Ko e Lukutoto —‘Mena Fakaalofa kua Katoatoa e Mitaki’ Mai he Matua
“Ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki . . . mai he Matua.”
1. Ko e heigoa e tau mena mitaki ne taute he lukutoto ma tautolu?
KO E poa lukutoto ha Iesu Keriso ne maeke ke moua e tau monuina loga. Ma e fakatai, ko e fakatokaaga he lukutoto kua hafagi ma e tau fanau oti ha Atamu ne fiafia ke he tututonu ke fai vala he magafaoa he Atua a taha aho. Ko e taha monuina foki kua maeke a tautolu ke momoui tukulagi mo e fiafia. Mua atu, ne matutaki e lukutoto mo e tau mena kua aoga lahi ke he tau tagata oti he lagi mo e he lalolagi.
2. (a) Ko e heigoa e mena aoga lahi ke he lagi mo e lalolagi ne putoia e Iesu he liogi haana? (Kikite fakatino he kamataaga.) (e) Ko e heigoa ka fakatutala a tautolu ki ai he vala tala nei?
2 Kavi ke he ua e tau ato mate a Iesu, ne fakaako e ia e tau tutaki haana ke liogi: “Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Kia kumikumi la tautolu ke he puhala kua matutaki e lukutoto ke he fakatapuaga he higoa ha Iehova, ko e pule he Kautu he Atua, mo e taute he finagalo he Atua.
“KIA TAPU HAU A HIGOA”
3. Ko e heigoa ne hukui he higoa ha Iehova? Totoko atu fēfē a Satani ke he higoa ha Iehova?
3 Fakamua ai, ne liogi a Iesu ke fakatapu e higoa ha Iehova. Kua hukui he higoa ha Iehova a Iehova, mo e ko hai a ia. Ko ia ko e Atua ne mua e malolō mo e tututonu he lagi mo e lalolagi katoatoa. Fakahigoa foki e Iesu a ia ko e “Matua tapu.” (Ioane 17:11) Ha kua tapu a Iehova, ko e tau mena oti ne taute e ia mo e tau matafakatufono ne fakatū e ia kua tapu. Ka e i Etena, ne hūhū fakavaia e Satani e tonuhia he Atua ke fakatū e tau tuaga ma e tau tagata. Ne pikopiko a ia hagaao ki a Iehova mo e totoko e higoa, po ke aga he Atua.
4. Fakatapu fēfē e Iesu e higoa he Atua?
4 Ka ko Iesu, ne fiafia mooli a ia ke he higoa ha Iehova ti taute e tau mena oti kua maeke a ia ke fakatapu ai. (Ioane 17:25, 26) Fēfē? He mahani mo e fakaako atu ha Iesu, ne lagomatai e ia falu ke kitia e tau tuaga ha Iehova kua hako ti ko e tau mena oti ne ole e Ia ke taute e tautolu ko e mitaki ni ma tautolu. (Totou Salamo 40:8-10.) Pete foki he fakatupu e Satani e matematekelea mo e mate mamahi ki a Iesu, ne fakatumau ni a Iesu ke fakamooli. Kua fakamooli e ia na maeke he tagata mitaki ke omaoma katoatoa ki a Iehova.
5. Fakatapu fēfē e tautolu e higoa ha Iehova?
5 Maeke fēfē a tautolu ke fakakite kua fiafia a tautolu ke he higoa ha Iehova? He mahani ha tautolu. Manako a Iehova ki a tautolu ke tapu. (Totou 1 Peteru 1:15, 16.) Kakano he mena nei ke tapuaki ni ki a ia mo e omaoma ki a ia mo e tau loto katoa ha tautolu. Pete ka favale ki a tautolu, eketaha a tautolu ke momoui fakatatau ke he tau mena ne fakaako e Iehova ki a tautolu. He momoui fakalagotatai ke he tau tuaga ha Iehova, kua fakaheke e tautolu e higoa haana. (Mataio 5:14-16) Fakakite e tautolu kua mitaki e tau matafakatufono ha Iehova ti ko Satani ko e pikopiko. Nakai mitaki katoatoa a tautolu ti to taute e tautolu e tau hehē. Ka taute e tautolu, fakatokihala ti eketaha a tautolu ke nakai taute e tau mena ne ekefakakelea e higoa ha Iehova.
