1. Ko e heigoa e lilifu ne moua e tautolu?

KO E lilifu lahi ke ha ha i loto he fakapotopotoaga ha Iehova! Ko tautolu he parataiso fakaagaaga ne pukenamo he tau tagata mafola mo e fiafia. Ko e heigoa e vala haau i loto he fakapotopotoaga?

2. Ko e heigoa e fakataiaga ne fakaaoga he aposetolo ko Paulo he tau tohi loga haana he Tohi Tapu?

² Lahi e mena ka fakaako e tautolu hagaao ke he matakupu nei mai he fakataiaga ne fakaaoga lagaloga he aposetolo ko Paulo he tau tohi loga haana he Tohi Tapu. He tau tohi takitaha nei, ne fakatatai e Paulo e fakapotopotoaga ke he tino he tagata. Fakatatai foki e ia e tau tagata takitaha he fakapotopotoaga ke he tau faahi tino he tagata.​—Roma 12:4-8; 1 Kori. 12:12-27; Efeso 4:16.

3. Ko e heigoa e tau fakaakoaga tolu ka fakatutala a tautolu ki ai he vala tala nei?

³ He vala tala nei, to fakatutala a tautolu ke he tolu e fakaakoaga aoga ka ako e tautolu mai he fakataiaga ha Paulo. Fakamua, to fakaako e tautolu kua igatia a tautolu mo e kotofaaga * he fakapotopotoaga ha Iehova. Uaaki, to fakatutala a tautolu ke he mena ka taute e tautolu kaeke kua uka ia tautolu ke maama e matagahua ha tautolu he fakapotopotoaga. Mo e toluaki, to fakatutala a tautolu ke he kakano kua lata ke fakatumau ke taute e matagahua ha tautolu he fakapotopotoaga he Atua.

4. Ko e heigoa ne fakaako he Roma 12:4, 5 ki a tautolu?

⁴ Ko e fakaakoaga fakamua ka ako e tautolu mai he fakataiaga ha Paulo kua igatia a tautolu mo e tuaga uho he magafaoa ha Iehova. Kamata e Paulo e fakataiaga haana he pehē: “Ha ko e mena tuga ne tino taha ha ha i ai e tau fahi tino loga, ka e nakai ko e feua taha he tau fahi tino oti; Kua pihia foki a tautolu ne tokologa, kua tino taha kia Keriso, ka e fakafehagaiaki e tau fahi tino.” (Roma 12:4, 5) Ko e heigoa e kakano ha Paulo? Igatia a tautolu oti mo e kehekehe e tau matagahua he fakapotopotoaga, ka e uho a tautolu takitokotaha.

5. Ko e heigoa e “tau mena fakaalofa” nukua foaki e Iehova ke he fakapotopotoaga?

⁵ Ka manamanatu a koe ki a lautolu kua fai tuaga he fakapotopotoaga, liga mafiti a koe ke manamanatu ki a lautolu kua takitaki. (1 Tesa. 5:12; Hepe. 13:17) Mooli he puhala ia Keriso kua foaki e Iehova e “tau mena fakaalofa ke he tau tagata” ma e fakapotopotoaga Haana. (Efeso 4:8) Ko e “tau mena fakaalofa ke he tau tagata” nei kua putoia a lautolu he Kau Fakatufono, lautolu kua kotofa ke lagomatai e Kau Fakatufono, tau matakainaga he La Komiti, tau leveki takaiaga, lautolu ne fakaako e tau aoga faka-Tohi Tapu, tau motua he fakapotopotoaga mo e tau fekafekau lagomatai. Kotofa he agaaga tapu e tau matakainaga taane oti nei ke leveki e tau mamoe fakahelehele ha Iehova mo e gahua ke fakamalolō e fakapotopotoaga.​—1 Pete. 5:2, 3.

