1. Ko e heigoa ne mailoga e Iehova ke he tau tagata haana?

KUA “fiafia a Iehova ke he hana motu [tau tagata].” (Sala. 149:4) Ko e manatu fiafia mooli! Mailoga e Iehova e tau mahani mitaki ha tautolu; mo e kitia e ia e aoga ti futia mai a tautolu ki a ia. Ka fakatumau ai ke fakamooli ki a ia, to fakatumau a ia ke fakatata tukulagi ki a tautolu!​—Ioane 6:44.

2. Ko e ha kua uka e falu ke talitonu kua fakaalofa a Iehova ki a lautolu?

² Liga pehē falu, ‘Iloa e au na fakaalofa a Iehova ke he tau tagata haana ko e matakau, ka e iloa fēfē e au kua ofania mooli e Iehova au?’ Ko e ha ne liga hūhū pihia e taha tagata? Ko Oksana * ne matematekelea e moui he vahā tama, kua pehē: “Fiafia lahi au he papatiso ti kamata ke paionia. Ka e 15 e tau he mole, kamata au ke manatu e tau mena kelea ne tupu ki a au he tote. Manatu au kua nakai talia e Iehova au, ti nakai latatonu au ke moua e fakaalofa haana.” Ko Yua ko e matakainaga fifine paionia ne loga foki e tau lekua he mogo ne tote, kua pehē: “Tukulele e au e moui haaku ki a Iehova ha kua manako au ke fakafiafia a ia. Ka e talitonu au to nakai fakaalofa a ia ki a au.”

3. Ko e heigoa ka fakatutala a tautolu he vala tala nei?

³ Tuga e tau matakainaga fifine tokoua ne totoku, fakaalofa lahi a koe ki a Iehova ka e liga fakauaua kua fakaalofa a ia ki a koe. Ko e ha kua lata a koe ke talitonu na leveki mooli e ia a koe? Ti ko e heigoa ka lagomatai a koe ke fahia ka manatu kua nakai fakaalofa a Iehova ki a koe? Kia fakatutala ke he tau tali he tau hūhū nei.

4. Ko e ha kua hagahagakelea ke fakauaua ke he fakaalofa ha Iehova ki a tautolu?

⁴ Ko e fakaalofa ko e malolō omoomoi. Ka talitonu a tautolu ke he fakaalofa mo e lalagoaga ha Iehova, to fakalagalaga ai ke  fekafekau mo e loto katoa ki a ia pete e tau paleko he moui. Kaeke ke fakauaua ai na leveki he Atua a tautolu, to ‘tote ni ha tautolu a malolo.’ (Fakatai 24:10) Ti ka loto lolelole mo e galo e tua ke he fakaalofa he Atua, to nakai maeke a tautolu ke totoko e tau lagatau ha Satani.​—Efeso 6:16.

5. Lauia fēfē e falu he fakauaua ke he fakaalofa he Atua?

⁵ Falu Kerisiano fakamooli he vahā ha tautolu kua lolelole fakaagaaga ha ko e tau fakauaua. Ko e motua ko James ne pehē: “Pete kua fekafekau au he Peteli mo e fiafia he gahua fakamatala he fakapotopotoaga vagahau kehe, tuahā au kaeke kua talia mooli e Iehova e tau mena ne taute e au ma haana. He taha mogo, tuahā foki au kaeke kua fanogonogo a Iehova ke he tau liogi haaku.” Ko Eva he fekafekauaga mau foki ne pehē: “Iloa e au ko e fakauaua ke he fakaalofa ha Iehova kua hagahagakelea ha kua lauia e tau mena oti kua taute e koe ke fekafekau ki a Iehova. Oti e manako ha tautolu ke taute e tau mena fakaagaaga mo e galo e fiafia he fekafekau ki a Iehova.” Ko Michael ko e paionia tumau mo e motua, ne pehē: “Ka nakai talitonu a koe na leveki he Atua a koe, to tafia kehe a koe mai ia ia.”