6. Ko e ha ne onoono a Iehova ki a tautolu kua tututonu pete he nakai mitaki katoatoa a tautolu?
6 Ko tautolu ne fakauku po ke ‘tau mamoe kehe,’ kua fakamagalo e Iehova e tau agahala ha tautolu kaeke ke tua a tautolu ke he lukutoto. Talia e ia ko e tau tagata ne tapuaki ki a ia ko lautolu kua fakatapu e tau momoui ki a ia. Ne talahaua tututonu e ia e tau Kerisiano fakauku ko e tau fanau haana mo e ‘tau mamoe kehe’ ne tututonu ko e tau kapitiga haana. (Ioane 10:16; Roma 5:1, 2; Iakopo 2:21-25) Ko e mena ia foki mogonei, kua maeke e lukutoto ke moua e tautolu e fakafetuiaga mitaki mo e ha tautolu a Matua mo e ke fakatapu haana higoa.
“KIA HOKO MAI HAU A KAUTU”
7. Ko e heigoa e tau monuina ne maeke he lukutoto ke taute?
7 He liogi fakaako, ne pehē a Iesu: “Kia hoko mai hau a kautu.” Matutaki fēfē e lukutoto ke he Kautu he Atua? Ko e Kautu he Atua, po ke fakatufono, ne moua mai ia Iesu mo e 144,000 ne fifili mai he tau tagata. Maeke he lukutoto ma e tau tagata nei ke liu fakatū hake ke he lagi. (Fakakiteaga 5:9, 10; 14:1) To eke a lautolu mo tau patuiki mo e tau ekepoa ti pule fakalataha mo Iesu ke he lalolagi ke he taha e afe tau. He magahala ia, to fakaaoga e Iehova e Kautu ke taute e lalolagi mo parataiso ti lagomatai e tau tagata oti ke mitaki katoatoa. Ko e tau fekafekau ha Iehova he lagi mo e he lalolagi mogoia to eke mo taha e magafaoa. (Fakakiteaga 5:13; 20:6) To moumou e Iesu a Satani ti utakehe e tau lekua oti kana ne fakatupu e ia.
8. (a) Lagomatai fēfē e Iesu e tau tutaki haana ke maama kua aoga e Kautu he Atua? (e) Lalago fēfē e tautolu e Kautu mogonei?
Luka 4:43) Ne tala age foki a ia ke he tau tutaki haana ke eke mo tau fakailoa haana “ke hoko ni ke he fakaotiaga [tau kalakala oti] he lalolagi.” (Gahua 1:6-8) Mogonei, puhala he gahua fakamatala he Kautu ne moua he tau tagata e tuaga ke fakaako ke he lukutoto ti eke mo tau tagata he Kautu he Atua. Fakakite e tautolu ko e tau tagata fakamooli he Kautu ha kua lalago a lautolu ne fakauku ke fakamatala e tala mitaki he lalolagi katoa.
“KIA EKE HAU A FINAGALO”
9. Ko e ha kua mauokafua a tautolu to fakamooli e Iehova e finagalo haana ma e tau tagata?
9 Ko e heigoa e kakano ha Iesu he pehē foki a ia: “Kia eke hau a finagalo”? Ka pehē a Iehova to fai mena ka tupu, to tupu mooli ai. (Isaia 55:11) Nakai maeke he totokoaga ha Satani ke taofi a Iehova. Ko e heigoa e finagalo ha Iehova ma e lalolagi? Manako a ia ke he lalolagi ke puke he tau fanau mitaki katoatoa ha Atamu mo Eva. (Kenese 1:28) Kane mamate a Atamu mo Eva ka e nakai fai fanau, to nakai fakamooli e finagalo he Atua ke fakapuke e lalolagi aki e tau fanau ha laua. Ti fakaatā e Iehova a laua ke fanafanau. Foaki he lukutoto ki a lautolu oti kua fakagahuahua e tua e tuaga ke mitaki katoatoa mo e momoui tukulagi. Fakaalofa a Iehova ke he tau tagata ti manako ki a tautolu ke moua e moui homo ue atu ne finagalo e ia ma tautolu.
