1. Ko e heigoa kua manako a tautolu oti ma e tau magafaoa ha tautolu?

“MAI he magaaho ne fakaako e au e kupu mooli, manako au ke he tau tagata oti he magafaoa haaku ke fakalataha mo au i Parataiso,” ui he matakainaga fifine ko Pauline. * “Manako lahi au ke he taane haaku ko Wayne, mo e tama taane tote ha maua ke fakalataha mo au he fekafekau ki a Iehova.” Fai magafaoa nakai a koe ne nakaila iloa mo e fakaalofa ki a Iehova? Liga logona hifo a koe ki a lautolu tuga he logonaaga ha Pauline ke he magafaoa haana.

2. Ko e heigoa e tau hūhū ka fakatutala a tautolu ki ai he vala tala nei?

² Nakai omoi e tautolu e tau magafaoa ha tautolu ke talia e tala mitaki, ka e fakamafana e tautolu a lautolu ke hafagi e tau manamanatuaga mo e tau loto ha lautolu ke he fekau he Tohi Tapu. (2 Timo. 3:14, 15) Ko e ha kua lata a tautolu ke fakamatala ke he tau magafaoa ha tautolu? Ko e ha kua lata a tautolu ke fakakite e fakaalofa hofihofi? Ko e heigoa ka taute e tautolu ke lagomatai e tau magafaoa ha tautolu ke fakaalofa ki a Iehova tuga ne taute e tautolu? Ti maeke fēfē e tau matakainaga oti he fakapotopotoaga ke lagomatai a tautolu?

3. Hagaao ke he 2 Peteru 3:9, ko e ha kua lata ke fakamatala a tautolu ke he tau magafaoa?

³ Nakai leva, to moumou e Iehova e fakatokaaga nei. Ko lautolu ni “ne kotofa ke he moui tukulagi” ka momoui. (Gahua 13:48) Lahi e magaaho mo e malolō kua fakaaoga e tautolu ke fakamatala ke he tau tagata kehe he matakavi ha tautolu, ti manako pauaki foki a tautolu ke he tau magafaoa ke fekafekau mo  tautolu ki a Iehova. Ko Iehova ko e ha tautolu a Matua fakaalofa kua “nakai finagalo a ia ke malaia taha, ka kia hohoko oti kana ke he tokihala.”​—Totou 2 Peteru 3:9.

4. Ko e heigoa e mena hepe ka taute e tautolu he fakamatala ke he tau magafaoa ha tautolu?

⁴ Lata a tautolu ke tokaloto kua ha ha i ai e puhala hako mo e puhala hepe ke fakailoa e fekau he fakamouiaga. Pete kua liga fakailoilo a tautolu ka fakamatala ke he tagata kehe, liga foapū a tautolu ka tutala ke he tau magafaoa ha tautolu.

5. Ko e heigoa kua lata ke tokaloto e tautolu ato lali ke fakailoa e kupu mooli ke he tau magafaoa ha tautolu?

⁵ Tokologa a tautolu ne liga ono ki tua mo e tokihala he lali fakamua a tautolu ke fakamatala ke he tau magafaoa ti manako ke taute ai ke he taha puhala foki. Fakatonu he aposetolo ko Paulo ke he tau Kerisiano: “Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.” (Kolo. 4:5, 6) Mitaki ke manatu e fakatonuaga nei ka tutala a tautolu ke he tau magafaoa. Neke hiku ni ti fakaita e tautolu a lautolu ka e nakai lagomatai ke fanogonogo.

6-7. Talahau e fakataiaga ne fakatātā e lata ke fakakite e fakaalofa hofihofi ke he hoa nakai tua.

⁶ Fakakite e fakaalofa hofihofi. Ko Pauline ne totoku fakamua, ne pehē: “Mogo fakapā, manako au ke tutala ni hokoia ke he tau mena fakaagaaga ke he taane haaku. Nakai tutala a maua ke he tau mena tutupu.” Ka ko e taane ha Pauline ko Wayne, ne nakai lahi e iloaaga ke he Tohi Tapu ti nakai maama e mena ne tutala a Pauline ki ai. Ki a ia, tuga ko e tau mena oti ni ha Pauline ne manatu ki ai ko e lotu haana. Tupetupe a ia kua fakalataha a Pauline ke he vahega lotu hagahaga kelea ti kua fakahehē ai.

