TALA KE HE MOUI
Foaki e Iehova ki a Au e Kautūaga ke he Gahua Haana
Tala age au ke he leoleo kua fitā e fano au ke he fale pouli ha kua nakai manako au ke tau. Hūhū au ki a ia, “Liu kane fai a koe ke fekau au ke taute e mena ia?” Lagaua aki anei he poaki ki a au ke fano he Kautau he United States.
NE FANAU au he 1926 i Crooksville, Ohio i United States. Nakai ō tapu e Matua Taane mo e Matua Fifine, ka e pehē a laua ki a mautolu ko e tau fanau ne toko valu ke ō he tapu. Fano au he Tapu Methodist. He 14 e tau haaku, mai he akoako ki a au e palepale ha kua taha e tau he fano au he tapu he tau Aho Tapu oti.
Margaret Walker (matakainaga fifine ke uaaki he faahi hema) ne lagomatai au ke iloa e kupu mooli
Kavi ke he magaaho ia, ko e tuutakaina ne higoa ko Margaret Walker, ko e taha he Tau Fakamoli a Iehova ne kamata ke ahiahi mai ke he matua fifine haaku mo e tutala ki a ia hagaao ke he Tohi Tapu. Taha aho, fifili au ke fakalataha atu mo laua. Manatu e Matua Fifine to fakatauhele e au e fakaako haana, ati ui e ia ki a au ke fano ki fafo. Ka e lali tumau au ke fanogonogo ke he tau fakatutalaaga ha laua. Mole atu falu ahiahi, hūhū a Margaret ki a au, “Iloa nakai e koe e higoa he Atua?” Pehē au, “Iloa oti he faoa e mena ia—ko e Atua.” Pehē a ia, “Tamai e Tohi Tapu haau ti hafagi ki a Salamo 83:18.” Taute pihia e au, ti kitia e au ko Iehova e higoa he Atua. Poi atu au ke he tau kapitiga ti tala age ki a lautolu, “Ka ō a mutolu a magaaho ki kaina, ti hafagi e Tohi Tapu ki a Salamo 83:18 ke kitia e higoa he Atua.” Liga pehē a koe na kamata ni au he mogoia ke fakamatala.
Fakaako e au e Tohi Tapu ti papatiso he 1941. Nakai leva he mole, ne kotofa au ke taute e fakaakoaga Tohi Tapu he fakapotopotoaga. Fakamafana e au e matua fifine haaku mo e tau lafu ke o mai, ti kamata oti a lautolu ke o mai ke he fakaako Tohi Tapu ne taute e au. Ka e nakai manako a Dad.
TOTOKOAGA I KAINA
Ne loga atu foki haaku tau matagahua he fakapotopotoaga, ti fakaputu e au e tau tohi loga ne lolomi he Tau Fakamoli a Iehova. Taha aho, tuhi a Dad ke he tau tohi haaku ti pehē: “Kitia e koe e tau mena oti kō? Loto au ke uta ki fafo he fale ē, ti fano foki mo koe.” Toka e au a kaina ti fano nofo i Zanesville i Ohio ne tata mai, ka e fano tumau au ke fakamafana e magafaoa haaku.
Lali a Dad ke taofi e Matua Fifine he fano ke he tau feleveiaaga. Falu mogo ka fano a ia, ne tutuli he matua taane a ia ti toho mai a ia ki fale. Ka e hola a ia ki fafo he taha gutuhala foki ti fano he feleveiaaga.
Tala age au ke he Matua Fifine: “Ua tupetupe. To mategūgū na ia he tutuli a koe.” Nakai leva ti fiu a Dad he lali ke taofi a ia, ti atāina e Matua Fifine ke fano he tau feleveiaaga.He kamata e Aoga Fekafekau Fakateokarasi he 1943, kamata au ke taute e tau lauga he tagata fakaako he fakapotopotoaga haaku. Ko e fakatonuaga ne moua e au he mole e vala haaku he aoga kua lagomatai au ke eke mo tagata taute lauga mitaki.
