1-3. (a) Ha ha he tuaga fe e tau tagata fuata oti, ti fakatatai e tautolu ke he heigoa e mena ia? (Kikite fakatino he kamataaga.) (e) Ko e heigoa ka lagomatai e tau Kerisiano ikiiki he tuaga nei?

MANAMANATU kua fakatoka a koe ke fano ke he taha matagahua pauaki he taone mamao. Ke fano fenoga, lata a koe ke heke e pasi. He tuaga pasi, he mogo fakamua ne fakagogoa a koe ha kua tokologa lahi e tagata ti loga lahi foki e pasi. Ka kua fiafia ai he iloa tonu e koe e mena ka fano ki ai mo e pasi ka heke ai. To nakai heke a koe he falu pasi foki ha kua iloa e koe to uta a koe he hala hepe.

² Ko e moui kua tuga e fenoga, ti ko mutolu e tau fuata ikiiki kua tuga e tau tagata he tuaga pasi. Falu magaaho kua loga lahi e tau fifiliaga he moui ti maeke ke fakagogoa e logonaaga haau. Kaeke ke iloa tonu e koe e matakavi ke fano ki ai, to mukamuka lahi ke taute e koe e tau fifiliaga hako. Ko e puhala fe kua lata a koe ke fifili?

³ To tali he vala tala nei e hūhū ia mo e to fakamafana a koe ke hagaaki e moui haau ke fakafiafia a Iehova. Kakano ai ke muitua  e fakatonuaga ha Iehova he tau fifiliaga oti ne lata a koe ke taute he moui, tuga e vahega fakaakoaga po ke gahua tupe ka moua e koe po ke mau ti fanafanau a koe. Kakano ai ke fakamakamaka ke hokotia ke he tau foliaga fakaagaaga, ko e tau foliaga ka fakatata lahi a koe ki a Iehova. Ka hagaaki tumau a koe ke fekafekau ki a Iehova, to maeke ke iloa e koe to fakamonuina e ia a koe ti lagomatai ke kautū.​—Totou Tau Fakatai 16:3.

4. Ko e heigoa ka kumikumi a tautolu ki ai he vala tala nei?

⁴ Kua mitaki ke fakatoka e tau foliaga fakaagaaga. Ko e ha? To kumikumi a tautolu ke he tolu e kakano. Ko e kakano fakamua mo e ke uaaki to lagomatai a koe ke kitia ko e fakamakamaka ke hokotia ke he tau foliaga fakaagaaga ke eke a koe mo kapitiga mitaki foki ha Iehova. Ko e kakano ke toluaki to fakakite kua mitaki ke fakatoka e tau foliaga nei he tote a koe.

5. Ko e heigoa e kakano aoga lahi he fakatoka e tau foliaga fakaagaaga?

⁵ Ko e kakano aoga lahi he fakatoka he tau foliaga fakaagaaga ko e fakaaue ki a Iehova ma e fakaalofa haana mo e mena ne taute e ia ma tautolu. Taha tagata tohia he Salamo ne pehē: “Kua mitaki ke fakaheke atu kia Iehova, . . . Ha kua fakafiafia mai e koe au ke he hāu a gahua, Iehova na e; to kalaga fiafia na au ha ko e tau mena ne eke he hāu a tau lima.” (Salamo 92:1, 4) Manamanatu ke he tau mena oti ne tuku atu e Iehova ki a koe: haau a moui, tua, Tohi Tapu, fakapotopotoaga, mo e amaamanakiaga he moui tukulagi he Parataiso. Ka fakatoka e koe e tau foliaga fakaagaaga, kua fakakite e koe ki a Iehova e loto fakaaue haau ke he tau mena oti kana ne fakatata a koe ki a Ia.

6. (a) Maeke fēfē e tau foliaga fakaagaaga ke lauia e fakafetuiaga haau mo Iehova? (e) Ko e heigoa falu foliaga ka fakatoka e koe he mogo ne tote a koe?

