakaako e Tohi Tapu ke iloa e finagalo he Atua. Fakamaama he aposetolo ko Paulo e mena nei ke he tau matakainaga haana i Kolose he pehē a ia: “Nakai okioki ai a maua he liogi ma mutolu, . . . kua ole atu foki kua puke a mutolu ke he maama mitaki ke he hana finagalo.” Ko e ha kua aoga lahi ma lautolu ke totou mo e fakaako e tau Tohiaga Tapu? Ha kua foaki ai ki a lautolu e pulotu mo e lagomatai ke maama e puhala ke “mahani . . . ke lata mo e Iki [Iehova], kia fiafia mai a ia . . . ke he tau mena oti.” To lagomatai foki a lautolu ke taute ai e “tau gahua mitaki oti” ne manako a Iehova ke taute e lautolu, mua atu ke fakamatala e tala mitaki. (Kolose 1:9, 10) Ti ka fakaako a tautolu mo e taha tagata, lata a tautolu ke lagomatai a ia ke maama ko e totou mo e fakaako tumau he Tohi Tapu ka lagomatai a ia ke fekafekau ki a Iehova.

⁴ Nakai maeke a tautolu ke lagomatai e tau tagata fakaako Tohi Tapu ha tautolu ke maama e uho he fakaako fakatagata he Tohi Tapu ka nakai fakaako e tautolu e Tohi Tapu. Kaeke ke totou tumau e tautolu e Tohi Tapu mo e manamanatu fakahokulo ki ai, to lagomatai he mena nei a tautolu ke he tau momoui mo e gahua ha tautolu he fonua. Ma e fakatai, ka gahua a tautolu he fonua ti uka e hūhū he taha tagata ki a tautolu, to fakaaoga e tautolu e Tohi Tapu ke tali ai. Po ke ka totou a tautolu ke he puhala ne nakai tiaki e Iesu, Paulo, mo e falu e gahua ha lautolu he fonua, to fakamalolō mo e fakatumau a tautolu ke fakamatala pete ka uka e tuaga. Ti ka tala age e tautolu ke he falu e mena ne iloa he fakaako mo e puhala ne lagomatai ai ki a tautolu, liga atihake foki a lautolu ke fakaako fakahokulo e Tohi Tapu ke maeke a lautolu ke aoga mai ai.

5. Talahau e manatu he puhala ke lagomatai a lautolu ne foou ke fai fakaholoaga he fakaako fakatagata he Tohi Tapu.

⁵ Liga hūhū a koe, ‘Maeke fēfē au ke fakamahani e tagata fakaako haaku ke kumikumi tumau ke he Tohi Tapu?’ Liga fakakite age e koe e puhala ke tauteute e vala tala he tohi kua fakaako e mua. Maeke a koe ke tala age ki a ia ke totou e falu vala tala he apenetiki he tohi Ko e Heigoa ne Fakaako Mooli he Tohi Tapu? mo e kumi e tau kupu Tohi Tapu oti ne  tū ai. Pihia foki, maeke a koe ke fakakite ki a ia e puhala ke tauteute ma e tau feleveiaaga ke fai tali a ia. Fakamalolō a ia ke totou e tau lagaki takitaha he Ko e Kolo Toko mo e Awake! Ti maeke foki a koe ke fakakite age e puhala ke moua e tau tali ke he tau hūhū Tohi Tapu, ma e fakatai he fakaaoga e Watchtower Library po ke Watchtower ONLINE LIBRARY. Ka lali a ia ke taute e tau puhala kehekehe nei he fakaako fakatagata, to liga fiafia a ia mo e manako ke fakaako fakalahi ki ai.

6. (a) Maeke fēfē a koe ke lagomatai e tagata fakaako haau ke feaki e fiafia he loto haana ke he Tohi Tapu? (e) Ko e heigoa ka taute he tagata fakaako he Tohi Tapu kaeke ke feaki e ia he loto haana e fiafia ke he tau Tohiaga Tapu?

