1. He tau puhala fe ka gahua a tautolu mo Iehova?

KO E magaaho ne tufuga e Iehova e tau tagata, manako a ia ki a lautolu ke eke mo tau ekegahua haana. Pete kua nakai mitaki katoatoa e tau tagata mogonei, maeke agaia e tau tagata mahani fakamooli ke gahua fakalataha mo Iehova he tau aho takitaha. Ma e fakatai, ko tautolu ko e ‘tau ekegahua fakalataha mo e Atua’ ka fakamatala e tala mitaki he Kautu mo e taute tutaki. (1 Korinito 3:5-9) Ko e lilifu mooli ha kua fifili he Tufuga mua ue atu a tautolu ke taute e gahua ne aoga lahi! Nakai ni ko e gahua fakamatala e puhala kua gahua a tautolu mo Iehova. He vala tala nei, to fakaako foki a tautolu ke he puhala ke gahua mo ia ka lagomatai e tau magafaoa ha tautolu mo lautolu he fakapotopotoaga, ka fakamokoi a tautolu, ka lalago e tautolu e tau matagahua he fakatokatokaaga he lalolagi katoa, mo e ka fakalaulahi e fekafekauaga ha tautolu ki a Iehova.​—Kolose 3:23.

2. Lata he ha ke nakai fakatatai e mena kua taute e tautolu ma Iehova mo e mena ne taute he falu?

² He fakaako a tautolu ke he vala tala nei, aoga ke manatu kua  kehekehe e tau tagata. Ko e ha tautolu a tau he moui, malolō tino, tau tutūaga, mo e tau lotomatala kua nakai tatai. Ti nakai lata ke fakatatai e mena kua maeke a koe ke taute ma Iehova mo e mena ka taute he falu. Pehē e aposetolo ko Paulo: “Kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha.”​—Kalatia 6:4.

3. Ko e ha kua talahau e tautolu ko e tau tagata oti ne leveki e magafaoa haana kua gahua mo e Atua?

³ Amanaki a Iehova ki a tautolu ke leveki e tau magafaoa. Ma e fakatai, maeke a koe ke gahua ke moua e tupe ke leveki aki e magafaoa. Tokologa e matua fifine ne nonofo i kaina mo e tau fanau ikiiki ha lautolu. Ka nakai maeke e tau matua ke leveki a lautolu ni, maeke a tautolu ke leveki a lautolu. Aoga mooli e tau mena nei. Pehē e Tohi Tapu: “Kaeke kua nakai leveki e taha hana faoa, ti au atu kia lautolu kua nonofo mo ia, kua fakatikai e ia e tua, kua mua foki hana kelea kia ia kua faliuliu.” (1 Timoteo 5:8) Ka ha ha ia koe e tau matagahua fakamagafaoa, liga kua nakai lahi e mena ne taute e koe ma Iehova tuga he manako haau. Ka e ua loto lolelole! Kua fiafia a Iehova ka leveki e koe e magafaoa haau.​—1 Korinito 10:31.

4. Maeke fēfē e tau matua ke tuku fakamua e tau mena he Kautu, ti ko e heigoa ka tupu he taute pihia e lautolu?

⁴ Ko e tau matua Kerisiano ka gahua mo Iehova he lagomatai e tau fanau ha lautolu ke fakatoka e tau foliaga he gahua ha Iehova. Tokologa e matua ne taute e mena nei. Ko e fua, fifili e tau fanau ha lautolu he mogo fakamui ke gahua mau ki a Iehova he tau matakavi mamao mai he kaina. Falu ko e tau misionare, falu ne paionia he tau matakavi ne manako lahi ke he tau tagata fakailoa, mo e falu ne gahua he Peteli. Mooli, ka mamao e tau fanau kua nakai maeke e tau matua ke lahi e magaaho mo lautolu tuga he manako e lautolu. Ka e nakai lotokai a lautolu ke fakamalolō e tau fanau ke matutaki ke fekafekau ki a Iehova he mena ne ha ha ai a lautolu. Ko e ha? Ha kua fiafia lahi a lautolu he tuku fakamua he tau fanau a Iehova he tau momoui ha lautolu. (3 Ioane 4) Tokologa he tau matua ia ne logona hifo tuga a Hana, he pehē kua “tuku atu” e ia e tama taane haana ko Samuela ki a Iehova. Logona hifo he tau matua ko e lilifu lahi ke gahua mo Iehova he puhala nei.​—1 Samuela 1:28.