6. Ko e heigoa e mena ka taute e tautolu ka fakauaua hagaao ke he fakaalofa he Atua?

⁶ Fakakite he tau mena nei ne tutupu e hagahagakelea he tua ka manamanatu ai kua nakai fakaalofa a Iehova ki a tautolu. Ko e heigoa kua lata ke taute ka fakauaua a tautolu hagaao ke he fakaalofa he Atua? Lata a tautolu ke tiaki fakamafiti e manamanatuaga ia! Ole ki a Iehova ke lagomatai a koe ke utakehe e tau “manamanatu” kelea ia, ka e fakapuke aki e “monuina foki mai he Atua . . . to leveki ai e tau loto ha mutolu, katoa mo e tau manatu ha mutolu.” (Sala. 139:23; Filipi 4:6, 7) Ti manatu, nakai ni ko koe tokotaha. Taufetului e falu matakainaga fakamooli mo e tau logonaaga kelea. Ko e tau fekafekau ha Iehova i tuai ne fehagai foki mo e tau logonaaga pihia. Manamanatu ke he mena ka fakaako mai he fakafifitakiaga he aposetolo ko Paulo.

7. Ko e heigoa e tau lekua ne fehagai mo Paulo?

⁷ Kua pehia kia a koe ha kua loga e tau matagahua ti nakai fahia ke taute e tau mena oti ia? Ka pihia, to maama e koe a Paulo. Nakai kapaletū a ia ke he taha e fakapotopotoaga ka e kapaletū ke he tau fakapotopotoaga oti.  (2 Kori. 11:23-28) Kua leva kia e gagao haau ti utakehe e fiafia haau? Leva e matematekelea ha Paulo ha kua “mahukihuki ke he tino” ne lauia e malolō tino, ti kua manako lahi a ia ke utakehe ai. (2 Kori. 12:7-10) Loto lolelole kia a koe ha ko e nakai mitaki katoatoa ni haau? Pihia a Paulo he falu mogo. Pehē a Paulo ko ia “ko e tagata malaia” ha kua taufetului tumau a ia mo e nakai mitaki katoatoa ni haana.​—Roma 7:21-24.

8. Ko e heigoa ne lagomatai a Paulo ke fahia ke he tau lekua haana?

⁸ Pete he fehagai a Paulo mo e tau kamatamata mo e tau tuaga fakalolelole, tumau a ia ke fekafekau ki a Iehova. Moua e ia i fe e malolō ke taute pihia? He mailoga e ia e nakai mitaki katoatoa, nakai maueue e tua haana ke he lukutoto. Iloa foki e Paulo e maveheaga ha Iesu ko e “taha ne tua kia [Iesu], ka kia moua e ia e moui tukulagi.” (Ioane 3:16; Roma 6:23) Ko Paulo mooli taha ia lautolu ne tua ke he lukutoto. Talitonu a ia kua mautali a Iehova ke fakamagalo a lautolu foki ne agahala kelea lahi ka fakatokihala a lautolu.​—Sala. 86:5.

9. Ko e heigoa kua fakaako e tautolu mai he tau kupu ha Paulo ia Kalatia 2:20?

⁹ Tua foki a Paulo ke he malolō he fakaalofa he Atua ne fakakite he Keriso. (Totou Kalatia 2:20.) Mailoga e tau kupu mafanatia he matahiku he kupu tohi ia. Pehē a Paulo: “Ke he Tama he Atua, ko ia ne fakaalofa mai kia au, mo e foaki mai e ia a ia ke hukui aki au.” Nakai fakakaupā e Paulo e fakaalofa he Atua ke tuga he pehē, ‘Kitia e au e kakano ne fakaalofa a Iehova ke he tau matakainaga haaku, ka e nakai maeke a ia ke fakaalofa ki a au.’ Fakamanatu e Paulo ke he tau Roma: “He matulei a Keriso ke hukui aki a tautolu, ka ko e tau tagata hala agaia a tautolu.” (Roma 5:8) Nakai fakakaupā e fakaalofa he Atua!

10. Ko e heigoa kua fakaako e tautolu ia Roma 8:38, 39?

¹⁰ Totou Roma 8:38, 39. Talitonu katoatoa a Paulo ke he malolō he fakaalofa he Atua. Tohi e ia kua nakai fai mena “ke fakamavehe a tautolu mo e fakaalofa he Atua.” Iloa e Paulo na fakauka a Iehova he fehagai mo e motu ha Isaraela. Iloa foki e ia e puhala ne fakaalofa hofihofi noa a Iehova ki a ia. Taha kakano foki, pehē a Paulo, ‘Ha kua fakafano mai e Iehova haana ni a Tama ke mate ma haaku, nakai fai kakano au ke fakauaua ke he fakaalofa haana.’​—Roma 8:32.