6. Ia 1 Tesalonia 2:6-8, ko e heigoa kua eketaha e tau matakainaga taane ne kotofa he agaaga tapu ke taute?

⁶ Kua kotofa he agaaga tapu e tau matakainaga taane ke leveki e tau matagahua kehekehe. Tuga ni e tau faahi kehekehe he tino, ko e tau lima mo e tau hui, kua gahuahua ke lata mo e tino katoa, ko e tau matakainaga taane ne kotofa he agaaga tapu kua gahua malolō ke aoga e fakapotopotoaga katoa. Nakai kumi ni e lautolu e fakahekeaga ha lautolu. Ka e eketaha a lautolu ke fakamafana mo e fakamalolō e tau matakainaga oti. (Totou 1 Tesalonia 2:6-8.) Fakaaue a tautolu ki a Iehova ma e tau matakainaga taane ia ne lotomatala fakaagaaga mo e mahani fakamokoi!

7. Ko e heigoa e tau monuina ne moua e lautolu kua fekafekau mau?

⁷ Falu he fakapotopotoaga kua liga kotofa ke fekafekau ko e tau misionare, tau paionia pauaki, po ke tau paionia mau. Kua eke he tau matakainaga he lalolagi katoa e fakamatala mo e taute tutaki mo gahua mau ha lautolu. He taute pihia, kua lagomatai e lautolu e tokologa ke eke mo tau tutaki ha Keriso Iesu. Pete kua gahoa e tau koloa fakatino he tau matakainaga nei ne gahua fakamatala mau, kua foaki e Iehova ki a lautolu e moui ne loga e monuina. (Mare. 10:29, 30) Ofania e tautolu e tau matakainaga fakahele nei, mo e loto fakaaue kua eke a lautolu mo vala he fakapotopotoaga!

8. Ko e ha kua uho ki a Iehova e tau tagata fakailoa oti he tala mitaki?

⁸ Ko lautolu ni kia hokoia e tau matakainaga taane ne kotofa mo lautolu ne fekafekau mau kua fai vala he fakapotopotoaga? Nakai pihia! Ko e tau tagata fakailoa oti he tala mitaki kua aoga ke he Atua mo e fakapotopotoaga. (Roma 10:15; 1 Kori. 3:6-9) Ko e taha he tau foliaga ne mua e aoga he fakapotopotoaga ko e taute tutaki ma e ha tautolu a Iki ko Iesu Keriso. (Mata. 28:19, 20; 1 Timo. 2:4) Ko lautolu oti kua fakalataha mo e fakapotopotoaga, ko e tau tagata fakailoa ne papatiso mo e nakaila papatiso, kua lali ke tuku fakamua e matagahua nei.​—Mata. 24:14.

9. Ko e ha kua ofania e tautolu e tau matakainaga fifine Kerisiano ha tautolu?

⁹ Fakakite e Iehova e lilifu ke he tau matakainaga fifine Kerisiano he foaki ki a lautolu  e matagahua aoga he fakapotopotoaga. Uho ki a Iehova e tau hoana, tau matua fifine, tau takape, mo e tau matakainaga fifine ne nonofo takitokotaha hane fekafekau fakamooli ki a Ia. Lagaloga e totoku he Tohi Tapu e tau fifine mahani mitaki ne fakafiafia e Atua. Kua nava ki a lautolu ha ko e tau fakafifitakiaga mitaki he pulotu, tua, fakamakutu, loto malolō, fakamokoi, mo e tau gahua mitaki. (Luka 8:2, 3; Gahua 16:14, 15; Roma 16:3, 6; Filipi 4:3; Hepe. 11:11, 31, 35) Loto fakaaue mooli a tautolu ki a Iehova ma e tau fifine Kerisiano he tau fakapotopotoaga ha tautolu ne ha ha i ai e tau aga mitaki nei foki!

