Tau Hūhū he Tau Tagata Totou
Ato mate a Iesu, ko e ha ne talahau e ia e tau kupu ha Tavita ia Salamo 22:1?
He tau kupu fakahiku ha Iesu ato mate a ia he Mataio 27:46: “Hoku Atua na e, hoku Atua na e, ko [e] heigoa e mena kua tiaki mai ai e koe au?” He talahau pihia, ne fakamooli e Iesu e tau kupu he salamo ko Tavita ia Salamo 22:1. (Mare. 15:34) Kua hepe ke fakahiku, na talahau e Iesu e tau kupu nei ha kua ita po ke lolelole fakakū e tua haana. Maama katoatoa e Iesu e kakano ne lata a ia ke mate, ti makai a ia ke taute e mena ia. (Mata. 16:21; 20:28) Iloa foki e ia ko e magaaho ka mate a ia, to lata a Iehova ke utakehe e “pa takai” ia ia. (Iopu 1:10) Fakaatā mogoia e Iehova a Iesu ke fakakite e mahani fakamooli pete e uka ke hoko ke he mate.—Mare. 14:35, 36.
Ti ko e ha ne talahau e Iesu e tau kupu he salamo nei? Pete kua nakai iloa tonu e tautolu, kia fakatutala ke he falu kakano. *
He talahau e tau kupu nei, fakakite kia e Iesu to nakai fai fakalagoaga a Iehova ke he mate haana? Lata a Iesu ke totogi e lukutoto ka e nakai lagomatai e Iehova. Ko e tagata a ia, ti lata ke mate ma e “tau tagata oti kana.”—Hepe. 2:9.
He fatiaki e falu kupu mai he salamo, kua onoono kia a Iesu ke he salamo katoa? Ko e aga he tau tagata Iutaia he magahala ia ke ako manatu e tau salamo loga. Ka logona e lautolu e taha kupu he salamo, ko e aga ha lautolu ke mafiti ke manamanatu ke he salamo katoa. Kaeke ko e manatu ha Iesu anei, to lagomatai e ia e tau tagata Iutaia ke manatu e tau perofetaaga loga he salamo nei hagaao ke he tau mena tutupu ne takatakai he mate haana. (Sala. 22:7, 8, 15, 16, 18, 24) Pihia foki, ko e tau kupu fakahiku he salamo ne fakaheke a Iehova mo e fakamaama ko Ia e Patuiki he lalolagi oti.—Sala. 22:27-31.
He fatiaki e tau kupu nei ha Tavita, kua fakamaama kia e Iesu e nakai agahala haana? Ato mate a Iesu, ne fakauka a ia ke he hopoaga nakai fakafili tonu kua agahala a ia he vagahau kelea ke he Atua. (Mata. 26:65, 66) Ko e hopoaga ia ne taute fakamafiti ai he pō ne nakai lagotatai mo e tau matafakatufono kua fakavē. (Mata. 26:59; Mare. 14:56-59) He fatiaki e tau kupu nei ko e hūhū fakalagalaga, liga hagaaki a Iesu ke he manatu kua nakai lata a ia ke moua e fakahala nei.
Fakamanatu foki kia e Iesu ke he falu, pete ko Tavita ne tohi e salamo nei ne fakaatā ke matematekelea, nakai kakano ai kua galo e Tavita e taliaaga ha Iehova? Nakai fakakite he hūhū ha Tavita kua nakai tua a ia. He mole e hūhū, fakakite e ia e mauokafua haana to fakahao mo e matutaki a Iehova ke fakamonuina a ia. (Sala. 22:23, 24, 27) Pihia foki, pete ko Iesu ko e “tama a Tavita” ne matematekelea he akau fakatautau, nakai kakano e mena nei kua nakai talia e Iehova a Iesu.—Mata. 21:9.
Fakakite kia e Iesu e momoko lahi mahaki ha kua utakehe e Iehova e puipuiaga mai ia ia ke maeke ke fakakite e fakamooli katoatoa haana? Nakai ko e finagalo ha Iehova he kamataaga ke matematekelea mo e mate e Tama haana. Hoko laia e mena ia he mole e liuliu ha Atamu mo Eva. Nakai fai mena kelea ne taute e Iesu, ka e lata a ia ke matematekelea mo e mate ke tali e matakupu ne fakatū e Satani mo e foaki e lukutoto kua lata ke fakatau mai aki e mena kua fakagalo he tagata. (Mare. 8:31; 1 Pete. 2:21-24) To fakamooli e mena nei kaeke kua utakehe fakakū e Iehova e puipuiaga haana mai ia Iesu he magaaho fakamua laia he moui haana.
Lali kia a Iesu ke lagomatai e tau tutaki haana ke hagaaki ke he kakano ne fakaatā e Iehova a ia ke mate he puhala nei? * Iloa e Iesu ko e mate tuga e tagata matahavala he akau fakatautau to fakatupetupe e tokologa. (1 Kori. 1:23) Ka hagaaki e tau tutaki haana ke he kakano mooli ne mate a ia, to maama e lautolu. (Kala. 3:13, 14) To onoono mogoia a lautolu ki a Iesu ko e Fakamoui ka e nakai ko e tagata matahavala.
Pete ni e kakano ne fatiaki e Iesu e tau kupu nei, mailoga e ia ko e mena ne tupu ki a ia ko e vala he finagalo ha Iehova ma haana. Nakai leva he mole e fatiaki e Iesu e salamo nei, pehē a ia: “Kua fakaoti tuai.” (Ioane 19:30; Luka 22:37) Ē, utakehe fakakū e Iehova e lagomatai haana ia Iesu he fakaatā a ia ke fakamooli katoatoa e mena ne fakafano mai a ia ke he lalolagi ke taute. Fakaatā foki a ia ke fakamooli e tau mena oti ne tohi hagaao ki a ia “he fakatufono a Mose, mo e tau perofeta, mo e tau salamo.”—Luka 24:44.
^ para. 2 Kikite foki ke he vala tala “Fakaako Mai he Tau Kupu Fakahiku ha Iesu” he paratafa 9 mo e 10 he fufuta nei.
^ para. 4 He fekafekauaga ha Iesu, fa talahau po ke hūhū a ia he falu mogo ke he tau mena ne nakai fakakite e tau logonaaga mooli haana. Taute e ia e mena nei ke fakalagalaga aki e tutalaaga he tau tutaki haana.—Mare. 7:24-27; Ioane 6:1-5; kikite Ko e Kolo Toko, Oketopa 15, 2010, lau 4-5.