⁶ Ko e kakano ke uaaki ke fakatoka e tau foliaga fakaagaaga ko e magaaho ka eketaha a koe ke hokotia ki ai, kua taute e koe e gahua mitaki ma Iehova. To fakatata lahi he mena nei a koe ki a Ia. Mavehe he aposetolo ko Paulo: “Nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” (Heperu 6:10) Nakai tote lahi a koe ke fakatoka e tau foliaga. Ma e fakatai, ko Christine ne 10 e tau he moui he mogo ne fifili a ia ke totou tumau e tau tala he tau momoui he tau matakainaga fakaagaaga mahani fakamooli. Ko Toby ne 12 e tau he moui he mogo ne fakatoka e ia e foliaga ke totou e Tohi Tapu katoa ato papatiso. Ko Maxim ne 11 e tau he moui mo e mahakitaga haana ko Noemi ne 10 e tau he moui he mogo ne papatiso a laua. Fakatoka e laua e foliaga ke fekafekau he Peteli. Ke fakatumau e hagaaki ke he foliaga ia, ne pine hake e laua e tohi ole he Peteli ke he kaupā he kaina ha lautolu. Ka e kua a koe? Manamanatu nakai a koe ke he falu foliaga ka fakatoka e koe ti kamata ke gahua ke hokotia ai?​—Totou Filipi 1:10, 11.

7, 8. (a) Maeke fēfē he fakatoka he tau foliaga ke fakamukamuka lahi ka taute e tau fifiliaga? (e) Ko e ha ne nakai fifili e taha fuata mui ke fano ke he univesitī?

⁷ Ko e heigoa e kakano ke toluaki ne mitaki ke fakatoka e tau foliaga he tote a koe? Ha ko e fuata tote, loga e tau fifiliaga kua lata a koe ke taute. Lata a koe ke fifili e fakaakoaga po ke gahua ka moua e koe mo e falu mena loga foki. Ko e tau fifiliaga anei he moui  kua tuga e tau mafegahala ke hokotia ki ai ka taute e fenoga haau. Ka iloa e koe e mena ka fano ki ai to mukamuka a koe ke fifili e puhala ka fano ai. He puhala pihia foki, ka iloa e koe e tau foliaga haau to mukamuka lahi ke taute e tau fifiliaga pulotu. Pehē e Tau Fakatai 21:5: “Ko e tau manatu he tagata ne malolo ke gahua kua hiku ia ke he muhu mena.” Ka taute tuai e tau pulega haau he fakatoka e tau foliaga mitaki, to mafiti a koe ke moua e kautūaga. Pihia e mena ne tupu ki a Damaris he mogo ne lata a ia ke taute e fifiliaga aoga lahi he fuata mui.

⁸ Mitaki lahi e tau gahua aoga ha Damaris ti ko e mogo ne oti mo e aoga tokoluga ne maeke a ia ke fano ke he univesitī ke fakaako loea ka e nakai totogi e ia e fakaakoaga haana. Ka e nakai pihia, ne fifili a ia ke gahua he pege. Ko e ha? Mogo ne tote lahi a ia, ne fifili a ia ke paionia. Pehē a ia: “Kakano ai ke gahua tupe vala magaaho. He moua e tikulī (degree) loea he fano he univesitī, to loga e tupe haaku ka moua ka e tote e magaaho haaku ke moua e gahua tupe vala magaaho.” Paionia a Damaris mogonei ke 20 e tau. Logona hifo nakai e ia kua fakatoka e ia e foliaga hako mo e taute e fifiliaga hako he fuata mui a ia? Ē. He pege ne gahua a ia, ne feleveia a ia mo e tau loea tokologa ne taute e gahua ne lata a ia ke taute ane fano ke he univesitī. Pehē a ia kua tokologa a lautolu ne nakai fiafia lahi ke he tau gahua ha lautolu. Logona hifo e Damaris ko e tau tau oti nei he paionia ne foaki ki a ia e fiafia mo e lagomatai a ia ke kalo kehe mai he nakai fiafia tuga a lautolu.

