1. Atihake fēfē e koe e kapitiga tata mo e taha tagata?

KUA fa mahani ko e lakaaga fakamua ke atihake e kapitiga tata mo e taha tagata kua feleveia mo koe, ko e fai magaaho mo ia. He fetutalaaki, talahau e tau manatu mo e tau mena tutupu, kua eke a mua mo tau kapitiga. Ke atihake e kapitiga tata mo Iesu, kua fehagai a tautolu mo e tau paleko. Ko e heigoa falu he tau mena nei?

2. Ko e heigoa e paleko fakamua kua fehagai mo tautolu?

² Ko e paleko fakamua kua nakaila feleveia a tautolu mo Iesu. Tokologa e Kerisiano he senetenari fakamua ne fehagai mo e paleko taha nei. Pete ia, pehē e aposetolo ko Peteru: “Ko ia kua nakai kitia e mutolu, ka e fakaalofa atu kia ia, kua nakai kitia a ia ainei, ka e tua ni ki ai.” (1 Pete. 1:8) Ti maeke ke fakatū e fakafetuiaga tata mo Iesu ka e nakai feleveia mo ia.

3. Ko e heigoa e paleko ke uaaki kua fehagai mo tautolu?

³ Ko e paleko ke uaaki kua nakai maeke a tautolu ke tutala ki a Iesu. Ka liogi a tautolu, tutala a tautolu ki a Iehova. Mooli kua liogi a tautolu puhala he higoa ha Iesu, ka e nakai tutala fakahako a tautolu ki a ia. Ti nakai manako a Iesu ki a tautolu ke liogi ki a ia. Ko e ha? Ha ko e liogi ko e puhala he tapuakiaga, ti lata ni ke tapuaki hokoia ki a Iehova. (Mata. 4:10) Pete ia, maeke a tautolu ke fakakite e fakaalofa ha tautolu ki a Iesu.

4. Ko e heigoa e paleko ke toluaki, ti ko e heigoa ka fakatutala a tautolu he vala tala nei?

 ⁴ Ko e paleko ke toluaki kua nofo a Iesu he lagi, ti nakai maeke a tautolu ke fakalataha mo ia. Ka e maeke agaia a tautolu ke lahi e mena kua iloa hagaao ki a Iesu he nakai fakalataha mo ia. To fakatutala a tautolu ke he fā e mena ka taute ke fakamalolō e kapitiga ha tautolu mo ia. Ka e fakamua, kumikumi la ke he kakano kua lata ma tautolu ke atihake e kapitiga tata mo e Keriso.

5. Ko e ha kua lata a tautolu ke kapitiga mo Iesu? (Kikite foki e tau puha “ Kapitiga mo Iesu kua Takitaki Atu ke Kapitiga mo Iehova” mo e “ Onoonoaga Lagotatai ke he Matagahua ha Iesu.”)

⁵ Kua lata a tautolu ke eke mo tau kapitiga ha Iesu ka manako a tautolu ke moua e fakafetuiaga mitaki mo Iehova. Ko e ha ne mooli e mena ia? Fakatutala ke he ua e kakano. Fakamua, tala age e Iesu ke he tau tutaki haana: “Ha ko e mena fakaalofa mai ni e Matua kia mutolu, ha kua fakaalofa a mutolu kia au.” (Ioane 16:27) Pehē foki a ia: “Nakai hau taha ke he Matua, ka noa mo au.” (Ioane 14:6) Ko e lali ke eke mo kapitiga ha Iehova ka e nakai atihake e pipiaga tata mo Iesu kua tuga e lali ke hū ki loto he fale ka e nakai fakaaoga e gutuhala. Fakaaoga e Iesu e fakataiaga pihia he fakamaama hagaao ki a ia “ko e gutuhala he tau mamoe.” (Ioane 10:7) Ko e kakano ke uaaki kua fifitaki katoatoa e Iesu e tau mahani he Matua haana. Pehē a ia ke he tau tutaki haana: “Ko ia kua kitia au, kua kitia foki e ia e Matua.” (Ioane 14:9) Ti ko e puhala aoga ke iloa e tautolu a Iehova ko e fakaako hagaao ke he moui ha Iesu. He fakaako a tautolu hagaao ki a Iesu, to lahi e fakaalofa ha tautolu ki a ia. He lahi e kapitiga ha tautolu mo Iesu, to hokulo e fakaalofa ha tautolu ke he Matua haana.

