Ka mooli e mena nei, manamanatu ke he puhala ka lauia e tau momoui ha tautolu. Ma e fakatai, taha e tama taane he matakainaga ne taupega. Ne malipilipi e loto he matua taane. Manamanatu a ia kua mailoga tuai kia e Iehova e vahā i mua ti fifili to maeke a ia mo e hoana haana ke fakauka ke he matematekelea nei. He fakatokaaga nei, tokologa ia tautolu ka fehagai mo e tau matematekelea. Ti kua lata kia a tautolu ke talitonu na pule a Iehova ke he tau mena oti kua tutupu ke he tau momoui ha tautolu?

He kumikumi a tautolu ke he 1 Korinito 10:13, to kitia e tautolu nakai lalago he Tohi Tapu na iloa tuai e Iehova e mena ka fakauka ki ai a tautolu ti fifili e tau kamatamata ka hoko ki a tautolu. Ko e ha ne talahau pihia a tautolu? Kumikumi la tautolu ke he fā e kakano.

Fakamua, foaki e Iehova e atāina ke he tau tagata ke taute e tau fifiliaga. Manako a ia ke taute e tautolu e tau fifiliaga ni ha tautolu. (Teutaronome 30:19, 20; Iosua 24:15) Ka fifili a tautolu ke taute e tau fifiliaga ne fakafiafia a Iehova, maeke a tautolu ke falanaki ki a ia ke takitaki a tautolu. (Tau Fakatai 16:9) Ka taute e tautolu e tau fifiliaga kelea, to helehele e tautolu e tau fua pihia he tau momoui ha tautolu. (Kalatia 6:7) Ka fifili e Iehova e tau kamatamata ne hohoko ki a tautolu, to moua mooli kia e tautolu e atāina ke fifili?

Uaaki, nakai puipui e Iehova a tautolu mai he “tau mena ke tutupu ai.” (Fakamatalaaga 9:11) Liga lauia e tagata ke he pakia kelea ha ko ia he matakavi hepe he magaaho hepe. Tutala a Iesu hagaao ke he pakia ne 18 e tagata ne mamate he malolo hifo e kolo ki luga ha lautolu. Talahau fakamahino e ia nakai fakatupu he Atua e mamate ha lautolu. (Luka 13:1-5) Nakai tonu ke manatu ato tupu e pakia, na fifili he Atua ko hai ka momoui po ko hai ka mamate.

Toluaki, igatia a tautolu mo e lata ke fakatumau e mahani fakamooli ki a Iehova. Pehē a Satani kua fekafekau ni e tau tagata ha Iehova ki a Ia ha ko e tau mena ne foaki e Ia ki a lautolu. Talahau e Satani to nakai fakatumau a tautolu ke fakamooli ki a Iehova kaeke kua lauia a tautolu he tau kamatamata. (Iopu 1:9-11; 2:4; Fakakiteaga 12:10) Ka puipui e Iehova a tautolu mai he falu kamatamata, tuga kua hako a Satani.

Fāaki, nakai fifili a Iehova ke iloa e tau mena oti ka tutupu tuai ki a tautolu. Mooli, maeke a Iehova ke iloa e tau mena ka tutupu he vahā i mua ka manako a ia. (Isaia 46:10) Ka e fakakite he Tohi Tapu nakai fifili e ia ke iloa tuai e tau mena oti. (Kenese 18:20, 21; 22:12) Kua fakaalofa mo e tututonu a Iehova ti nakai fakatauhele e ia e tokanoaaga ha tautolu ke taute ne tautolu e tau fifiliaga ha tautolu.—Teutaronome 32:4; 2 Korinito 3:17.

Ti ko e heigoa mogoia e kakano he pehē a Paulo ko Iehova ne “nakai tuku atu e ia a mutolu ke he kamatamata kua mua ke he mena kua fahia ai a mutolu”? Fakamaama ai e Paulo e mena ka taute e Iehova he magaaho he tau kamatamata, ka e nakai ato hoko ai. Ka falanaki a tautolu ki a Iehova, to lagomatai e ia a tautolu ke he tau kamatamata ha tautolu he moui. (Salamo 55:22) To kumikumi a tautolu mogonei ke he ua e kakano ne talahau pihia a Paulo.

