1. Ko e ha ne tufugatia e Iehova e moui?

FAI MAGAAHO ne tokotaha ni a Iehova. Ka e nakai ogoogonoa a ia. Nakai lata ke ha ha i ai e tau tagata mo ia ke fiafia a ia. Ka e manako e Atua ke he falu ke moui fiafia. Ti omoomoi he fakaalofa a Iehova ke kamata ke tufugatia.​—Sala. 36:9; 1 Ioa. 4:19.

2. Fēfē e logonaaga ha Iesu mo e tau agelu ke he tau gahua tufugatia ha Iehova?

² Fakamua, tufugatia e Iehova e Tama haana ko Iesu. Ti puhala he Tama uluaki haana, “ne eke e ia e tau mena oti kana,” putoia e tokologa he tau mena momoui fakaagaaga lotomatala. (Kolo. 1:16) Fiafia lahi a Iesu ke gahua mo e Matua haana. (Fakatai 8:30) Ti fiafia foki e tau agelu he Atua. Kitia e lautolu a Iehova mo e Iki Gahua Iloilo haana ko Iesu ne tufugatia e lagi mo e lalolagi. Tali atu fēfē e tau agelu? Kamata a lautolu ke “kalaga fiafia” he mogo ne tufugatia e lalolagi, ti matutaki a lautolu ke fakakite e fiafia ke he tau gahua takitaha ha Iehova, putoia e tufugatia mua ue atu haana ko e tau tagata. (Iopu 38:7; Fakatai 8:31) Igatia e tau tufugatia nei mo e fakakite e fakaalofa mo e pulotu ha Iehova.​—Sala. 104:24; Roma 1:20.

3. Tuga ne fakakite ia 1 Korinito 15:21, 22, ko e heigoa ne fakaatā he poa lukutoto ha Iesu?

³ Finagalo a Iehova ma e magafaoa he tagata ke moui tukulagi  he palaneta fulufuluola ne tufugatia e ia. Ka ko e mogo ne totoko a Atamu mo Eva ke he Matua fakaalofa ha laua, ne hoko mai e agahala mo e mate ke he lalolagi katoa. (Roma 5:12) Tali atu fēfē a Iehova? He magaaho nā, talahau e ia e puhala ka fakahao e ia e tau tagata. (Kene. 3:15) Finagalo a Iehova ke foaki e lukutoto ke maeke e tau fanau ha Atamu mo Eva ke tokanoa mai he agahala mo e mate. Ti fakaatā mogoia e ia e tau tagata takitaha ke fifili ke fekafekau ki a Ia mo e moua e moui tukulagi.​—Ioane 3:16; Roma 6:23; totou 1 Korinito 15:21, 22.

4. Ko e heigoa e tau hūhū ka fakatutala a tautolu ki ai he vala tala nei?

⁴ Ko e maveheaga he Atua ke fakaliu tu mai a lautolu ne mamate kua lagā mai e tau hūhū loga. Ma e fakatai, to liga fakahoko fēfē e fakaliu tu mai? To mailoga nakai e tautolu e tau fakahele ha tautolu ka fakaliu tu mai? He tau puhala fe ka tamai he liu tu mai e fiafia ki a tautolu? Ti atihake fēfē he manamanatu fakahokulo ke he liu tu mai e loto fakaaue ha tautolu ke he fakaalofa, pulotu, mo e fakauka ha Iehova? Kia fakatutala la tautolu ke he tau hūhū takitaha ia.

