MANAMANATU ke he aho ne fiafia lahi mahaki e moui haau. Ko e magaaho kia ne faihoana a koe po ke magaaho ne fanau e tama fakamua haau? Po ke aho ne papatiso a koe? Liga ko e aho ne mua atu e aoga mo e fiafia he moui haau. He aho ia, kua olioli lahi e tau matakainaga haau ke kitia e fakamooli haau kua fakaalofa a koe ke he Atua mo e haau a loto katoa, agaaga katoa, manatu katoa, mo e malolō katoa!​—Mareko 12:30.

Liga logona hifo e koe e fiafia lahi he fekafekau ki a Iehova tali mai he papatiso haau. Ka e tokologa e tagata fakailoa ne galo fakahaga e fiafia ne ha ha ia lautolu fakamua. Ko e ha kua tupu e mena nei? Ko e tau kakano fe ati fakatumau a tautolu ke fekafekau mo e fiafia ki a Iehova?

Ne lahi e fiafia ne tamai he fekau he Kautu ki a tautolu. Ko e ha? Ha kua mavehe e Iehova to nakai leva ti moumou he Kautu e lalolagi favale nei ti tamai e lalolagi foou he Atua. Talahau mai he Sefanaia 1:14 ki a tautolu: “Kua tata mai e aho lahi a Iehova, kua tata mai ni, kua fakaave mai ni.” Kaeke ke logona hifo e tautolu kua leva tuai e fakatali ha tautolu, maeke a tautolu ke galo e fiafia ne ha ha ia tautolu fakamua. Fakatupu he mena nei a tautolu ke fakamanou hifo he ha tautolu a fekafekauaga ke he Atua.​—Tau Fakatai 13:12.

Ka fai magaaho a tautolu mo e tau matakainaga ha tautolu, to logona hifo e tautolu e mafanatia ke tumau e fekafekau mo e fiafia ki a Iehova. Ko e mahani mitaki he tau tagata ha Iehova ka futiaki a tautolu ke he tapuakiaga mooli ti lagomatai a tautolu ke kamata ke fekafekau ke he Atua mo e fiafia. (1 Peteru 2:12) Ka e, ko e heigoa ka tupu kaeke kua fakatonu taha he tau matakainaga ha tautolu ha kua nakai omaoma a ia ke he tau poakiaga he Atua? Liga fakalolelole he mena nei e falu he fakapotopotoaga ati galo e fiafia ha lautolu.

Maeke foki he velevele koloa ke fakagalo e fiafia ha tautolu. Puhala fe? Lali e lalolagi ha Satani ke fakaohooho a tautolu ke fakatau e tau koloa ne nakai aoga mooli ki a tautolu. Kia manatu e tautolu e tau kupu ha Iesu: “Nakai maeke ia taha ke fekafekau ke he na iki tokoua, ha ko e mena fakavihia e ia taha, ka e fakaalofa ke he taha; ka nakai pihia, ti pipiki atu a ia ke he taha, ka e fakateaga ke he taha. Nakai maeke ia mutolu ke fekafekau ke he Atua mo Mamone.” (Mataio 6:24) Nakai maeke a tautolu ke fekafekau fiafia ki a Iehova ka e he magaaho taha lali ke moua e tau mena oti kua maeke ia tautolu mai lalolagi nei.

Ko e fekafekau ki a Iehova ne nakai ko e kavega mamafa ma lautolu ne fakaalofa ki a ia. (1 Ioane 5:3) Manatu na pehē a Iesu: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau  agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.” (Mataio 11:28-30) He eke mo Kerisiano mooli kua fakahauhau ti moua e tautolu e fiafia. Ha ha mooli ia tautolu e tau kakano mitaki ke fiafia he fekafekauaga ha Iehova. Kia fakatutala a tautolu mogonei ke he tolu e mena ia.​—Hapakuka 3:18.

Fekafekau a tautolu ke he Punaaga he Moui, ko e Atua fiafia. (Gahua 17:28; 1 Timoteo 1:11) Mailoga e tautolu kua foaki ha tautolu a tau momoui ke he Tufuga ha tautolu. Kia matutaki a tautolu ke fekafekau mo e fiafia ki a Ia, pete he totou tau tuai he papatiso a tautolu.

Manamanatu ki a Héctor ne 40 e tau he fekafekau ki a Iehova ko e leveki faifano. Fiafia agaia a ia he fekafekau ki a Iehova he “vaha fuakau.” (Salamo 92:12-14) Ko e gagao he hoana haana ne fakakaupā e fekafekauaga haana ke he Atua, ka e nakai galo e fiafia ha Héctor. Pehē a ia: “Pete ne momoko he kitia e kelea fakahaga he gagao he hoana haaku ti kua paleko ke leveki a ia, nakai fakaatā e au e mena nei ke fofō e fiafia haaku he fekafekau ke he Atua mooli. He iloa kua foaki e au e moui haaku ki a Iehova, ko ia ne tufuga e tagata aki e amaamanakiaga, kua fai kakano lahi ke fakaalofa hokulo mo e fekafekau loto katoa ki a Ia. Eketaha au ke hakahakau ke he gahua fakamatala, ti lali au ke toka mau tumau e amaamanakiaga he Kautu he manamanatuaga haaku ke nakai galo e fiafia haaku.”

