HA KUA uka lahi e moui he “tau aho fakamui,” ati lata a tautolu ke mua atu e lahi he fakauka mogonei. (2 Timoteo 3:1-5) Tokologa e tagata ne viko takai ia tautolu kua nakai fakauka. Mahani lotokai a lautolu, loto ke taufetoko, ti nakai manako fakalatalata a lautolu. Lata mogoia a tautolu ke hūhū hifo: ‘Nakai fakauka kia a au tuga e tau tagata ne viko takai ia au? Ko e heigoa e kakano ke fakauka mooli? Ko e heigoa haaku ka taute ke eke e mahani fakauka mo vala he aga haaku?’

Ko e heigoa e kakano he kupu “fakauka” ne fakaaoga he Tohi Tapu? Nakai ko e fakamanavalahi noa ni ke he lekua. Ko e tagata fakauka kua fakamanavalahi mo e fai kakano, amanaki a ia ke mitaki e tau tuaga. Nakai manamanatu ni a ia ki a ia ka e manamanatu foki a ia ke he tau logonaaga he falu, pihia foki ki a lautolu ne liga fakaita po ke ekefakakelea a ia. Matutaki a ia ke amaamanaki to holo ki mua e fakafetuiaga ha lautolu. Nakai ofo ai ha kua pehē e Tohi Tapu ko e fakauka kua fua mai he fakaalofa. * (Kikite matahui tala.) (1 Korinito 13:4) Ko e fakauka ko e vala foki he “fua he Agaga.” (Kalatia 5:22, 23) Ti ko e heigoa ha tautolu kua lata ke taute ke fakauka mooli?

Ke fakauka kua lata a tautolu ke liogi ma e lagomatai he agaaga ha Iehova, nukua foaki e ia ki a lautolu kua falanaki ki a Ia. (Luka 11:13) Kua malolō lahi e agaaga ia, ka e lata agaia a tautolu ke gahua fakatatau ke he tau liogi ha tautolu. (Salamo 86:10, 11) Kakano he mena nei kua lata a tautolu ke fakakite e fakauka he tau aho takitaha ti eke ai mo vala he aga ha tautolu. Ka e falu magaaho kua liga kaumahala a tautolu. Ko e heigoa ka lagomatai a tautolu?

Lata a tautolu ke fakaako mo e muitua e fakafifitakiaga mitaki katoatoa ha Iesu. He tutala e aposetolo ko Paulo hagaao ke he “tagata fou,” putoia e fakauka, ne fakamalolō e ia a tautolu: “Kia pule foki e mafola mai he [“Keriso,” NW] ke he tau loto ha mutolu.” (Kolose 3:10, 12, 15) Ke taute pihia, lata a tautolu ke muitua e fakafifitakiaga ha Iesu mo e falanaki katoatoa to hoko e magaaho tonu ti fakahako he Atua. Ka falanaki pihia a tautolu, to nakai galo e fakauka ha tautolu pete e tau mena ne tutupu viko ia tautolu.​—Ioane 14:27; 16:33.

Manako oti a tautolu ke hoko mafiti mai e lalolagi foou. Ka e fakaako a tautolu ke lahi e fakauka ka manamanatu a tautolu ke he fakauka ha Iehova ki a tautolu. Fakamafana mai e Tohi Tapu: “Kua nakai mule mai e Iki [Iehova] ke he mena kua talahaua mai, tuga he manatu he falu ke he mule; ka e fakauka mai a ia kia tautolu, he nakai finagalo a ia ke malaia taha, ka kia hohoko oti kana ke he tokihala.” (2 Peteru 3:9) Ka manamanatu a tautolu ke he fakauka ha Iehova ki a tautolu, to lahi atu foki e fakauka ha tautolu ke he falu. (Roma 2:4) Ko e heigoa falu tuaga kua lata a tautolu ke fakauka?

Loga e tuaga he tau aho takitaha he moui ne lata a tautolu ke fakauka. Ma e fakatai, lata ke fakauka ke nakai fakatauhele falu ka logona e tautolu kua fai mena aoga a tautolu ke talahau. (Iakopo 1:19) Lata foki a tautolu ke fakauka ka fakaita he taha a tautolu. He nakai mafiti e tali, mitaki ke manatu e puhala ha Iehova mo Iesu ne tali ke he tau lolelole ha tautolu. Nakai hagaaki a laua ke he loga e tau mena ikiiki kua hepe ne taute e tautolu. Ka e kitia e laua e tau mahani mitaki ha tautolu ti fakauka he tuku mai ki a tautolu e magaaho ke holo ki mua.​—1 Timoteo 1:16; 1 Peteru 3:12.

Lata foki a tautolu ke fakauka ka fai tagata ne tala mai ki a tautolu kua hepe e mena ne talahau po ke taute e tautolu. Liga ko e tali fakamua ha tautolu ko e ita mo e totoko atu. Ka e tala mai e Kupu he Atua ke nakai tali atu pihia. Pehē ai: “Kua mua e mitaki he tagata kua fakauka kia ia kua loto fakatokoluga. Aua neke fakatepetepe hāu a loto ke ita; ha kua toka mau ai e ita ke he tau loto he tau tagata goagoa.” (Fakamatalaaga 7:8, 9) Pete foki ka hepe katoatoa e ekefakakelea, lata a tautolu ke fakauka mo e manamanatu fakamitaki ato tali atu. Ko e mena ia ne taute e Iesu he mogo ne ekefakakelea he falu a ia.​—Mataio 11:19.