 ⁷ Talahau e Pauline ne fai mogo kua lahi mahaki e magaaho haana he tau afiafi mo e tau matahiku vahā tapu ne fakalataha mo e tau matakainaga fakaagaaga haana he tau feleveiaaga, gahua fakamatala, mo e tau fakafiafiaaga. “Hau a Wayne ki kaina he falu mogo kua nakai fai tagata i ai ti logona hifo e matimati,” he talahau e Pauline. Maama ai, kua misi e Wayne e hoana mo e tama taane haana. Nakai iloa e ia e tau tagata kua fakalataha mo laua, ti tuga kua mua e aoga he tau kapitiga foou ha Pauline ki a ia. Ne tali atu a Wayne he fakamatakutaku ke tau vevehe mo Pauline. Kitia nakai e koe e tau puhala ne kua lata a Pauline ke lahi e fakaalofa hofihofi?

8. Hagaao ke he 1 Peteru 3:1, 2, ko e heigoa kua liga mailoga lahi he tau magafaoa ha tautolu?

⁸ Fakakite e koe e mahani mitaki. Fa mahani ko e mena kua taute e tautolu ne mailoga lahi he tau magafaoa ke he tau mena ne talahau e tautolu. (Totou 1 Peteru 3:1, 2.) Mailoga e Pauline e mena ia he mogo fakamui. “Iloa e au na fakaalofa a Wayne ki a maua ti nakai manako mooli ke tau vevehe,” he ui e ia. “Ka ko e fakamatakutaku haana kua mailoga e au e lata ke kamata ke taute e tau mena he puhala ha Iehova. He nakai tutala tumau, lata au ke fakatoka e fakafifitakiaga mitaki puhala he mahani haaku.” Ne nakai liu a Pauline ke omoi a Wayne ke tutala hagaao ke he Tohi Tapu, ka e kamata a ia ke tutala mo Wayne ke he tau mena tutupu he tau aho takitaha. Kitia e Wayne kua lahi e mafola ha Pauline, ti kitia foki e ia e mahani mitaki he tama taane ha laua. (Fakatai 31:18, 27, 28) He mailoga e Wayne e lauiaaga mitaki he fekau he Tohi Tapu ke he magafaoa haana, ne hafagi e ia e manamanatuaga mo e loto haana ke he fekau mai he Kupu he Atua.​—1 Kori. 7:12-14, 16.

9. Ko e ha kua lata a tautolu ke fakamanavalahi?

 ⁹ Fakamanavalahi he lali ke lagomatai e tau magafaoa haau. Fakatoka e Iehova e fakafifitakiaga ma tautolu. Fakafano atu tumau e ia ke he tau tagata e magaaho ke fanogonogo ke he tala mitaki mo e moua e moui. (Iere. 44:4) Tala age e aposetolo ko Paulo ki a Timoteo ke fakamanavalahi ke lagomatai e falu. Ko e ha? He taute pihia, to fakamoui e ia a ia mo lautolu kua fanogonogo ki a ia. (1 Timo. 4:16) Fakaalofa a tautolu ke he tau magafaoa, ti manako a tautolu ke iloa e lautolu e tau kupu mooli i loto he Tohi Tapu. Ko e tau kupu mo e tau gahua ha Pauline ne fakahiku ke fakalagalaga mitaki ke he magafaoa haana. Moua e ia mogonei e fiafia he fekafekau ki a Iehova fakalataha mo e taane haana. Paionia tokoua a laua, ti fekafekau a Wayne ko e motua.