⁶ Ka fakaako a tautolu mo e taha tagata, manako a tautolu ke mailoga e ia kua uho e Tohi Tapu ha kua lagomatai a ia ke iloa mitaki a Iehova. He nakai peehi a ia ke fakaako, maeke a tautolu ke fakakite ki a ia e puhala ke fiafia e fakaakoaga. Ko e lahi e kumikumi haana ke he Tohi Tapu, to lahi foki e logonaaga haana tuga he salamo ne lologo: “Ko e mitaki kia au ke fakatata ke he Atua; kua eke e au e Iki ko Iehova mo kolo haku.” (Salamo 73:28) To lagomatai mooli he agaaga ha Iehova e taha tagata ne manako ke fakatata ki a Ia.

7. Fakamahani fēfē e Iesu e tau tagata fakapuloa he tala mitaki? (Kikite fakatino he kamataaga.)

⁷ Maeke a tautolu ke lahi e mena ke fakaako mai he puhala ne fakamahani e Iesu e tau aposetolo haana. Ne uta e Iesu a lautolu mo ia he fano ke fakamatala, ti onoono a lautolu ke he puhala ne fakaako e ia e tau tagata. Tuku age foki e ia e tau fakatonuaga pauaki ke he puhala kua lata a lautolu ke fakamatala. (Mataio, veveheaga 10) ^[1] (Kikite tala he matahiku.) He mogo kū, ne ako he tau aposetolo e puhala mai ia Iesu ke fakaako e kupu mooli ke he tau tagata. (Mataio 11:1) Onoono la a tautolu ke he ua e puhala ka fakamahani e tautolu a lautolu ne foou ka gahua a lautolu he fonua.

8, 9. (a) Matutaki fēfē a Iesu ke he tau tagata takitokotaha he fekafekauaga haana? (e) Maeke fēfē a tautolu ke lagomatai e tau tagata fakailoa foou ke tutala mo e tau tagata tuga ne taute e Iesu?

⁸ Tutala mo e tau tagata. Nakai tutala tumau a Iesu ke he moto tagata. Fa tutala a ia ke he tau tagata takitokotaha, ti fakakapitiga foki a ia ki a lautolu. Ma e fakatai, ne tutala a ia mo e fifine ne hau ke utu vai ne tata ke he maaga ha Sikara. (Ioane 4:5-30) Tutala foki a Iesu mo Mataio Levi ko e tagata oko tukuhau, ti uiina a ia mo tutaki haana. Talia e Mataio ti ko e mogo fakamui ne uiina a Iesu mo e falu ke kai he fale haana. Ne tutala a Iesu mo e tau tagata tokologa he kaiaga.​—Mataio 9:9; Luka 5:27-39.

⁹ Tutala foki a Iesu he puhala totonu ki a Natanielu, pete he vagahau kelea a Natanielu hagaao ke he tau tagata Nasareta. Ha ko e puhala totonu ne vagahau a Iesu ki a Natanielu, ne hiki e logonaaga haana hagaao ki a Iesu mai Nasareta. Ti manako a  Natanielu ke fakaako fakalahi mai ia Iesu. (Ioane 1:46-51) Mai he fakafifitakiaga ha Iesu, fakaako e tautolu ka tutala ke he tau tagata he puhala fakakapitiga mo e totonu, to liga fanogonogo a lautolu ke he mena ne talahau e tautolu. ^[2] [Kikite tala he matahiku.] Ka fakamahani e tautolu a lautolu ne foou ke vagahau he puhala nei, to fiafia a lautolu he gahua ke he fonua.

10-12. (a) Feaki fēfē e Iesu e fiafia he falu ke he tala mitaki? (e) Lagomatai fēfē e tautolu e tau tagata fakailoa foou ke fakaholo ki mua e lotomatala ha lautolu ko e tau faiaoga he kupu mooli he Tohi Tapu?

¹⁰ Fakaako a lautolu ne makai ke fanogonogo. Lavelave lahi a Iesu. Ka ko e mogo ne makai e tau tagata ke fanogonogo ki a ia, ne fakaaoga e ia e magaaho mo lautolu ti fakaako ki a lautolu e tau mena loga. Taha aho ne fakapotopoto e tau tagata ke he mataafaga ke fanogonogo ki a Iesu. Ti nofo a Iesu he foulua mo Peteru mo e fakaako atu ke he tau tagata. Mole ia, manako foki a ia ke fakaako a Peteru. Taute e Iesu e mana ke loga e ika ha Peteru ke moua. Ti tala age a ia ki a Peteru: “Kamata he vaha nai ke moua ai e koe e tau tagata.” Maeke agataha a Peteru mo lautolu ne fakalataha mo ia ke “hiki hake ha lautolu a tau foulua ki uta, ati toka ai e lautolu e tau mena oti” ti mumui ki a Iesu.​—Luka 5:1-11.

