KUA omoomoi e Iehova e aposetolo ko Paulo ke tohi hagaao ke he hiva e fua ne moua mai he gahuaaga he agaaga tapu. (Kalatia 5:22, 23) Ko e tau fua mitaki oti nei ne fakahigoa “ko e fua he Agaga.” * (Kikite matahui tala.) Ko e fua nei ko e vala he “tagata fou” kua lata e tau Kerisiano ke tapulu ai. (Kolose 3:10) Tuga ni e akau ka fua mai he fakamalū fakamitaki, to moua he tagata e tau fua mitaki nei ka gahuahua e agaaga tapu he moui haana.​—Salamo 1:1-3.

Ko e fua fakamua ne tohi e Paulo ko e fakaalofa. Uho fēfē e fua nei? Pehē a Paulo ka nakai fai fakaalofa, ko e “mena noa ni” a ia. (1 Korinito 13:2) Ka ko e heigoa e fakaalofa, ti maeke fēfē a tautolu ke feaki ai mo e fakakite ai he tau aho takitaha?

Pete kua uka lahi ke fakamaama e fakaalofa, fakamaama he Tohi Tapu e puhala kua manamanatu mo e gahua e tagata fakaalofa. Ma e fakatai, ko e tagata fakaalofa kua ‘fakauka mo e totonu’ ti “fiafia ni mo e kupu moli.” Ka fai fakaalofa e tagata, kua “fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti.” Ha ha ia ia e fakaalofa hokulo ma e falu, leveki mooli a ia ki a lautolu, mo e kapitiga fakamooli a ia. Ka nakai fai fakaalofa e tagata, kua mahekeheke, fakatokoluga, hemu, lotokai, mo e nakai fakamagalo a ia. He nakai fakakite e tau mahani kelea pihia, manako a tautolu ke fakakite e fakaalofa mooli ma e falu, ko e fakaalofa ne “nakai kumi e ia hana tau mena.”​—1 Korinito 13:4-8.

“Ko e Atua ko e fakaalofa a ia.” (1 Ioane 4:8) Ko e tau gahua mo e tau mahani oti haana ne fakamooli e mena ia. Ti ko e fakaalofa mua ue atu haana ke he tau tagata he fakafano mai a Iesu ke he lalolagi ke matematekelea mo e mate ma tautolu. Pehē e aposetolo ko Ioane: “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia. Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu; ne fakafano mai foki e ia hana Tama ko e lukutoto mo e tau hala ha tautolu.” (1 Ioane 4:9, 10) Ha ko e fakaalofa he Atua, ne fakamagalo ai e tau agahala ha tautolu ti maeke ai ke moua e amaamanakiaga mo e moui.

Fakakite e Iesu kua fakaalofa a ia ke he tau tagata he foaki e moui haana ke taute e finagalo he Atua. Tala mai e aposetolo ko Paulo ki a tautolu: “Ko e finagalo haia kua fakatapu ai a tautolu ke he tino a Iesu Keriso kua eke mo poa laga taha ni.” (Heperu 10:9, 10) Nakai fai tagata kua maeke ke fakakite e fakaalofa ne lahi mahaki. Pehē a Iesu: “Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki hana tau kapitiga.” (Ioane 15:13) Maeke nakai he tau tagata nakai mitaki katoatoa ke fifitaki e fakaalofa ha Iehova  mo Iesu ne fakakite? Ē! Kia fakatutala a tautolu ke he puhala ka taute pihia.