10. Ko e ha kua lata a tautolu ke fakauka?

¹⁰ Kia fakauka. Ka fakatatau e tau momoui ha tautolu ke he tau tutūaga he Atua, to uka he tau magafaoa ha tautolu ke hiki ke he tau taofiaga mo e tau puhala momoui foou ha tautolu. Ko e mena fakamua ne fa mailoga e lautolu kua nakai liu a tautolu ke fakalataha mo lautolu ke fakamanatu e tau faiagahau fakalotu mo e nakai liu fakalataha ke he tau matagahua fakapolitika. Liga ita e falu he magafaoa ki a tautolu he kamataaga. (Mata. 10:35, 36) Ka e ua tiaki noa a lautolu. Ka nakai eketaha a tautolu ke lagomatai a lautolu ke maama e tau taofiaga ha tautolu, tuga na fakafili e tautolu a lautolu kua nakai lata ke moua e moui tukulagi. Nakai foaki mai e Iehova e gahua fakafili ki a tautolu, ka kua kotofa age tuai e Ia ki a Iesu. (Ioane 5:22) Ka fakauka a tautolu to makai e tau magafaoa ha tautolu he mogo fakamui ke fanogonogo ke he fekau ha tautolu.​—Kikite puha “ Fakaaoga e Faahi Kupega Hila ha Tautolu ke Fakaako.”

11-13. Ko e heigoa kua fakaako e koe mai he puhala ne fehagai a Alice mo e tau matua haana?

¹¹ Kia mauokafua ka e fakailoilo. (Fakatai 15:2) Manamanatu ke he fakataiaga ha Alice. Fakaako a ia hagaao ki a Iehova he nofo mamao mai he tau matua haana ne nakai talitonu ke he Atua mo e putoia lahi ke he tau mena fakapolitika. Mailoga e ia kua latatonu a ia ke ua fakamule ke tala age ki a laua hagaao ke he tau mena mitaki ne fakaako e ia. “Ka fakatali a koe ke fai magaaho to tala age e tau hikiaga ke he tau taofiaga mo e tau gahua haau,” he ui e Alice, “to ita lahi e magafaoa haau.” Tohitohi a ia ke he tau matua haana he hūhū ke he tau manatu ha laua hagaao ke he tau fakaakoaga he Tohi Tapu ke he tau matakupu ne amanaki a ia ke fiafia a laua ki ai, tuga e fakaalofa. (1 Kori. 13:1-13) Fakaaue a ia ke he tau matua haana he feaki mo e leveki a ia, ti fakafano e ia e tau mena fakaalofa. He ahiahi atu a ia ke he kaina he tau matua haana, ne lagomatai e ia e matua fifine haana ke he tau mena he kaina. Fakamua, nakai fiafia e tau matua ha Alice he mogo ne tala age e ia ki a laua e tau taofiaga foou haana.

¹² He nofo a Alice i kaina mo e tau matua haana, ne fakatumau a ia ke he fakaholoaga totou Tohi Tapu haana. “Lagomatai he mena nei e matua fifine haaku ke maama e aoga he Tohi Tapu ki a au,” he ui e Alice. Fifili mogoia e matua taane ha Alice ke fakaako e taha mena he Tohi Tapu ke maama e hiki he manamanatuaga he tama fifine haana, ti manako a ia ke kumi kelea ke he Tohi Tapu. “Age e au e Tohi Tapu ki a ia,” he ui e Alice, “ti tohi hifo e au e manatu fakatagata.” Ko e heigoa e fua? He nakai moua e kelea, ne omoomoi lahi e matua taane ha Alice ke he tau mena ne totou e ia he Kupu he Atua.

¹³ Lata a tautolu ke mauokafua ka e fakailoilo, pete foki ka fakauka a tautolu ke he tau kamatamata. (1 Kori. 4:12e) Ma e fakatai, ko Alice ne fakauka ke he totokoaga mai he matua fifine haana. “Magaaho ne papatiso au, fakahigoa e  Mami au ko e ‘tama fifine kelea.’” Tali atu fēfē a Alice? “He nakai kalo he mena ne tupu, ne fakamaama fakalilifu e au kua fifili tuai au ke eke mo taha he Tau Fakamoli a Iehova mo e to pipiki au ke he fifiliaga ia. Lali au ke fakamafana e matua fifine haaku kua ofania mooli e au a ia. Ne tagi tokoua a maua, ti tunu e au e mena kai mitaki ke kai a ia. Tali mai he magaaho ia, kamata e matua fifine haaku ke talia ko e Tohi Tapu ati eke au mo tagata mitaki.”

