1. Ko e heigoa ne ui e Tavita hagaao ke he fakatokolalo ha Iehova?

MAEKE mooli nakai a tautolu ke talahau kua mahani fakatokolalo a Iehova? Ē maeke. Taha mogo ne ui a Tavita: “Kua foaki mai foki e koe e akau punuti he fakamouiaga mai ia koe; ko e hau a holoilalo kua fakamatalahi ai au.” (2 Samu. 22:36; Sala. 18:35) Liga manamanatu a Tavita ke he aho ne hau e perofeta ko Samuela ke he fale he matua taane ha Tavita ke fakauku e patuiki ha Isaraela ma e magaaho i mua. Ko Tavita e tama fakahiku he tau tama taane tokovalu; ka ko ia ne fifili e Iehova ke hukui e Patuiki ko Saulo.​—1 Samu. 16:1, 10-13.

2. Ko e heigoa ha tautolu ka fakatutala ki ai he vala tala nei?

² Talia mooli e Tavita e tau kupu ne talahau he salamo hagaao ki a Iehova: “Ko ia ni kua fakatokolalo e ia a ia ke kitekite ke he lagi katoa mo e lalolagi. Kua fakatu hake mai he kelekele e lalo tagata, kua lagaaki e ia e tagata nofogati. . . . Kia fakanofo ai a ia fakalataha mo e tau iki.” (Sala. 113:6-8) He vala tala nei, to fakatutala fakamua ai ke he falu fakaakoaga aoga ke he mahani fakatokolalo he kitekite ke he tau tuaga ne fakakite e Iehova e mahani nei. To kumikumi foki a tautolu ke he mena ka fakaako e tautolu mai he Patuiki ko Saulo, perofeta ko Tanielu, mo Iesu hagaao ke he mahani fakalatalata.

3. Fehagai fēfē a Iehova mo tautolu, ti ko e heigoa ne fakakite he mena nei?

³ Fakakite e Iehova kua fakatokolalo a ia he puhala ne fehagai a ia mo e tau tagata tapuaki nakai mitaki katoatoa. Nakai ni talia e ia e tapuakiaga ha tautolu ka e onoono foki a ia ki a tautolu ko e tau kapitiga haana. (Sala. 25:14) Ke maeke a tautolu ke moua e tuaga kapitiga mo Iehova, fakaatā e ia e Tama haana mo poa  ma e tau agahala ha tautolu. Ko e fakaalofa noa mo e fakaalofa hofihofi mooli ha Iehova!

4. Ko e heigoa ha Iehova kua foaki ma tautolu, mo e ko e ha?

⁴ Manamanatu ke he taha puhala he mahani fakatokolalo ha Iehova. Ha ko e Tufuga, maeke a Iehova ke nakai foaki ki a tautolu e lotomatala ke fifili e puhala ke momoui a tautolu. Ka e nakai taute pihia e ia. Taute e ia a tautolu ke he haana a fakatai mo e foaki ki a tautolu e atāina ke fifili. Manako a ia ki a tautolu ko e tau tagata tokolalo ke fekafekau mai he tau loto ki a ia ha kua fakaalofa a tautolu ki a ia mo e mailoga e tau aoga he omaoma ki a ia. (Teu. 10:12; Isaia 48:17, 18) Loto fakaaue mooli a tautolu ha kua mahani fakatokolalo a Iehova!

5. Fakaako fēfē e Iehova a tautolu ke mahani fakatokolalo? (Kikite fakatino he kili.)

⁵ Fakaako e Iehova a tautolu ke mahani fakatokolalo he puhala ne fehagai a ia mo tautolu. Ko Iehova ko e Atua pulotu mua ue atu he lagi mo e lalolagi katoatoa. Pete ia, kua makai a ia ke talia e tau manatu he falu. Ma e fakatai, fakaatā e Iehova e Tama haana ke lagomatai a ia ke tufuga e tau mena oti kana. (Fakatai 8:27-30; Kolo. 1:15, 16) Ti pete ne malolō ue atu a Iehova, age e ia e falu matagahua ke he falu. Tuga anei, kotofa e ia a Iesu ke eke mo Patuiki he Kautu, mo e to foaki e Ia e falu matagahua ke he tau tagata ne 144,000 ka pule fakalataha mo Iesu. (Luka 12:32) Mooli kua fakaako e Iehova a Iesu ke eke mo Patuiki mo e Ekepoa ne Mua. (Hepe. 5:8, 9) Fakaako foki e ia a lautolu ka pule fakalataha mo Iesu, ka e nakai lali a ia ke pule ke he puhala ka taute aki e lautolu e gahua nei. Falanaki a ia to taute e lautolu e finagalo haana.​—Fakakite. 5:10.

