1-2. Ko e ha ne liga talahau e Iesu e tau kupu ia Ioane 4:35, 36?

LIGA kua leva he fano a Iesu he tau fonua, liga he tau karite ne tutupu foou laia. (Ioane 4:3-6) Kavi ke he fā e mahina to motua e tau karite nei ke helehele. Talahau e Iesu taha mena ne liga matakehe: “Haga hake a ha mutolu a tau mata, mo e kitekite ke he fonua kua hina mai nai ke he heleheleaga saito.” (Totou Ioane 4:35, 36.) Ko e heigoa e kakano haana?

² Ko e kakano ha Iesu ne hagaao ke he fakapotopoto he tau tagata ka e nakai ko e tau saito. Manamanatu ke he mena ne tupu laia. Pete he nakai feutaaki e tau mena he tau Iutaia mo e tau Samaria, kua fakamatala a Iesu ke he fifine Samaria ti fanogonogo a ia! He tutala a Iesu hagaao ke he tau fonua ‘kua hina ke he heleheleaga saito,’ ko e toloaga he tau Samaria ne logona hagaao ki a Iesu mai he fifine ne o atu ke fakaako fakalahi hagaao ki a Iesu. (Ioane 4:9, 39-42) Taha talahauaga he Tohi Tapu hagaao ke he mena nei: “Ko e makai he tau tagata . . . ne fakakite kua tuga e tau saito a lautolu kua motua ke helehele.”

3. Ka onoono a koe ke he tau tagata tuga ne taute e Iesu, to aoga fēfē e fakamatala haau?

³ Ka e kua e tau tagata kua fakamatala e koe e tala mitaki ki ai? Onoono nakai a koe ki a lautolu kua tuga e tau saito motua ke helehele? Ka pihia, tolu e mena ka fakamooli aki e mena nei. Fakamua, to fakamatala a koe mo e fakamafiti. Ko e magaaho helehele kua fakakaupā; ti nakai fai magaaho ke moumou.  Uaaki, to fiafia a koe he kitia e tau tagata kua talia e tala mitaki. Pehē e Tohi Tapu: “Ne fiafia [e tau tagata] ka helehele ai e saito.” (Isaia 9:3) Mo e toluaki, to kitia e koe e tau tagata takitaha ke eke mo tutaki, ti hikihiki e koe e fakatutalaaga haau ke felauaki mo e tau mena ne fiafia a ia ki ai.

4. Ko e heigoa ka fakaako e tautolu mai he aposetolo ko Paulo he vala tala nei?

⁴ Nakai tiaki e Iesu e tau Samaria tuga ne liga taute he tau tutaki haana. Ka e kitekite a ia ki a lautolu ko e tau tutaki he tau mogo i mua. Lata foki a tautolu ke kitia e tau tagata he fonua ha tautolu to eke a lautolu mo tau tutaki he Keriso. Fakatoka he aposetolo ko Paulo e fakafifitakiaga mitaki ma tautolu ke muitua. Ko e heigoa ka fakaako e tautolu mai ia ia? He vala tala nei, to fakatutala a tautolu ke he puhala (1) kua iloa e ia e taha mena hagaao ke he tau taofiaga ha lautolu ne fakamatala a ia ki ai, (2) mailoga e tau mena ne fiafia a lautolu ki ai, mo e (3) kitia a lautolu ke eke mo tau tutaki he Keriso he tau mogo i mua.

5. Ko e ha kua maeke a Paulo ke maama e tau tagata haana he sunako?

⁵ Fakamatala tumau a Paulo he tau sunako he tau tagata Iutaia. Ma e fakatai, he sunako i Tesalonia “ne tolu foki e aho sapati kua vagavagahau ai a ia [mo e tau Iutaia] ke he tau Tohi.” (Gahua 17:1, 2) Liga fakatotoka a Paulo i loto he sunako. Feaki hake a ia ko e tagata Iutaia. (Gahua 26:4, 5) Maeke a Paulo ke maama e tau Iutaia ti fakamatala a ia ki a lautolu mo e mauokafua.​—Filipi 3:4, 5.

