Fanau au i Quebec City he matakavi vagahau Falani ha Quebec i Canada. Ko e tau matua haaku ko Louis mo Zélia ne feaki hake au he kaina mafanatia mo e fakaalofa. Ko e matua taane haaku ko e tagata mā ka e fiafia lahi ke totou. Fiafia au ke tohitohi ti amanaki ke eke mo tagata tohi tala a taha aho.

He kavi ke he 12 e tau haaku, ko Rodolphe Soucy, ko e taha he tau kapitiga gahua he matua taane haaku ne ahiahi mai ke he kaina ha mautolu mo e kapitiga haana. Ko e Tau Fakamoli a Iehova a laua. Nakai iloa lahi au hagaao ke he Tau Fakamoli ti ai manako ke he lotu ha laua. Ka e nava au ke he puhala mitaki ne tali e laua e tau hūhū he fakaaoga e Tohi Tapu. Nava foki e tau matua haaku ti talia e mautolu ke fakaako e Tohi Tapu.

He magaaho ia ne fano au he aoga Katolika. He falu magaaho, ne tutala au mo e tau kapitiga aoga hagaao ke he mena haaku ne ako mai he fakaako Tohi Tapu. Fakamui, iloa he tau faiaoga ne ko e tau akoako, hagaao ke he mena nei. He nakai fakaaoga e Tohi Tapu ke fakakite kua hepe e mena haaku ne talahau, taha ia lautolu ne tukupau au i mua he vahega ko e tagata totoko! Pete ne fakatupetupe, mitaki e fua ne moua ha kua lagomatai au ke kitia kua nakai felauaki e tau fakaakoaga fakalotu he aoga mo e talahauaga he Tohi Tapu. Mailoga e au kua lata ni ke nakai liu he aoga ia. Mo e fakaatāaga he tau matua haaku ne hiki au ke he taha aoga foki.

Matutaki au ke fakaako e Tohi Tapu ka e tote e holo ki mua fakaagaaga haaku ha kua hopoate au he gahua fakamatala he taha gutuhala ke he taha gutuhala. Lahi e fakaohoohoaga he Lotu Katolika ti totoko fakakelea ke he gahua fakamatala ha mautolu. Ko Maurice Duplessis ko e palemia ha Quebec ne matutaki  lahi fakapolitika ke he lotu. Ha ko e lalagoaga he palemia, ne kunuene mo e keli foki he tau matakau favale e Tau Fakamoli. Lata ke loto malolō mooli ke fakamatala he magahala ia.

Ko e matakainaga taane ne lagomatai au ke fahia mai he hopoate haaku ko John Rae, ne kautū mai he vahega ke hiva aki he Aoga Kiliata. Ko John ne lotomatala lahi kua mahani molū, fakatokolalo, mo e mahani fakalatalata. Lavea ke fakatonu fakahako e ia au ka e lahi e mena haaku ne fakaako mai he fakafifitakiaga mitaki haana. Taufetului a John ke vagahau Falani, ti fa fakatauō au mo ia he gahua fakamatala mo e lagomatai a ia ke he vagahau. He fai magaaho mo John ne lagomatai au ke taute e fifiliaga lahi ma e kupu mooli. Hogofulu e tau he mole e feleveia fakamua haaku mo e Tau Fakamoli, ne papatiso au ia Me 26, 1951.

Ko e fakapotopotoaga tote ha mautolu i Quebec City ne laulahi ko e tau paionia. Ko e fakaohoohoaga mitaki ha lautolu ne fakalagalaga au ke paionia. He magahala ia, ne fakamatala a mautolu ke he taha gutuhala ke he taha gutuhala he fakaaoga ni e Tohi Tapu. He nakai fai tohi, lata a mautolu ke fakaaoga fakailoilo e Tohi Tapu. Ko e mena ia, ne fakamahani au ke iloa e tau kupu Tohi Tapu ke lalago e kupu mooli. Ka e tokologa ne nakai manako ke totou foki e Tohi Tapu ka nakai ha ha e taliaaga pauaki he Lotu Katolika.

He 1952, mau e au a Simone Patry, ko e matakainaga fifine fakamooli he fakapotopotoaga ia. Ne hiki a maua ki Montreal ti he tau ia ni ne fai tama a maua, ko e tama fifine ko Lise. Pete ne oti e paionia haaku mo e he nakai leva ti mau a maua, lali au mo Simone ke fakamukamuka e tau momoui ha maua ke putoia auloa ko e magafaoa ke he tau matagahua he fakapotopotoaga.