5. Lagomatai fēfē e koe e tau matakainaga he fakapotopotoaga haau? (Kikite fakatino he kamataaga.)

⁵ Ka nakai fai matagahua lahi fakamagafaoa a koe mogonei, maeke nakai a koe ke lalago e tau matakainaga ne gagao po ke fuakau po ko lautolu ne manako lagomatai? Po ke maeke nakai a koe ke lagomatai a lautolu ne leveki e tau magafaoa ha lautolu? Onoono viko ke he fakapotopotoaga ha mutolu ke kitia a lautolu ne manako ke he lagomatai ia. Ma e fakatai, liga ko e matakainaga fifine ne leveki e matua motua haana. Maeke nakai a koe ke fai magaaho mo e matua haana ka e toka a ia ke taute falu matagahua? Po ke liga lagomatai e koe taha he foaki ke uta a ia ke he tau feleveiaaga, ke he fale koloa, po ke ahiahi taha tagata he fale gagao. Ka taute e koe e mena ia, maeke a koe ke gahua mo Iehova ke tali e liogi.​—Totou 1 Korinito 10:24.

6. Maeke fēfē a tautolu ke mahani fakamokoi?

⁶ Ko e tau ekegahua he Atua kua iloa lahi ha ko e mahani fakamokoi. He Tohi Tapu, ko e kupu “fakamokoi” kua kakano “ke fakaalofa age ke he tau tagata kehe.” (Heperu 13:2) He Kupu he Atua, totou e tautolu hagaao ke he tau fakafifitakiaga ne fakaako ki a tautolu e puhala ka fakakite e tautolu e mahani totonu nei. (Kenese 18:1-5) Maeke mo e lata a tautolu ke lagomatai e falu kaeke ko tautolu he tuaga ke taute ai, he faoa po ke nakai faoa a lautolu ki a tautolu ke he tua.​—Kalatia 6:10.

7. Ko e heigoa e tau fua mitaki ka mahani fakamokoi a koe ke he tau fekafekau gahua mau?

⁷ Maeke nakai a koe ke gahua mo Iehova ke mahani fakamokoi ke he tau fekafekau gahua mau ne lata ke moua e mena ke nonofo ai? (Totou 3 Ioane 5, 8.) Ka taute pihia e tautolu to aoga ai ki a lautolu mo tautolu. Talahau ai he Tohi Tapu “kia fefakamafanaaki.” (Roma 1:11, 12) Manamanatu ke he mena ne tupu ki a Olaf. He mogo ne tote a ia, ne ahiahi mai e leveki takaiaga nofo tokotaha ke he fakapotopotoaga ti lata ke moua e mena ke nofo ai ka e nakai fai he fakapotopotoaga ne maeke ke lagomatai a ia. Ole a Olaf ke he tau matua haana ne nakai ko e Tau Fakamoli ke nofo e leveki takaiaga he kaina ha lautolu. Fakaatā e laua ka e tala age ki a Olaf ke mohe he nofoa loa. Nakai tokihala a Olaf he taute pihia. Fiafia fakalataha a ia mo e leveki takaiaga he faahi tapu katoa ia! He tau pogipogi oti ne mamatike a laua mo e fakatutala ke he loga e tau matakupu ka e kai e kai pogipogi. Lahi e fakamafana he leveki takaiaga a Olaf ti fifili a ia ke fekafekau mau ki a Iehova. He 40 e tau kua mole, ne loga e motu ne gahua misionare a Olaf i ai.

8. Ko e ha ne lata ke totonu pete ka nakai loto fakaaue e falu he mogo fakamua? Talahau e fakatai.

⁸ Loga e puhala ka fakakite e tautolu e fakaalofa ke he tau tagata kehe, pete ka nakai loto fakaaue a lautolu he mogo fakamua. Ma e fakatai, ko e matakainaga fifine i Spain ne fakaako e Tohi Tapu mo Yesica ko e fifine mai Ecuador. Taha aho he fakaako Tohi Tapu, ne nakai nā e tagi ha Yesica. Ti hūhū e matakainaga fifine ki a ia ko e ha. Pehē a Yesica ato hau ki Spain na mativa lahi a ia. Taha aho ne nakai fai mena kai a ia ke fagai aki e tama fifine haana, ko e vala vai ni hokoia. Liogi a Yesica ma e lagomatai mo e lali ke fakamohe e tama mukemuke haana. Nakai leva, tokoua e Fakamoli ne o atu ki a Yesica ti age ki a ia e mekasini. Ka e hemu a ia ki a laua, ti hēhē e mekasini mo e pehē: “Ko e mena kai kia anei ne manako a mua ke fagai aki e au e tama fifine haaku?” Lali e tau matakainaga ke fakamafana a Yesica ka e nakai fanogonogo a ia. Mogo fakamui, toka he tau matakainaga fifine e kato mena kai he gutuhala haana. Mogonei he fakaako, tagi a ia he mailoga kua fakaheu e ia e tali he Atua ke he liogi haana. Ka e eketaha a Yesica ke fekafekau ki a Iehova. Maaliali ai, ko e tau fua mitaki ne moua mai he fakamokoi he tau matakainaga fifine ia.​—Fakamatalaaga 11:1, 6.

