1, 2. (a) Iloa fēfē e tautolu kua maeke a tautolu ke fakatapulu ke he tagata foou? (e) Ko e heigoa e tau mahani he tagata foou ne fakaako e tautolu ia Kolose 3:10-14?

I LOTO he New World Translation of the Holy Scriptures, ne lagaua e moua e tautolu e talahauaga “tagata fou.” (Efeso 4:24; Kolose 3:10) Hagaao e mena nei ke he aga “kua eke ke lata mo e Atua.” Maeke nakai a tautolu ke fakatapulu ke he tagata foou? Ē. Tufuga e Iehova e tau tagata ke he haana fakatai ti maeke a tautolu ke fifitaki e tau mahani mitaki haana.​—Kenese 1:26, 27; Efeso 5:1.

² Mooli kua moua e tautolu e nakai mitaki katoatoa, ti hehē e tau manako ha tautolu oti he falu magaaho. Lauia foki a tautolu ha ko e takatakaiaga ha tautolu. Ka ko e lagomatai fakaalofa noa ha Iehova ati maeke a tautolu ke eke mo tau tagata ne manako a ia ki ai. Ke lagomatai a tautolu ke eketaha ke taute e mena nei, kia fakatutala a tautolu ke he falu mahani he vala he tagata foou. (Totou Kolose 3:10-14.) To kitekite a tautolu  ke he puhala ka fakakite e tautolu e tau mahani nei he ha tautolu a gahua he fonua.

3. Ko e heigoa taha mahani he tagata foou?

³ Fakamaama e Paulo ko e nakai fili tagata ko e vala aoga lahi he tagata foou. Pehē a ia: “Kua nakai ha i ai e tagata Heleni, po ke Iutaia, ko e peritome, po ke nakai peritome, ko e tagata he motu kehe po ke tagata Sakutia, ko e tupa, po ke toka noa.” * (Kikite matahui tala.) He fakapotopotoaga, nakai fai tagata kua lata ke logona hifo kua mahomo hake a ia ke he falu ha ko e haana lanu, motu, po ke tuaga he matakavi. Ko e ha? Ha ko e tau tutaki he Keriso, kua “taha maka ni a [tautolu] oti.”​—Kolose 3:11; Kalatia 3:28.

4. (a) Kua lata ke taute fēfē he tau fekafekau ha Iehova e falu? (e) Ko e heigoa e tuaga ka paleko ke he kaufakalatahaaga faka-Kerisiano?

⁴ Ka fakatapulu a tautolu ke he tagata foou, to fakalilifu e tautolu e tau tagata oti, pete ne lanu po ke feakiaga ha lautolu. (Roma 2:11) He falu faahi he lalolagi, fa uka pauaki e mena nei. Ma e fakatai, he mogo kua mole i Aferika Toga, ne fakatoka kehe pauaki he fakatufono e tau matakavi ke nonofo ai e tau tagata lanu kehekehe. Laulahi he tau tagata he motu ia, ne putoia foki e Tau Fakamoli ne nonofo agaia he tau matakavi ia. Ko e Kau Fakatufono ne manako ke fakamalolō e tau matakainaga ha tautolu ke ‘fakalahi atu e tau loto.’ Ia Oketopa 2013, ne talia e lautolu e fakaholoaga pauaki ka lagomatai e tau matakainaga he tau lanu kehekehe ke feiloaaki lahi.​—2 Korinito 6:13.

5, 6. (a) Ko e heigoa e tau fakatokaaga ne taute he taha motu ke lagomatai e tau tagata he Atua ke kaufakalataha? (Kikite fakatino he kamataaga.) (e) Ko e heigoa e fua?