10. Aoga fēfē e lukutoto ke he tau tagata ne mamate?
10 Ka e kua e tau piliona tagata ne mamate ka e nakai maeke ke iloa a Iehova? Manako a Iehova ke he tau tagata ke momoui. To liuaki mai e ia a lautolu ne mamate ke he moui. Maeke he lukutoto ke taute e mena nei ke liuaki mai a lautolu ke he moui. Ti maeke a lautolu ke fakaako ki a Iehova mo e ke momoui tukulagi. (Gahua 24:15) Ko Iehova e Punaaga he moui. Ka liuaki age e Iehova e moui ki a lautolu ne mamate, to eke a ia mo Matua ha lautolu. (Salamo 36:9) He liogi fakaako, ne pehē a Iesu ko Iehova ko e “ha mautolu a Matua na e, ha ha he lagi.” (Mataio 6:9) Tuku age e Iehova ki a Iesu e matagahua aoga lahi ke fakaliu tu mai a lautolu ne mamate. Pehē a Iesu: “Ko au nai ko e liu tu mai, mo e moui.”
11. Ko e heigoa e finagalo he Atua ma e “moto tagata tokologa”?
11 Pehē foki a Iesu: “Ha ko e tagata kua eke e finagalo he Atua, ko e haku a matakainaga a ia, mo e haku a mahakitaga, mo e haku a matua fifine.” (Mareko 3:35) Ko e finagalo he Atua ko e tau tagata oti mai he tau motu, tau magafaoa, mo e tau vagahau to eke mo tau tagata tapuaki haana. Fakamaama ai ko lautolu “ko e moto tagata tokologa, kua nakai maeke ia taha ke totou.” Tua a lautolu ke he lukutoto ti manako ke omaoma ke he Atua. Fakaheke e lautolu a ia ti pehē: “Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.”
12. Mai he liogi ha Iesu, ko e heigoa ne fakaako e tautolu hagaao ke he finagalo ha Iehova ma e tau tagata?
12 Lahi e mena ne fakaako e tautolu ki a Iehova mo e haana finagalo ma e tau tagata mai he liogi fakaako ha Iesu. Fakamua, lata a tautolu ke taute e tau mena oti kua maeke ke fakatapu e higoa ha Iehova mo e fakaheke a ia. (Isaia 8:13) Ko e poa lukutoto ha Iesu ati maeke e fakamouiaga ha tautolu, ti fakaheke foki e higoa he Atua. Ko e higoa ha Iesu ne kakano foki “Iehova ko e Fakamouiaga.” Uaaki, to fakaaoga e Iehova e Kautu haana ke tamai e aoga katoatoa he lukutoto ke he tau tagata omaoma. Mo e toluaki, mauokafua a tautolu to nakai fai mena ke taofi e finagalo ha Iehova ke fakamooli ai.
FAKAKITE E LOTO FAKAAUE HAAU KI A IEHOVA MA E LUKUTOTO
13. Ko e ha ne papatiso a tautolu?
13 Ko e puhala uho lahi kua fakakite e tautolu e loto fakaaue ma e lukutoto he fakatapu e tau momoui ha tautolu ki a Iehova ti papatiso. He puhala nei, kua fakakite e tautolu e tua ke he lukutoto mo e ko tautolu foki “ko e tau tagata [ha Iehova].” (Roma 14:8) Ka papatiso a tautolu, ole a tautolu ki a Iehova ke foaki ki a tautolu e “loto manamanatu hifo mitaki.” (1 Peteru 3:21) Tali e Iehova he fakagahua e tau mena kua aoga he lukutoto ki a tautolu. Ti mauokafua katoatoa a tautolu to foaki mai e ia ki a tautolu e tau mena oti kana ne mavehe e ia.