Fakamalolō e Paulo a tautolu: “Kia fifitaki a mutolu ke he Atua tuga e tau fanau fakahelehele. Kia mahani a mutolu mo e fakaalofa, tuga ne fakaalofa mai a Keriso kia tautolu, mo e foaki e ia a ia ma tautolu.” (Efeso 5:1, 2) Ko e heigoa e kakano ke “mahani a mutolu mo e fakaalofa”? Kakano ai ke fakakite e fakaalofa he tau magaaho oti. Nakai ni talahau e tautolu kua fakaalofa a tautolu ke he falu. Fakakite ai e tautolu ke he tau mena ne taute e tautolu. Tohi e Ioane: “Haku fanau ikiiki na e, aua neke fakaalofa a tautolu ke he kupu po ke alelo, ka ko e mahani mo e fakamoli.” (1 Ioane 3:18) Ma e fakatai, fakamatala e tautolu e “tala mitaki nai he kautu” ha kua fakaalofa a tautolu ki a Iehova mo e katofia ha tautolu. (Mataio 24:14; Luka 10:27) Maeke foki a tautolu ke ‘mahani fakaalofa’ ka fakauka, totonu, mo e fakamagalo atu. Fakagahua e tautolu e fakatonuaga he Tohi Tapu: “Tuga ne fakamagalo mai a [“Iehova,” NW] kia mutolu, kia pihia foki a mutolu.”​—Kolose 3:13.

Ka fakatonu po ke fakahako e tautolu e falu, nakai kakano ai kua nakai fakaalofa a tautolu. Ma e fakatai, ke nā e tagi he tama, kua fa mahani e falu matua ke taute e tau mena ne manako e tama ki ai. Ka ko e matua ne fakaalofa mooli ke he tama haana to mauokafua kaeke kua lata. Puhala pihia foki, pete kua fakaalofa e Atua, “ko ia kua ofania [e Iehova] kua akonaki atu a ia kia ia.” (Heperu 12:6) Ti ko e fakaalofa ke foaki e akonaki kua latatonu kaeke kua lata. (Tau Fakatai 3:11, 12) Ka e manatu, agahala oti a tautolu ti fa kaumahala ke fakakite e fakaalofa. Maeke a tautolu oti ke holo ki mua he fakakite e fakaalofa. Taute fēfē e tautolu e mena nei? Kia fakatutala la ke he tolu e puhala.

Fakamua, ole ke he Atua ke foaki ki a koe e agaaga tapu haana ne moua mai e fakaalofa. Pehē a Iesu ko Iehova ne “foaki mai e Agaga Tapu kia lautolu ka ole atu ai kia ia.” (Luka 11:13) Ti talitonu a tautolu kaeke ke liogi ma e agaaga tapu mo e fakaatā ai ke lagomatai a tautolu, to lahi atu e fakaalofa ha tautolu. (Kalatia 5:16) Ma e fakatai, kaeke ko koe e motua, maeke a koe ke ole ma e agaaga tapu ke lagomatai a koe ke fakaalofa ka lata a koe ke fakatonu e falu mai he Tohi Tapu. Po ke ko koe e matua, maeke a koe ke ole ke he agaaga he Atua ke lagomatai a koe ke akonaki e fanau haau he puhala fakaalofa ka e nakai ita.

Uaaki, manamanatu fakahokulo ke he puhala ne fakakite e Iesu e fakaalofa pete he ekefakakelea he falu a ia. (1 Peteru 2:21, 23) Ka fakaita he taha a koe po ke lauia a koe he nakai fakafili tonu, hūhū hifo, ‘Ko e heigoa ka taute e Iesu?’ Ko e matakainaga fifine ne higoa ko Leigh ne hūhū hifo e hūhū ia kua lagomatai a ia ke manamanatu to taute taha mena. Pehē a ia: “Taha mogo ne fakafano he tagata gahua e meli hila ke he tau tagata gahua haaku hagaao ke he tau tala kelea ki a au mo e gahua ne taute e au. Hukia lahi mahaki e loto haaku. Ka e hūhū hifo au, ‘Fifitaki fēfē e au a Iesu he fehagai mo e tagata nei?’ Mole e manamanatu ke he mena ka taute e Iesu, ne fifili au ke tiaki noa mo e nakai manamanatu lahi ke he mena ia. Fakamui, ne iloa e au ko e tagata ne gahua mo au ne fehagai mo e lekua malolō tino ti kua lahi e tupetupe. Fakahiku ai e au kua liga nakai fai kakano mooli e tau mena ne tohi e ia. He manamanatu ke he fifitakiaga ha Iesu he fakakite e fakaalofa pihia foki he mogo ka fakaita, kua lagomatai au ke fakakite e fakaalofa pihia ke he tagata ne gahua mo au.” Ka fifitaki e tautolu a Iesu to fakakite tumau e tautolu e fakaalofa ke he falu.