TUUHO HE MAGAHALA FELAKUTAKI
He 1944, he Felakutaki II he Lalolagi, poaki ki a au ke hū he kautau. Fina atu au ki Fort Hayes i Columbus, Ohio ke tivi e malolō tino mo e fakapuke e tau laupepa. Tala age foki au ke he tau takitaki to nakai eke au mo kautau. Fakaatā e lautolu au ke fano ki kaina. Ka e fai aho he mole, taha e leoleo ne hau ke he gutuhala haaku ti ui ki a au, “Corwin Robison, ha ha ia au e fakaatāaga ke fakahala a koe.”
Ua e faahi tapu he mole ke he fale fakafili, ne pehē e ikifakafili: “Kaeke ko e fifiliaga haaku, to fakahala mate a koe ke he fale pouli. Fai mena nakai a koe ke talahau?” Tali au: “Ma Iki Lilifu, kua lata au ke haia he vahega he fekafekau. Ko e gutuhala he tau tagata oti ko e matakavi fakamatala haaku, ti kua fitā he fakamatala e au e tala mitaki he Kautu ke he tau tagata tokologa.” Tala age e ikifakafili ke he matakau fakafili: “Nakai fakalataha mai a mutolu ki hinei ke fifili ko e maeke nakai e fuata nei ke eke mo fekafekau po ke nakai. Ko e fakalataha mai a mutolu ki hinei ke fifili ko e maeke nakai a ia ke eke mo kautau po ke nakai.” Nakai katoa e hafa tulā, ne fifili e matakau fakafili kua agahala au. Fakahala he ikifakafili au ke lima e tau he fale pouli i Ashland i Kentucky.
PUIPUI E IEHOVA AU HE FALE POULI
Ko e faahi tapu ua fakamua haaku ne nofo he fale pouli i Columbus, Ohio ti nofo au he fale pouli he aho fakapā. Liogi au ki a Iehova: “Nakai maeke au ke nofo he fale pouli ke lima e tau. Ai iloa e au e mena ke taute.”
He aho hake, fakatoka mai he tau leoleo au. Fina atu au ke he taha pagotā ne loa mo e magamaga e tau tukeua, ti tutū a maua mo e onoono ki fafo he pūhio. Hūhū a ia ki a au, “Ko e heigoa ati hau a koe ki loto ma Fua Kū?” Pehē au, “Ko au ko e taha he Tau Fakamoli a Iehova.” Pehē a ia, “Ko koe ka taha? Ti ko e ha ne haia a koe i loto ē?” Pehē au, “Nakai ō e Tau Fakamoli a Iehova he felakutaki mo e tamate e tau tagata.” Pehē a ia, “Tuku e lautolu a koe he fale pouli ha kua nakai keli tagata a koe. Tuku e lautolu e falu tagata he fale pouli ha kua keli tagata a lautolu. Hako nakai e mena ia?” Pehē au, “Nakai, ai hako.”
Pehē mogoia a ia, “Ne 15 e tau he nofo au he taha fale pouli foki ti totou e au e falu he tau tohi ha mutolu.” He logona e au e mena ia ne liogi au, “Iehova, lagomatai au ke tamai e tagata nei ke he faahi haaku.” He mogoia, ko e pagotā kua higoa ko Paul ne pehē: “Ka lali e taha he tau tagata nei ke aamo a koe, ti kaā fakalahi. To fakakia e au a lautolu.” Ti ko e mogo ne nofo au i ai, nakai fai lekua au mo e tau pagotā toko 50 he faahi ia.
