KUA manako e tau tagata ke fiafia. Ka ko e tau vahā fakamui anei ti igatia e tagata mo e tau lekua ne “uka” ke fehagai ki ai. (2 Timoteo 3:1) Falu tagata ne galo e fiafia ha kua taute fakakelea, gagao, galo e tau gahua, po ke fai he tau fakahele ha lautolu ne mamate. Falu ne galo e fiafia ha kua fai mena ne tupu ke fakatupetupe po ke fakamomoko a lautolu. Liga loto lolelole foki e tau fekafekau ha Iehova ti galo fakahaga e fiafia ha lautolu. Ka tupu ai ki a koe, maeke fēfē a koe ke liu moua e fiafia haau?

Ke tali e hūhū ia, lata a tautolu ke maama fakamua e fiafia mooli mo e puhala ne fiafia tumau e falu pete he lauia ke he tau tuaga uka. Mole ia, to kitia e tautolu e puhala ka maeke a tautolu ke tumau e fiafia mo e fakalahi ai.

Nakai tatai e fiafia mo e katakata. Manamanatu ke he mena nei: Ko e tagata ne konahia ne liga kata tumau. Ka magalo e kona haana to nakai liu a ia ke kata, ti liga loga agaia e tau lekua. Nakai tumau e katakata haana ti nakai ko e fiafia mooli.​—Tau Fakatai 14:13.

He taha faahi, ko e fiafia ko e logonaaga malolō he tau loto ha tautolu ka moua po ke amanaki a tautolu ke he taha mena mitaki. He moua e fiafia kua kakano ko e olioli he tau tuaga mitaki po ke kelea. (1 Tesalonia 1:6) Liga hogohogo manava a tautolu ke he taha mena ka e moua agaia e tautolu e fiafia. Ma e fakatai, ne fahi e tau aposetolo ha kua fakamatala a lautolu hagaao ki a Iesu. Ka e “o ai a lautolu mai mua he fakapotopotoaga mo e fiafia, ha kua eke ni kua aoga a lautolu ke eke fakakelea ha ko e hana higoa.” (Gahua 5:41) Nakai fiafia a lautolu ha kua fahi ka e fiafia ha kua maeke ai ke fakatumau ke fakamooli ke he Atua.

Ko e fiafia ne nakai ko e mena fanau mo tautolu po ke taha mena ne moua noa e tautolu. Ko e ha ne nakai pihia ai? Ha ko e fiafia mooli ko e vala he fua he agaaga tapu he Atua. Lagomatai he agaaga he Atua a tautolu ke feaki e “tagata fou,” ne putoia ai e fiafia. (Efeso 4:24; Kalatia 5:22) Ka moua e tautolu e fiafia, to mukamuka lahi ke fahia ke he tau tuaga uka ha tautolu.

Manako a Iehova ke kitia e tau mena mitaki ne tupu he lalolagi, nakai ko e tau mena kelea ne kitia e tautolu mogonei. Ka e pete he taute he tau tagata e tau mahani kelea, ne nakai galo e fiafia ha Iehova. Pehē e Tohi Tapu: “Ha ha he haeleaga hana e malolo mo e fiafia.” (1 Nofoaga he Tau Patuiki 16:27) Lafi ki ai, ko e tau mena mitaki ne taute he tau fekafekau ha Iehova kua fakafiafia a Ia.​—Tau Fakatai 27:11.

Fifitaki, po ke lali ke tuga a Iehova ke ua galo e fiafia ha tautolu he magaaho ka nakai fakamooli e tau amanakiaga ha tautolu. He nakai tupetupe, hagaaki a tautolu ke he tau mena mitaki ne moua mogonei mo e fakatali fakatekiteki  ke he tau mena ne mua atu e mitaki he vahā anoiha. *​—Kikite matahui tala.