⁵ Ne taute he tau matakainaga taane e tau fakaholoaga ke maeke e Tau Fakamoli mai he ua e fakapotopotoaga he tau vagahau po ke tau lanu kehekehe ke fakalataha auloa he falu matahiku faahi tapu. Ko e tau matakainaga he tau fakapotopotoaga ne ua ne fakalataha ke fakamatala, ō auloa ke he tau feleveiaaga, mo e ahiahi ke he tau kaina ha lautolu. Totou teau e tau fakapotopotoaga ne fakalataha ke he fakaholoaga nei ti loga e hokotaki mitaki ne moua he la ofisa. Nava lahi e falu ne nakai ko e Tau Fakamoli. Ma e fakatai, taha e akoako ne pehē: “Nakai ko e Fakamoli au ka e talahau e au kua mitaki lahi mahaki e fakatokaaga ha mutolu ke he gahua fakamatala, mo e moua foki e mutolu e kaufakalatahaaga ke he tau lanu kehekehe.” Fēfē e logonaaga he tau matakainaga ke he fakaholoaga nei?

⁶ Fakamua, ko e matakainaga fifine ne higoa ko Noma ne vagahau Xhosa ne hopoate lahi ke uiina e Tau Fakamoli mai he fakapotopotoaga vagahau Palagi ke he kaina nakai monuina haana. Ka e mole e fakamatala mo e Tau Fakamoli palagi ti ahiahi ke he tau kaina ha lautolu ne nakai fuafuakelea e logonaaga haana. Pehē a ia: “Ko lautolu kua tuga na tautolu!” Ti ka o mai e tau matakainaga he fakapotopotoaga vagahau Palagi  ke fakamatala mo e fakapotopotoaga vagahau Xhosa, ne uiina e Noma e falu ha lautolu ke kai he kaina haana. Nava lahi a ia he mailoga ko e taha ia lautolu ne hau ko e motua palagi ne fiafia ke nofo he puha palasetiki tokolalo. Fakaaue ke he fakaholoaga nei ha kua tokologa e matakainaga ne moua e tau kapitiga foou mo e matutaki ke iloa a lautolu mai he falu feakiaga kehekehe.

7. Ko e ha kua lata tumau a tautolu ke fakakite e fakaalofa hofihofi?

⁷ Ato fakaoti e lalolagi ha Satani, to moua he tau tagata ha Iehova e tau kamatamata. Ko e nakai fai gahua, tau gagao hagahagakelea, favaleaga, tau mena tutupu pauaki, galo e tau koloa ha ko e kolokolovao, po ke falu tuaga uka ne lauia a tautolu oti. Ke lagomatai e falu he tau magaaho kamatamata, kua lata a tautolu ke fakaalofa hofihofi noa mooli. Ko e fakaalofa hofihofi ka fakalagalaga a tautolu ke taute e falu ke he puhala totonu. (Efeso 4:32) Ko e tau mahani nei ko e vala he tagata foou. To lagomatai ai a tautolu ke fifitaki e Atua mo e fakamafana e falu.​—2 Korinito 1:3, 4.

8. Ko e heigoa e tau mena mitaki ka tupu ka fakaalofa hofihofi mo e totonu a tautolu ke he tau tagata oti he fakapotopotoaga? Talahau e fakatai.

⁸ Fakakite fēfē e tautolu e totonu lahi ki a lautolu he fakapotopotoaga ne hiki mai he taha motu po kua nakai monuina? Manako a tautolu ke fakafeleveia ki a lautolu, eke mo tau kapitiga ha lautolu, ti lagomatai ki a lautolu ke mailoga kua manako a tautolu ke haia a lautolu he fakapotopotoaga. (1 Korinito 12:22, 25) Ma e fakatai, ne hiki a Dannykarl mai i Filipaina ki Sapanī. Ha ko e tagata motu kehe a ia, nakai taute fakamitaki a ia tuga e falu tagata gahua he gahuaaga haana. Ati fano a ia ke he feleveiaaga he Tau Fakamoli a Iehova. Pehē a Dannykarl: “Teitei ni ko e tau Sapanī e tau tagata oti he toloaga ka e fakafeleveia mafanatia e lautolu au ke tuga ko lautolu ko e tau kapitiga tuai haaku.” Ko e totonu he tau matakainaga ne matutaki ke lagomatai a ia ke fakatata ki a Iehova. Fai magaaho ti papatiso a Dannykarl, kua eke a ia mogonei mo motua. Ko e falu motua foki kua fiafia ha ko ia mo e hoana haana ko Jennifer ko e vala he fakapotopotoaga, kua pehē: “Moui mukamuka a laua ko e tau paionia ti fakatoka e fakafifitakiaga mitaki he tuku fakamua e Kautu.”​—Luka 12:31.