Ko au taha he Tau Fakamoli ne tuku he fale pouli he tuuho i Ashland, Kentucky
Magaaho ne hiki he tau takitaki au ke he fale pouli i Ashland, ne feleveia au mo e falu matakainaga ne momotua i ai. Lagomatai e lautolu au mo e falu ke fakatata tumau ki a Iehova. Kotofa e lautolu ki a mautolu e totouaga he Tohi Tapu ma e faahi tapu, ti tauteute e mautolu e tau hūhū mo e tau tali ma e feleveiaaga ne ui e mautolu ko e Bible Bees. Nonofo a mautolu he poko lahi ne fakaatuatu e tau mohega ke he tau kaupā. Ha ha ai e matakainaga taane ne fakatokatoka e fonua ha mautolu. Pehē a ia ki a au: “Robison, leveki e koe e mohega ha mena mo mena. Ko e tagata kua kotofa ke he mohega ia ko e fonua haau a ia. Lali ke fakamatala ki a ia to fano kehe a ia.” Ko e puhala ia ne fakamatala a mautolu he puhala fakatokatoka.
MENA NE MOUA E AU I FAFO HE FALE POULI
Kua oti e Felakutaki II he Lalolagi he 1945, ti fai magaaho ne nofo au he fale pouli. Tupetupe au ke he magafaoa haaku ha kua ui a Dad ki a au, “Ka maeke au ke utakehe a koe, maeke foki au ke taute pihia e faoa ne toe.” He fakatoka mai au, ne ofo lahi mahaki au. Toko fitu he magafaoa haaku kua ō ke he tau feleveiaaga ti taha he tau mahakitaga haaku kua papatiso pete ne totoko a Dad.
Fano he gahua he fonua mo Demetrius Papageorge, ko e matakainaga fakauku ne kamata fekafekau ki a Iehova he 1913
He kamata e Felakutaki ha Korea he 1950, ne poaki ki a au ke hū ke lagaua aki he kautau. Ti tala mai ki a au ke liu ki Fort Hayes. He mole e kamatamata he iloaaga haaku, pehē e leoleo ki a au, “Ko koe taha ne lahi mahaki e ola he matakau haau.” Ui au, “Mitaki a ia, ka e nakai fano au he kautau.” Fatiaki e au e 2 Timoteo 2:3 ti pehē, “Fitā au he eke mo tagata tau ha Keriso.” He fai magaaho ne fakanonono, pehē a ia, “Fano a koe.”
Nakai leva, ne fano au ke he feleveiaaga he Peteli he fonoaga i Cincinnati, Ohio. Tala mai e Matakainaga ko Milton Henschel ki a mautolu kua lahi e manako ke he tau matakainaga taane ne loto ke gahua malolō ma e Kautu. Ne tohi ole au ke gahua he Peteli ti talia ai. Kamata au ke fekafekau i Brooklyn ia Aokuso 1954, ti ko au agaia he Peteli tali mai ai.
Ne loga tumau e gahua haaku he Peteli. Fai tau ne gahua au he tau tulavela he faahi lomi mo e tau ofisa, gahua he tau matini, mo e fakafoou e tau loka. Gahua foki au he tau Fale he Toloaga i New York City.
Leveki e tau tulavela he tau ofisa he Peteli i Brooklyn
Fiafia lahi au ke he tau fakaholoaga he Peteli tuga e tapuakiaga pogipogi mo e Fakaako fakamagafaoa he Watchtower, mo e fakamatala foki mo e fakapotopotoaga. Ka manamanatu a koe ki ai, ko e tau mena anei kua lata tumau ke taute he ha magafaoa he Tau Fakamoli a Iehova. Ka taute auloa he tau matua mo e tau fanau e lauga he aho, taute tumau e Tapuakiaga he Magafaoa, fai vala he tau feleveiaaga fakapotopotoaga, mo e makutu he fakamatala e tala mitaki,
liga to fakatata tumau e magafaoa katoa ki a Iehova.Kua loga e tau kapitiga haaku he Peteli mo e fakapotopotoaga. Falu ko lautolu ne fakauku kua o hake ke he lagi. Falu ne nakai fakauku. Ka e nakai mitaki katoatoa oti e tau fekafekau ha Iehova, putoia ai e tau matakainaga he Peteli. Ka taufetoko au mo e taha matakainaga, lali tumau au ke taute e mafola. Manamanatu au ke he Mataio 5:23, 24 mo e puhala kua lata ia tautolu ke fehagai mo e tau fekehekeheaki. Nakai mukamuka ke talahau “Fakamolemole atu au,” ka e laulahi he tau fekehekeheaki kua taute he puhala nei.