Mua atu ke he tau matua ke fakauka ka lagomatai e tau fanau ha lautolu ke fakahako e aga po ke kalo kehe he tau manako kelea. Tuga e fakatai ki a Mattias, ne gahua he Peteli i Scandinavia. He fuata mui a Mattias, ne vaiga tumau he tau kapitiga aoga haana a ia ha ko e tau taofiaga haana. Fakamua, nakai iloa he tau matua haana e mena nei ne tupu. Ka e kitia mogoia e laua kua kamata a ia ke fakauaua ke he tau taofiaga haana. Ko e matua taane ha Mattias ko Gillis ne talahau kua lata a ia mo e hoana haana ke lahi e fakauka ke he tuaga nei. Hūhū e Mattias e tau hūhū tuga: “Ko hai e Atua? Ka e kua ka nakai ko e Kupu he Atua e Tohi Tapu? Iloa fēfē e tautolu kua manako mooli e Atua ke he mena nei po ke taha mena mai ia tautolu?” Hūhū foki a ia ke he matua taane haana: “Ko e ha kua fakafili au kaeke kua nakai logona hifo po ke talitonu au tuga a koe?”

Fakamaama e Gillis: “Falu mogo kua talahau he tama taane ha maua e tau hūhū he puhala ita, nakai totoko ai ke he matua fifine po ke ki a au, ka e totoko ai ke he kupu mooli  ne logona hifo e ia kua taute e moui haana ke uka.” Lagomatai fēfē e Gillis e tama haana? “Ne nonofo hifo au mo e tama haaku ti tutala ke he loga e tulā.” Fa mahani, kua fanogonogo ni hokoia a Gillis ki a Mattias mo e hūhū ki a ia ke lali ke maama e tau logonaaga mo e tau manatu haana. Falu mogo ne fakamaama e Gillis e taha mena ke he tama haana mo e tala age ki a ia ke fai aho ke manamanatu ki ai ato liu a laua ke tutala hagaao ki ai. Falu mogo, pehē a Gillis kua lata a ia ke fai aho gahoa foki ke manamanatu ke he mena ne tala age he tama. He tau fakatutalaaga tumau nei, kamata a Mattias ke maama e kakano he lukutoto mo e maama kua fakaalofa a Iehova ki a tautolu mo e ha ha e tonuhia ke pule ki a tautolu. Pehē e matua taane haana: “Lahi e magaaho, ti fa uka, ka e fano ni fakatekiteki ti tupu e fakaalofa ki a Iehova he loto ha Mattias. Ko e hoana haaku mo au kua fiafia lahi ha ko e tau laliaga fakauka ha maua ke lagomatai e tama ha maua he tau tau fuata mui haana ne fua mitaki mo e hokotia ke he loto ha Mattias.”

He fakauka a Gillis mo e hoana haana ke lagomatai e tama taane ha laua, falanaki a laua ki a Iehova ma e lagomatai. Pehē a Gillis: “Fa tala age au ki a Mattias ko e fakaalofa hokulo ha maua ki a ia kua fakalagalaga e matua fifine haana mo au ke liogi fakamakamaka foki ke lagomatai e Iehova a ia ke maama.” Ko e tau matua nei kua fiafia mooli he fakauka mo e nakai mahala!

Lata foki ia tautolu ke fakauka ka leveki he tagata he magafaoa po ke kapitiga ne kua leva e gagao. Tuga e fakatai ki a Ellen * (kikite matahui tala), ne nofo foki i Scandinavia.

Kavi ke he valu e tau kua mole, ne lagaua e stroke he taane ha Ellen ti kelea lahi e uho ulu haana. Ha ko e mena ia, nakai maeke e taane haana ke logona hifo e fiafia, momoko, po ke fakaalofa. Uka lahi mahaki e tuaga nei ma Ellen. Pehē a ia: “Kua lahi e fakauka mo e lahi e liogi.” Lafi e ia: “Ko e kupu tohi mahuiga haaku ne fakamafana au ia Filipi 4:13 ne pehē: ‘Kua maeke ia au e tau mena oti kana ke he fakamalolo mai a [“Iehova,” NW] kia au.’” Ha ko e malolō mo e lalago ha Iehova, ati fahia a Ellen ke fakauka ke he tuaga.​—Salamo 62:5, 6.

Mooli, ko e fakafifitakiaga mitaki lahi mahaki he fakakite e fakauka ko Iehova. (2 Peteru 3:15) He Tohi Tapu, fa totou e tautolu kua lahi e fakauka ha Iehova. (Nehemia 9:30; Isaia 30:18) Manatu nakai e koe e tali ha Iehova ki a Aperahamo he mogo ne loga e hūhū haana ki a Ia hagaao ke he fifiliaga Haana ke moumou a Sotoma? Nakai fakatauhele e Iehova a Aperahamo. Ne fanogonogo fakauka a Ia ke he tau hūhū takitaha mo e tau tupetupe ha Aperahamo. Ti fakakite e Iehova kua logona e Ia e tau tupetupe ha Aperahamo mo e fakamafana age to nakai moumou e Ia a Sotoma pete he tokohogofulu ni e tagata tututonu he maaga ia. (Kenese 18:22-33) Fanogonogo fakauka tumau a Iehova, ti nakai mafiti a ia ke tali atu!

Ko e fakauka ko e vala aoga lahi he tagata foou kua lata ke moua he tau Kerisiano oti. Ka taute e tautolu e tau mena oti kana ke fakauka mooli, kua fakaheke e tautolu a Iehova ko e Matua fakaalofa mo e fakauka ha tautolu, ti fakalataha a tautolu mo “lautolu kua moua tuai ke he tua mo e fakauka e tau mena kua talahaua mai.”​—Heperu 6:10-12.