6. Ko e heigoa taha kakano kua lata a tautolu ke moua e fakafetuiaga mo Iesu? Fakamaama.

 ⁶ Kua lata a tautolu ke moua e fakafetuiaga mo Iesu ke maeke e tau liogi ha tautolu ke tali. Kakano ai kua lata a tautolu ke lahi atu e mena ke taute he talahau noa e tau kupu ke he “higoa ha Iesu” he matahiku he tau liogi. Lata foki ke mailoga e tautolu e puhala kua fakaaoga e Iehova a Iesu ke tali e tau liogi ha tautolu. Tala age a Iesu ke he tau aposetolo: “Ko e tau mena oti foki ke ole atu ai a mutolu ke he haku a higoa, to eke ni e au.” (Ioane 14:13) Pete ko Iehova kua logona mo e tali e tau liogi ha tautolu, foaki e ia ki a Iesu e pule ke fakahoko e tau fifiliaga Haana. (Mata. 28:18) Ato tali he Atua e tau liogi ha tautolu, kitia e ia kaeke kua fakagahua e tautolu e fakatonuaga ne foaki e Iesu. Ma e fakatai, pehē a Iesu: “Kaeke ke fakamagalo atu e mutolu, ke he tau tagata e tau hala ha lautolu, ti fakamagalo mai foki a mutolu he Matua ha mutolu ha ha he lagi. Kaeke foki kua nakai fakamagalo atu e mutolu ke he tau tagata e tau hala ha lautolu, ti nakai fakamagalo foki ha mutolu a Matua ha mutolu a tau hala.” (Mata. 6:14, 15) Ti kua aoga mogoia ke taute e tautolu falu he puhala totonu tuga ne taute e Iehova mo Iesu ki a tautolu!

7. Ko hai ne aoga mai he poa lukutoto ha Iesu?

⁷ Ko lautolu ni kua moua e fakafetuiaga tata mo Iesu ka aoga mai he poa lukutoto haana. Iloa fēfē e tautolu? Pehē a Iesu to “tuku atu . . . hana moui ke hukui aki hana tau kapitiga.” (Ioane 15:13) Ko e tau tagata mahani fakamooli ne momoui ato hau a Iesu ke he lalolagi kua lata ke fakaako hagaao ki a ia mo e fakaalofa ki a ia. Ko e tau tagata ia tuga a Aperahamo, Sara, Mose, mo Raava to fakaliu tu mai, ka e lata foki e tau fekafekau tututonu nei ha Iehova ke kapitiga mo Iesu ke moua e moui tukulagi.​—Ioane 17:3; Gahua 24:15; Hepe. 11:8-12, 24-26, 31.

8-9. Ia Ioane 15:4, 5, ko e heigoa kua fakamalolō he fakafetuiaga mo Iesu ke taute e tautolu, ti ko e ha kua aoga ai?

⁸ Moua e tautolu e fiafia he gahua fakalataha mo Iesu he fakamatala mo e fakaako e tala mitaki he Kautu. He nofo a Iesu he lalolagi, ko e faiaoga a ia. Tali mai he liu atu a ia ke he lagi, ko Iesu ko e ulu he fakapotopotoaga ti matutaki a ia ke takitaki e gahua fakamatala mo e fakaako. Kitia mo e loto fakaaue a ia ke he tau laliaga haau ke lagomatai e tokologa ke iloa a ia mo e haana a Matua. Ko e puhala ni ka fakamooli e tautolu e gahua nei he moua e lagomatai ha Iehova mo Iesu.​—Totou Ioane 15:4, 5.

⁹ Fakaako fakamaaliali he Kupu he Atua kua lata a tautolu ke moua mo e fakatumau e fakaalofa ki a Iesu ke maeke ke fakafiafia a Iehova. Kumikumi la tautolu ke he fā e mena ka taute e tautolu ke eke mo tau kapitiga ha Iesu.

