KUA manako lahi nakai a koe ke he kotofaaga he fakapotopotoaga ka e nakai maeke a koe ke taute mogonei? Liga ko e kotofaaga ne taute he taha tagata. Po ke liga ko e kotofaaga he fekafekauaga ne taute e koe fakamua. Ka ko e tau he moui, kelea e malolō tino, uka e tuaga fakatupe, po ke tau matagahua ma e magafaoa kua fakakaupā mogonei e mena haau ne maeke ke taute. Po ke liga lata ia koe ke fakaoti mai he kotofaaga kua leva he taute e koe ha ko e tau hikiaga he fakatokatokaaga. Pete ne tau kakano ia, liga logona hifo e koe kua nakai lahi e mena haau kua taute he fekafekauaga he Atua. He tau tuaga pihia, liga logona hifo mooli e koe e momoko he loto he falu magaaho. Pete ia, maeke fēfē a koe ke nakai fakaatā e tau logonaaga tuga e fakalolelole, loto kona, po ke ita ke tupu? Maeke fēfē a koe ke fakatumau e fiafia haau?

Maeke a tautolu ke fakaako taha mena aoga ke he puhala ke fakatumau e fiafia mai he fakafifitakiaga ha Ioane ko e Papatiso. Ne moua e Ioane e tau kotofaaga lalahi, ka e liga nakai amanaki a ia ke he moui haana ke pihia e lauiaaga he fekafekau ki a Iehova. Liga nakai manatu a ia to lahi e magaaho haana he nofo he fale puipui ke he magaaho haana he gahua fakamatala. Ka e matutaki agaia a Ioane ke fiafia, ti fakatumau e ia e aga nei ke he moui katoa haana. Ko e heigoa ne lagomatai a ia? Ti maeke fēfē a tautolu ke fakatumau e fiafia pete ka fehagai mo e tau fakalolelole?

He vahā tau tupu he 29 V.N., kamata e Ioane e kotofaaga haana ko e tagata foafoa he Mesia, he pehē: “Kia tokihala a a mutolu; ha ko e mena kua tata mai tuai e kautu he lagi.” (Mata. 3:2; Luka 1:12-17) Tokologa ne tali atu. Ne o mai e tau tagata tokologa he tau matakavi mamao ke logona e fekau haana, ti omoomoi e tokologa ke fakatokihala mo e papatiso. Hataki fakamalolō foki e Ioane e tau takitaki lotu fia tututonu ke he fakafiliaga ne fakatali ki a lautolu ka nakai hiki a lautolu. (Mata. 3:5-12) Kitia e ia e mena ne mua ue atu ne tupu he fekafekauaga haana he vahā tau mateafu he 29 V.N. he mogo ne papatiso e ia a Iesu. Tali mai ai, takitaki e Ioane e falu ke mumui ki a Iesu, ko e Mesia ne mavehe.​—Ioane 1:32-37.

He onoono ke he tuaga kehe pauaki ha Ioane, ne pehē a Iesu: “Nakai tu mai taha ia lautolu ne  fanau mai he tau fifine ke mua kia Ioane e papatiso.” (Mata. 11:11) Mauokafua a tautolu na fiafia lahi a Ioane ke he tau monuina ne moua e ia. Tuga a Ioane, tokologa mogonei ne moua e tau monuina homo ue atu. Taha fakatai ke he mena nei ko e matakainaga ne higoa ko Terry. Ko ia mo e hoana haana ko Sandra, ne molea 50 e tau he fekafekauaga mau. Pehē a Terry: “Loga e tau kotofaaga haaku. Fekafekau au ko e paionia, tagata he Peteli, paionia pauaki, leveki takaiaga, leveki faahimotu, ti liu foki mogonei ko e paionia pauaki.” Kua fiafia ke moua e tau kotofaaga faka-Kerisiano, ka e tuga ne fakaako e tautolu mai he fakafifitakiaga ha Ioane, ne lahi e laliaga ke fakatumau e fiafia ka hiki e tau tuaga ha tautolu.