¹¹ Manako foki a Nikotemo ke lahi e mena ka fakaako mai ia Iesu. Ka ko Nikotemo ko e taha he Saneheturini ti matakutaku ke he mena ka talahau he falu ka kitia e lautolu a ia ne tutala mo Iesu. Ti fina atu a ia ki a Iesu he pō. Nakai vega e Iesu a ia ka e fakaaoga e magaaho ke fakamaama ki a ia e aoga he tau kupu mooli. (Ioane 3:1, 2) Makai tumau a Iesu ke fakaaoga e magaaho haana ke fakaako e kupu mooli ke he tau tagata mo e atihake e tua ha lautolu. He puhala pihia foki, lata a tautolu ke makai ke aahi atu ke he tau tagata he magaaho kua felauaki mo lautolu, ti lata ke fakaaoga e magaaho ke lagomatai a lautolu ke maama e Tohi Tapu.

¹² Ka gahua a tautolu mo lautolu ne foou he fonua, maeke a tautolu ke fakaako a lautolu ke liliu ke he ha tagata ne tuga kua makai ke liu tutala mo lautolu. Maeke foki a tautolu ke uiina a lautolu ne foou ke ō mo tautolu ke he tau liu aahi atu mo e tau fakaako Tohi Tapu. He taute pihia, to iloa e lautolu e puhala ke fakaako e falu mo e kitia e mitaki ke lagomatai a lautolu ia ke iloa e kupu mooli hagaao ki a Iehova. To fiafia mogoia a lautolu ne foou ke liu aahi atu ke he tau tagata mo e fakaako e Tohi Tapu mo lautolu. To fakaako foki a lautolu ke fakauka mo e ke nakai mafiti ke fiu ka nakai liu moua ha tagata i kaina.​—Kalatia 5:22; kikite puha “ Nakai Fakalolelole a Ia.”

13, 14. (a) Ko e heigoa e manatu haau ke he tau fakafifitakiaga he Tohi Tapu ki a lautolu ne taute e tau foakiaga ke lata mo e falu? (e) He tau puhala fe ka fakamahani e koe e tau tagata fakailoa foou mo lautolu ne ikiiki ke fakakite e fakaalofa ke he ha lautolu a tau matakainaga?

¹³ Manako a Iehova ke he tau fekafekau haana ke fefakaalofaaki tuga e tau matakainaga mo e ke fekafekau fakalataha. (Totou Luka 22:24-27; 1 Peteru 1:22.) Fakamaama he Tohi Tapu na foaki e Iesu e tau mena oti, putoia e moui haana ke lagomatai e falu. (Mataio 20:28) Ko Toreta ne “loga hana tau gahua mitaki mo e tau mena fakaalofa ne eke e ia.” (Gahua 9:36, 39) Ne “gahua fakalahi” a Maria ma e tau matakainaga haana i  Roma. (Roma 16:6) Lagomatai fēfē e tautolu a lautolu ne foou ke maama e aoga lahi he taute e tau mena mitaki ma e tau matakainaga ha lautolu?

¹⁴ Maeke a tautolu ke tala age ki a lautolu ne foou ke ō mo tautolu ke ahiahi a lautolu ne momotua po ke gagao. Ka ahiahi atu e tau matua ki a lautolu ia, maeke a lautolu ke uta e tau fanau mo lautolu kaeke kua latatonu. Maeke he tau motua ke tala age ki a lautolu ne ikiiki po ke foou ke gahua fakalataha mo lautolu kaeke ke uta e tau mena kai ma lautolu ne momotua po ke fakafoou e tau kaina ha lautolu. Ka kitia e lautolu ne ikiiki mo lautolu ne foou e puhala kua leveki he taha matakainaga e taha, to iloa e lautolu ke taute pihia foki. Ma e fakatai, he fakamatala he maaga tua, taha e motua ne ahiahi tumau ke he tau matakainaga ne nonofo ai ke fakakia a lautolu. Ko e matakainaga taane fuata ne fa ō mo ia ne ako mai he fakafifitakiaga mitaki he motua nei ke manamanatu ke he mena ka taute e ia ke lagomatai e tau matakainaga haana.​—Roma 12:10.

