1, 2. Ko e heigoa ne mailoga he tau tagata hagaao ke he Tau Fakamoli a Iehova?

TOKOLOGA e tagata ne mailoga kua matakehe lahi e Tau Fakamoli a Iehova. Ma e fakatai, ko e tagata tohia ko Anton Gill ne nava ke he tau mahani he Tau Fakamoli he Nazi i Sihamani. Tohi e ia: “Futiaki he Tau Fakamoli a Iehova e faitaua pauaki he tau Nazi. . . . He 1939, toko 6,000 ia lautolu he [tau kemuaga pagotā].” Lafi e ia pete ni kua fehagai e Tau Fakamoli mo e tau matematekelea lahi mahaki, ne talahaua a lautolu ha ko e mahani falanaki, totoka i lalo he tau pehiaaga, fakamooli ke he ha lautolu a Atua, mo e kaufakalataha.

² Nakaila leva, mailoga foki he tau tagata i Aferika Toga e mena matakehe lahi hagaao ke he Tau Fakamoli a Iehova. He taha magaaho, ko e Tau Fakamoli ne kehekehe e tau lanu ne haia he motu ia ne nakai fakaatā ke feleveia auloa. Ka e, he Aho Tapu ia Tesemo 18, 2011, ne molea 78,000 he Tau Fakamoli a Iehova ne kehekehe e tau lanu mai i Aferika Toga mo e tau  motu tata mai kua fakapotopoto ma e fakaholoaga pauaki he malē lahi mahaki i Johannesburg. Taha he tau takitaki he malē ia ne pehē: “Ko e toloaga ne mua atu e mahani mitaki anei he kitiaaga haaku. Kua maopoopo e tau tauteuteaga ha lautolu oti. Ti fakameā fakamitaki e mutolu e malē. Ka e mua atu ai, o mai a mutolu he tau motu kehekehe.”

3. Ko e heigoa ati matakehe lahi e tau matakainaga ha tautolu he lalolagi katoa?

³ Maeke foki he tau tagata ne nakai ko e Tau Fakamoli ke kitia mitaki kua matakehe lahi e tau matakainaga ha tautolu he lalolagi katoa. (1 Peteru 5:9) Ko e ha ne kehe lahi a tautolu mai he falu fakatokatokaaga? Ha kua moua ai e lagomatai he Tohi Tapu mo e agaaga tapu he Atua, ne eketaha a tautolu ke hiki e tau mahani ne nakai fakafiafia a Iehova. Kua “tuku kehe e [tautolu] e tagata tuai,” ka e fakatapulu ai ke he “tagata fou.”​—Kolose 3:9, 10.

4. Ko e heigoa ka fakatutala a tautolu ki ai he vala tala nei? Ko e ha?

⁴ He mole e tuku kehe e tautolu e tagata tuai, kua lata a tautolu ke fakamamao tumau mai ai. He vala tala nei, to fakaako fakamua e tautolu e puhala ke tuku kehe e tagata tuai mo e kakano kua aoga lahi e mena nei. To kitia e tautolu kua maeke e tagata ke taute e tau hikiaga lalahi he moui haana pete kua taute e ia e tau mahani kelea. To fakatutala foki a tautolu ke he tau mena ne taute e lautolu kua leva e nonofo he kupu mooli ke tuku kehe tumau e tagata tuai. Ko e ha kua lata a tautolu ke fakatutala ke he mena nei? Momoko ai, falu ne fekafekau fakamua ki a Iehova kua nakai matutaki ke mataala. Kamata a lautolu ke manamanatu mo e taute e tau mena fakamua ato iloa e lautolu a Iehova. Igatia a tautolu mo e lata ke manatu e hatakiaga nei: “Ko ia kua manatu kua tu a ia, kia fakaeneene a ia neke veli.”​—1 Korinito 10:12.

5. (a) Talahau e fakataiaga kua fakakite e kakano ke fakamafiti ke tuku kehe e tagata tuai. (Kikite fakatino he kamataaga.) (e) Ko e heigoa e tau mahani ne putoia he tagata tuai kua talahau ia Kolose 3:5-9?

⁵ Ko e heigoa ka taute e koe ka mailoga e koe kua kiva mo e namupaku e tau mena tui haau? To aaki fakamafiti e koe. He puhala pihia, ka mailoga e tautolu kua taute e tautolu e tau mena kua vihiatia e Iehova, kia fakamafiti ke hiki. He tutala ke he tau mahani kelea pihia, pehē a Paulo: “Kia tuku kehe e mutolu e tau mena oti ia.” Kia fakatutala a tautolu ke he ua e mahani nei: ko e feuaki mo e mahani kelea.​—Totou Kolose 3:5-9.