10. Ko e heigoa e lakaaga fakamua ke atihake e kapitiga mo Iesu?

¹⁰ (1) Ke iloa a Iesu. Maeke a tautolu ke taute e mena nei he totou e tau tohi ha Mataio, Mareko, Luka, mo Ioane he Tohi Tapu. He manamanatu fakahokulo a tautolu ke he tau tala he Tohi Tapu hagaao ke he moui ha Iesu, kua fakaalofa mo e fakalilifu e tautolu a Iesu ha ko e puhala totonu ne fehagai a ia mo e tau tagata. Tuga anei, pete ko ia e Iki ha lautolu, nakai taute e ia e tau tutaki haana tuga e tau tupa. Ka e fakakite e ia e tau manatu mo e tau logonaaga haana he loto ki a lautolu. (Ioane 15:15) Momoko mo e tagi fakalataha a Iesu mo lautolu. (Ioane 11:32-36) Maeke foki e tau fī haana ke kitia ko e kapitiga a ia ki a lautolu  kua talia e fekau haana. (Mata. 11:19) Ka fifitaki a tautolu ki a Iesu he puhala ne fehagai a ia mo e tau tutaki haana, to holo ki mua e tau fakafetuiaga ha tautolu mo e falu ti lahi e fiafia ha tautolu, mo e tupu e loto fakaaue ha tautolu ke he Keriso.

11. Ko e heigoa e lakaaga ke uaaki ke eke mo kapitiga ha Iesu, ti ko e ha kua aoga e lakaaga ia?

¹¹ (2) Fifitaki e puhala manamanatu mo e tau gahua ha Iesu. Ko e mitaki he iloa mo e fifitaki e tautolu e puhala manamanatu ha Iesu, to tata lahi e kapitiga ha tautolu mo ia. (1 Kori. 2:16) Fifitaki fēfē e tautolu a Iesu? Manamanatu ke he taha e fakataiaga. Hagaaki lahi a Iesu ke lagomatai e falu ka e nakai ni fakafiafia e ia a ia. (Mata. 20:28; Roma 15:1-3) Ha kua pihia e aga manamanatu haana, kua foaki noa a ia mo e fakamagalo atu. Nakai mafiti a ia ke ita ke he mena ne talahau he tau tagata hagaao ki a ia. (Ioane 1:46, 47) Nakai fakaatā e ia e tau hehē kua mole he tau tagata ke nakai liu matutaki mo lautolu. (1 Timo. 1:12-14) Pehē a Iesu: “Ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) He ha he hūhū hifo ki a koe, “Muitua nakai e au e fakafifitakiaga ha Iesu he taute e tau mena oti kua maeke ia au ke fakatumau e mafola mo e tau matakainaga haaku?”

12. Ko e heigoa e lakaaga ke toluaki ke eke mo kapitiga ha Iesu, ti taute fēfē e tautolu e lakaaga ia?

¹² (3) Lalago e tau matakainaga he Keriso. Onoono a Iesu ke he mena kua taute e tautolu ma e tau matakainaga fakauku haana ke tuga kua taute e tautolu e mena nei ke lata mo ia. (Mata. 25:34-40) Ko e matapatu puhala kua lalago e tautolu a lautolu ne fakauku ko e fakalataha katoatoa ke he gahua fakamatala he Kautu mo e taute tutaki tuga ne poaki e Iesu ke he tau tutaki haana ke taute. (Mata. 28:19, 20; Gahua 10:42) Ko e lagomatai ni he ‘tau mamoe kehe’ ka fakamooli he tau matakainaga he Keriso e matagahua fakamatala he lalolagi katoa hane taute mogonei. (Ioane 10:16) Kaeke ko koe e mamoe kehe, he tau magaaho takitaha kua fakalataha a koe ke he gahua nei, kua fakakite e koe e pipiaga fakaalofa ki a lautolu ne fakauku ti pihia mo Iesu.

