1-2. Ko e ha ne tupetupe lahi a Iesu?

KE HE aho fakahiku ha Iesu, ne tupetupe lahi a ia. Nakai leva ti mate fakakelea a ia he kelipopo ke he tau lima he tau tagata hala. Ka e nakai ni manamanatu a Iesu ke he mate haana ka hoko mai. Kua fakaalofa lahi a ia ke he Matua haana ti manako ke fakafiafia a Ia. Iloa e Iesu ka mahani fakamooli a ia ke he kamatamata uka ka hoko mai, to lalago e ia ke fakatokoluga e higoa ha Iehova. Fiafia foki a Iesu ke he tau tagata ti iloa e ia ko e amaamanakiaga ha tautolu ke he vahā anoiha ma e moui tukulagi to fakavē ke he mahani fakamooli tumau haana he moui ke he lalolagi.

² Pete kua fakaatukehe lahi mahaki a Iesu, ne ha ha ia ia e mafola. “Ko e monuina [mafola] haku ke ta atu e au kia mutolu,” he tala age e ia ke he tau aposetolo haana. (Ioane 14:27) Ha ha ia ia e “monuina [mafola] foki mai he Atua,” ko e fakatotoka ne fua mai he fakafetuiaga uho he tagata mo Iehova. Lagomatai he mafola ia e manamanatuaga mo e loto ha Iesu ke fakatotoka.​—Filipi 4:6, 7.

3. Ko e heigoa ka kumikumi a tautolu ki ai he vala tala nei?

³ Nakai fai ia tautolu ka fehagai mo e peehiaga pihia ne fakauka ki ai a Iesu, ka ko e tau tagata oti ne mumui ki a ia to fehagai mo e tau kamatamata. (Mata. 16:24, 25; Ioane 15:20) Tuga a Iesu, to tupetupe foki a tautolu he falu magaaho. Ko e heigoa ka taute e tautolu ke nakai molea e fakaatukehe ti galo e mafola he manamanatuaga ha tautolu? Kia kumikumi a tautolu ke he tolu e mena ne taute e Iesu he fekafekauaga haana he lalolagi mo e kitia e puhala ka fifitaki e tautolu a ia ka fehagai mo e tau kamatamata.

4. He tokaloto e 1 Tesalonia 5:17, talahau falu fakafifitakiaga ne fakakite kua liogi tumau a Iesu he aho fakahiku he moui haana he lalolagi.

⁴ Totou 1 Tesalonia 5:17. Liogi tumau a Iesu he aho fakahiku he moui haana ke he lalolagi. Mogo ne fakatū e ia e fakamanatuaga he mate haana, liogi a ia ke lata mo e areto mo e uaina. (1 Kori. 11:23-25) Ato toka e matakavi ne taute e Paseka, ne liogi a ia mo e tau tutaki. (Ioane 17:1-26) He hohoko atu a ia mo e tau tutaki haana ke he Mouga ko Olive he pō ia, ne liogi tumau a ia. (Mata. 26:36-39, 42, 44) Ti ko e tau kupu fakahiku ne talahau e Iesu ato mate a ia, ko e liogi. (Luka 23:46) Puhala he liogi, putoia e Iesu a Iehova ke he tau mena oti ne tutupu he aho fakahiku he moui haana.

5. Ko e ha ne lolelole e loto malolō he tau aposetolo?

⁵ Taha kakano kua fakauka a Iesu ke he kamatamata haana ha kua falanaki a ia he liogi ke he Matua. Ka ko e tau aposetolo ne kaumahala he pō ia ke fakamakamaka ke he liogi. Ko e fua, ne lolelole e loto malolō ha lautolu he fehagai mo e kamatamata. (Mata. 26:40, 41, 43, 45, 56) Ka fehagai a tautolu mo e tau kamatamata, to fakatumau ni e mahani fakamooli ha tautolu ka muitua ke he fakafifitakiaga ha Iesu mo e ke liogi tumau. Ko e heigoa ha tautolu ka ole he liogi?