6, 7. (a) Fakakite fēfē he tau kupu ha Paulo kua lata ke eketaha ke tuku kehe e tagata tuai? (e) Ko e heigoa e puhala moui ha Sakura? Ko e heigoa ne foaki ki a ia e malolō ke hiki?

⁶ Feuaki. He Tohi Tapu, ko e “feuaki” ne putoia e fakafetuiaga fakataane mo e fifine he vahāloto he ha tagata ne nakai ko e taane mo e hoana kua mau. Pehē a Paulo kua lata e tau Kerisiano ke “tamate” ha lautolu a “tau fahi tino” ka hokotia ke he mahani feuaki. Kakano e mena nei kua lata a tautolu ke eketaha fakamalolō ke huo kehe e tau manako  kelea. Kua uka e mena ia ke taute, ka e maeke a tautolu ke kautū!

⁷ Kitia e tautolu e mena nei mai he fakataiaga ke he matakainaga fifine i Sapanī ne higoa ko Sakura. * (Kikite matahui tala.) He lahi hake a Sakura ne fa logona e ia e matimati mo e loto momoko. He lali ke utakehe e matimati haana, ne kamata a ia ke mahani feuaki he 15 e tau haana. Ne mahani feuaki a Sakura mo e tau tagata kehekehe ti fakahiku lagatolu e fakatōtama. Pehē a ia: “Fakamua, logona e au e haohao mitaki he taute e mahani nei he manamanatu au kua manako mo e fakaalofa mai ki a au. Ka ko e lagaloga e mahani feuaki haaku kua lagaloga foki e logona hifo e au e nakai haohao mitaki.” Matutaki e puhala moui nei ato 23 e tau ha Sakura. Ti kamata a ia ke fakaako e Tohi Tapu mo e Tau Fakamoli a Iehova mo e fiafia ke he mena ne fakaako e ia. Lagomatai e Iehova a ia ke oti e moui mahani feuaki mo e kautū mai he tau logonaaga agahala mo e fakamā haana. Kua eke a Sakura mogonei mo paionia tumau ti nakai liu a ia ke logona hifo e matimati. Pehē a ia: “Fiafia mooli au ke fakamafana he fakaalofa ha Iehova he tau aho takitaha.”

8. Ko e heigoa falu mahani ne taute e Atua ke onoono ki a tautolu kua nakai meā?

⁸ Mahani kelea. He Tohi Tapu, ko e “mahani kelea” kua lahi atu e mena ne putoia ke he mahani feuaki. Maeke ke hagaao ke he tau mena tuga e ula po ke talahau e tau vaiga kiva. (2 Korinito 7:1; Efeso 5:3, 4) Maeke foki ke hagaao ke he tau mena kelea ne liga taute fakagalogalo he tau tagata, tuga e totou he tau tohi ne fakalagalaga e mahani feuaki po ke kitekite ke he tau fakatino telefua. Ko e tau mena nei ne liga takitaki ke he mahani kelea he mulumō. (Kolose 3:5) *​—Kikite matahui tala.

9. Ko e heigoa ka tupu ka feaki he tagata e “manako kelea” ke he mahani feuaki?

⁹ Ko e tau tagata ne onoono tumau ke he tau fakatino telefua ne feaki e “manako kelea” ti hufia ke he mahani feuaki. Ko e tau tagata kumikumi ne mailoga ko e hufia ke he tau fakatino telefua kua tatai mo e hufia ke he kava po ke tau tulaki. Ti nakai ofo ai ko e aga onoono ke he tau fakatino telefua kua fakahiku ai ke he tau fua hagahagakelea. Maeke foki e tau mena nei ke putoia e tau logonaaga hokulo he fakamā, tote e fua mitaki he gahua, nakai fiafia e tau magafaoa, tau vevehe, mo e taupega foki. He mole e atāina e taha tagata mai he hufia haana he tau fakatino telefua ke he taha e tau, pehē a ia kua liu a ia ke logona hifo e fakalilifu ni ki a ia.