9, 10. (a) Ko e heigoa falu matagahua foaki noa ne taute he tau Isaraela? (e) He tau puhala fe ka lagomatai he tau matakainaga taane e fakapotopotoaga he mogonei?

⁹ Ke he vahā i tuai, loga e magaaho ne gahua foaki noa e tau Isaraela. (Esoto 36:2; 1 Nofoaga he Tau Patuiki 29:5; Nehemia 11:2) Mogonei, loga foki e tuaga kua foaki noa e koe e magaaho, tau koloa fakatino, mo e tau lotomatala ke lagomatai e tau matakainaga haau. Ka taute pihia e koe, to fiafia lahi a koe mo e to fakamonuina e Iehova a koe.

¹⁰ Fakamafana he Kupu he Atua e tau tagata taane he fakapotopotoaga ke gahua mo Iehova ke lagomatai e falu he eke mo tau fekafekau lagomatai mo e tau motua. (1 Timoteo 3:1, 8, 9; 1 Peteru 5:2, 3) Ko lautolu ne taute e mena nei ke lagomatai e falu he tau puhala aoga ti pihia ke he tapuakiaga ha lautolu. (Gahua 6:1-4) Kua tala atu kia e tau motua ki a koe ke taute e tau matagahua po ke lagomatai ke he tau tohi, tau mepe he gahua fakamatala, levekiaga, po ke falu mena foki? Ko e tau matakainaga taane ne lagomatai ke he tau puhala nei ne fiafia lahi he taute pihia.

11. Aoga fēfē e taha matakainaga fifine mai he gahua ke he tau matagahua talaga?

¹¹ Ko lautolu ne foaki noa ke taute e tau matagahua talaga ne fa moua e tau kapitiga foou. Taha matakainaga fifine ne higoa ko Margie kua 18 e tau he gahua he tau matagahua talaga ke he Fale he Kautu. He tau matagahua nei, ne mamata a ia ke he tau matakainaga fifine fuata ti lagomatai ke fakaako a lautolu. Pehē a ia ko e puhala mitaki lahi mahaki anei ma e tau tagata gahua foaki noa ke fakamafana e taha mo e taha. (Roma 1:12) Ka fehagai a ia mo e tau magaaho uka he moui haana, kua fakamafana he tau kapitiga ne moua e ia mai he tau matagahua  nei a ia. Kua gahua foaki noa nakai a koe ke he matagahua talaga? Maeke a koe ke taute e tau matagahua, pete he nakai fai lotomatala pauaki a koe.

12. Maeke fēfē a koe ke lagomatai he mole e matematekelea?

¹² Gahua foki a tautolu mo Iehova he lagomatai e tau matakainaga ka mole e matematekelea. Ma e fakatai, maeke a tautolu ke foaki e tau tupe lagomatai. (Ioane 13:34, 35; Gahua 11:27-30) Taha puhala ka lagomatai e tautolu ko e fakameā po ke fakafoou e tau mena ne malona he mole e matematekelea. Ko Gabriela ko e matakainaga fifine i Poland ne malona tiaki e fale he puke he vai kua fiafia lahi ke kitia e tau matakainaga he tau fakapotopotoaga tata ne o mai ke lagomatai a ia. He manamanatu ke he mena ne tupu, pehē a ia kua nakai tupetupe a ia ke he tau koloa ne galo ka e hagaaki a ia ke he tau mena ne moua e ia. Pehē a ia: “Ko e mena nei ne tupu kua fakamooli ki a au ko e fai vala ke he fakapotopotoaga Kerisiano ko e lilifu uho lahi ti pihia mo e punaaga he olioli mo e fiafia.” Tokologa ne moua e lagomatai he mole e matematekelea ne pehē kua logona pihia foki a lautolu. Ko lautolu ne gahua mo Iehova ke lagomatai e tau matakainaga nei ne logona hifo e fiafia mo e makona lahi.​—Totou Gahua 20:35; 2 Korinito 9:6, 7.