10. Ko e ha ne ofania e tautolu e tau matakainaga momotua ha tautolu?

¹⁰ Fiafia foki a tautolu he tokologa e tau matakainaga momotua. Falu he tau fakapotopotoaga ne ha ha i ai e tau matakainaga momotua kua fekafekau fakamooli ki a Iehova he tau momoui katoa ha lautolu. Falu matakainaga momotua kua liga nakaila leva ia e fakaako e kupu mooli. He ha tuaga ni, liga taufetului e tau matakainaga momotua ha tautolu mo e tau lekua malolō tino kehekehe ha kua fuakau. Liga fakakaupā he tau lekua ia e tau mena kua maeke a lautolu ke taute he fakapotopotoaga mo e gahua fakamatala. Ka e taute e lautolu nei kua momotua e tau mena kua fahia a lautolu he gahua fakamatala, ti fakaaoga e tau malolō oti ha lautolu ke fakamafana mo e fakamahani e falu! Ti aoga a tautolu mai he tau iloaaga ha lautolu. Fulufuluola mooli a lautolu ki a Iehova mo tautolu.​—Fakatai 16:31.

11-12. Atihake fēfē a koe he tau fuata ikiiki he fakapotopotoaga haau?

¹¹ Manamanatu foki ke he tau fuata ikiiki ha tautolu. Fehagai a lautolu mo e loga he tau paleko he tutupu hake he lalolagi nei ne pule a Satani ko e Tiapolo ki ai mo e tau fakaohoohoaga kelea haana. (1 Ioa. 5:19) Ka e atihake a tautolu oti ka kitia e tau fuata ikiiki kua tali he tau feleveiaaga, fai vala he gahua fakamatala, mo e loto malolō ke lalago e tau taofiaga ha lautolu. Ē, ko mutolu e tau fuata ikiiki kua fai vala aoga foki he fakapotopotoaga ha Iehova!​—Sala. 8:2.

¹² Ka ko e falu matakainaga ha tautolu kua  taufetului ke talitonu kua fai vala aoga lahi a lautolu he fakapotopotoaga. Ko e heigoa ka lagomatai a tautolu ke logona hifo kua fai vala a tautolu takitokotaha he fakapotopotoaga? Kia fakatutala a tautolu ki ai.

13-14. Ko e ha kua logona hifo he falu kua nakai uho a lautolu ke he fakapotopotoaga?

¹³ Mailoga e fakaakoaga ke uaaki kua ako e tautolu mai he fakataiaga ha Paulo. Fakamaama e ia e lekua ne lauia e tokologa mogonei; uka lahi a lautolu ke talitonu na fai aoga a lautolu ke he fakapotopotoaga. Tohia e Paulo: “Kaeke ke pehe mai e hui, Ha ko e mena nakai ko e lima au, nakai ha he tino au; ko e moli kia kua nakai ha he tino a ia? Kaeke ke pehe mai e teliga, Ha ko e mena nakai ko e mata au, nakai ha he tino au; ko e moli kia, kua nakai ha he tino a ia?” (1 Kori. 12:15, 16) Ko e heigoa kua fakaako mai e Paulo?

¹⁴ Ka fakatatai e koe a koe ke he falu he fakapotopotoaga, to liga nakai kitia e koe e aoga haau he fakapotopotoaga. Falu he fakapotopotoaga kua liga eke mo tau faiaoga iloilo, tau tagata fakatokatoka mitaki, po ke tau leveki mamoe mafanatia mo e atihake. Liga logona hifo e koe kua nakai moua e koe e tau lotomatala pihia. Fakakite he mena nei kua fakatokolalo mo e mahani fakalatalata a koe. (Filipi 2:3) Ka e lata ke fakaeneene. Ka fakatatai tumau e koe a koe mo lautolu ne lotomatala lahi, to fakalolelole e loto haau. Liga logona hifo e koe foki tuga ne talahau e Paulo, kua nakai fai vala a koe i loto he fakapotopotoaga. Ko e heigoa ka lagomatai a koe ke fehagai mo e tau logonaaga pihia?