10. Vevehe kehe fēfē a Ribeiro mai he hufia haana ke he tau fakatino telefua?

¹⁰ Tokologa e tagata ne taufetului mooli ke fakamamao mai he tau fakatino telefua. Ka e maeke ke kautū mai he taufetului nei. Manamanatu ki a Ribeiro i Brazil. He fuata mui a ia, ne toka e ia e kaina ti fano ke gahua he kamupanī ne liu taute e tau laupepa ke fakaaoga. Kitia e ia e tau mekasini telefua. Pehē a Ribeiro: “Ne hufia fakahaga au. Kelea lahi mahaki ai ti nakai maeke au ke fakatali ke he fifine ne nonofo mo au ke fano kehe he fale ka e kitekite au he tau vitiō telefua.” He taha aho he gahua, ne kitekite a Ribeiro  ke he tumutumu pepa ka taute ke liu fakaaoga ti mailoga e tohi ne fakahigoa The Secret of Family Happiness. Lagaki hake e ia ti totou ai. Ko e mena ne ako e ia kua takitaki a ia ke fakaako e Tohi Tapu mo e Tau Fakamoli a Iehova. Ka e leva lahi to maeke a Ribeiro ke vevehe kehe mai he hufia haana ke he tau fakatino telefua. Ko e heigoa ne lagomatai a ia? Fakamaama e ia: “Puhala he liogi, fakaako Tohi Tapu, mo e manamanatu fakahokulo ke he mena ne fakaako e au kua fakamalagaki e loto fakaaue haaku ke he tau mahani he Atua ato malolō lahi e fakaalofa haaku ki a Iehova ke he manako haaku ke he tau fakatino telefua.” Ko e lagomatai he Tohi Tapu mo e agaaga tapu he Atua ne hiki e tau puhala ha Ribeiro ti papatiso mo e eke a ia mogonei mo motua he fakapotopotoaga.

11. Ko e heigoa ka lagomatai e tagata ke fakamamao mai he tau fakatino telefua?

¹¹ Mailoga ko e fakamamao mai ha Ribeiro he tau fakatino telefua, ne nakai ni ko e fakaako haana ke he Tohi Tapu. Lata a ia ke manamanatu fakahokulo ke he mena ne totou e ia he Tohi Tapu ti fakaatā ai ke hokotia ke he loto haana. Lata a ia ke liogi ki a Iehova he olelalo ma e lagomatai Haana. Ko e tau mena nei ne lagomatai ke fakamalolō lahi e fakaalofa ha Ribeiro ke he Atua, ti fakakaumahala ai e manako haana ke he tau fakatino telefua. Ke fakamamao mai he tau fakatino telefua, kua lata foki a tautolu ke fakahokulo e fakaalofa ki a Iehova mo e vihiatia e mena kua kelea.​—Totou Salamo 97:10.

12. Ko e heigoa ne lagomatai a Stephen ke tuku kehe e ita mo e vagahau kelea?

¹² Falu tagata ne mukamuka ke ita lahi mo e vagahau kelea mo e amuamu ke he falu. Ka tupu e mena nei, kua matematekelea e magafaoa katoa. Ko e matua taane i Ausetalia ne higoa ko Stephen ne fa kupu pilo ti ita lahi ke he tau mena ikiiki. Pehē a ia: “Lagatolu e nonofo kehekehe e hoana haaku mo au ti amaamanaki foki mogonei ke tau vevehe.” Ka e kamata a laua ke fakaako e Tohi Tapu mo e Tau Fakamoli, ti lali a Stephen ke fakagahua e tau mena ne iloa e ia. Pehē a ia ato iloa e ia a Iehova, kua ita lahi a ia ke he ha mena ne fakahogohogo manava a ia ti logona hifo kua tuga e pomu a ia ne amanaki ke pā. Mole e kamata ha Stephen ke muitua ke he fakatonuaga he Tohi Tapu, ne kamata e tuaga ke holo mitaki. Pehē a ia: “Kua mafiti e holo ki mua he moui magafaoa ha mautolu. Ha ko e lagomatai ha Iehova kua logona e au mogonei e mafola mo e totoka.” Mogonei kua eke a Stephen mo fekafekau lagomatai, ti fai magaaho tuai e hoana haana he paionia tumau. Pehē e tau motua he fakapotopotoaga ha Stephen: “Ko Stephen kua fakanono, gahua malolō, ti ha ha ia ia e aga fakatokolalo.” Pehē foki a lautolu kua nakai kitia e lautolu a ia kua ita. Nakai matalahi a Stephen ha ko e hiki he aga haana. Pehē a ia: “Nakai moua e au e tau monuina loga nei he moui haaku ane mai  nakai talia e au e lagomatai ha Iehova ke hiki katoatoa e aga haaku.”

13. Ko e ha kua hagahagakelea e ita? Ko e heigoa ne hataki he Tohi Tapu a tautolu ki ai?

¹³ Hataki he Tohi Tapu a tautolu ke kalo kehe he ita, vale fakakelea ke he falu, mo e kupu kelea. (Efeso 4:31) Ko e tau mena nei ne fa takitaki ke he tau mahani vale. Tokologa he lalolagi mogonei ne manamanatu ko e mena mitaki e ita mo e aga vale. Ka ko e taute e tau mena nei kua nakai fakalilifu e Tufuga ha tautolu. Tokologa e tau matakainaga ha tautolu ne kua lata ke hiki e tau aga mo e fakatapulu ke he tagata foou.​—Totou Salamo 37:8-11.