Kua fakatumau e fiafia ha Ioane ko e Papatiso ha kua nakai galo ia ia e loto fakaaue ma e kotofaaga haana. Manamanatu ke he fakatai. He mole e papatiso ha Iesu, kamata e fekafekauaga ha Ioane ke tote fakahaga ka e tupu lahi e fekafekauaga ha Iesu. Ne tupetupe e tau tutaki ha Ioane ti o atu ki a ia mo e pehē: “Kitiala, ha ne papatiso e ia, kua o atu foki kia ia e tau tagata oti kana.” (Ioane 3:26) Tali atu a Ioane: “Ko e tagata hana e hoana, ko e kitofaihoana a ia; ka ko e kapitiga he kitofaihoana, kua tu mai mo e fanogonogo kia ia, kua fiafia lahi ke he leo he kitofaihoana; ko e haia foki kua katoatoa ai haku a fiafia nai.” (Ioane 3:29) Nakai totoko a Ioane ki a Iesu, po ke manatu a Ioane ko e gahua haana ne moua kua nakai aoga ha kua mua atu e gahua ha Iesu. Ka e fakatumau e fiafia ha Ioane ha kua tokiofa e ia e tuaga haana ko e “kapitiga he kitofaihoana.”

Lagomatai he aga ha Ioane a ia ke tumau e fiafia pete kua nakai mukamuka e kotofaaga haana. Ma e fakatai, ne fanau a Ioane ko e Naseri ti ko e mena ia kua nakai fakaatā a ia ke inu uaina. (Luka 1:15) “Hau a Ioane nakai kai, nakai inu foki a ia,” he talahau e Iesu hagaao ke he moui mukamuka ha Ioane. Ke he taha faahi, ko Iesu mo e tau tutaki haana ne nakai fakakaupā pihia ti moui tuga e tau tagata ne toe. (Mata. 11:18, 19) He nakai taute e Ioane ha mana, iloa foki e ia ko e tau tutaki ha Iesu, putoia e falu ne mumui ki a Ioane he mogo fakamua kua maeke ke taute e tau mana. (Mata. 10:1; Ioane 10:41) Nakai fakaatā e Ioane e tau kehekeheaga pihia ke fakatauhele a ia, ka e fakamakutu a Ioane ke tumau ke he kotofaaga ni haana mai ia Iehova.

Ka tokiofa foki e kotofaaga ha tautolu mogonei he fekafekauaga ha Iehova, maeke ai ke puipui ha tautolu a fiafia. Ko Terry, ne totoku fakamua kua pehē, “Hagaaki au ke he tau kotofaaga takitaha ne tuku mai ki a au.” He liu a ia manatu e moui haana he fekafekauaga mau, pehē a ia, “Ai tokihala au ka ko e tau magaaho fulufuluola ni haaku ne tokiofa.”

Maeke a tautolu ke fakalahi e fiafia ha tautolu ke he fekafekauaga he Atua he manamanatu fakahokulo ke he kakano aoga mooli he ha kotofaaga faka-Kerisiano. Ko e lilifu he eke mo “tau ekegahua . . . fakalataha mo e Atua.” (1 Kori. 3:9) Ke tuga he kanakana e koloa uho ke mau e fulufuluola, ko e manamanatu fakahokulo ke he lilifu he fekafekau ke he Atua ka taofi e tau onoonoaga hehē neke moumou e fiafia ha tautolu. To nakai fakatatai e tautolu e tau laliaga ha tautolu ke he tau laliaga he falu tagata. To nakai manamanatu a tautolu kua nakai uho lahi e kotofaaga ha tautolu ha ko e tau kotofaaga ne foaki ke he falu.​—Kala. 6:4.