11. Pete kua taute e Paulo e tau agahala tuga ne talahau ia 1 Timoteo 1:12-15, ko e ha ne mauokafua a ia na fakaalofa e Atua ki a ia?

¹¹ Totou 1 Timoteo 1:12-15. Liga fai mogo ne kelea lahi e loto ha Paulo ha ko e tau mena ne taute e ia fakamua. Pehē a ia “kua mua” e  agahala haana, ti nakai ko e mena ke ofo! To iloa e Paulo e kupu mooli, favale a ia ke he tau Kerisiano he taha maaga mo e taha maaga, he tuku e falu ke he tau fale puipui mo e kaufakalataha ke kelipopo e falu. (Gahua 26:10, 11) Fēfē la e logonaaga ha Paulo ka feleveia mo e taha fuata Kerisiano ne mamate e tau matua ha ko e tau gahua ha Paulo? Tokihala a Paulo ke he tau hehē haana ka e iloa e ia kua nakai maeke a ia ke hiki e tau mena kua mole. Talia e Paulo kua mate e Keriso ma haana, ti mauokafua a ia he tohi: “Ko e fakaalofa noa he Atua kua pehenei ai au.” (1 Kori. 15:3, 10) Ko e heigoa e fakaakoaga ma tautolu? Kia talia na mate e Keriso ma haau mo e hafagi e puhala ma haau ke moua e fakafetuiaga tata mo e mafanatia mo Iehova. (Gahua 3:19) Mena ne mua e aoga ke he Atua ko e mena ka taute e tautolu mogonei mo e he vahā i mua, nakai ko e tau hehē kua mole, pete ko e taha he Tau Fakamoli a Iehova a tautolu po ke nakai he mogoia.​—Isaia 1:18.

12. Lagomatai fēfē he tau kupu ia 1 Ioane 3:19, 20 a tautolu ka logona hifo e fakateaga po ke nakai fakaalofa ki a tautolu?

¹² Ka manamanatu a koe ki a Iesu ne mate ke ufiufi e tau agahala haau, liga pehē a koe, ‘Nakai lata au ke moua e lilifu ia.’ Ko e ha ne liga logona hifo pihia a koe? Liga fakahehē he tau loto nakai mitaki katoatoa ha tautolu a tautolu, ti logona hifo e fakateaga po ke nakai fai fakaalofa. (Totou 1 Ioane 3:19, 20.) He tau mogo pihia, lata ke manatu “kua mua e Atua ke he tau loto ha tautolu.” Ko e fakaalofa mo e fakamagalo he Matua he lagi kua mua atu e malolō ke he ha logonaaga kelea ne liga ha ha agaia ke he tau loto ha tautolu. Lata ke fakaako ke talitonu na fakaalofa a Iehova ki a tautolu. Ke taute e mena ia, lata ke fakaako tumau e Kupu haana, liogi tumau ki a ia, mo e fakalataha tumau mo e tau tagata ne tapuaki  ki a ia. Ko e ha kua aoga lahi ke taute e tau mena ia?

13. Lagomatai fēfē a tautolu he fakaako ke he Kupu he Atua? (Kikite foki e puha “ Puhala ne Lagomatai he Kupu he Atua a Lautolu.”)

¹³ Fakaako e Kupu he Atua he tau aho takitaha, to lahi atu e maama haau ke he tau aga mafanatia ha Iehova. To iloa e koe kua fakaalofa lahi a ia ki a koe. Ko e manamanatu fakahokulo ke he vala he Kupu he Atua he tau aho takitaha ka lagomatai a koe ke manamanatu fakamitaki, ti fakatonu e manamanatuaga mo e loto haau. (2 Timo. 3:16) Ko e motua ko Kevin ne taufetului mo e tau logonaaga fakateaga, ne pehē: “He totou e Salamo 103 mo e manamanatu fakahokulo ki ai ne lagomatai au ke fakahako e manamanatuaga mo e maama e tau manatu mooli ha Iehova hagaao ki a au.” Ko Eva ne totoku fakamua, ne pehē: “He fakaoti e aho, manamanatu fakahokulo au ke he tau mena kua aoga ki a Iehova. Moua e au e loto mafola mo e atihake e tua haaku.”