14. Maeke nakai e tagata vale ke mahani molū?

¹⁴ Ko e matakainaga taane ne higoa ko Hans ko e motua he fakapotopotoaga i Austria. Ko e leveki he kau he tau motua he fakapotopotoaga ha Hans ne pehē: “Ko ia foki ko e matakainaga ne mua atu e mahani molū ne manako a koe ke feleveia.” Ka e nakai mahani molū tumau a Hans. He fuata mui a ia, kamata a ia ke inu lahi ke he kava mo e aga vale. Taha mogo ne konahia a ia ti ita lahi a ia mo e tamate e kapitiga fifine haana. Ne tuku a Hans ke he fale puipui ke 20 e tau ka e nakai hiki e aga haana he nofo he fale puipui. Ti ole e matua fifine haana ke he motua ke ahiahi atu ki a Hans, ti kamata a ia ke fakaako e Tohi Tapu. Pehē a ia: “Taufetului au ke tuku kehe e aga tuai haaku. Ko e tau kupu Tohi Tapu ne fakamalolō au ia Isaia 55:7 ne pehē: ‘Kia tiaki e ia ne mahani kelea hana mahani,’ mo e 1 Korinito 6:11 ne pehē hagaao ki a lautolu ne tiaki e tau mahani agahala: ‘Ne pihia foki e falu ia mutolu.’ Totou tau tuai e lagomatai fakalahi e Iehova a au puhala he  agaaga tapu haana ke fakatapulu ke he aga foou.” Papatiso a Hans he nofo agaia he fale puipui, ti mole 17 mo e hafa e tau ti fakatoka mai a ia ki fafo he fale puipui. Pehē a ia: “Fiafia au ke he fakaalofa noa mo e fakamagaloaga mua ue atu ha Iehova.”

15. Ko e heigoa taha vala he tagata tuai? Ko e heigoa ne talahau he Tohi Tapu hagaao ki ai?

¹⁵ Ko e pikopiko ko e vala foki he tagata tuai. Ma e fakatai, tokologa e tagata ne pikopiko ke kalo kehe he totogi e tau tukuhau po ke kalo kehe he fai fakalagoaga ke he tau hehē ha lautolu. Ka ko Iehova “ko e Atua fakamoli.” (Salamo 31:5) Ti manako a ia ke he tau tagata tapuaki oti haana ke “vagahau fakamoli” mo e “aua neke fepikopikoaki.” (Efeso 4:25; Kolose 3:9) Maaliali ai, lata a tautolu ke talahau e mena mooli pete kua fakamā po ke uka.​—Tau Fakatai 6:16-19.

16. Ko e heigoa ka lagomatai a tautolu ke tuku kehe e tagata tuai?

¹⁶ Nakai maeke ke tuku kehe e tagata tuai he malolō ni ha tautolu. Ko Sakura, Ribeiro, Stephen, mo Hans ne eketaha fakamalolō ke hiki e tau puhala moui tuai ha lautolu. Ko e mena ne lagomatai a lautolu ko e malolō he Kupu he Atua mo e haana agaaga tapu. (Luka 11:13; Heperu 4:12) Ke aoga mai he malolō ia, lata a tautolu ke totou e Tohi Tapu he tau aho takitaha, manamanatu fakahokulo ki ai, mo e liogi tumau ma e pulotu mo e malolō ke fakagahua e tau mena ne fakaako e tautolu. (Iosua 1:8; Salamo 119:97; 1 Tesalonia 5:17) Aoga foki a tautolu mai he Kupu he Atua mo e haana agaaga tapu ka tauteute a tautolu mo e o atu ke he tau feleveiaaga. (Heperu 10:24, 25) Ti manako a tautolu ke fakaaoga foki e tau foakiaga he fakatokatokaaga ha Iehova ne tuku mai ki a tautolu tuga e tau mekasini, JW Broadcasting, JW Library, mo e jw.org.​—Luka 12:42.

17. Ko e heigoa ka fakatutala a tautolu ki ai he vala tala ka mui mai?

¹⁷ Kua fakatutala a tautolu ke he loga e mahani kelea ne lata he tau Kerisiano ke tuku kehe mo e fakamamao tumau mai ai ke fakafiafia a Iehova. Ka e lahi atu foki e mena kua lata a tautolu ke taute. Lata a tautolu ke fakatapulu ke he tagata foou ti fakatumau ai mo vala he tau momoui ha tautolu. He vala tala ka mui mai, to fakatutala ai ke he puhala ka taute e tautolu e mena nei.