6. Kehe fēfē e tau tagata he makete ha Atenai mai ia lautolu ne fakamatala a Paulo he sunako?

⁶ He mole e fakaohooho he tau tagata favale a Paulo ke hola kehe i Tesalonia, matutaki atu ki Perea, ti hoko a ia ki Atenai. Liu foki “vagavagahau ai a ia ke he sunako ke he tau tagata Iutaia, mo e tau tagata [tapuaki] ke he Atua.” (Gahua 17:17) He fakamatala ke he tau makete, kua kehe e tau tagata ha Paulo mogonei. Ha ha i ai foki ia lautolu ne fanogonogo ko e tau tagata pulotu mo e falu he tau Tagata Motu Kehe kua onoono ke he fekau ha Paulo ko e “kupu fou.” Pehē a lautolu ki a ia: “Ha kua ogo mai e koe e falu a mena kehe ke he tau teliga ha mautolu.”​—Gahua 17:18-20.

7. Ia Gahua 17:22, 23, hiki fēfē e Paulo e tutalaaga haana?

⁷ Totou Gahua 17:22, 23. Nakai talahau e Paulo e fekau haana ke he tau Tagata Motu Kehe i Atenai ke he puhala taha ne talahau e ia ke he tau Iutaia he sunako. Liga hūhū hifo a  Paulo ki a ia, ‘Ko e heigoa he tau tagata nei i Atenai ne tua ki ai?’ Matakite lahi a ia ke he tau takatakaiaga haana ti mailoga e tau aga fakalotu he tau tagata. Matutaki atu ai, kumi e Paulo e tau mena ne mahani ke he puhala tapuaki ha lautolu mo e kupu mooli he tau Tohiaga Tapu. “Ha ko e Kerisiano Iutaia, mailoga e ia ko e tau Heleni pouliuli ne nakai tapuaki ke he Atua ‘mooli’ he tau Iutaia mo e tau Kerisiano,” he talahau he taha tagata fakamaama he Tohi Tapu, “ka e lali a ia ke fakakite ko e Atua ne fakailoa e ia kua nakai matakehe ke he tau tagata Atenai.” Ti makai a Paulo ke hiki e tutalaaga haana. Tala age a ia ke he tau tagata Atenai ko e fekau haana kua moua mai he ‘Atua Nakai Iloa,’ ne lali a lautolu ke tapuaki ki ai. Pete kua nakai mahani e tau Tagata Motu Kehe mo e tau Tohiaga Tapu, nakai tiaki e Paulo a lautolu. Ka e onoono a ia ki a lautolu ke tuga ko e tau saito kua momoho ke helehele ti hikihiki e ia e fakatutalaaga haana ke he tala mitaki.

8. (a) Mailoga fēfē e koe e tau taofiaga fakalotu he tau tagata he matakavi haau? (e) Ka talahau taha tagata na fai lotu a ia, fēfē e tali haau?

⁸ Tuga a Paulo, kia matakite. Onoono ke he tau mena ne fakakite e tau taofiaga he tau tagata he matakavi haau. Fakamanaia fēfē he tagata he kaina e fale po ke motokā haana? Ko e haana higoa, tau tapulu, tauteuteaga, po ke tau kupu kua fakakite ko e lotu fe haana? Liga tala atu fakahako a ia ki a koe na fai lotu a ia. Ko e mena ia ne tupu ke he paionia pauaki ko Flutura, tali e ia, “Nakai hau au ke tapoohi e tau taofiaga haaku ki a koe, ka e ke tutala mo koe hagaao ke he matakupu nei . . . ”

9. Ko e heigoa e tau mena ka tatai e iloaaga haau mo e tagata fai lotu?

⁹ Ko e heigoa e tau matakupu kua liga fakatutala a koe mo e tagata fai lotu? Lali ke moua e tau mena ne tatai e iloaaga ha mua ki ai. Liga tapuaki a ia ke he taha ni e Atua, liga mailoga e ia ko Iesu e Fakamoui he tau tagata, po ke liga talitonu a ia kua nonofo a tautolu he vahā kelea lahi mahaki ka nakai leva ti moumou. Fakavē ke he tau taofiaga ne maama tokoua e mua, talahau e fekau he Tohi Tapu he puhala kua fiafia e tagata ia.