6-7. Ko e heigoa ka fakaako e tautolu mai he ha tautolu a Matua he lagi hagaao ke he foaki e matagahua ke he falu?

⁶ Ka foaki he Matua ha tautolu he lagi e falu  matagahua ke he falu, pete he nakai lata a ia ke moua e lagomatai ha lautolu, kua mua atu foki e lata ha tautolu ke taute pihia! Tuga anei, ko koe kia ko e ulu he magafaoa po ke motua he fakapotopotoaga? Muitua e fakafifitakiaga ha Iehova he foaki e tau gahua ke he falu ti ua lali ke pule ke he puhala ne taute e lautolu e gahua. Ka fifitaki e koe a Iehova to nakai ni oti e gahua he taute ka e to fakaako foki e koe falu mo e fakalahi e mauokafua ha lautolu. (Isaia 41:10) Ko e heigoa foki ha lautolu ne tū kotofa ka fakaako mai ia Iehova?

⁷ Fakakite he Tohi Tapu kua fiafia a Iehova ke he tau manatu he tau tama haana ko e tau agelu. (1 Patu. 22:19-22) Tau matua, muitua fēfē e mutolu e fakafifitakiaga ha Iehova? Ka latatonu, hūhū ke he fanau haau ma e tau manatu ha lautolu ke taute aki e gahua. Ti ka felauaki, fakaaoga e tau manatu ha lautolu.

8. Fakauka fēfē a Iehova he fehagai mo Aperahamo mo Sara?

⁸ Taha puhala foki ne fakakite e Iehova e fakatokolalo haana ko e mahani fakauka. Ma e fakatai, fakauka a Iehova ki a lautolu ne fekafekau ki a ia kua fakalilifu he tuahā ke he tau fifiliaga haana. Fanogonogo a Iehova he tala age e Aperahamo e tau tupetupe haana ke he fifiliaga ke moumou a Sotoma mo Komora. (Kene. 18:22-33) Manamanatu foki ke he puhala ne fehagai a Iehova mo e hoana ha Aperahamo ko Sara. Nakai hukia po ke ita a Iehova he kata a Sara ke he maveheaga Haana to fatu a ia he vahā motua. (Kene. 18:10-14) Ka e fakalilifu e ia a Sara.

9. Ko e heigoa he tau matua mo e tau motua ka fakaako mai he fakafifitakiaga ha Iehova?

⁹ Tau matua mo e tau motua, ko e heigoa ka fakaako e mutolu mai he fakafifitakiaga ha Iehova? Manamanatu ke he tali haau ka nakai talia e lautolu i lalo he pule haau e tau fifiliaga haau. Ko e mena mua kia haau ke fakahako a lautolu? Po ke lali kia a koe ke maama e onoonoaga ha lautolu? Aoga mooli e tau magafaoa mo e tau fakapotopotoaga ka muitua e lautolu ne tū kotofa a Iehova. Mogonei kua fakatutala tuai a tautolu ke he mena kua fakaako e tautolu mai he fakafifitakiaga ha Iehova he mahani fakatokolalo. To fakaako e tautolu mogonei ke he mahani fakalatalata mai he tau fakafifitakiaga ne fakamau he Kupu he Atua.

10. Fakaaoga fēfē e Iehova e fakafifitakiaga he falu ke fakaako a tautolu?

¹⁰ Ha ko e ha tautolu a “Faiaoga Homo Ue Atu” (NW) ko Iehova, kua foaki e ia e tau fakafifitakiaga he Kupu haana ke fakaako a tautolu. (Isaia 30:20, 21) Fakaako e tautolu he manamanatu fakahokulo ke he tau tala he Tohi Tapu hagaao ki a lautolu ne fakakite e tau mahani Atua, putoia e mahani fakalatalata. Fakaako foki e tautolu he kumikumi ke he mena ne tupu ki a lautolu ne kaumahala ke fakakite e tau mahani mitaki ia.​—Sala. 37:37; 1 Kori. 10:11.