Fakakite fēfē e tautolu kua loto fakaaue a tautolu ke he lukutoto? (Kikite paratafa 13, 14)
14. Ko e ha ne poaki e Iehova ki a tautolu ke fakaalofa ke he falu?
14 Ko e tau mena oti kana ne taute e Iehova ne omoomoi he fakaalofa. Ko e finagalo haana ke he tau tagata oti ne tapuaki ki a ia ke fifitaki ki a ia mo e fefakaalofaaki. (1 Ioane 4:8-11) Ka fakaalofa a tautolu ke he tau tagata, kua fakakite fakamaali e tautolu kua manako a tautolu ke eke mo “fanau he Matua ha [tautolu] ha he lagi.” (Mataio 5:43-48) Ko e tau poakiaga ua ne mua atu, fakamua ke fakaalofa ki a Iehova, mo e ke uaaki ke fakaalofa ke he falu. (Mataio 22:37-40) Taha puhala ke fakakite e tautolu e fakaalofa ke he tau tagata he fakaako ki a lautolu e tala mitaki he Kautu he Atua. Ka omaoma a tautolu ke he poakiaga ha Iehova ke fakaalofa ke he falu, mua atu ke he tau matakainaga ha tautolu, to maeke he fakaalofa ha tautolu ke “katoatoa foki.”
TAMAI HE LUKUTOTO E TAU MONUINA MAI IA IEHOVA
15. (a) Ko e heigoa e tau monuina kua moua e tautolu mogonei mai ia Iehova? (e) Ko e heigoa e tau monuina ka moua e tautolu anoiha?
15 Fakamafana e Iehova a tautolu ha kua tua a tautolu ke he lukutoto, to “holoholo kehe” e tau agahala ha tautolu. Maeke a ia ke fakamagalo katoatoa e tau agahala ha tautolu. (Totou Gahua 3:19-21.) He fitā e fakatutala a tautolu ki ai, ko e lukutoto kua maeke ia Iehova ke hiki falu tagata ke eke mo tau fanau haana he lagi. Ko lautolu nei ne kua fakauku. (Roma 8:15-17) Uiina e ia a lautolu ko e ‘tau mamoe kehe’ ke eke mo vala he magafaoa haana he lalolagi. Mole atu e mitaki katoatoa ha tautolu to ha ha i ai e kamatamata fakahiku. Ka fakamooli a lautolu ki a Iehova, to hiki e ia a lautolu ke eke mo tau fanau foki haana. (Roma 8:20, 21; Fakakiteaga 20:7-9) To fakaalofa tumau a Iehova ke he tau fanau oti haana. To matutaki e lukutoto ke tamai e tau monuina tukulagi. (Heperu 9:12) Foaki mai e Iehova ki a tautolu e mena fakaalofa uho nei, ti nakai fai ke utakehe ai mai ia tautolu.
16. Lagomatai fēfē he lukutoto a tautolu ke tokanoa?
16 Ka fakatokihala mai he tau agahala ha tautolu, nakai fai mena ka maeke he Tiapolo ke taofi a tautolu he eke mo vala he magafaoa ha Iehova. Ne “laga taha ni” e mate ha Iesu. Ti kua oti tuai he totogi e lukutoto. (Heperu 9:24-26) Ne fakahoko e Atamu e mate ki a tautolu, ka e foaki he poa ha Iesu ki a tautolu e moui tukulagi. Maeke he lukutoto ke fakatokanoa a tautolu mai he lalolagi ha Satani mo e matakutaku he mate.
17. Ko e heigoa e kakano he fakaalofa ha Iehova ki a koe?
17 To fakamooli tumau e tau maveheaga he Atua. Tuga ni e tau matafakatufono ne taute e Iehova ma e tufugatiaaga ne nakai hiki, to nakai hiki a Iehova. To nakai fakahogohogo manava e ia a tautolu. (Malaki 3:6) Nakai ni ko e mena fakaalofa he moui ka foaki mai e Iehova ki a tautolu. To foaki mai e ia haana fakaalofa ki a tautolu. “Kua iloa foki e tautolu, mo e tua a tautolu ke he fakaalofa ha he Atua kia tautolu. Ko e Atua, ko e fakaalofa a ia.” (1 Ioane 4:16) To fakamooli tumau e tau maveheaga haana. Nakai leva, to eke e lalolagi mo parataiso fulufuluola. Ko lautolu oti ne momoui to fifitaki ki a Iehova mo e fakaalofa ke he taha mo e taha. To pehē e tau fekafekau oti haana he lagi mo e lalolagi: “Kia ha he Atua ha tautolu e fakamonu, mo e fakahekeaga, mo e iloilo, mo e fakaaue, mo e lilifu, mo e mana, mo e malolo tukulagi tukumuitea. Amene.”