13. Fakagahua fēfē e tautolu e fakatonuaga ha Iesu ia Luka 16:9?

¹³ Kapitiga foki a tautolu mo Iehova mo Iesu he fakaaoga e tau foakiaga fakatupe ke lalago e gahua ne poaki e laua. (Totou Luka 16:9.) Ma e fakatai, maeke a tautolu ke foaki e tau mena fakaalofa ke he gahua he lalolagi katoa ne putoia e foaki he tau tupe ke lata mo e gahua fakamatala he tala mitaki he tau matakavi mamao, fakatumau e talaga mo e leveki he tau fale ne lalago e tapuakiaga mooli, mo e foaki e tau koloa fakatino ke lata mo lautolu ne lauia he tau matematekelea tutupu pauaki. Maeke foki a tautolu ke lalago fakatupe e fakapotopotoaga ha tautolu ni mo e lagomatai a lautolu kua iloa e tautolu kua lata ke moua e lagomatai. (Fakatai 19:17) Ko e tau puhala anei ka lalago e tautolu e tau matakainaga he Keriso.

14. Ia Efeso 4:15, 16, ko e heigoa e lakaaga ke fāaki ke eke mo kapitiga ha Iesu?

¹⁴ (4) Lalago e tau fakaholoaga he fakapotopotoaga Kerisiano. Fakamalolō e tautolu e matutakiaga ki a Iesu ko e ulu he fakapotopotoaga ka kaufakalataha a tautolu mo lautolu kua kotofa ke leveki a tautolu. (Totou Efeso 4:15, 16.) Ma e fakatai, lali a tautolu mogonei ke fakaaoga katoatoa oti e tau Fale he Kautu. Ke maeke ke taute e mena ia, kua lafi e falu fakapotopotoaga mo e hikihiki e tau veveheaga he tau fonua. Ko e fakatokaaga nei kua maeke ke fakaaoga fakamitaki ai e tau tupe foaki. He magaaho taha, kua lata e falu tagata fakailoa ke hiki ke he tau tutūaga foou.  Ko e tau tagata fakailoa mahani fakamooli ia ne liga fekafekau he fakapotopotoaga ke he loga e tau tau ti liga tata lahi ke he tau matakainaga i ai. Ka ko e mogonei kua ole ki a lautolu ke fekafekau he fakapotopotoaga kehe. Fiafia lahi a Iesu ke kitia e tau tutaki mahani fakamooli nei kua kaufakalataha ke he fakaholoaga ia!

15. Holo ki mua fēfē e kapitiga ha tautolu mo Iesu anoiha?

¹⁵ Ko lautolu ne fakauku he agaaga tapu kua amaamanaki ke fakalataha tukulagi mo Iesu he fekafekau ko e tau hakega fakalataha ke he Kautu he Atua. To ha ha i ai a lautolu mo e Keriso he kitekite ki a ia, tutala mo ia, mo e fai magaaho mo ia. (Ioane 14:2, 3) Ko lautolu ne amaamanaki ke he lalolagi to moua foki e fakaalofa mo e onoonoaga ha Iesu. Pete ni kua nakai kitia e lautolu a Iesu ko e fakafetuiaga ha lautolu mo ia to tupu malolō lahi he fiafia e moui ne foaki e Iehova mo Iesu ki a lautolu.​—Isaia 9:6, 7.

16. Ko e heigoa e tau monuina kua moua e tautolu mai he kapitiga a tautolu mo Iesu?

¹⁶ Ka talia e tautolu e uiina ha Iesu ke eke mo tau kapitiga haana, to moua e tautolu loga e monuina. Ma e fakatai, aoga ki a tautolu e fakaalofa mo e lalagoaga haana he magaaho tonu nei. Kua moua e tautolu e magaaho ke moui tukulagi. Mua atu e aoga, ko e kapitiga ha tautolu mo Iesu kua takitaki a tautolu ke moua e koloa mitaki lahi mahaki, ko e fakafetuiaga fakatagata ne tata mo e Matua ha Iesu ko Iehova. Ko e lilifu mooli he fakahigoa a tautolu ko e tau kapitiga ha Iesu!