10. Ko e heigoa kua lata a tautolu ke lali ke taute, ti ko e ha?

¹⁰ Kia tokaloto kua liga nakai talitonu e tau tagata ke he tau mena oti kua fakaako he lotu ha lautolu. Ti pete kua mailoga e koe e lotu he tagata, lali ke iloa e mena ne talitonu mooli a ia ki ai. “Tokologa mogonei ne fio e iloilo mo e tau taofiaga fakalotu ha lautolu,” he ui e David, ko e paionia pauaki i Australia. Ko Donalta i Albania ne pehē, “Falu ne feleveia mo mautolu ne pehē na ō a lautolu he tapu ka e magaaho fakamui ne talahau e lautolu kua  nakai talitonu mooli a lautolu ke he Atua.” Ko e matakainaga taane ne gahua misionare i Argentina ne pehē ko e falu he tau tagata ne tala age kua talitonu a lautolu ke he Tolu Taha Tapu ka e nakai talitonu mooli a lautolu ke he Matua, Tama, mo e agaaga tapu ko e Atua taha a lautolu. “He iloa e mena ia kua mukamuka lahi ke moua e mena ne talia he tagata,” he ui e ia. Ti lali ke iloa ko e heigoa ne talitonu mooli e tau tagata ki ai. Tuga a Paulo, maeke a koe ke ‘eke mo tau mena oti ke he tau tagata oti.’​—1 Kori. 9:19-23.

11. Ia Gahua 14:14-17, talahau fēfē e Paulo e fekau haana ke futia ke he tau tagata ne nonofo i Luseta?

¹¹ Totou Gahua 14:14-17. Mailoga e Paulo e tau mena ne fiafia e tau tagata ne fanogonogo ki a ia, ti hikihiki e ia e fakatutalaaga haana. Ma e fakatai, ko e toloaga ne tutala a ia ki ai i Luseta ne tote po ke nakai fai maamaaga he tau Tohiaga Tapu. Ti fakaaoga e Paulo e tau puhala fakakakano kua maeke a lautolu ke iloa. Tutala a ia ke he heleheleaga he tau fua he fonua mo e lotomatala ke moua e moui fiafia. Fakaaoga e ia e tau kupu mo e tau fakataiaga ka mafiti e tau tagata fanogonogo haana ke maama.

12. Maeke fēfē a koe ke mailoga e tau mena ne fiafia e tagata ki ai ti hikihiki e fakatutalaaga haau?

¹² Fakaaoga e iloilo ke mailoga e tau mena ne fiafia ki ai e tau tagata he matakavi haau ti hikihiki e fakatutalaaga haau. Iloa fēfē e koe e mena ne fiafia e tagata ki ai he fina atu a koe ki a ia po ke kaina haana? Liu foki ni, kia matakite. Liga gahua a ia he katene, totou pepa, taute he motokā, po ke falu matagahua foki. Ka latatonu, he ha he fakaaoga e mena ne fa e taute e ia ke kamata e fakatutalaaga? (Ioane 4:7) Ko e mena tui foki he tagata kua liga talahau taha mena hagaao ki a ia​—liga fakakite e motu, gahua, po ke matakau sipote mahuiga haana. “Hafagi e au e fakatutalaaga mo e tagata taane 19 e tau ne tū he tapulu miti haana e tagata lologo talahaua,” ui e Gustavo. “Hūhū au ki a ia hagaao ke he tagata lologo, ti tala mai e ia e kakano ne fiafia a ia ke he tagata lologo.  Takitaki e tutalaaga ia ke he fakaako Tohi Tapu ti ko ia mogonei ko e matakainaga taane ha tautolu.”