Liga iloa e Ioane to nakai leva e fekafekauaga haana, ka e liga nakai mailoga e ia to fakaoti mafiti ai. (Ioane 3:30) He 30 V.N., kavi ke he ono e mahina he mole e papatiso e ia a Iesu, ne tuku he Patuiki ko Herota a Ioane ke he fale puipui. Ka e matutaki a Ioane ke taute e mena kua maeke ia ia ke fakamatala. (Mare. 6:17-20) Ko e heigoa ka lagomatai a ia ke fakatumau e fiafia pete e tau hikiaga nei? Ne hagaaki tumau a ia ke he tau mena fakaagaaga.

He haia a Ioane he fale puipui, ne fakailoa ki a ia hagaao ke he fekafekauaga ha Iesu hane tupu lahi. (Mata. 11:2; Luka 7:18) Talitonu a Ioane ko Iesu e Mesia ka e liga manamanatu a ia ke he puhala ka fakamooli e Iesu e tau mena oti ne totoku he tau Tohiaga Tapu ka fakakatoatoa he Mesia. Ha ko e mena to moua he Mesia e tuaga patuiki, to kamata agataha kia e pule ha Iesu? To takitaki kia ke he fakatoka mai ha Ioane he fale puipui? Ha kua  manako a Ioane ke maama mitaki e tuaga ha Iesu, ne fakafano e ia tokoua e tutaki haana ke hūhū ki a Iesu: “Ko koe kia ka haele mai? po ke leo atu a mautolu ke he taha?” (Luka 7:19) He liliu a laua ki a Ioane, liga fanogonogo fakamakutu a ia he fakamaama e laua kua taute e Iesu e tau fakamalolōaga fakamana ti fakafano atu a laua ke tala age ki a Ioane: “Kua ala e tau matapouli, kua o e tau kulikuli, kua fakamea e tau lepela, kua māgi e tau teligatuli, kua fakamamatike a lautolu ne mamate, kua fakamatala e vagahau mitaki ke he tau tagata nonofogati.”​—Luka 7:20-22.

Ne fakamalolō mooli he tala ha laua a Ioane. Ti fakakite ai kua fakamooli e Iesu e tau perofetaaga faka-Mesia. Kua nakai putoia he kitia mai ha Iesu ke he fakatoka mai ha Ioane he fale puipui, ka e iloa e Ioane ko e fekafekauaga haana kua uho lahi. Pete ne tau tutūaga haana, fai kakano a ia ke fiafia.

Tuga a Ioane, ka hagaaki a tautolu ke he tau mena fakaagaaga, to maeke a tautolu ke fakauka mo e fakamanavalahi katoa mo e fiafia. (Kolo. 1:9-11) Maeke a tautolu ke taute e mena nei he totou e Tohi Tapu ti manamanatu fakahokulo ki ai, he fakamanatu mai ko e gahua ha tautolu ke he fekafekauaga he Atua kua uho lahi. (1 Kori. 15:58) Pehē a Sandra: “Ko e totou taha e veveheaga he Tohi Tapu he tau aho takitaha kua lagomatai au ke fakatata lahi atu ki a Iehova. Ne lagomatai au ke hagaaki ki a ia ka e nakai ki a au.” Maeke foki a tautolu ke hagaaki ke he tau fakailoaaga he gahua he Kautu, nukua lagomatai ai ke nakai onoono ke he tau tutūaga ni ha tautolu ka e hagaaki ke he tau mena ha Iehova kua taute. “Ko e tau fakaholoaga he tau mahina takitaha he JW Broadcasting^® kua lagomatai a tautolu ke logona hifo e tata lahi ke he fakatokatokaaga,” he talahau e Sandra, “ti kua lagomatai a tautolu ke fakatumau e fiafia ke he kotofaaga ha tautolu.”

He magaaho kū ne fakamatala a Ioane ko e Papatiso, ne fakamatala a ia “ke he loto, katoa mo e malolo a Elia,” ti tuga a Elia, ko ia ko e “tagata haia tuga na tautolu.” (Luka 1:17; Iako. 5:17) Ka muitua e tautolu e fakafifitakiaga haana he loto fakaaue mo e hagaaki fakaagaaga, maeke foki a tautolu ke fakatumau e fiafia ke he fekafekauaga he Kautu pete ne tau mena ka tutupu.