Toluaki, fakaako ke fakakite e fakaalofa foaki noa. Ko e fakaalofa anei ne fakakite e tau tutaki mooli ha Iesu. (Ioane 13:34, 35) Ha ha ia Iesu e fakaalofa nei ti fakatoka e ia e fifitakiaga mitaki katoatoa ma tautolu. Puhala fe? He toka e lagi, “kua fakatokolalo e ia a ia” ke lata mo tautolu ati “hoko ke he mate.” (Filipi 2:5-8) Ka fifitaki a tautolu ke he fakaalofa foaki noa ha Iesu, to eke e tau manatu mo e tau logonaaga ha tautolu ke  tuga haana, mo e to tuku fakamua e tautolu e tau manako he falu ke he ha tautolu.

Loga e aoga he fakakite e fakaalofa. Kia fakatutala a tautolu ke he ua e fakataiaga:

• TAU MATAKAINAGA HE LALOLAGI KATOA: Ha ko e fakaalofa ha tautolu ke he taha mo e taha, iloa e tautolu ko e tau matakainaga he ha fakapotopotoaga ka ahiahi a tautolu ki ai he lalolagi katoa to fakafeleveia mafanatia a tautolu. Ko e fakamonuinaaga ke iloa kua ofania a koe he “tau matakainaga . . . he lalolagi”! (1 Peteru 5:9) Moua ni e tautolu e fakaalofa pihia mai he tau tagata he Atua.

• MAFOLA: Ko e “fakauka . . . ko e taha ke he taha mo e fakaalofa” kua fakaatā a tautolu ke fiafia e “pipiaga he mafola.” (Efeso 4:2, 3) Moua e tautolu e mafola nei he ha tautolu a tau feleveiaaga, tau toloaga, mo e tau fonoaga. Nakai kia talia e koe ko e aga mafola pihia kua mua ue atu mooli ke he lalolagi mavehevehe nei? (Salamo 119:165; Isaia 54:13) Ka tutuli e tautolu e mafola mo e falu, fakakite e tautolu kua fakaalofa mooli a tautolu ki a lautolu ti fakafiafia he mena nei ha tautolu a Matua he lagi.​—Salamo 133:1-3; Mataio 5:9.

Tohi e Paulo: “Kua fakamafana e fakaalofa.” (1 Korinito 8:1) Ko e heigoa e kakano he mena ia? He 1 Korinito veveheaga 13, ne fakahigoa he falu ko e “Salamo he Fakaalofa,” ne fakamaama e ia e puhala ne fakamafana e fakaalofa. Kumi he fakaalofa e mitaki he falu tagata. Leveki he fakaalofa e tau manako he falu. (1 Korinito 10:24; 13:5) Ha kua manamanatu, maama, fakauka, mo e totonu, kua atihake e tau magafaoa fakahelehele mo e pipi fakalataha e tau fakapotopotoaga.​—Kolose 3:14.

Loga e puhala ke fakakite e fakaalofa ke he falu, ka ko e fakaalofa ha tautolu ke he Atua ko e fakaalofa ne mua e uho mo e atihake. Ko e ha? Ha ko e fakaalofa ha tautolu ki a ia kua pipi fakalataha a tautolu! Ko e tau tagata mai he tau feakiaga, tau lanu, mo e tau vagahau oti kua tapuaki auloa ki a Iehova, he fekafekau “loto fakalataha” ki a ia. (Sefanaia 3:9) Kia eketaha a tautolu ke fakakite e fua uho nei he agaaga tapu he Atua he tau aho takitaha.