Hogofulu e tau he mole ato liu au manamanatu fakahokulo ke fakalahi haaku a fekafekauaga. He 1962 he fina atu ke he Aoga Fekafekau he Kautu ma e tau motua ne taha e mahina he loa ke he Peteli i Canada, ne kotofa au ke nofo he poko mo e matakainaga taane ko Camille Ouellette. Ko e fakamakutu ha Camille ma e gahua fakamatala ne nava lahi au ki ai, mua atu ha ko e tagata fai magafaoa a ia. He magahala ia, nakai ko e mena mahani mau i Quebec ma e matua ke paionia ka e feaki e tama; ka ko e foliaga ha Camille a ia. He nonofo tokoua a maua, fakamafana e ia au ke manamanatu hagaao ke he  tuaga haaku. He mole e tau mahina gahoa, mailoga e au kua maeke au ke liu fekafekau ko e paionia tumau. Falu ne manatu kua nakai pulotu e fifiliaga haaku, ka e matutaki ni au mo e mauokafua to fakamonuina e Iehova e tau laliaga haaku ke fakalahi e gahua fakamatala.

He 1964, ne kotofa au mo Simone ke fekafekau ko e tau paionia pauaki i Quebec City, ko e taone ne feaki hake a maua ti fekafekau i ai he tau tau loga. He magaaho nei, hane laukauka mai e tau tuaga ke fakamatala ka e fehagai agaia a mautolu mo e totokoaga.

He magaaho pale laā he taha Aho Faiumu, ne tapaki au i Sainte-Marie, ko e taone tote ne tata atu ki Quebec City. Uta he leoleo au ke he fale leoleo ti tuku he fale puipui ha kua fakamatala au mai he taha fale ke he taha fale ka e nakai fai fakaatāaga. Fakamui, ne uta au ki mua he ikifakafili ko Baillargeon ko e tagata pule malolō. Hūhū mai a ia ko hai ke hukui au he hopoaga. Mogo ne ui e au e higoa Glen How, * ko e matakainaga ne iloa lahi ko e loea, tupetupe e ikifakafili ti pehē: “Oi nakai! Ai ko e tagata ia!” Moua e Glen How e matahigoa mitaki he lalago e Tau Fakamoli he magahala ia. Fakailoa mai agataha he hopoaga kua utakehe tuai e tau hokotaki hagaao ki a au.

Ha ko e totokoaga ke he gahua ha mautolu i Quebec ne uka foki ke totogi e taha fale hagahaga mitaki ma e feleveiaaga. Moua ni he fakapotopotoaga tote ha mautolu e fale motokā tuai ne nakai mafana. Ke fakamafana ai he tau vahā makalili lahi, fakaaoga he tau matakainaga e oil heater. Fa fai tulā ne potopoto viko a mautolu i ai ato kamata e feleveiaaga ke fetutalaaki ke he tau mena tutupu atihake.

Kua mitaki ha ia ke kitia e tupu lahi he gahua fakamatala he tau tau loga. He tau atu tau 1960, ha ha i ai ni falu fakapotopotoaga ikiiki he matakavi i Quebec City, ko e faahi ha Côte-Nord mo e Gaspé Peninsula ne lafi. Mogonei, molea e ua e takaiaga he tau matakavi nei ti fuluola e tau Fale he Kautu ne feleveia e tau matakainaga i ai.

Kua uiina au mo Simone ke fekafekau he gahua takaiaga he 1970. He 1973 mogoia, kotofa a maua ke he gahua faahimotu. Ke he tau tau ia, lahi e mena haaku ne fakaako mai he tau matakainaga lotomatala tuga a Laurier Saumur * mo David Splane, * ne fekafekau foki a laua he gahua faifano. He mole e tau toloaga takitaha, igatia au mo David mo e talahau e tau manatu ke fakaholo ki mua e puhala fakaako ha maua. Manatu e au he taha mogo ne tala mai e David ki a au: “Léonce, fiafia au ke he lauga fakahiku haau. Mitaki, ka e tolu e lauga haaku ka taute mai he tau vala tala oti ia!” Fa hihiga au ke loga lahi e vala tala ka fakaaoga he tau lauga haaku. Lata au ke fakaako ke fakakū hifo.

Ne kotofa e tau leveki faahimotu ke fakamafana e tau leveki takaiaga. Ka e tokologa e tau  matakainaga i Quebec ne iloa mitaki au. Fa manako a lautolu ke gahua mo au he fonua ka ahiahi atu au ke he tau takaiaga. Pete he fiafia au he gahua fakamatala mo lautolu, nakai lahi e magaaho haaku mo e leveki takaiaga. Taha mogo, ne fakamanatu mai he taha leveki takaiaga fakahele ki a au: “Mitaki he foaki e koe e magaaho ma e tau matakainaga, ka e ua nimo ko e faahi tapu haaku anei. Lata foki au ke fakamafana!” Ko e fakatonuaga totonu nei ne lagomatai au ke lagotatai lahi.