11. Ko e heigoa ka fakaako e tautolu mai he fakafifitakiaga kelea ha Saulo?

¹¹ Manamanatu ke he mena ne tupu ke he Patuiki ko Saulo. Ko e tama fuata mahani fakalatalata a ia he kamataaga. Mailoga e ia e tau kaupāaga haana ti nakai talia foki e ia ke loga e matagahua ka taute. (1 Samu. 9:21; 10:20-22) Ka e nakai leva ti mahani fakatokoluga a Saulo. Fakakite e ia e aga kelea nei he nakaila leva he eke a ia mo patuiki. He taha magaaho, ne nakai fakauka a ia ke fakatali ke he perofeta ko Samuela. Pete he lata a Saulo ke mahani fakalatalata he falanaki ki a Iehova ke taute taha mena ma e tau tagata, ne tugi e ia e poa huhunu ka e nakai tonuhia a ia ke taute pihia. Ko e fua, galo e Saulo e taliaaga ha Iehova ti utakehe foki e  tuaga patuiki. (1 Samu. 13:8-14) Pulotu a tautolu ka fakaako mai he fakafifitakiaga hataki nei mo e kalo kehe mai he mahani fakatokoluga.

12. Fakakite fēfē e Tanielu e mahani fakalatalata?

¹² Kehe mai he fakafifitakiaga kelea ha Saulo, manamanatu ke he fakafifitakiaga mitaki he perofeta ko Tanielu. He moui katoa ha Tanielu, ne fakatumau a ia ko e fekafekau fakatokolalo mo e mahani fakalatalata he Atua mo e ono atu tumau ki a Iehova ma e takitakiaga. Tuga anei, he mogo ne fakaaoga e Iehova a Tanielu ke fakamaama e miti ha Nepukanesa, nakai uta e ia e fakahekeaga ma haana ni. Ka e mahani fakalatalata a ia he foaki katoatoa e fakahekeaga ki a Iehova. (Tani. 2:26-28) Ko e heigoa e fakaakoaga ma tautolu? Ka fiafia e tau matakainaga ke fanogonogo ke he tau lauga ha tautolu po ke ka moua e tautolu e tau fua mitaki he gahua fakamatala, manako a tautolu ke manatu ke foaki katoatoa e fakahekeaga ki a Iehova. Lata a tautolu ke mahani fakalatalata he talahau kua nakai maeke a tautolu ke taute e tau mena nei ka noa mo e lagomatai ha Iehova. (2 Kori. 4:7) Ka moua e tautolu e aga nei, kua muitua foki a tautolu ke he fakafifitakiaga mitaki ha Iesu. He puhala fe?

13. Ko e heigoa ne fakaako e tautolu hagaao ke he mahani fakalatalata he tau kupu ha Iesu ia Ioane 5:19, 30?

¹³ Pete ni ko e Tama mitaki katoatoa he Atua a Iesu, ne falanaki a ia ki a Iehova. (Totou Ioane 5:19, 30.) Nakai lali a ia ke fofō e pule mai he Matua haana he lagi. Tala mai he Filipi 2:6 ki a tautolu kua “nakai manatu a ia [Iesu] ko e fofo mena ke fakataufata a ia mo e Atua.” Ha ko e Tama mahani omaoma a Iesu, maama e ia e tau kaupāaga haana ti fakalilifu ke he pule he Matua haana.

14. He ole ki a Iesu ke taute taha mena ne nakai kotofa ki a ia, fēfē e tali haana?

¹⁴ Manamanatu ke he tali ha Iesu he o atu e tau tutaki ko Iakopo mo Ioane mo e matua fifine ha laua ki a ia ke ole ma e kotofaaga ne nakai ha ha ia Iesu e tonuhia ke foaki. Tala age agataha a Iesu, ko e Matua haana ni he lagi ka fifili ko hai ka nofo he faahi matau mo e faahi hema ha Iesu he Kautu. (Mata. 20:20-23) Fakakite e Iesu kua fakalilifu e ia e tau mena kua tonuhia a ia ki ai. Mahani fakalatalata a ia. Nakai taute pulenoa e ia ha mena taha ne nakai kotofa e Iehova ki a ia ke taute. (Ioane 12:49) Muitua fēfē e tautolu e fakafifitakiaga mitaki ha Iesu?

15-16. Fakagahua fēfē e tautolu e fakatonuaga he Tohi Tapu ia 1 Korinito 4:6?

 ¹⁵ Muitua e tautolu e fakafifitakiaga ha Iesu he mahani fakalatalata he fakagahua e fakatonuaga he Tohi Tapu ia 1 Korinito 4:6. Tala mai he kupu ia: “Kia nakai mua ha mutolu a manatu ke he mena kua tohi.” Ka ole ke he puhala ha tautolu, nakai manako a tautolu ke talahau ni he manatu ha tautolu po ke talahau e mena fakamua ne hake mai he tau loto. Ka e lata a tautolu ke takitaki atu ke he fakatonuaga he Tohi Tapu mo e tau tohi ha tautolu ne fakavē ke he Tohi Tapu. He puhala nei kua fakakite e tautolu e tau mena kua tonuhia a tautolu ki ai. He mahani fakalatalata, kua foaki e tautolu e fakahekeaga ke he “tau fakafiliaga tonu” ha Iehova.​—Fakakite. 15:3, 4.