15. Ia 1 Korinito 12:4-11, ko e heigoa kua lata a tautolu ke mailoga hagaao ke he tau mena fakaalofa ne moua e tautolu?

¹⁵ Manamanatu ke he mena nei: Na foaki e Iehova ke he falu Kerisiano he senetenari fakamua e tau mena fakaalofa ofoofogia he agaaga tapu, ka e nakai moua he tau Kerisiano oti e tau mena fakaalofa ia. (Totou 1 Korinito 12:4-11.) Foaki e Iehova ki a lautolu e tau mena fakaalofa mo e tau lotomatala kehekehe, ka e uho oti e tau Kerisiano takitaha. He vahā nei, nakai fai  mena fakaalofa ofoofogia a tautolu he agaaga tapu. Ka e gahua agaia e matapatu fakaakoaga. Liga nakai tatai oti e tau lotomatala ha tautolu takitokotaha, ka e uho oti a tautolu ki a Iehova.

16. Ko e heigoa e fakatonuaga mai he aposetolo ko Paulo kua lata a tautolu ke fakagahua?

¹⁶ He nakai fakatatai a tautolu mo e falu Kerisiano, lata a tautolu ke fakagahua e fakatonuaga ne omoomoi he aposetolo ko Paulo: “Ka kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha.”​—Kala. 6:4.

17. Aoga fēfē a tautolu ka muitua e tautolu e fakatonuaga ha Paulo?

¹⁷ Ka muitua a tautolu ke he fakatonuaga omoomoi ha Paulo mo e kumikumi ke he tau gahua ni ha tautolu, liga kamata a tautolu ke kitia kua moua e tautolu e tau mena fakaalofa mo e tau lotomatala pauaki. Ma e fakatai, liga nakai lotomatala e motua he fakaako mai mua he fakapotopotoaga, ka e liga mitaki lahi he taute tutaki. Po ke nakai iloilo a ia he fakatokatoka tuga falu motua he fakapotopotoaga haana, ka e liga iloa a ia ko e leveki mamoe totonu ne mukamuka e tau tagata fakailoa ke o atu ke moua e tomatomaaga faka-Tohi Tapu. Po ke liga mailoga a ia ke he aga fakamokoi haana. (Hepe. 13:2, 16) Ka kitia mitaki e tautolu e tau malolō mo e tau lotomatala ni ha tautolu, to mitaki e logonaaga ha tautolu ke he tau mena ka taute e tautolu he fakapotopotoaga. Ti liga nakai mahekeheke a tautolu ke he tau matakainaga kua moua e tau lotomatala ne kehe mai he ha tautolu.

18. Feaki fēfē e tautolu e tau lotomatala ha tautolu?

¹⁸ Ko e heigoa ni e vala ha tautolu he fakapotopotoaga, lata a tautolu oti ke manako ke fakaholo ki mua e fekafekauaga mo e feaki e tau lotomatala ha tautolu. Ke lagomatai a tautolu ke holo ki mua, foaki e Iehova e fakamahaniaga mitaki lahi mai he fakatokatokaaga haana. Ma e fakatai, he feleveiaaga ha tautolu he faahi tapu, moua e tautolu e fakaakoaga kua lauia mitaki ke he gahua fakamatala ha tautolu. Kua fakaaoga katoatoa nakai e tautolu e fakaholoaga fakamahani ia?

19. Hokotia fēfē a koe ke he foliaga ke fina atu he Aoga ma e Tau Tagata Fakamatala?

¹⁹ Ko e taha fakaholoaga fakamahani foki ne mitaki lahi ko e Aoga ma e Tau Tagata Fakamatala. Hafagi e aoga nei ke he tau matakainaga oti kua gahua mau ne 23 ke he 65 e tau tau he moui. Liga kitia e koe kua nakai fakaai a koe ke hokotia ke he foliaga nei. Ka e he nakai fakamau hifo e tau kakano ne nakai maeke a koe ke fano he aoga, kia fakamau hifo e tau kakano kua manako a koe ke fano. Ti tauteute e fakatokaaga ka lagomatai a koe ke hokotia ke tuku e tohi ole. He lagomatai e Iehova mo e gahua malolō haau, ko e mena mogoia ne tuga kua nakai maeke ia koe ke taute, to maeke ia koe.