Loga e tau fakafifitakiaga he Tohi Tapu ke he tau tagata ne tumau e fiafia pete ne loga e tau lekua. Tumau e fiafia ha Aperahamo pete he hagahaga kelea e moui haana mo e magaaho ne fakatupu lekua e falu tagata ki a ia. (Kenese 12:10-20; 14:8-16; 16:4, 5; 20:1-18; 21:8, 9) Taute fēfē e ia e mena nei? He manamanatu ke he amaamanakiaga haana ke moui he lalolagi foou i lalo he pule he Mesia. (Kenese 22:15-18; Heperu 11:10) Pehē a Iesu: “Ko Aperahamo ha mutolu a matua ne fiafia lahi a ia kia kitia ai haku a vaha.” (Ioane 8:56) Fifitaki e tautolu a Aperahamo ka manamanatu tumau a tautolu ke he fiafia ka moua e tautolu he vahā anoiha.​—Roma 8:21.

Ne malolō foki e tua ha Paulo mo Sila ti tumau e fiafia ha laua pete he loga e tau tutūaga uka. Ma e fakatai, he mole e fahi fakakelea ti tuku he fale puipui, ne “liogi ai mo e lologo a Paulo mo Sila ke he Atua.” (Gahua 16:23-25) Maeke a laua ke fakauka ke he matematekelea ha kua matutaki a laua ke manamanatu ke he tau maveheaga he Atua ma e vahā anoiha. He iloa kua matematekelea a laua ha ko e tau tutaki he Keriso, ne moua e laua e fiafia. Fifitaki e tautolu a Paulo mo Sila ka manatu e tautolu e tau fua mitaki kua moua mai he fekafekau fakamooli ke he Atua.​—Filipi 1:12-14.

Ha ha i ai foki mogonei e tau fakafifitakiaga loga he tau matakainaga ne tumau ha lautolu a fiafia pete he fehagai mo e tau tuaga uka. Ma e fakatai, ia Novema 2013, ne moumou he Super Typhoon Haiyan e tau kaina he tau magafaoa Fakamoli ne molea 1,000 i Filipaina. Ko George ne malona tiaki e kaina he taone ko Tacloban, ne pehē: “Pete ne mena kua tupu, fiafia e tau matakainaga. Uka au ke fakakite e fiafia ne logona hifo e mautolu.” Ka manamanatu a tautolu ke he tau mena ne taute e Iehova ma tautolu ti fakatumau ke loto fakaaue ki a Ia, to tumau e fiafia ha tautolu pete he tau tuaga uka lahi. Ko e heigoa falu mena ne foaki mai e Iehova ati moua e tautolu e tau kakano ke fiafia?

Ko e kakano lahi mahaki he fiafia ko e ha tautolu a fakafetuiaga mo Iehova. Iloa e tautolu e Patuiki he lagi mo e lalolagi katoatoa. Ko ia ko e ha tautolu a Matua, Atua, mo e Kapitiga!​—Salamo 71:17, 18.

Fiafia foki a tautolu ha kua foaki mai e Iehova e moui mo e lotomatala ke olioli ai. (Fakamatalaaga 3:12, 13) Ha kua futiaki e ia a tautolu ki a ia, maama e tautolu e finagalo haana ma tautolu ti iloa e puhala ke momoui ai a tautolu. (Kolose 1:9, 10) Ka e laulahi he tau tagata ne nakai maama e kakano he moui. Ke kitia e kehekeheaga, ne tohi e Paulo: “Kua nakai kitia he tau mata, ai logona foki he tau teliga, ti nakai hoko foki ke he loto he tagata e tau mena kua taute he Atua ma lautolu kua fakaalofa kia ia. Ka kua fakakite mai he Atua e tau mena ia kia tautolu ke he hana Agaga.” (1 Korinito 2:9, 10) He maama e finagalo mo e amaamanakiaga ha Iehova kua foaki ki a tautolu e fiafia.

Fai mena foki ne taute e Iehova ma tautolu. Taute e ia e puhala ke fakamagalo e tau agahala ha tautolu. (1 Ioane 2:12) Foaki e ia ki a tautolu e amaamanakiaga he moui ke he lalolagi foou, ka nakai leva ti hoko mai. (Roma 12:12) Foaki mai foki e Iehova mogonei ki a tautolu e tau kapitiga loga ne maeke ke tapuaki fakalataha ki a ia. (Salamo 133:1) Puipui foki e ia a tautolu mai ia Satani mo e tau temoni. (Salamo 91:11) Ka tumau a tautolu ke manamanatu ke he tau mena homo ue atu nei kua foaki mai e Iehova, to lahi atu e fiafia ha tautolu.​—Filipi 4:4.