¹⁶ Fakalataha mo e fakaheke ki a Iehova, fai kakano mitaki foki a tautolu he fakakite e mahani fakalatalata. To onoono mogonei ke he puhala ka tamai he mahani fakatokolalo mo e mahani fakalatalata e fiafia ki a tautolu mo e lagomatai a tautolu ke femataaki mo e falu.

17. Ko e ha kua fiafia e tau tagata mahani fakatokolalo mo e mahani fakalatalata?

¹⁷ Ka mahani fakatokolalo mo e mahani fakalatalata a tautolu, liga to lahi atu e fiafia ha tautolu. Ko e ha ne pihia ai? Ka mailoga e tautolu e tau mena kua tonuhia a tautolu ki ai, to loto fakaaue mo e fiafia a tautolu ke he tau lagomatai kua moua e tautolu mai he falu. Ma e fakatai, manamanatu ke he magaaho ne fakamaulu e Iesu e tau tagata lepela tokohogofulu. Taha ni ia lautolu ne liu ke fakaaue ki a Iesu he fakamaulu e gagao kelea lahi haana, ko e mena kua nakai maeke he tagata ke taute ni e ia. Loto fakaaue e tagata fakatokolalo mo e mahani fakalatalata nei ma e lagomatai ne moua e ia, ti fakaheke a ia ke he Atua ha ko e mena nei.​—Luka 17:11-19.

18. Lagomatai fēfē he mahani fakatokolalo mo e mahani fakalatalata a tautolu ke femataaki mo e falu? (Roma 12:10)

 ¹⁸ Ko e tau tagata mahani fakatokolalo mo e mahani fakalatalata kua fa femataaki mitaki mo e falu ti liga moua e tau kapitiga tata. Ko e ha? Makai a lautolu ke talahau kua moua he falu tagata e tau mahani mitaki ti fakakite e mauokafua ki a lautolu. Ko lautolu kua mahani fakatokolalo mo e mahani fakalatalata kua fiafia ka kautū e falu he tau kotofaaga kua moua e lautolu ti mafiti ke nava mo e tuku atu e lilifu ki a lautolu.​—Totou Roma 12:10.

19. Ko e heigoa falu kakano kua lata a tautolu ke kalo kehe he mahani fakatokoluga?

¹⁹ Kehe ai, uka e tau tagata fakatokoluga ke nava e falu, he manako ke moua ni e lautolu e fakahekeaga. Liga to fakatatai e lautolu a lautolu mo e falu ti fakaohooho e aga fetoko. He nakai fakamahani mo e age e matagahua ke he falu, ko e tagata fakatokoluga ne fa manamanatu kua lata ni ke taute e ia e matagahua ha ko e manatu haana kua nakai hako e mena ne taute he falu. Ko e tagata fakatokoluga kua foli tuaga mo e mahekeheke. (Kala. 5:26) Ko e tau tagata pihia kua lavea ke tumau e tau fakafetuiaga kapitiga. Ka mailoga e tautolu kua mahani fakatokoluga a tautolu, lata a tautolu ke liogi fakamakamaka ma e lagomatai ha Iehova ke ‘liu foki fakafou he tau loto ha tautolu’ ke ua vakavaka hifo e aga kelea nei i loto ha tautolu.​—Roma 12:2.

20. Ko e ha kua lata a tautolu ke mahani fakatokolalo mo e mahani fakalatalata?

²⁰ Loto fakaaue mooli a tautolu ke he fakafifitakiaga ha Iehova! Kitia e tautolu e mahani fakatokolalo haana he puhala ne fehagai a ia mo e tau fekafekau haana, ti manako a tautolu ke fifitaki a ia. Manako foki a tautolu ke muitua ke he tau fakafifitakiaga mitaki he tau tagata mahani fakalatalata he Tohi Tapu kua moua e lilifu ke ō mo e Atua. Kia foaki tumau ki a Iehova e lilifu mo e fakahekeaga kua latatonu mo ia. (Fakakite. 4:11) To hokotia foki a tautolu ke ō mo e ha tautolu a Matua he lagi ne ofania e tau tagata mahani fakatokolalo mo e mahani fakalatalata.