5. Ko e ha kua talitonu a tautolu to fakaliu tu mai e tau tagata he puhala fakatokatoka mo e maopoopo?

⁵ Ka fakaliu tu mai e Iehova e tau tagata tokologa puhala he haana Tama, liga manatu a tautolu to nakai taha e magaaho ka liliu tutū mai oti a lautolu ke he moui. Ko e ha? Ka amanaki ti tokologa lahi e tau tagata he lalolagi to tupu mai e tau mena vihi. Na fakatokatoka e Iehova e tau mena oti he puhala maopoopo. Iloa e ia ke hololoa e mafola, kua lata ke fai fakatokatokaaga tumau. (1 Kori. 14:33) Ko Iehova ko e Atua pulotu mo e fakauka he magaaho ne gahua a ia mo Iesu ke tauteute e  lalolagi ato tufuga e tau tagata ke nonofo ai. Ko e mena ia, to fakatātā e Iesu e tau aga pihia foki he Pule Afe Tau ka gahua a ia mo lautolu ka hao i Amaketo ke tauteute e lalolagi ke lata mo lautolu ka fakaliu tu mai.

6. Hagaao ke he Gahua 24:15, ko hai foki ka fakaliu tu mai e Iehova?

⁶ Mua atu, ko lautolu ka hao i Amaketo to lata ke fakaako e tau tagata ka liliu tu mai hagaao ke he Kautu he Atua mo e tau puhala ha Iehova. Ko e ha? Ha kua laulahi ia lautolu ka liu momoui to putoia a lautolu kua “hepehepe.” (Totou Gahua 24:15.) To taute e lautolu e tau hikiaga loga ke aoga mai he lukutoto he Keriso. Manamanatu ke he gahua kua putoia he fakaako e kupu mooli hagaao ke he Atua ke he tau tagata tokologa ne nakai iloa a Iehova. To igatia kia e tagata mo e moua e fakaakoaga ni haana, tuga e puhala ne taute e tautolu e tau fakaako Tohi Tapu mogonei? To kotofa kia a lautolu nei ne foou ke he tau fakapotopotoaga mo e fakamahani ai ke fakaako a lautolu ka fakaliu tu mai he mogo fakamui? Fakatali ni a tautolu to kitia. Ka e iloa e tautolu, ka hoko ke he fakahikuaga he Pule Afe Tau he Keriso, “to puke e lalolagi ke he maama kia Iehova.” (Isaia 11:9) Ko e afe tau ia to lavelave ka e fiafia mooli!

7. Ko e ha kua fakaalofa hofihofi e tau tagata he Atua he fakaako a lautolu ka fakaliu tu mai?

⁷ He magahala he Pule Afe Tau he Keriso, to matutaki e tau tagata oti ha Iehova he lalolagi ke taute e tau hikiaga ke fakafiafia a Ia. To moua mogoia e lautolu oti e fakaalofa hofihofi mooli he lagomatai e tau tagata ka fakaliu tu mai ke totoko e tau manako agahala mo e momoui fakatatau ke he tau puhala ha Iehova. (1 Pete. 3:8) Nakai noa ko lautolu ka liliu mai ke he moui to futiaki ke he tau tagata mahani fakatokolalo ha Iehova, hane ‘gahua ke momoui ai’ foki.​—Filipi 2:12.

8. Ko e ha kua maeke ke manatu ko e tau tagata ka fakafeleveia a lautolu ka fakaliu tu mai to mailoga e tau fakahele ha lautolu?

⁸ Loga e kakano ka manamanatu a tautolu to maeke a lautolu ka fakaliu tu mai ke mailoga e tau fakahele ha lautolu. Tuga anei, fakavē ke he tau liu tu mai ne fitā e fakahoko, tuga kua liu a Iehova tufugatia e tau tagata ke tatai e foliga, vagahau, mo e manamanatu he puhala taha ato mamate a lautolu. Fakatatai e Iesu e mate ke he mohe mo e liu tu mai ke he ala hake he mohe. (Mata. 9:18, 24; Ioane 11:11-13) Ka aala hake e tau tagata he momohe, kua foliga mo e tutala agaia a lautolu tuga he magaaho to momohe a lautolu, ti pihia foki e manamanatuaga ha lautolu. Manamanatu la ke he mena ne tupu ki a Lasalo. Fā tuai e aho he mate a ia ti kua kamata e tino haana ke popo. Ka ko e magaaho ne fakaliu tu mai e Iesu a ia, mailoga agataha he lafu mahakitaga haana a ia ti manatu agaia e Lasalo a laua.​—Ioane 11:38-44; 12:1, 2.