9, 10. Talahau e tau fakataiaga he tau fua mitaki ne moua mai ka fakakite e tautolu e fakaalofa hofihofi he gahua ke he fonua.

⁹ Moua e tautolu e magaaho ke taute e “mahani mitaki . . . ke he tau tagata oti kana” ka fakamatala e tautolu e tala mitaki he Kautu. (Kalatia 6:10) Tokologa e Tau Fakamoli ne logona e fakaalofa hofihofi ma e tau tagata ne hiki mai he taha motu, ti lali ke fakaako e vagahau ha lautolu. (1 Korinito 9:23) Ne fua mitaki e tau laliaga ha lautolu. Ma e fakatai, ko e matakainaga fifine paionia i Ausetalia ne higoa ko Tiffany ne fakaako e vagahau Swahili ke lagomatai e fakapotopotoaga vagahau Swahili he taone ko Brisbane. Pete kua uka ke fakaako e vagahau, ka e fai aoga mooli e moui haana. Pehē a Tiffany: “Ka manako a koe ke gahua he taha matakavi kehe, ko e fekafekau he fakapotopotoaga vagahau kehe kua lata mo koe. Tuga ko e fano fenoga ka e nakai toka e taone haau. Moua e koe e fiafia he tau matakainaga ha tautolu he lalolagi katoa mo e  kitia ni e koe e kaufakalatahaaga ofoofogia.”

¹⁰ Ko e magafaoa i Sapanī ne fai mena pihia foki ne taute. Ko Sakiko ko e tama fifine ne pehē: “Fa feleveia e mautolu e tau tagata ne o mai i Brazil he gahua he fonua. Ka fakakite age e mautolu e kupu tohi mai he Tohi Tapu Portuguese, tuga e Fakakiteaga 21:3, 4 po ke Salamo 37:10, 11, 29 ne fanogonogo a lautolu ti mokulu e tau hihina mata he falu mogo.” Logona hifo he magafaoa e fakaalofa hofihofi ma e tau tagata nei ne hiki mai ke he motu ti manako ke lagomatai a lautolu ke fakaako e kupu mooli, ne kamata e magafaoa ha lautolu ke fakaako e vagahau Portuguese. Fakamui, ne lagomatai he magafaoa ke kamata e fakapotopotoaga vagahau Portuguese. He tau tau kua mole, ne lagomatai e lautolu e tau tagata tokologa ne hiki mai ke he motu ke eke mo tau fekafekau ha Iehova. Pehē a Sakiko: “Ko e gahua lahi ke fakaako e vagahau Portuguese ka e loga lahi e tau monuina he tau laliaga. Fakaaue lahi a mautolu ki a Iehova.”​—Totou Gahua 10:34, 35.

11, 12. (a) Ko e ha kua lata a tautolu ke moua e fatuakiloto hako ke fakatapulu ke he tagata foou? (e) Ko e heigoa ka lagomatai a tautolu ke fakatumau e loto fakatokolalo?

¹¹ Ko e fatuakiloto ha tautolu he fakatapulu ke he tagata foou ke tuku atu e lilifu ki a Iehova, ka e nakai ke moua e fakahekeaga mai he falu. Manatu na fakatokoluga ti agahala foki e agelu mitaki katoatoa. (Fakatatai Esekielu 28:17.) Nakai mitaki katoatoa a tautolu ti kua mua atu e uka ma tautolu ke kalo kehe mai he fakatokoluga. Maeke agaia a tautolu ke fakatapulu ke he loto fakatokolalo. Ko e heigoa ka lagomatai a tautolu ke taute e mena nei?