9. Ko e ha ne matalahi a tautolu he tau fuata ikiiki ha tautolu?

⁹ Totou afe he tau fuata ikiiki ha tautolu he lalolagi katoa hane mitaki e mena ne taute ti latatonu ke nava ki ai. Ko e fakafetuiaga ha lautolu mo Iehova mo e tau foliaga fakaagaaga ha lautolu e matapatu he tau momoui ha lautolu. Kua fiafia mooli he tau fuata ikiiki nei e moui, mo e magaaho taha kua fakaako a lautolu ke muitua ke he takitakiaga ha Iehova he tau mena oti ne putoia e fakaakoaga, gahua tupe, mo e moui magafaoa. Pehē a Solomona: “Kia tua a koe kia Iehova mo e hāu a loto katoa.” Lafi e ia: “Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” (Tau Fakatai 3:5, 6) Tau fuata ikiiki, kua ofania lahi mahaki e Iehova a mutolu! Kua uho lahi a mutolu ki a ia, mo e to puipui, takitaki, ti fakamonuina e ia a mutolu.

10. (a) Ko e ha kua lata e gahua fakamatala ke eke mo taha he tau mena ne mua e aoga ki a tautolu? (e) Maeke fēfē a koe ke mitaki he fakamaama e tau taofiaga haau?

¹⁰ Ka hagaaki haau a moui ke fakafiafia a Iehova, to manako a koe ke tala age ke he falu hagaao ki a Ia. Pehē a Iesu Keriso “to fakamatala fakamua foki e vagahau mitaki.” (Mareko 13:10) Mafiti e gahua fakamatala ti lata ke eke mo taha he tau mena ne mua e aoga ki a tautolu. Maeke nakai a koe ke fakatoka e foliaga he fakamatala tumau? Maeke nakai a koe ke paionia? Ka e kua ka nakai fiafia lahi a koe ke fakamatala? Maeke fēfē a koe ke mitaki he fakamaama e tau taofiaga haau?  Ua e mena ka lagomatai a koe: Mautauteute fakamitaki, ti ua fiu he tala age ke he falu e tau mena ne iloa e koe hagaao ki a Iehova. Liga ofo a koe ke he lahi he fiafia haau he gahua fakamatala.

11, 12. (a) Ko e heigoa ka taute e koe ke mautauteute ke tala age ke he falu hagaao ki a Iehova? (e) Fakaaoga fēfē he taha matakainaga fuata e magaaho ke tutala hagaao ki a Iehova he aoga?

¹¹ Kamata he tauteute e tali ke he falu hūhū ka hūhū he tau kapitiga aoga haau, ma e fakatai, “Ko e ha ne talitonu a koe ke he Atua?” Haia e tau vala tala he ha tautolu a faahi kupega hila ka lagomatai a koe ke tali e hūhū ia. Ka onoono a koe ki lalo he BIBLE TEACHINGS > TEENAGERS, to moua e koe e laupepa gahua ne ha ha ai e mataulu “Why Do I Believe in God?” Muitua ke he tau lakaaga he laupepa gahua nei ke tauteute e tali ni haau. To moua e koe tolu e kupu Tohi Tapu ka fakaaoga: Heperu 3:4, Roma 1:20, mo e Salamo 139:14. Ha ha i ai foki e tau laupepa gahua ka fakaaoga e koe ke tauteute e tau tali ke he tau hūhū loga foki.​—Totou 1 Peteru 3:15.

¹² Tala age ke he tau kapitiga aoga haau na maeke a lautolu ke kumi e tau vala tala he jw.org. Ko e mena ia ne taute e Luca. Kua tutala e vahega haana ke he tau lotu kehekehe. Mailoga e Luca kua loga e mena ne talahau he taha tohi hagaao ke he Tau Fakamoli a Iehova ne hepe. Pete he hopoate a Luca, ne ole a ia ke he faiaoga ke maeke ke tala age ke he vahega e kakano ne hepe e tau mena ia. Fakaatā he faiaoga a ia ke fakamaama e tau mena ne talitonu a ia ki ai, ti maeke ke fakakite e faahi kupega hila ke he vahega katoa. Ma e gahua aoga i kaina, tala age e faiaoga ke he tau tama oti he vahega ke kitekite e vitiō Beat a Bully Without Using Your Fists.  Maeke nakai a koe ke manamanatu ke he fiafia ha Luca he tutala hagaao ki a Iehova he aoga?