9. Ko e ha a lautolu ka fakaliu tu mai to nakai liliu mai mo e tino mo e manamanatuaga mitaki katoatoa?

⁹ Mavehe a Iehova to nakai fai tagata ka momoui i lalo hifo he pule he Keriso ka pehē: “Kua gagao au.” (Isaia 33:24; Roma 6:7) Ko lautolu mogoia ka fakaliu tu mai he mate to malolō e tau tino. Ka e to nakai mitaki katoatoa a lautolu he mogoia ni. Neke nakai kitia he tau fakahele ha lautolu a lautolu. Tuga to mitaki katoatoa fakahaga e tau tagata oti kana he magahala he Pule Afe Tau he Keriso. Ka hokotia la ke he matahiku he taha e afe tau ka liuaki age e Iesu e Kautu ke he haana Matua. Ko e fakakatoatoa laia e matagahua he Kautu, putoia e fakahoko e tau tagata oti kana ke he tuaga mitaki katoatoa.​—1 Kori. 15:24-28; Fakakite. 20:1-3.

10. To lauia fēfē e logonaaga haau ha ko e liu tu mai?

¹⁰ Manamanatu la ke he magaaho ka fakafeleveia e koe e tau fakahele haau. To kata po ke tagi kia a koe ha ko e fiafia ne logona hifo e koe? To fiafia lahi mahaki kia a koe ti uhu e tau lologo fakaheke ki a Iehova? Taha e mena kua mooli, to logona hifo e koe e fakaalofa lahi mahaki ke he haau a Matua fakahele mo e haana Tama ne fakamokoi lahi mahaki ha ko e mena fakaalofa mua ue atu ko e liu tu mai.

11. Hagaao ke he tau kupu ha Iesu ne fakamau ia Ioane 5:28, 29, ko e heigoa ka logona hifo e lautolu kua momoui fakatatau ke he tau tuaga tututonu he Atua?

¹¹ Manamanatu la ke he fiafia ha lautolu ka fakaliu tu mai he toka kehe e lautolu e tau aga tuai mo e momoui fakatatau ke he tau tuaga tututonu he Atua. Ko lautolu kua hikihiki e tau momoui to logona mooli e liliu tu mai ke he moui. He taha faahi, ko lautolu ka totoko ke he Atua to nakai fakaatā ke fakatauhele e mafola he Parataiso.​—Isaia 65:20; totou Ioane 5:28, 29.

12. To fakamonuina fēfē e Iehova e tau tagata oti kana he lalolagi?

¹² I lalo hifo he pule he Kautu, to logona he tau tagata oti he Atua e mooli he tau kupu he Tau Fakatai 10:22: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.” He gahuahua e agaaga ha Iehova ki luga ha lautolu, to moui fakaagaaga mooli e tau tagata he Atua, kakano to eke a lautolu ke tuga e Keriso mo e momoui ke hokotia atu ke he mitaki katoatoa. (Ioane 13:15-17; Efeso 4:23, 24) He tau aho takitaha to malolō lahi e tau tino ha lautolu ti eke mo tau tagata mitaki. To mua atu e fiafia he moui he magaaho ia! (Iopu 33:25) Ka e maeke fēfē he manamanatu fakahokulo ke he liu tu mai ke lagomatai a koe mogonei?