¹² Taha mena ka lagomatai a tautolu ke loto fakatokolalo ko e totou e Kupu he Atua he tau aho takitaha mo e manamanatu fakahokulo ke he mena ne totou e tautolu. (Teutaronome 17:18-20) Kua lata pauaki a tautolu ke manamanatu fakahokulo ke he mena ne fakaako e Iesu ki a tautolu mo e fakafifitakiaga homo ue atu haana he loto fakatokolalo. (Mataio 20:28) Kua loto fakatokolalo a Iesu he holoholo e tau hui he tau aposetolo haana. (Ioane 13:12-17) Taha mena foki ka taute e tautolu ko e liogi ki a Iehova ma e agaaga haana. Ko e agaaga  haana ka lagomatai a tautolu ke totoko ha logonaaga kua mua hake a tautolu ke he falu.​—Kalatia 6:3, 4; Filipi 2:3.

13. Ko e heigoa e tau palepale he loto fakatokolalo?

¹³ Totou Tau Fakatai 22:4. Manako a Iehova ki a tautolu ke loto fakatokolalo. Loga e palepale ha ko e loto fakatokolalo. Ka loto fakatokolalo a tautolu to lahi e mafola mo e kaufakalataha he fakapotopotoaga. To foaki mai foki e Iehova ki a tautolu e fakaalofa noa haana. Pehē e aposetolo ko Peteru: “Kia fakatapulu a mutolu ke he loto holoilalo; nukua, totoko he Atua ke he tau tagata fakatokoluga, ka e foaki mai e fakaalofa noa kia lautolu kua holoilalo.”​—1 Peteru 5:5.

14. Ko hai e fakafifitakiaga mitaki lahi mahaki he mahani molū mo e fakauka?

¹⁴ He lalolagi mogonei, ka mahani molū mo e fakauka e tagata kua fa manamanatu e falu kua lolelole e tagata ia. Ka e nakai mooli e mena nei. Ko e tau mahani mitaki nei ne mai ia Iehova ko e Atua malolō ue atu he lagi mo e lalolagi. Ko e fakafifitakiaga mitaki lahi mahaki a ia he mahani molū mo e fakauka. (2 Peteru 3:9) Ma e fakatai, manamanatu ke he fakauka ha Iehova he magaaho ne tali atu ki a Aperahamo mo Lota he puhala he tau agelu Haana. (Kenese 18:22-33; 19:18-21) Ti manamanatu ke he fakauka ha Iehova he nakai omaoma e motu ko Isaraela ke molea 1,500 e tau.​—Esekielu 33:11.

15. Ko e heigoa e fakafifitakiaga ne fakatoka e Iesu he fakakite e mahani molū mo e fakauka?

¹⁵ Ne “totonu” a Iesu. (Mataio 11:29) Lahi e fakauka haana ke he tau kūkū he tau tutaki haana. He fekafekauaga ha Iesu he lalolagi, ne fa ekefakakelea mo e tukupau ki a ia. Ka ko ia kua mahani molū mo e fakauka ke hoko ke he mate. Magaaho ne mamahi lahi mahaki a Iesu he akau fakatautau, ne ole a ia ke he Matua haana ke fakamagalo e tau tagata ne tamate a ia. Pehē a ia: “Kua nakai iloa e lautolu e mena kua eke e lautolu.” (Luka 23:34) Pete he pehia po ke mamahi lahi a Iesu, ne fakatumau a ia ke mahani molū mo e fakauka.​—Totou 1 Peteru 2:21-23.

16. Fakakite fēfē e tautolu e mahani molū mo e fakauka?

¹⁶ Talahau e Paulo taha puhala ka fakakite e tautolu e mahani molū mo e fakauka he tohi e ia: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a Keriso kia mutolu, kia pihia foki a mutolu.” (Kolose 3:13) Ke fakamagalo e falu, lata a tautolu ke mahani molū mo e fakauka. To fakaholo ki mua mo e fakatumau he mena nei e kaufakalataha he fakapotopotoaga.