Maeke nakai e Kerisiano kua fitā e fiafia ke fiafia lahi foki? Pehē a Iesu: “Kua tala atu e au e tau mena nai kia mutolu, kia tumau ai haku  a fiafia kia mutolu, kia fakakatoatoa ai foki ha mutolu a fiafia.” (Ioane 15:11) Fakakite he mena nei kua maeke a tautolu ke fiafia lahi tumau. Fakatatai e tautolu e fiafia ha tautolu ke he afi. Ka manako a tautolu ke kakā lahi e afi, lata a tautolu ke tuku fakalahi e gaafi. Manatu: Lagomatai he agaaga tapu a tautolu ke fiafia. Ti ka manako a tautolu ke lahi e fiafia, lata a tautolu ke ole tumau ma e agaaga he Atua puhala he liogi. Lata foki a tautolu ke manamanatu fakahokulo tumau ke he Tohi Tapu nukua omoomoi he agaaga tapu.​—Salamo 1:1, 2; Luka 11:13.

Taha mena foki ka foaki ki a tautolu e fiafia lahi ko e tumau e fagahuatia ke he tau mena ne fakafiafia a Iehova. (Salamo 35:27; 112:1) Ko e ha? Pehē e Tohi Tapu kua tufuga a tautolu ke “matakutaku . . . ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.” (Fakamatalaaga 12:13) Kua tufuga a tautolu ke taute e finagalo he Atua. Ti ka fekafekau a tautolu ki a Iehova, to fiafia mooli e tau momoui ha tautolu. *​—Kikite matahui tala.

He fakalahi e fiafia ha tautolu, to loga foki e fua mitaki ka moua e tautolu. Ma e fakatai, to lahi atu e fiafia ha Iehova ki a tautolu he matutaki ke fekafekau fiafia ki a ia pete e tau lekua ha tautolu. (Teutaronome 16:15; 1 Tesalonia 5:16-18) Ha kua moua foki e tautolu e fiafia mooli, to nakai manamanatu a tautolu ke tuku fakamua he moui e muhukoloa. Ka e to lali a tautolu ke taute foki e tau foakiaga lalahi ke lata mo e Kautu he Atua. (Mataio 13:44) Ka kitia e tautolu e mitaki ne moua mai he lahi e mena kua taute ma Iehova, to moua e tautolu e fiafia lahi, to mitaki e logonaaga ha tautolu, mo e to fakafiafia lahi e tautolu e falu.​—Gahua 20:35; Filipi 1:3-5.

Ko e lahi atu foki e fiafia ne moua e tautolu, to liga tino malolō lahi atu a tautolu. Pehē e Tohi Tapu: “Ko e loto fiafia kua eke mo vai lakau aoga haia.” (Tau Fakatai 17:22) Ko e tagata kumikumi he University of Nebraska i United States ne fakaako ke he malolō tino ne talahau e manatu kua lagotatai mo e Tohi Tapu. Pehē a ia: “Ka fiafia mo e makona a koe mo e moui haau mogonei, to liga mua atu e tino malolō haau anoiha.”

Ti pete he nonofo a tautolu he tau magaaho tupetupe, maeke a tautolu ke fiafia mooli ka moua e agaaga tapu puhala he liogi, fakaako, mo e manamanatu fakahokulo ke he Kupu he Atua. To moua foki e tautolu e fiafia ka manamanatu ke he tau mena mitaki loga ne foaki mai e Iehova mogonei, ka fifitaki e tua he falu, mo e ka eketaha ke taute e finagalo he Atua. Ati logona hifo e tautolu e mena ne talahau ia Salamo 64:10, ne pehē: “To fiafia e tagata tututonu kia Iehova, mo e tua kia ia.”