6. To lagomatai fēfē he tua a tautolu ke fakatumau e mafola?

⁶ Liogi a tautolu ki a Iehova ke ‘fakalahi ha tautolu a tua.’ (Luka 17:5; Ioane 14:1) Lata ke ha ha ia tautolu e tua ha ko e mena to kamatamata e Satani e tau tagata oti ne mumui ki a Iesu. (Luka 22:31) To lagomatai fēfē he tua a tautolu ke fakatumau e mafola pete ka fehagai mo e tau paleko loga? Ka taute e tau mena oti kua lata ia tautolu ke fehagai mo e  kamatamata, to omoomoi he tua a tautolu ke tuku atu ki a Iehova e mena ne tupetupe a tautolu. Ha kua falanaki a tautolu to iloa mitaki e ia e mena ke taute, to mafola e manamanatuaga mo e loto ha tautolu.​—1 Pete. 5:6, 7.

7. Ko e heigoa ne fakaako e koe mai he talahauaga ha Robert?

⁷ Lagomatai he liogi a tautolu ke fakatumau e mafola he loto pete e tau kamatamata ne fehagai mo tautolu. Manamanatu ke he fakataiaga ki a Robert, ko e motua fakamooli ne 80 tumā e tau mogonei. Pehē a ia: “Ko e fakatonuaga ia Filipi 4:6, 7 kua lagomatai au ke fehagai mo e tau kamatamata loga he moui haaku. Ha ha ia au e tau lekua fakatupe. Ti galo fakakū e kotofaaga haaku he eke mo motua.” Ko e heigoa ne lagomatai a Robert ke fakatumau e mafola he loto? “Liogi fakamafiti au he kamata ke logona hifo e fakaatukehe,” he ui e ia. “Talitonu au ka lahi tumau mo e mauokafua ke he liogi to lahi e logonaaga mafola haaku.”

8. Ia Ioane 8:29, ko e heigoa taha kakano ne ha ha ia Iesu e mafola he loto?

⁸ Totou Ioane 8:29. Pete kua favale ki ai, ne mafola e loto ha Iesu he iloa kua fakafiafia e ia e Matua haana. Fakatumau a ia ke omaoma pete kua uka ma haana ke taute pihia. Fakaalofa a ia ke he Matua haana ti tuku fakamua e fekafekauaga ha Iehova he moui katoa haana. Ato hifo mai a Iesu ke he lalolagi, ko ia ko e “tufuga,” po ke iki gahua he Atua. (Fakatai 8:30) He ha ha he lalolagi, fakaako fakamakutu e ia e falu hagaao ke he Matua haana. (Mata. 6:9; Ioane 5:17) Tamai he gahua ia e fiafia lahi ki a Iesu.​—Ioane 4:34-36.

9. Maeke fēfē he lavelave ke he gahua fakamatala ke lagomatai a tautolu ke fakatumau e mafola he loto?

 ⁹ Maeke a tautolu ke fifitaki a Iesu he omaoma ki a Iehova mo e tumau ke “fakamakai nakai noa ke he gahua he Iki.” (1 Kori. 15:58) Ka “fakaatukehe [lavelave]” a tautolu ke he gahua fakamatala, to maeke a tautolu ke onoono mitaki ke he tau tupetupe ha tautolu. (Gahua 18:5) Ma e fakatai, ko lautolu ne feleveia mo tautolu he gahua he fonua ne fa lalahi atu e tau lekua ke he ha tautolu. Ka e he mogo ne fakaako a lautolu ke fakaalofa ki a Iehova mo e fakagahua e fakatonuaga haana, holo ki mua e mitaki he tau momoui ha lautolu ti fiafia lahi. He tau magaaho takitaha ne kitia e tautolu e mena ia ne tupu, ti logona hifo ai e mauokafua to leveki e Iehova a tautolu. Lagomatai he talitonu ia a tautolu ke fakatumau e mafola he loto. Talahau pihia he matakainaga fifine ne taufetului e moui katoa he gagao fakaatukehe mo e tau logonaaga hokulo he nakai fai aoga. “Ka lavelave au he gahua fakamatala,” pehē a ia, “kua lagotatai mo e fiafia lahi e logonaaga haaku. Manatu au kua pihia he gahua au he fonua ti tata lahi mahaki e logonaaga ki a Iehova.”