Momoko ai, he 1976 kua tupu e taha mena fakaofo mo e momoko lahi. Ko Simone ko e hoana fakahele haaku ne gagao lahi ti mate. Ko e aga foaki noa mo e fakaalofa haana ma Iehova ne taute a ia mo hoa fulufuluola. He lahi e magaaho ke he gahua fakamatala ne lagomatai lahi au ke fahia ke he maanu haaku, ti fakaaue au ki a Iehova ma e lalagoaga fakaalofa Haana he magaaho uka ia. Fakamui, mau e au a Carolyn Elliott, ko e matakainaga paionia fakamakutu ne vagahau Peritania ne hiki ki Quebec ke fekafekau he matakavi ne manako lagomatai. Ko Carolyn kua mukamuka ke tutala ki ai mo e fiafia mooli ke he falu, mua atu ki a lautolu ne mā po ke matimati. Eke a ia mo fakamonuina mooli he fakalataha a ia mo au ke he gahua faifano.

Ia Ianuari 1978, ne ole ki a au ke fakaako e Aoga Fekafekau Paionia fakamua i Quebec. Logona hifo e au e tupetupe ha ko e fakaholoaga he aoga kua foou ki a au tuga ni e foou ke he tau tagata fakaako. Fakaaue ni ha ko e vahega fakamua ne fakaako e au kua putoia ai loga e matakainaga ne leva e paionia. Pete ni ko e faiaoga au, lahi e mena ne fakaako e au mai he tau tagata fakaako!

Fakamui he 1978, ko e Fonoaga he Lalolagi Katoa “Victorious Faith” ne taute he Olympic Stadium i Montreal. Ko e fonoaga ne mua atu e lahi i Quebec, ne molea 80,000 ne fakalataha atu. Kua kotofa au ke gahua he Faahi Gahua Nusi he fonoaga. Tutala au mo e tau tagata tohi  tala tokologa ti fiafia lahi ke kitia e tau tala mitaki hagaao ki a mautolu. Molea e 20 e tulā ne fakapuloa e tau hūhū tala he televisoni mo e letiō, mo e totou teau e tau vala tala ne lomi. Foaki ai e fakamatala ofoofogia lahi!

Ko e hikiaga lahi ma haaku ne hoko he 1996. He mole e fekafekau he faahi vagahau Falani i Quebec tali mai he papatiso haaku, ne kotofa au ke fekafekau he faahi vagahau Peritania he matakavi ha Toronto. Logona hifo e au e nakai hokotia mo e tupetupe he manamanatu ke taute e tau lauga ke he vagahau Peritania mapakipaki haaku. Lata au ke liogi tumau mo e falanaki fakalahi ki a Iehova.

He liu manamanatu ki ai, maeke mooli au ke talahau kua fiafia au he ua e tau ne fekafekau he matakavi ia ha Toronto. Fakauka a Carolyn he lagomatai au ke mauokafua ke he vagahau Peritania, ti lahi e lalagoaga mo e fakamafanaaga he tau matakainaga. Tokologa e kapitiga foou ne moua agataha e maua.

Lafi atu ke he tau matagahua mo e tauteute ma e toloaga he matahiku he faahi tapu, fa mahani au ke fano he tau afiafi Faraile he gahua fakamatala he taha gutuhala ke he taha gutuhala ke taha e tulā. Falu ne liga manatu, ‘Ko e fano he ha ke he fonua ato hoko e toloaga lavelave he matahiku he faahi tapu?’ Ka ko e tau fakatutalaaga mitaki he gahua fakamatala ne atihake au. Pihia foki mogonei, fiafia tumau au he fano he fonua.

He 1998, ne liu kotofa au mo Carolyn ki Montreal ko e tau paionia pauaki. Ke he loga e tau, ko e kotofaaga haaku ne putoia e fakatokatoka he tau puhala fakamatala pauaki he toloaga tagata mo e gahua fakalataha mo e tau tagata fakapuloa tala ke fakahako e maamaaga he tau tagata ke he Tau Fakamoli a Iehova. Fiafia au mo Carolyn he fakamatala mogonei ke he tau tagata motu kehe ne hiki mai foou ki Canada ti makai ke fakaako fakalahi hagaao ke he Tohi Tapu.

He liu au onoono ki tua ke he 68 e tau he eke mo fekafekau papatiso ha Iehova, logona hifo e au e monuina mooli. Ko e fakaako ke fiafia ke he gahua fakamatala mo e lagomatai e tokologa ke iloa e kupu mooli kua eke mo palepale lahi. He mole e feaki he tama fifine haaku ko Lise mo e taane haana e magafaoa, kamata a laua ke fekafekau ko e tau paionia tumau. He kitia e fakamakutu haana ke he gahua fakamatala kua mafanatia e loto haaku. Loto fakaaue pauaki au ke he tau matakainaga Kerisiano ha ko e tau fakafifitakiaga mitaki mo e fakatonuaga pulotu ha lautolu kua lagomatai au ke holo ki mua fakaagaaga mo e leveki e tau kotofaaga loga. Mailoga e au ke fakatumau ke fakamooli he kotofaaga kua maeke ni ka falanaki a tautolu ke he agaaga tapu malolō lahi ha Iehova. (Sala. 51:11) Matutaki au ke fakaaue ki a Iehova he foaki ki a au e lilifu uho he fakaheke e higoa haana!​—Sala. 54:6.