20. Ko e heigoa ka fakaako e tautolu mai ia Roma 12:6-8?

²⁰ Ko e fakaakoaga ke toluaki ka ako e tautolu mai he fakataiaga ha Paulo kua moua ia Roma 12:6-8. (Totou.) Liu foki a Paulo fakakite mai ko e tau tagata he fakapotopotoaga kua kehekehe e tau mena fakaalofa. Ka e fakamaama e ia mogonei kua lata a tautolu ke fakaaoga e tau lotomatala ha tautolu ke fakamafana mo e fakamalolō e fakapotopotoaga.

21-22. Ko e heigoa e fakaakoaga ka ako e tautolu mai ia Robert mo Felice?

²¹ Manamanatu ke he mena ne tupu ke he matakainaga ka fakahigoa e tautolu ko Robert. He mole e fekafekau a ia he motu kehe, ne kotofa a ia ke gahua he Peteli he motu ne tupu hake a ia. Pete kua fakamafana ki a ia kua nakai hiki e kotofaaga haana ha kua fai mena hepe a  ia ne taute, pehē a ia: “Ko e logonaaga kelea haaku hagaao ki a au ne tuga kua kaumahala, ti totou mahina he manatu pihia au. Fai magaaho ne logona hifo e au ke oti e gahua he Peteli.” Puhala fe ne liu a ia moua e fiafia haana? Fakamanatu he motua totonu ki a ia na fakaako e Iehova a tautolu he tau matagahua takitaha ha tautolu kua mole ke aoga lahi ma e matagahua ha tautolu mogonei. Mailoga e Robert kua lata a ia ke oti e onoono ki tua mo e kamata ke hagaaki ke he tau mena kua maeke a ia ke taute he magaaho tonu nei.

²² Ko e Matakainaga taane ko Felice Episcopo ne fehagai foki mo e paleko pihia. Ne paase mai a ia mo e hoana haana i Kiliata he 1956 ti gahua leveki takaiaga i Bolivia. He 1964 ne fai tama a laua. Pehē a Felice: “Paleko ki a maua ke toka e kotofaaga ne uho lahi ki a maua. Tala atu e au, liga taha e tau ne moumou e au he momoko. Ka ko e lagomatai ha Iehova, ne hiki e aga haaku ti hagaaki ke he kotofaaga foou haaku he eke mo matua.” Logona hifo pihia nakai a koe tuga a Robert po ko Felice? Lolelole nakai e loto haau ha kua nakai tatai e kotofaaga haau mogonei mo e he magaaho kua mole? Ka pihia, to fiafia lahi a koe ka hiki e koe e onoonoaga haau mo e hagaaki ke he mena ka taute e koe he magaaho tonu nei ke fekafekau ki a Iehova mo e tau matakainaga haau. Fakatumau ke gahua malolō he fakaaoga e tau mena fakaalofa mo e tau lotomatala haau ke lagomatai e falu, to moua e koe e fiafia he fakamafana e koe e fakapotopotoaga.

23. Ko e heigoa kua lata a tautolu ke fai magaaho ke taute, mo e ko e heigoa ka fakatutala a tautolu ki ai he vala tala ka mui mai?

²³ Kua uho oti a tautolu takitokotaha ki a Iehova. Manako a ia ke eke a tautolu mo vala he magafaoa haana. Ka fakaaoga e tautolu e taha magaaho ke manamanatu fakahokulo ke he mena ke taute e tautolu ke atihake e tau matakainaga ha tautolu mo e gahua malolō ke taute ai, to liga nakai logona hifo e tautolu kua nakai fai vala a tautolu he fakapotopotoaga! Ka e fēfē e onoonoaga ha tautolu ke he falu he fakapotopotoaga? Fakakite fēfē e tautolu kua loto fakaaue a tautolu ki a lautolu? He vala tala ka mui mai, to fakatutala a tautolu ke he matakupu aoga ia.