10. Ko e heigoa ne fakaako e koe mai he talahauaga ha Brenda?

¹⁰ Manamanatu foki ke he fakafifitakiaga he matakainaga fifine ne higoa ko Brenda. Ko ia mo e tama fifine haana ne matematekelea he gagao multiple sclerosis. Nofo tumau ni a Brenda he nofoa fakataveli ti fakakaupā e fahia. Fakamatala a ia mai he taha gutuhala ke he taha gutuhala ka maeke, ka e lahi ni e fakamatala haana he tohitohi. Pehē a ia: “He talia e au ke he manamanatuaga mo e logonaaga kua nakai maeke e tuaga haaku ke hiki he fakatokaaga nei, logona hifo e au e atāina ke hagaaki ke he gahua fakamatala haaku. Maeke e gahua fakamatala ke utakehe e onoonoaga haaku mai he tau fakaatukehe haaku. Peehi ki a au ke fakatumau ke lagomatai a lautolu ne feleveia mo au he fonua. Ti fakamanatu tumau he mena ia ki a au e amaamanakiaga ne moua e au ma e anoiha.”

11-13. (a) Fakakite fēfē he tau aposetolo mo e falu ko e tau kapitiga mooli ki a Iesu? (e) Lauia fēfē e logonaaga ha Iesu ha ko e tau kapitiga haana?

¹¹ He magaaho katoa ne fakamatala a Iesu, eke e tau aposetolo fakamooli mo tau kapitiga mitaki ki a ia. Ko e tau fakafifitakiaga mooli a lautolu ke he fakatai ne pehē: “Ha ha i ai taha kua ofania mai kua mua he pipiki mai a ia ke he matakainaga.” (Fakatai 18:24) Uho lahi e tau kapitiga pihia ki a Iesu. He fekafekauaga haana, nakai fai lafu a ia ne tua ki a ia. (Ioane 7:3-5) Taha magaaho, ne manamanatu e tau magafaoa haana kua vikoia a ia. (Mare. 3:21) Kehe mamao ai, maeke a Iesu ke talahau ke he tau aposetolo fakamooli he pō ato mate a ia: “Ko mutolu nā, ne tumau a mutolu kia au ke he tau mena ne kamatamata ai au.”​—Luka 22:28.

¹² Falu magaaho kua fakahogohogo manava he tau aposetolo a Iesu, nakai hagaaki a ia ke he tau hehē ha lautolu ka kua kitia e ia e tua ha lautolu ki a ia. (Mata. 26:40; Mare. 10:13, 14; Ioane 6:66-69) He pō fakahiku mo lautolu ato tamate a Iesu, pehē a ia ke he tau tagata taane fakamooli nei: “Totoku atu e au a mutolu ko e tau kapitiga; ha kua fakailoa atu e au kia mutolu e tau mena oti ne fanogonogo ai au ke he haku a Matua.” (Ioane 15:15) Ko e punaaga mooli he fakamafanaaga e tau kapitiga ha Iesu ki a ia. Ko e lagomatai ne foaki e lautolu ki a Iesu he fekafekauaga haana ne fiafia lahi mahaki a ia.​—Luka 10:17, 21.

¹³ Lafi ke he tau aposetolo, fai kapitiga foki a Iesu, ko e tau tagata taane mo e tau fifine ne lagomatai a ia he gahua fakamatala mo e falu puhala aoga foki. Falu ne uiina a ia ke kai he tau kaina ha lautolu. (Luka 10:38-42; Ioane 12: 1, 2) Falu ne fenoga mo ia mo e fakaaoga e tau koloa ha lautolu mo ia. (Luka 8:3) Moua e Iesu e tau kapitiga mitaki ha ko ia ko e kapitiga mitaki ki a lautolu. Taute e ia e tau mena mitaki ma lautolu ti nakai molea e amanaki haana ki a lautolu. Mitaki katoatoa a Iesu, ka e loto fakaaue a ia ke he lalago ne foaki he tau kapitiga nakai mitaki katoatoa haana ki a ia. Nakai fakauaua ai, kua lagomatai e lautolu a ia ke fakatumau e mafola he loto haana.

14-15. Maeke fēfē a tautolu ke moua e tau kapitiga mitaki, ti maeke fēfē a lautolu ke lagomatai a tautolu?