13. Maeke fēfē a koe ke foaki e fakaako Tohi Tapu he puhala kua futia?

¹³ Ka tala age a koe ke fakaako e Tohi Tapu mo e taha tagata, taute ai ke futia e manatu ki a ia; fakakite ki a ia e puhala ka fakapuke he fakaakoaga e tau manako haana. (Ioane 4:13-15) Ma e fakatai, ko e matakainaga fifine ko Poppy ne uiina ki loto he kaina he fifine ne fakakite e fiafia. He kitia e Poppy e setifikete he kaupā ne fakakite ko e fifine ko e porofesa ne kua kumikumi ke he tau fakaakoaga, fakamaama foki e Poppy kua fakaako e tautolu e tau tagata he puhala fakaako Tohi Tapu mo e tau feleveiaaga ha tautolu. Talia he fifine e fakaako Tohi Tapu, fano ke he feleveiaaga he aho hake, ti fina atu ke he toloaga takaiaga he mogo fakamui. Taha e tau he mole, papatiso a ia. Hūhū hifo ki a koe: ‘Ko e heigoa ne fiafia e tau liu aahi atu haaku ki ai? Maeke nakai au ke fakamaama e fakaako Tohi Tapu he puhala kua futia a lautolu ki ai?’

14. Maeke fēfē a koe ke hikihiki e fakaako Tohi Tapu ke lata mo e tau tagata fakaako takitaha?

¹⁴ He mole e kamata e koe e fakaako Tohi Tapu, tauteute fakamitaki ma e tau fakaakoaga takitaha, ti tokaloto e feaki maiaga mo e tau fiafia he tagata fakaako haau. He tauteute e koe, fifili e tau kupu tohi ka totou e koe, tau vitiō ka fakakite e koe, mo e tau fakatai ka fakaaoga e koe ke fakamaama aki e tau kupu mooli he Tohi Tapu. Hūhū hifo ki a koe, ‘Ko e heigoa ka futia pauaki mo e hokotia ke he loto he tagata fakaako nei?’ (Fakatai 16:23) I Albania, ko e fifine ne fakaako mo e paionia ko Flora ne talahau fakamalolō, “Nakai maeke au ke talia e fakaakoaga ke he liu tu mai.” Nakai peehi e Flora e matakupu. Talahau e ia, “Manatu au kua lata ni a ia ke iloa fakamua e Atua ne mavehe e liu tu mai.” Tali mai he manatu ia, he tau fakaakoaga takitaha kua fakamaama e Flora e fakaalofa, pulotu, mo e malolō ha Iehova. Fakamui, kua tua mooli e tagata fakaako haana ke he liu tu mai. Ko ia mogonei ko e Fakamoli fakamakutu ha Iehova.

15. Ia Gahua 17:16-18, ko e heigoa e tau aga i Heleni i tuai ne fakatupetupe a Paulo, ka ko e ha ne nakai tiaki e ia e tau tagata Atenai?

¹⁵ Totou Gahua 17:16-18. Nakai tiaki e Paulo e tau tagata Atenai, pete kua puke e maaga ha lautolu he tapuaki tupua, mahani feuaki, mo e tau fakaakoaga pouliuli; ti nakai fakaatā e ia e tau ekefakakelea ha lautolu ke fakalolelole a ia. Ko Paulo ko ia ne eke mo Kerisiano, “ne vagahau kelea fakamua, to favale, to fakakelea atu.” (1 Timo. 1:13) Tuga ni he kitia e Iesu e mitaki ha Paulo, kua kitia e Paulo e mitaki he tau tagata Atenai. Ti nakai fakauaua e mauokafua haana.​—Gahua 9:13-15; 17:34.