TAU FUA MITAKI MAI HE FEKAFEKAUAGA HAAKU
Mogonei kua uka ia au ke fakamatala he taha gutuhala ke he taha gutuhala ha ko e tau he moui haaku, ka e nakai fakalolelole au. Tote e vagahau Mandarin Chinese ne iloa e au ti fiafia au he tutala ke he tau tagata Saina he puhalatū. Falu pogipogi ne foaki e au 30 po ke 40 e mekasini ki a lautolu ne fiafia.
Fakamatala ke he tau tagata Saina i Brooklyn i New York
Fai liu aahi atu foki au i Saina! Taha aho, ko e tama fifine totonu ne mamali ki a au he fakaolo mai e tau laupepa fakatātā ke lata mo e fakatūaga fua lakau. Mamali atu au ti age The Watchtower mo e Awake! he vagahau Saina. Uta ai e ia ti talahau ko e higoa haana ko Katie. He mogo fakamui, ka kitia e Katie au, ne hau a ia ke tutala mo au. Fakaako e au a ia ke he tau higoa Palagi he tau fua lakau mo e tau lakau kai, ti fatiaki e ia e tau kupu ka talahau e au. Fakamaama foki e au e tau kupu Tohi Tapu ki a Katie, ti talia e ia e tohi Bible Teach. Fai faahi tapu he mole, ne galo a ia.
Fai mahina he mole, age e au e tau mekasini ke he taha tama fifine foki hane tufa e tau laupepa fakatātā, ti talia ai e ia. He tapu hake, ne mai e ia e selafoni haana ki a au ti pehē, “Tutala a koe ki Saina.” Ui au, “Ai iloa au ha tagata i Saina.” Ka e fakamakamaka e tama fifine, ti totō e au e selafoni mo e pehē, “Fakaalofa atu ko Robison a ē.” Pehē e leo mai he taha faahi, “Robby, ko Katie a ē. Kua liu mai tai au ki Saina.” Ui au, “Saina?” Tali e Katie, “Ē. Robby, iloa e koe e tama fifine na ne atu e selafoni ki a koe? Ko e tehina haaku a ia. Loga e mena mitaki ne fakaako e koe ki a au. Fakamolemole fakaako a ia ke he puhala ne fakaako e koe au.” Pehē au, “Katie, to eketaha au ke taute pihia. Fakaaue he talahau ki a au e mena ne nofo ai a koe.” Nakai leva ti ko e mogo fakahiku foki a ia ne tutala au ke he tehina ha Katie. Ko e matakavi fe ni ne ha ha i ai e tau tama fifine ia mogonei, amanaki au kua lahi e mena ne fakaako e laua hagaao ki a Iehova.
Kua fekafekau au ki a Iehova ke 73 e tau, ti kua fiafia au he lagomatai e ia au ke fakatumau e tuuho mo e fakamooli i loto he fale pouli. Talahau foki he tau lafu haaku ki a au kua fakamalolō ki a lautolu he mogo ne fehagai au mo e totokoaga ha Dad ka e nakai mahala. Nakai leva, ne papatiso e Matua Fifine mo e toko ono he lafu haaku. Hiki fakatote foki e mahani a Dad, ti fano foki a ia ke he falu feleveiaaga ato mate a ia.
Kaeke ko e finagalo he Atua, ko e tau tagata he magafaoa haaku mo e tau kapitiga ne kua mamate to liliu tutū mai ke he moui he lalolagi foou. Manamanatu ke he olioli ha tautolu he tapuaki tumau a tautolu ki a Iehova mo lautolu ne ofania e tautolu! *—Kikite matahui tala.
^ para. 32 He tauteute e vala tala nei ke lomi, ne mate a Corwin Robison ne tua fakamooli ki a Iehova.