Foaki e Iehova e poa lukutoto ke moua e tautolu e moui fiafia. Mooli, “nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ē, maeke ke fakamagalo e tau agahala ha tautolu mo e maeke ke moua e moui tukulagi ka tua a tautolu ke he mena fakaalofa he Atua ko e lukutoto. Ko e kakano mitaki lahi mahaki anei ke fakakite e loto fakaaue! Ti ko e ha tautolu a loto fakaaue ke he lukutoto ka fakalagalaga a tautolu ke fekafekau ki a Iehova mo e fiafia.

Ko e matakainaga taane ne higoa ko Jesús ne nofo i Mexico, ne pehē: “Ne fakatupa au ke he gahua haaku, he falu mogo lima katoa e gahua vala magaaho haaku ti nakai okioki pete he nakai lata au ke taute pihia. Taute e au ke lahi e tupe ka moua. Ti fakaako au hagaao ki a Iehova mo e puhala ne foaki mai e Ia e Tama fakahele haana ma e tau tagata. Ha ha ia au e manako lahi mahaki ke fekafekau ki a Ia. Ti tukulele e au e moui haaku ki a Iehova, he mole e gahua ma e kamupanī ke 28 e tau, ne fifili au ke oti mo e gahua ti kamata ke fekafekau mau.” Ko e puhala a ia ne kamata a Jesús ke fekafekau mo e fiafia ki a Iehova.

Ko e momoui mahani meā ha tautolu kua tamai e fiafia ki a tautolu. Manatu nakai e koe na fēfē e moui haau fakamua to iloa e koe a Iehova? Fakamanatu he aposetolo ko Paulo ke he tau Kerisiano i  Roma na kua eke a lautolu mo “tau fekafekau he hala” ka ko e mogonei kua ‘fakatupatupa a lautolu ke he tututonu.’ Ha kua mahani meā e tau puhala momoui ha lautolu, maeke a lautolu ke amaamanaki atu ke he moui tukulagi. (Roma 6:17-22) Muitua foki e tautolu e tau tuaga ha Iehova, ti atāina a tautolu mai he mamahi ne moua mai he moui matahavala po ke favale. Ko e mena fiafia mooli!

Manamanatu ki a Jaime, ko e tagata nakai talitonu na fai Atua mo e talia ke he tupumainoa ti ko e tagata hūmomi foki. Kamata a Jaime ke fano he tau feleveiaaga ti aamohia lahi he fakaalofa ne moua e ia i ai. Ke tiaki e moui fakamua ha Jaime, lata a ia ke ole ki a Iehova ke lagomatai ke talitonu ki a Ia. “Fano fakatekiteki, mailoga e au na fai Matua fakahele mo e Atua fakaalofa hofihofi noa,” he talahau e Jaime. “Ko e tumau ke he tau tuaga tututonu ha Iehova kua eke mo puipuiaga ki a au. Ane mai nakai hiki au, liga kua mate tuai au ke tuga e falu he tau kapitiga hūmomi haaku. Ko e tau tau fiafia lahi mahaki he moui haaku he fekafekau ki a Iehova.”

Lata ke fēfē e logonaaga ha tautolu he fakatali ke he moumouaga he lalolagi favale nei? Manatu, kua taute a tautolu he finagalo he Atua mo e amaamanaki atu ke he moui tukulagi. “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.” (Kalatia 6:8, 9) Ha ko e lagomatai ha Iehova, kia fakauka a tautolu mo e eketaha ke feaki e tau mahani kua lata ia tautolu ke hao mai he “matematekelea lahi,” mo e matutaki ke fekafekau fiafia ki a Iehova.​—Fakakiteaga 7:9, 13, 14; Iakopo 1:2-4.

Mauokafua a tautolu to palepale e Iehova e fakauka ha tautolu ha kua iloa e ia e gahua ha tautolu ne taute mo e fakaalofa ne fakakite e tautolu ki a ia mo e higoa haana. Ka tumau a tautolu ke fekafekau mo e fiafia ki a ia, to eke a tautolu ke tuga e salamo ko Tavita ne pehē: “To tuku atu e au a Iehova ki mua haku nakai noa; ha ko e mena ha he tapa matau haku a ia, nakai fagahuatia ai au. Ko e mena ia kua fiafia ai haku loto, mo e olioli ai haku a lilifu; ke okioki foki haku tino mo e nakai haofia.”​—Salamo 16:8, 9.