¹⁴ To lagomatai he tau kapitiga mitaki a tautolu ke fakamooli tumau ki a Iehova. Ti ko e puhala mitaki lahi mahaki ke moua e tau kapitiga mitaki he eke mo kapitiga mitaki. (Mata. 7:12) Ma e fakatai, fakamafana he Tohi Tapu a tautolu ke fakalahi atu e tau loto ha tautolu ke he falu, mua atu ki a lautolu “kua nofogati” po ke manako lagomatai. (Efeso 4:28) Maeke nakai a koe ke lagomatai e taha he fakapotopotoaga haau? Maeke nakai a koe ke fano ke he fale koloa ma e taha tagata fakailoa ne motua? Maeke nakai a koe ke tunu e kai ma e magafaoa ne taufetului fakatupe? Ka iloa e koe ke fakaaoga e faahi kupega hila jw.org^® mo e JW Library^® app, maeke nakai a koe ke lagomatai falu he fakapotopotoaga ke moua e tau vala tala i loto? Ka hagaaki a tautolu ke lagomatai e falu, to liga lahi e fiafia ha tautolu.​—Gahua 20:35.

¹⁵ Ko e tau kapitiga ne moua e tautolu to lalago mai ka fehagai a tautolu mo e tau kamatamata, mo e to lagomatai mai ke fakatumau e mafola he loto. Tuga a Elihu ne fanogonogo he talahau e Iopu e tau kamatamata haana, lagomatai e tau kapitiga ha tautolu he fanogonogo  fakatekiteki ka tala age ha tautolu a tau tupetupe. (Iopu 32:4) Nakai lata ke amanaki ke he tau kapitiga ha tautolu ke taute e tau fifiliaga ma tautolu, ka e pulotu ai kaeke ke fanogonogo ke he fakatonuaga ha lautolu ne fakavē ke he Tohi Tapu. (Fakatai 15:22) Tuga ni he talia fakatokolalo he Patuiki ko Tavita e lagomatai he tau kapitiga haana, nakai lata a tautolu ke fakatokoluga lahi ke talia e lagomatai ne foaki he tau kapitiga ka lata mo tautolu. (2 Samu. 17:27-29) Mooli, ko e tau kapitiga mitaki pihia ko e mena fakaalofa mai ia Iehova.​—Iako. 1:17.

16. Hagaao ki a Filipi 4:6, 7, ko e heigoa ni e puhala ka moua e tautolu e mafola? Fakamaama.

¹⁶ Totou Filipi 4:6, 7. Ko e ha ne tala mai a Iehova ki a tautolu kua maeke a tautolu ke moua e mafola Haana puhala ia “Keriso Iesu”? Ha kua moua e tautolu e mafola tukulagi he tau manamanatuaga mo e tau logonaaga ha tautolu ka maama mo e tua a tautolu ke he matagahua ne taute e Iesu. Ma e fakatai, puhala he poa lukutoto ha Iesu, maeke he tau agahala oti ha tautolu ke fakamagalo. (1 Ioa. 2:12) Fakatotoka mooli e manatu ia ma tautolu! Ha ko e Patuiki he Kautu he Atua, to utakehe e Iesu e tau kelea oti ha Satani mo e fakatokaaga haana ne fakamamahi a tautolu. (Isaia 65:17; 1 Ioa. 3:8; Fakakite. 21:3, 4) Ko e amaamanakiaga mooli ne foaki ki a tautolu! Pete he foaki e Iesu ki a tautolu e kotofaaga paleko, kua fakalataha a ia mo tautolu he lalago a tautolu he tau aho fakamui he fakatokaaga nei. (Mata. 28:19, 20) Foaki mooli he mena ia ki a tautolu e loto malolō! Ko e fakatotoka, amaamanakiaga, mo e loto malolō​—ko e falu mena anei he malokuaga mauokafua kua ati hake e mafola he loto ha tautolu.

17. (a) Fakatumau fēfē he Kerisiano e mafola he loto? (e) He mavehe mai ia Ioane 16:33, ko e heigoa ka taute e tautolu?

¹⁷ Maeke fēfē mogoia a koe ke fakatumau e mafola he loto ka tupetupe a koe he tau kamatamata lalahi? Maeke a koe ke fifitaki e tau mena ne taute e Iesu. Fakamua, liogi ti fakatumau ke liogi. Uaaki, omaoma ki a Iehova mo e fakamatala fakamakutu pete foki he tau magaaho ka uka ke taute pihia. Mo e toluaki, kumi ke he tau kapitiga haau ke lagomatai a koe ke he tau kamatamata. To puipui mogoia he mafola he Atua e manamanatuaga mo e loto haau. Tuga a Iesu, to kautū a koe ke he ha kamatamata.​—Totou Ioane 16:33.