15. Ko e ha kua aoga lahi he tau motua ke hagaaki ke he holo ki mua he tau tagata taane he fakapotopotoaga?

¹⁵ Foaki e Iehova ke he tau tagata taane e matagahua ke fakaako e Kupu he Atua ke he fakapotopotoaga. Ti aoga lahi ma e tau matakainaga taane ke iloa e puhala ke fakaako fakamitaki ka lauga a lautolu. Kaeke ko e motua a koe, maeke a koe ke fanogonogo ke he fekafekau lagomatai ka fakamahani e lauga haana ti lagomatai a ia ke holo ki mua. (Nehemia 8:8) ^[3]​—Kikite tala he matahiku.

16, 17. (a) Ko e heigoa ne kitia tonu e Paulo ke he holo ki mua ha Timoteo? (e) Fakamahani fakamitaki fēfē he tau motua e tau leveki he tau mogo i mua he fakapotopotoaga?

¹⁶ Lata ke fakamahani e falu matakainaga taane foki ke eke mo tau leveki he fakapotopotoaga. Fakamahani e Paulo a Timoteo ti fakamafana ki a ia ke fakamahani e falu. Pehē a Paulo: “Kia fakamalolo he Iki a koe ke he fakaalofa noa ha ia Keriso Iesu. Ko e tau mena foki ne fanogonogo mai a koe kia au mo e tau talahau tokologa, kia tuku age e koe ke he tau tagata fakamoli, kua maeke ni ke fakaako atu ke he falu.” (2 Timoteo 2:1, 2) Loga e mena ne fakaako e Timoteo mai ia Paulo ko e motua mo e aposetolo, tuga e fakaholo ki mua haana a fakamatala mo e ke lagomatai e falu he fakapotopotoaga.​—2 Timoteo 3:10-12.

¹⁷ Lahi e magaaho ne fakaaoga e Paulo mo Timoteo ha kua manako a ia ke kitia  tonu kua fakamahani fakamitaki a Timoteo. (Gahua 16:1-5) Maeke he tau motua ke fifitaki a Paulo he uta e tau fekafekau lagomatai kua lata mo lautolu ke he falu he tau ahiahi leveki ha lautolu. He puhala nei, to fakaako he tau fekafekau lagomatai mai he tau motua e puhala ke fakaako e falu, ke fakauka mo e fakaalofa, mo e ke falanaki ki a Iehova ka leveki e fuifui Haana.​—1 Peteru 5:2.

18. Kua lata he ha e fakamahani he falu he gahua ha Iehova kua uho lahi ki a tautolu?

¹⁸ He vahā nei he fakaotiaga, tokologa a lautolu ne foou kua lata ke fakamahani ke holo ki mua e tau lotomatala ha lautolu ke he gahua fakamatala. Lata foki he tau matakainaga taane ke iloa ke leveki e fakapotopotoaga. Manako a Iehova ke fakamahani fakamitaki e tau fekafekau oti haana, ti kua tuku mai e ia e kotofaaga ke lagomatai a lautolu ne foou lahi. Kua uho lahi ke eketaha ke fakamahani e falu tuga ne taute e Iesu mo Paulo. Lata a tautolu ke fakamahani e tokologa ha kua lahi agaia e gahua fakamatala ke taute ato hoko mai e fakaotiaga.

19. Ko e ha kua lata a koe ke talitonu to kautū e tau laliaga haau ke fakamahani e falu he fekafekauaga ha Iehova?

¹⁹ Eketaha mo e gahua fakalahi ke fakamahani a lautolu ne foou. Maeke a tautolu ke talitonu to lagomatai e Iehova mo Iesu a tautolu ke iloa ke fakamahani e falu ke he puhala mitaki lahi. To fiafia a tautolu ke kitia a lautolu kua fakamahani e tautolu hane gahua fakamalolō he fakapotopotoaga po ke gahua fakamatala. (1 Timoteo 4:10) He magaaho taha, lata a tautolu ke eketaha tumau ke holo ki mua fakaagaaga, holo ki mua e tau mahani faka-Kerisiano, mo e fakatata lahi ki a Iehova.