13. Fakamalolō fēfē e tautolu e fakaalofa ki a Iehova ka gahua foaki noa a tautolu? Talahau e fakatai.

¹³ Ko e matakainaga fifine ne higoa ko Stephanie mo e falu tagata fakailoa he matakavi haana ne gahua mo e Atua he lagomatai e tau matakainaga ne fehola ki United States ha ko e felakutaki he motu ha lautolu. Lagomatai e lautolu e tau tagata fehola nei ke kumi e tau kaina mo e moua e tau koloa. Pehē a ia: “Fakalagalaga a mautolu ha ko e fiafia mo e loto fakaaue ha lautolu he logona hifo e fakaalofa fakamatakainaga he lalolagi katoa. Manatu e tau magafaoa kua lagomatai e mautolu a lautolu, ka ko e tala mooli kua lahi e lagomatai e lautolu a mautolu. Ko e fakaalofa, kaufakalataha, tua, mo e falanaki ki a Iehova ne kitia e mautolu kua fakamalolō mooli e fakaalofa ha mautolu ki a Iehova, ti foaki he mena nei ki a mautolu e hokulo he loto fakaaue ke he tau mena oti ne moua e mautolu puhala he fakatokatokaaga haana.”

14, 15. (a) Ko e heigoa e aga ne moua he perofeta ko Isaia? (e) Fifitaki fēfē he tau Kerisiano e aga ha Isaia?

¹⁴ Manako nakai a koe ke gahua fakalahi foki mo Iehova? To makai nakai a koe ke hiki ke he tau matakavi ne manako ke he tau tagata fakailoa? Mooli, nakai lata a tautolu ke hiki mamao ke mahani fakamokoi. Ka e  maeke e falu he tau matakainaga. Moua e lautolu e aga tuga he perofeta ko Isaia. Magaaho ne hūhū a Iehova, “Ko hai ke fakafano atu e au? ko hai foki ke fano ma mautolu?” pehē a ia: “Ko au hanai, kia fakafano atu e koe au.” (Isaia 6:8) Makai mo e maeke nakai a koe ke lagomatai e fakatokatokaaga ha Iehova? Ko e heigoa falu puhala ka lagomatai e koe?

¹⁵ Pehē a Iesu hagaao ke he gahua fakamatala mo e taute tutaki: “Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” (Mataio 9:37, 38) Maeke nakai a koe ke gahua paionia he matakavi ne manako ke he tau tagata fakailoa? Po ke maeke nakai a koe ke lagomatai e taha tagata ke taute pihia? Tokologa e matakainaga ne logona hifo ko e puhala mitaki lahi ke fakakite e fakaalofa ha lautolu ke he Atua mo e katofia ko e paionia he matakavi ne lata ke tokologa e tagata fakailoa. Manamanatu nakai a koe ke he falu puhala foki ke fakalahi e fekafekauaga haau? Ka taute pihia e koe, to fiafia lahi a koe.

16, 17. Ko e heigoa falu puhala ka fakalahi e koe e fekafekauaga haau ki a Iehova?

¹⁶ Makai nakai a koe ke fekafekau he Peteli po ke lagomatai ke he tau matagahua talaga, he gahua fakakū po ke taha po ke loga e aho he faahi tapu? Manako tumau e fakatokatokaaga ha Iehova ke he tau tagata kua makai ke fekafekau he ha matakavi kua manako lagomatai mo e to taute e tau mena ne tala age ki a lautolu ke taute pete kua kehe e vahega gahua ne moua e lautolu. Uho ki a Iehova e tau tagata oti ne makai ke taute e tau foakiaga mo e fekafekau he ha matakavi ne manako lagomatai.​—Salamo 110:3.

¹⁷ To manako nakai a koe ke lahi e fakamahani ke maeke ke fekafekau fakalahi ki a Iehova? Maeke a koe ke tuku e ole ke lata mo e Aoga ma e Tau Tagata Fakamatala he Kautu. Fakamahani he aoga nei e tau matakainaga motua fakaagaaga kua fitā he gahua mau ki a Iehova, ke maeke e fakatokatokaaga ha Iehova ke fakaaoga fakalahi a lautolu. Ko lautolu ne o atu ke he aoga nei kua lata ke makai ke fekafekau ke he ha matakavi ne fakafano a lautolu ki ai. To makai nakai a koe ke lahi e mena ka taute ma Iehova he puhala nei?​—1 Korinito 9:23.

18. Ko e heigoa e tau fua mitaki he gahua mo Iehova he tau aho takitaha?

¹⁸ Ha ko tautolu ko e tau tagata ha Iehova kua fakamokoi, mitaki, totonu, mo e fakaalofa a tautolu. Manamanatu a tautolu hagaao ke he falu he tau aho takitaha. Tamai he mena nei ki a tautolu e olioli, mafola, mo e fiafia. (Kalatia 5:22, 23) Pete ne tau tutūaga haau, to fiafia tumau a koe he fifitaki e aga fakamokoi ha Iehova ti eke mo taha he tau ekegahua ofania haana!​—Tau Fakatai 3:9, 10.