13. Ia Salamo 139:1-4, fakakite fēfē he liu tu mai kua iloa mitaki e Iehova a tautolu?

¹³ Fitā he fakatutala a tautolu ki ai, ka fakaliu tu mai e Iehova e tau tagata, to liuaki age e ia e tau manamanatuaga mo e tau aga ha lautolu tuga ni fakamua. Manamanatu la ke he kakano he mena ia. Fakaalofa lahi a Iehova ki a koe ti iloa e ia e tau mena oti kua manamanatu, logona hifo, talahau, mo e taute e koe. Ti ka fakaliu tu mai e Iehova a koe, to mukamuka lahi a ia ke liuaki atu e tau manatu, aga, mo e mahani haau. Mailoga lahi he Patuiki ko Tavita e fiafia mooli ha Iehova ki a tautolu takitokotaha. (Totou Salamo 139:1-4.) Fēfē e logonaaga ha tautolu mogonei he iloa kua maama mitaki e Iehova a tautolu?

14. Lauia fēfē a tautolu he manamanatu fakahokulo ke he puhala kua iloa mitaki e Iehova a tautolu?

¹⁴ Ka manamanatu fakahokulo a tautolu ke he puhala kua iloa mitaki e Iehova a tautolu, nakai lata a tautolu ke tupetupe. Ko e ha? Manatu na leveki moolioli e Iehova a tautolu. Uho a tautolu takitokotaha ki a ia. Mataala lahi a ia ke he tau mena ne tutupu ke he tau momoui ha tautolu. Ko e manatu mafanatia mooli! Nakai lata ke logona hifo kua tokotaha ni a tautolu. He tau minuti takitaha he tau aho oti, ko Iehova he faahi ha tautolu, ti manako ke lagomatai a tautolu.​—2 Nofo. 16:9.

15. Fakakite fēfē he liu tu mai e pulotu ha Iehova?

¹⁵ Ko e matakutakuina he mate ko e kanavaakau malolō lahi. Ko lautolu i lalo he pule a Satani kua fakaaoga ai ke fakaohooho e tau tagata ke afo e tau kapitiga ha lautolu po ke tiaki e mahani fakamooli ha lautolu. Ka e nakai kaumahala a tautolu ke he fakamatakutaku ia. Iloa e tautolu ka tamate he tau fī ha tautolu a tautolu, to liu a Iehova  ke fakamomoui a tautolu. (Fakakite. 2:10) Mauokafua a tautolu to nakai fai mena ke fakamamutu e kapitiga ha tautolu mo Iehova. (Roma 8:35-39) Ko e pulotu ofoofogia mooli kua fakakite e Iehova he foaki ki a tautolu e amaamanakiaga he liu tu mai! He puhala nei ati utakehe e taha he tau kanavaakau kelea lahi ha Satani, ka e magaaho taha kua foaki ki a tautolu e malolō mauokafua.

16. Ko e heigoa e tau hūhū kua lata a koe ke hūhū hifo, ti lagomatai fēfē he tau tali a koe ke iloa e lahi mahaki he falanaki haau ki a Iehova?

¹⁶ Ka fakamatakutaku he tau fī ha Iehova ke tamate a koe, to mauokafua nakai a koe to fakaliu tu mai e Iehova a koe? Iloa fēfē e koe? Taha puhala ke hūhū hifo ki a koe, ‘Fakakite nakai he tau fifiliaga ikiiki haaku he tau aho takitaha kua falanaki au ki a Iehova?’ (Luka 16:10) Taha hūhū foki, ‘Fakakite nakai he puhala moui haaku kua falanaki au ke he maveheaga ha Iehova ke leveki e tau manako fakatino ka tuku fakamua e au e Kautu haana?’ (Mata. 6:31-33) Ka tali a koe ē ke he tau hūhū ia, kua fakakite mogoia kua falanaki a koe ki a Iehova, mo e to mautali a koe ke he ha kamatamata ka fehagai mo koe.​—Fakatai 3:5, 6.

17. (a) Fakakite fēfē he liu tu mai e fakauka ha Iehova? (e) Fakakite fēfē e tautolu e loto fakaaue ke he fakauka ha Iehova?