17. Ko e ha kua aoga e mahani molū mo e fakauka?

¹⁷ Manako a Iehova ki a tautolu ke mahani molū mo e fakauka ke he falu. Kua latatonu e tau mahani nei ka manako a tautolu ke momoui he lalolagi foou haana. (Mataio 5:5; Iakopo 1:21) Ka mahani molū mo e fakauka a tautolu, tuku atu e tautolu e lilifu ki a Iehova mo e lagomatai e falu ke taute pihia.​—Kalatia 6:1; 2 Timoteo 2:24, 25.

18. Matutaki fēfē e fakaalofa mo e nakai fili tagata?

¹⁸ Ko e tau mahani ne fakatutala a tautolu ki ai kua matutaki oti ke he fakaalofa. Ma e fakatai, ne fakatonu he tutaki ko Iakopo e tau matakainaga haana ha kua taute e lautolu e tau tagata monuina ke mahomo hake ia lautolu ne nonofogati. Fakamaama e ia kua totoko e mena nei ke he poakiaga he Atua ke “fakaalofa atu a koe ke he tagata kua katofia mo koe, tuga hau a fakaalofa kia koe ni.” Lafi foki e ia: “Kaeke kua fakamailoga tagata e mutolu, kua hala tuai a mutolu.” (Iakopo 2:8, 9) Ka fakaalofa a tautolu ke he tau tagata, to nakai onoono hifo a tautolu ke he ha tagata ha ko e haana fakaakoaga, lanu, po ke tuaga. Nakai lata a tautolu ke tuga ko e taute noa ni he nakai fili tagata. Kua lata e nakai fili tagata ke eke mo vala mooli he tau momoui ha tautolu.

19. Ko e ha kua aoga ke fakatapulu a tautolu ke he fakaalofa?

¹⁹ Pihia foki, “kua fakauka e fakaalofa, to totonu,” mo e “nakai fakatokoluga.” (1 Korinito 13:4) Lata a tautolu ke fakauka, totonu, mo e loto fakatokolalo ke matutaki ke fakamatala e tala mitaki ke he tau katofia ha tautolu. (Mataio 28:19) Ko e tau mahani nei kua fakamukamuka foki ke femataaki mo e tau matakainaga oti ha tautolu he fakapotopotoaga. Ka fakakite e tautolu oti e fakaalofa pihia, to kaufakalataha mo e fakaheke he tau fakapotopotoaga ha tautolu a Iehova. To kitia he falu e kaufakalataha nei mo e to futiaki mai ke he kupu mooli. Kua latatonu e talahauaga he Tohi Tapu ke he tagata foou ne fakahiku aki: “Ka e ha i luga he tau mena oti ia e fakaalofa ko e pipi haia ke fakamaopoopo ai.”​—Kolose 3:14.

20. (a) Ko e heigoa e tau hūhū kua lata a tautolu ke hūhū hifo? Ko e ha? (e) Ko e heigoa e vahā homo ue atu anoiha ka amaamanaki a tautolu ki ai?

²⁰ Kua lata a tautolu oti ke hūhū hifo, ‘Ko e heigoa e tau hikiaga kua lata agaia au ke taute ke tuku kehe mo e fakamamao mai he tagata tuai?’ Lata a tautolu ke liogi ki a Iehova mo e olelalo ki a ia ke lagomatai a tautolu. Latatonu a tautolu ke eketaha ke hiki e tau manatu po ke tau mahani hepehepe ha tautolu ke maeke ke “eke ma [tautolu] e kautu he Atua.” (Kalatia 5:19-21) Ti lata foki a tautolu ke hūhū hifo, ‘Matutaki nakai au ke hiki e puhala manamanatu haaku ke fakafiafia a Iehova?’ (Efeso 4:23, 24) Nakai mitaki katoatoa a tautolu ti kua lata a tautolu ke tumau ke gahua malolō ke fakatapulu mo e fakatumau ke he tagata foou. Ko e matagahua nakai oti anei. Ko e moui homo ue atu mooli ka momoui oti e tau tagata ne fakatapulu ke he tagata foou mo e fifitaki e tau mahani mitaki katoatoa ha Iehova!