16-17. Ko e heigoa ne fakakite ko e tau tagata mai he tau feakiaga oti kua eke mo tau tutaki ha Keriso? Talahau e fakatai.

¹⁶ He senetenari fakamua, ko e tau tagata mai he tau feakiaga kehekehe ne eke mo tau tutaki ha Iesu. He tohi a Paulo ke he tau Kerisiano ne nonofo i Heleni he maaga ko Korinito, pehē a ia ko e falu tagata he fakapotopotoaga ia he taha magaaho ko e tau tagata kolokolovao po ke fakalialia e puhala momoui feuaki. Ti lafi e ia: “Ne pihia foki e falu ia mutolu, ka kua koukou tuai a mutolu.” (1 Kori. 6:9-11) Kitia nakai e koe e tau tagata ia to hiki mo e eke mo tau tutaki?

¹⁷ Mogonei kua tokologa hane makai ke taute e tau hikihikiaga kua lata ke eke mo tau tutaki ha Iesu. Ma e fakatai, i Australia ko e paionia pauaki ko Yukina ne iloa ko e tau tagata kehekehe oti kua maeke ke talia e fekau  he Tohi Tapu. Taha magaaho he ofisa sela fale, ne mailoga e ia e tau tātatau he fifine fuata ne tui he tau mena tui gafugafu. “Tehatehaua fakakū au,” he ui e Yukina, “ka e kamata mogoia au ke tutala ki a ia. Iloa e au kua fiafia lahi a ia ke he Tohi Tapu ti ko e falu he tau tātatau haana ko e tau kupu Tohi Tapu ia Salamo!” Kamata e fifine ke fakaako ti fano he tau feleveiaaga. *

18. Ko e ha ne nakai lata a tautolu ke fakafili e tau tagata?

¹⁸ Onoono kia a Iesu ke he fonua kua momoho ke helehele he amanaki a ia to tokologa e tagata ka mumui ki a ia? Nakai. Talahau tuai he tau Tohiaga Tapu to gahoa e tagata ka tua ki a ia. (Ioane 12:37, 38) Ha ha ia Iesu e lotomatala ofoofogia ke iloa e tau loto. (Mata. 9:4) Ka e hagaaki agaia a ia ki a lautolu tokogahoa ka talitonu, ti fakamatala fakamakutu a ia ke he tau tagata oti. Lata ke pihia foki a tautolu, pete he nakai iloa e tautolu e tau loto, totoko e aga ke fakafili e fonua po ke tau tagata takitaha! Ka e kitia e mitaki he tau tagata. Ko Marc e misionare i Burkina Faso ne pehē: “Ko e tau tagata ne manatu au to holo ki mua ne oti noa e fakaako. Ka ko e tau tagata ne nakai tuahā au ki ai, ne holo ki mua a lautolu. Iloa e au mogonei kua mitaki ke fakaatā e agaaga ha Iehova ke takitaki a tautolu.”

19. Lata ke fēfē e onoonoaga ha tautolu ke he tau tagata he fonua ha tautolu?

¹⁹ He kitia fakamua, liga nakai tokologa he fonua kua tuga e tau saito kua momoho ke helehele. Ka e manatu e talahauaga ha Iesu ke he tau tutaki haana. Nukua hina e fonua, kakano kua motua tuai ke helehele. Maeke e tau tagata ke hiki ti eke mo tau tutaki he Keriso. Onoono a Iehova ke he tau tutaki nei ko e “tau mena kua manako ki ai.” (Hakai 2:7) Ka kitia e tautolu e tau tagata he puhala ne kitia e Iehova mo Iesu, to fakaako e tautolu e tau feakiaga mo e tau fiafia ha lautolu. To onoono a tautolu ki a lautolu nakai tuga e tau tagata kehe, ka e to eke mo tau matakainaga.