¹⁷ Ha ha ia Iehova e aho mo e magaaho kua kotofa ke fakaotioti e fakatokaaga kelea nei. (Mata. 24:36) To nakai fakatepetepe a ia mo e to nakai fakahoko ai ato hoko e magaaho ne kotofa. Malolō e manako haana ke fakaliu tu mai a lautolu ne mamate, ka e fakauka a ia. (Iopu 14:14, 15) Fakatali a ia ato hoko e magaaho tonu ke fakamomoui a lautolu. (Ioane 5:28) Ha ha ia tautolu e tau kakano mitaki ke loto fakaaue ke he fakauka ha Iehova. Manamanatu la: Ha kua fakauka a Iehova, tokologa e tagata ti putoia foki a tautolu, ne fai magaaho ke “hohoko oti kana ke he tokihala.” (2 Pete. 3:9) Manako a Iehova ke tokologa e tagata ka moua e magaaho ke maeke ke momoui tukulagi. Kia fakakite e tautolu e loto fakaaue ke he fakauka haana. Fēfē? He eketaha ke kumi a lautolu oti ne lata “ke he moui tukulagi” mo e lagomatai a lautolu ke fakaalofa ki a Iehova mo e fekafekau ki a ia. (Gahua 13:48) To aoga mogoia a lautolu mai he fakauka ha Iehova ke tuga ni a tautolu.

18. Ko e ha kua lata a tautolu ke fakauka ke he falu?

¹⁸ To fakatali fakatekiteki a Iehova ato oti e  taha e afe tau mo e to amanaki a ia ke mitaki katoatoa a tautolu. Ato hoko e magaaho ia, makai a Iehova ke fakamagalo e tau agahala ha tautolu. Lata mogoia a tautolu ke kumi e mitaki he falu mo e fakauka ki a lautolu. Manamanatu ke he fakafifitakiaga he taha matakainaga fifine ne kamata e taane haana ke matematekelea he tupetupe lahi mahaki ti oti e fano ke he tau feleveiaaga. “Mamahi lahi mahaki e mena nei ki a au,” he ui e ia. “Ko e tau pulega ha maua ma e vahā i mua ko e magafaoa kua galo oti.” Ka e he tutupu e tau mena oti nei, ne matutaki ni e hoana ofania nei ke fakauka ke he taane haana. Falanaki a ia ki a Iehova ti nakai fakalolelole a ia. Tuga a Iehova, nakai hagaaki a ia ke he lekua ka e hagaaki a ia ke he tau mena mitaki hagaao ke he taane haana. Pehē a ia, “Ha ha he taane haaku e tau aga mitaki lahi, ti eketaha a ia ke malolō fakahaga.” Aoga lahi mogoia ma tautolu ke fakauka ki a lautolu he magafaoa po ke fakapotopotoaga ha tautolu hane lali ke fahia mai he tau paleko!

19. Ko e heigoa ha tautolu ka eketaha ke taute?

¹⁹ Fiafia a Iesu mo e tau agelu he mogo ne tufugatia fakamua e lalolagi. Ka e manamanatu la ke he fiafia ha lautolu ka kitia e lalolagi kua puke he tau tagata mitaki katoatoa kua fakaalofa mo e fekafekau ki a Iehova. Manamanatu ke he fiafia ha lautolu ne tamai he lalolagi ke he lagi ke pule fakalataha mo e Keriso he kitia e lautolu e tau tagata kua aoga mai he gahua ha lautolu. (Fakakite. 4:4, 9-11; 5:9, 10) Manamanatu foki ka momoui he magaaho ka hukui he tau hihina mata he fiafia e tau hihina mata he mamahi, gagao, momoko, mo e mate ka utakehe tukulagi. (Fakakite. 21:4) Ato hoko e magaaho ia, kia eketaha ke fifitaki ha tautolu a Matua fakaalofa, pulotu, mo e fakauka. Ka taute pihia e koe, to fakatumau e fiafia haau pete e tau kamatamata ka fehagai mo koe. (Iako. 1:2-4) To loto fakaaue mooli a tautolu ke he maveheaga ha Iehova ke “liu foki tutu mai a lautolu kua mamate”!​—Gahua 24:15.