14. Lagomatai fēfē he liogi a tautolu?

¹⁴ Liogi nakai noa. (1 Tesa. 5:17) Ko e kapitiga tata mo e taha tagata kua fakavē ke he fetutalaaki tumau mo e mai he loto. Pihia foki e fakafetuiaga ha tautolu mo Iehova. Ka tala age e tau logonaaga, tau manatu, mo e tau tupetupe ha tautolu ki a ia he liogi, kua fakakite e mauokafua ki a ia mo e iloa kua fakaalofa a ia ki a tautolu. (Sala. 94:17-19; 1 Ioa. 5:14, 15) Ko Yua ne totoku fakamua, ne pehē: “Ka liogi au, nakai ni tala age e au ki a Iehova e tau mena ne tutupu ki a au he aho ia. Tala age e au e tau manatu mo e tau logonaaga mooli haaku ki a Iehova. Kitia fakahaga e au a Iehova, nakai ko e takitaki lahi he kamupanī ka ko e Matua ne fakaalofa mooli ke he fanau haana.”​—Kikite e puha “ Kua Totou Nakai e Koe?”

15. Fakakite fēfē e Iehova e fiafia ki a tautolu?

¹⁵ Fakalataha mo e tau kapitiga fakamooli; ko e tau mena fakaalofa a lautolu mai ia Iehova. (Iako. 1:17) Fakakite he Matua he lagi e fiafia he foaki mai e magafaoa fakaagaaga he tau matakainaga kua fakakite e “fakaalofa . . . ke he tau aho oti kana.” (Fakatai 17:17) He tohi ha Paulo ke he tau Kolose, ne totoku e ia e falu Kerisiano ne lalago a ia, ti hagaao ki a lautolu ko e “fakamafanatia” lahi. (Kolo. 4:10, 11) Lata foki a Keriso Iesu ke moua e lalago ti loto fakaaue a ia ke he haana tau kapitiga, tau agelu mo e tau tagata.​—Luka 22:28, 43.

16. Lagomatai fēfē he tau kapitiga fakamooli a tautolu ke fakatata lahi ki a Iehova?

¹⁶ Fakaaoga fakamitaki nakai e koe e tau mena fakaalofa ha Iehova ko e tau kapitiga fakamooli? He tutala ke he kapitiga motua fakaagaaga hagaao ke he tau tupetupe ne nakai kakano kua lolelole e tua ha tautolu; ka kua puipui ai a tautolu. Manamanatu ki a  James ne totoku fakamua, ne pehē: “Ko e tau fakafetuiaga mitaki mo e tau Kerisiano motua fakaagaaga kua lagomatai lahi mahaki ki a au. Ka lauia lahi au ha ko e tau manatu kelea, fanogonogo fakatekiteki e tau kapitiga fakahele nei ti fakamanatu mai kua fakaalofa a lautolu ki a au. Ka taute pihia e lautolu, mailoga e au e fakaalofa mo e levekiaga ha Iehova ki a au.” Aoga mooli ke feaki mo e fakatumau e tau fakafetuiaga tata mo e tau matakainaga fakaagaaga ha tautolu!

17-18. Ko hai kua lata a tautolu ke fanogonogo ki ai, ti ko e ha?

¹⁷ Manako a Satani ki a tautolu ke kaumahala he eketaha ke taute e mena hako. Manako a ia ki a tautolu ke talitonu kua nakai fakaalofa mai a Iehova, ti nakai lata a tautolu ke fakahao. Ka e tuga ne kitia e tautolu kua nakai mooli e mena ia.

¹⁸ Fakaalofa a Iehova ki a koe. Ko e koloa uho a koe ki a Ia. Ka omaoma ki a Ia, to “tumau [a koe] ke he hana fakaalofa” ke hoko ke he tukulagi, tuga a Iesu. (Ioane 15:10) Ti ua fanogonogo ki a Satani po ke tau manatu kelea haau. Fanogonogo ki a Iehova, ko ia ne kitia e tau mena mitaki ia tautolu takitokotaha. Kia talitonu kua “fiafia a Iehova ke he hana motu [tau tagata],” putoia ai a koe!