13. Ko e ha kua nakai lata a tautolu ke fakalolelole ka fehagai mo e tau mena uka?

¹³ Ka fehagai a koe mo e tau mena uka, ua fakalolelole ka e tumau ke gahua ke he tau foliaga haau. (2 Timoteo 4:2) Pihia e mena ne taute e Katharina. He 17 e tau haana, ne fakatoka e ia e foliaga ke fakamatala ke he tau kapitiga gahua oti haana. Taha ia lautolu ne ekefakakelea lagaloga a ia. Ka e nakai nimo e Katharina e foliaga haana. Ko e mahani mitaki haana ne nava e taha kapitiga gahua haana ne higoa ko Hans. Kamata a ia ke totou e tau tohi ha tautolu, fakaako e Tohi Tapu, ti papatiso. Nakai iloa e Katharina e mena nei ha kua hiki tuai a ia ke he taha matakavi. Ti ofo lahi a ia he 13 e tau fakamui, ko ia mo e magafaoa haana he feleveiaaga ti ko e tagata lauga ma e toloaga ko Hans! Fiafia lahi a ia ha kua nakai fakalolelole a ia ke he foliaga haana ke fakamatala ke he tau kapitiga gahua.

14, 15. (a) Ko e heigoa kua lata ke manatu e koe ka peehi he falu a koe ke taute e mena ne taute e lautolu? (e) Ko e heigoa ka taute e koe ke fakatumau e malolō ka peehi he falu a koe?

¹⁴ Fakamafana tuai he vala tala nei a koe ke fifili ke hagaaki e moui haau ke fakafiafia a Iehova mo e fakatoka e tau foliaga fakaagaaga. Ka e tokologa e fuata ikiiki ne atu mo koe kua manako ke moua e magaaho fiafia. Liga uiina e lautolu a koe ke taute e mena ne taute e lautolu. To nakai leva ti lata a koe ke fakakite ke he falu kua aoga lahi ki a koe ke hokotia ke he tau foliaga haau. Ua fakaatā e falu ke taute a koe ke nimo e tau foliaga nei. Kaeke ko koe he tuaga pasi ne totoku he kamataaga he vala tala, to heke nakai a koe he ha pasi ha kua moua he tau tagata ne heke ai e magaaho fiafia? Nakai pihia!

¹⁵ Ti ko e heigoa ka taute e koe ke fakatumau e malolō ka peehi he falu a koe ke taute e mena ne taute e lautolu? Kalo kehe he tau tuaga ka uka ke totoko e peehiaga. (Tau Fakatai 22:3) Manamanatu ke he tau fua mamahi he taute e tau mena kua hepe. (Kalatia 6:7) Ti talahau fakatokolalo kua lata a koe ma e fakatonuaga mitaki. Fanogonogo ke he tau mena ne tala atu he haau a tau matua mo e tau matakainaga malolō fakaagaaga he fakapotopotoaga.​—Totou 1 Peteru 5:5, 6.

16. Fakakite fēfē he mena ne tupu ki a Christoph kua aoga lahi ke mahani fakatokolalo?

¹⁶ Ko e mahani fakatokolalo kua lagomatai a Christoph ke talia e fakatonuaga mitaki. Nakai leva he mole e papatiso haana, ne kamata a ia ke fano tumau ke he fale faofao tino. Uiina he falu fuata i ai a ia ke hū he kalapu sipote ha lautolu. Tutala a ia ke he motua hagaao ke he mena ia ti tala age e motua ki a ia ke manamanatu hagaao ke he falu hagahagakelea, tuga e fetoko lahi. Fifili a Christoph ke hū he kalapu sipote. Ka e fai magaaho he mole, mailoga e ia kua favale mo e hagahagakelea foki e sipote. Liu a ia tutala ke he tau motua ti foaki e lautolu ki a ia e fakatonuaga mai he Tohi Tapu. Pehē a Christoph, “Fakafano mai e Iehova ki a au e tau tagata fakatonu mitaki, ti fanogonogo au ki a Ia pete he fai magaaho ke taute ai.” Fakatokolalo mooli nakai a koe ke talia e fakatonuaga mitaki?