Ko e kakano fakamua ko e tau kamatamata ne hohoko ki a tautolu ne lauia ai e “tau tagata auloa.” He momoui a tautolu he fakatokaaga ha Satani, to fehagai a tautolu mo e tau tutūaga uka, liga ko e tau pakia foki. Kaeke ke falanaki a tautolu ki a Iehova to maeke ia tautolu ke fakauka ke he tau kamatamata nei mo e fakatumau e mahani fakamooli. (1 Peteru 5:8, 9) He mataulu he 1 Korinito veveheaga 10, tohi e Paulo hagaao ke he falu kamatamata ne fehagai mo e tau Isaraela he tutakale.  (1 Korinito 10:6-11) Ko lautolu ne falanaki ki a Iehova ne maeke ke fakauka ke he tau kamatamata ia. Ka ko e falu Isaraela ne nakai omaoma ki a Iehova. Nakai fakatumau a lautolu ke fakamooli ha kua nakai falanaki a lautolu ki a Ia.

Ko e kakano ke uaaki “ko e Atua kua fakamoli.” Ko e heigoa e kakano he mena nei? Ka onoono a tautolu ke he puhala ne leveki e Iehova e tau fekafekau haana he fakamauaga tala tuai, kitia e tautolu kua lagomatai fakamooli e ia a “lautolu kua fakaalofa atu kia ia mo e omaoma ke he hana tau poaki.” (Teutaronome 7:9) Fakaako e tautolu kua fakamooli tumau e Iehova e tau maveheaga haana. (Iosua 23:14) Maeke a tautolu ke iloa tonu e mena ia (1) to nakai fakaatā e Iehova ha kamatamata ke uka lahi ke nakai maeke a tautolu ke fakauka ai, mo e (2) to “taute foki e ia . . . e mena ke hao ai” a tautolu.

Maeke fēfē a Iehova ke ‘taute e mena ke hao ai’ a lautolu kua falanaki ki a ia? Mooli, maeke a ia ke utakehe e kamatamata. Ka e manatu, pehē a Paulo na “taute foki e [Iehova] e mena ke hao ai, kia fahia a mutolu ke fakauka ai.” Ti fa mahani a Iehova ke taute e puhala ke hao a tautolu he fakamalolō a tautolu ke maeke ke fakatumau e mahani fakamooli. Kia fakatutala a tautolu ke he falu puhala ne taute e ia e mena nei.

• Ko Iehova “kua fakamafana mai a [tautolu] ke he ha [tautolu] a tau matematekelea oti.” (2 Korinito 1:3, 4) Kua fakatotoka e ia e tau manamanatuaga, loto, mo e tau logonaaga ha tautolu puhala he Tohi Tapu, agaaga tapu haana, mo e fekafekau fakamoli.—Mataio 24:45; Ioane 14:16; Roma 15:4.

• Maeke a Iehova ke fakaaoga haana agaaga tapu ke takitaki a tautolu. (Ioane 14:26) Maeke he agaaga tapu ke lagomatai a tautolu ke manatu e tau tala mo e tau matapatu fakaakoaga he Tohi Tapu ke maeke ia tautolu ke taute e tau fifiliaga pulotu.

• Maeke a Iehova ke fakaaoga e tau agelu haana ke lagomatai a tautolu.—Heperu 1:14.

• Maeke a Iehova ke fakaaoga e tau matakainaga ke lagomatai a tautolu. Lagomatai e lautolu a tautolu ha ko e tau mena ne talahau mo e taute e lautolu.—Kolose 4:11.

Ti ko e heigoa kua fakaako e tautolu mai he tau kupu ha Paulo ia 1 Korinito 10:13? Nakai fifili e Iehova e tau kamatamata ke lauia a tautolu. Ka e talitonu a tautolu kaeke ke falanaki a tautolu ki a Iehova, maeke ia tautolu ke fakauka ke he ha kamatamata. Iloa e tautolu to taute tumau e Iehova e mena ke hao a tautolu ke fakatumau e mahani fakamooli ha tautolu ki a ia.