14. Ko e ha kua nakai lata a tautolu ke fakahui ke he peehiaga?

¹⁴ Liga fai magaaho ato maama katoatoa he tau magafaoa kua uho lahi mahaki ki a tautolu e fekafekau ki a Iehova. Tuga anei, he mogo ne fifili a Alice ke paionia ka e nakai foli ke he gahua ne fifili he tau matua haana, ne liu e matua fifine haana tagi. Ka e fakatumau e mauokafua ha Alice. “Ka mahala a koe ke he peehiaga he taha mena,” he ui e Alice, “to liga peehi he magafaoa haau a koe ke he falu mena foki. Ka totonu a koe ka e mauokafua ke he tau magafaoa haau, falu ia lautolu ka fanogonogo ki a koe.” Ko e mena ia ne tupu ki a Alice. Kua paionia e tau matua haana mogonei, ti ko e matua taane haana ko e motua.

15. Hagaao ke he Mataio 5:14-16 mo e 1 Peteru 2:12, maeke fēfē e tau gahua mitaki he falu ke lagomatai e tau magafaoa ha tautolu?

¹⁵ Futia e Iehova e tau tagata ki a ia he puhala he tau gahua, po ke “mahani mitaki” he fakapotopotoaga Kerisiano. (Totou Mataio 5:14-16; 1 Peteru 2:12.) Kaeke ko e hoa haau ne nakai ko e taha he Tau Fakamoli a Iehova, kua feleveia nakai a ia mo e falu matakainaga he fakapotopotoaga haau? Ko Pauline ne  totoku fakamua, ne uiina e tau matakainaga ke he kaina haana ke maeke he taane haana ko Wayne ke iloa a lautolu. Manatu e Wayne e taha matakainaga taane ne lagomatai a ia ke maama mooli e tau matakainaga: “Taha e aho ne nakai fano a ia ke gahua he hau ke kitekite e pelē mo au. Ti manatu au, ‘Kua mitaki a ia!’”

16. Ko e ha ne lata a tautolu ke uiina e tau magafaoa ke o mai he tau feleveiaaga?

¹⁶ Taha puhala mitaki lahi mahaki ke lagomatai e tau magafaoa ha tautolu ko e uiina a lautolu ke o mai mo tautolu he tau feleveiaaga he fakapotopotoaga. (1 Kori. 14:24, 25) Fano a Wayne ke he feleveiaaga fakamua haana ko e Fakamanatuaga, ha kua hili e gahua mo e kū foki e fakaholoaga. “Ai maama e au e lauga,” he ui e ia, “ka e manatu e au e tau tagata. O mai a lautolu ke feleveia mo au mo e mauokafua he fakaalofa lima mo au. Mailoga e au kua moolioli a lautolu.” Taha e hoa ne fitā he totonu ki a Pauline he lagomatai a ia mo e tama haana he tau feleveiaaga mo e gahua he fonua. Ti ko e mogo ne fifili a Wayne ke maama atu foki hagaao ke he tau taofiaga foou ha Pauline, ne ole a Wayne ke he taane ke fakaako Tohi Tapu mo ia.

17. Ko e heigoa kua nakai lata ke tukupau aki ni a tautolu, ka ko e ha kua nakai lata ke tiaki noa e tau magafaoa ha tautolu?

¹⁷ Amanaki a tautolu to fakalataha mai e tau magafaoa oti ha tautolu ke fekafekau ki a Iehova. Pete ne tau laliaga oti ha tautolu ke lagomatai e tau magafaoa ke eke mo tau fekafekau he Atua, ne liga nakai o mai a lautolu ke he kupu mooli. Ka pihia, nakai lata a tautolu ke tukupau aki ni a tautolu ha ko e fifiliaga ha lautolu. Ti nakai maeke a tautolu ke omoi ha tagata ke talia e tau taofiaga ha tautolu. Mua atu ai, ua fakateaga ke he fakaohoohoaga haau ke he tau magafaoa he kitia e lautolu e fiafia haau he fekafekau ki a Iehova. Liogi ma lautolu. Tutala fakailoilo ki a lautolu. Ua maimainā! (Gahua 20:20) Kia mauokafua to fakamonuina e Iehova e tau laliaga haau. Ti ka fifili e tau magafaoa haau ke fanogonogo ki a koe, to momoui a lautolu!