17, 18. (a) Ko e heigoa ne manako a Iehova ma e tau fuata ikiiki he vahā nei? (e) Kalo kehe fēfē a koe he tokihala ke he tau fifiliaga haau he mogo ka lahi hake a koe? Talahau e mena ne tupu.

¹⁷ Pehē e Tohi Tapu: “Ko e fuata na e kia olioli a a koe ke he hāu a vaha tote, kia fiafia foki  a koe ke he tau aho he hāu a vaha fuata.” (Fakamatalaaga 11:9) Manako a Iehova ke fiafia a koe he mogo ne tote ai. He vala tala nei, kua fakaako e koe ko e taha puhala ke fiafia ko e hagaaki tumau a koe ke he tau foliaga fakaagaaga haau, mo e muitua ke he fakatonuaga ha Iehova ke he tau pulega mo e tau fifiliaga oti kana haau. He taute tuai e koe e mena nei he moui haau, to nakai leva ti logona hifo e koe e puhala ne takitaki, puipui, mo e fakamonuina e Iehova a koe. Manamanatu ke he tau fakatonuaga mitaki oti ne foaki e ia ki a koe he haana a Kupu ti fakagahua e fakatonuaga: “Hanai, kia manatu a a koe ke he hāu a vaha fuata kia ia ne eke a koe.”​—Fakamatalaaga 12:1.

¹⁸ Mafiti e tutupu hake e tau fanau ikiiki ti eke mo tau tagata lalahi. Momoko ai, tokologa ne tokihala fakamui he fakatoka e tau foliaga hepe po ke nakai fai foliaga he mogo ne ikiiki a lautolu. Kaeke ke hagaaki tumau a koe ke he tau foliaga fakaagaaga haau, to fiafia a koe ke he tau fifiliaga haau he mogo ka lahi. Pihia e logonaaga ha Mirjana. He fuata mui, mitaki lahi a ia he tau sipote. Uiina foki a ia ke fai vala he Winter Olympic Games. Ka e fifili a ia ke fekafekau tumau ki a Iehova. Molea 30 e tau he mole, ko ia agaia he fekafekauaga mau ti fakalataha mo e taane haana. Pehē a ia ko e tau tagata ne manako ke he talahaua, lilifu, pule, mo e tau monuina kua nakai fiafia mooli. Pehē foki a ia ko e tau foliaga ne mua e mitaki ko e fekafekau ke he Atua mo e lagomatai e tau tagata ke iloa a Ia.

19. Ko e ha kua mitaki ke hagaaki ke he tau foliaga fakaagaaga he mogo ne ikiiki a mutolu?

¹⁹ Ko mutolu ko e tau fuata ikiiki kua latatonu mooli ke nava ki a mutolu ha kua pete ne uka e tau mena ne fehagai ki ai, kua hagaaki e tau momoui ha mutolu ke fekafekau ki a Iehova. Fakatoka e mutolu e tau foliaga fakaagaaga, ti onoono a mutolu ke he gahua fakamatala ko e taha he tau mena ne mua e aoga he tau momoui ha mutolu. Nakai fakaatā foki e mutolu e lalolagi ke taute a mutolu ke nimo e tau foliaga. Maeke a mutolu ke mauokafua kua nakai teao e gahua malolō ha mutolu. Ha ha mo mutolu e tau matakainaga ne ofania mo e lalago a mutolu. “Kia tuku atu a kia Iehova hāu a tau gahua; ti fakamau ai e ia e tau mena ne manamanatu ki ai a koe.”