1, 2. Onoono fēfē e tau tagata tokologa ke he tau gahua ha lautolu?

TOKOLOGA e tagata ne logona hifo kua matalahi po ke nakai matalahi a lautolu fakavē ke he gahua ne taute e lautolu. He falu aga fakamotu, ke iloa e tagata, kua fa mahani ke hūhū, “Ko e heigoa e gahua haau?”

² Fakamaama he Tohi Tapu he falu mogo e tau tagata he talahau e tau gahua ne taute e lautolu. Ma e fakatai, kua hagaao ki a “Mataio ko e telona,” “Simona ko e taute kili manu,” mo “Luka ko e ekekafo fakahele.” (Mataio 10:3; Gahua 10:6; Kolose 4:14) He falu mogo, talahau he Tohi Tapu e kotofaaga he tau tagata ne fekafekau ki a Iehova. Manamanatu ke he Patuiki ko Tavita, perofeta ko Elia, mo e aposetolo ko Paulo. Tokiofa oti he tau tagata taane nei e tau kotofaaga ha lautolu ne foaki age e Iehova. Kua lata foki ia tautolu ke tokiofa e ha kotofaaga kua moua e tautolu he fekafekau ki a Iehova.

3. Ko e ha ne lata ia lautolu ne momotua ke fakamahani a lautolu ne fuata? (Kikite fakatino he kamataaga.)

³ Kua fiafia a tautolu he fekafekau ki a Iehova ti tokiofa e tau  kotofaaga ha tautolu. Tokologa ia tautolu kua fiafia lahi ke he gahua ha tautolu ti amanaki ke matutaki ke taute ka maeke agaia ia tautolu. Ka e momoko ai, he mogo ka fuakau e tau tagata ti nakai maeke a lautolu ke taute e tau mena oti ne fa taute e lautolu he mogo ne fuata. (Fakamatalaaga 1:4) Ti tupu mai ai e tau paleko pauaki ke he tau tagata ha Iehova. Ko e gahua fakamatala mogonei kua tupu tumau, ti kua fakaaoga he fakatokatokaaga ha Iehova e tau matini foou ke hokotia e tala mitaki ke he tokologa. Ka e falu mogo liga uka ia lautolu ne momotua ke fakaako e tau puhala foou. (Luka 5:39) Ko e mena fa mahani ma e tau tagata ke galo fakahaga e malolō ha lautolu ka momotua. (Tau Fakatai 20:29) Ko e mena ia, kua totonu mo e aoga ai ka fakamahani e lautolu ne momotua a lautolu ne fuata ke taute falu matagahua he fakatokatokaaga ha Iehova.—Totou Salamo 71:18.

4. Ko e ha kua uka ma e falu ke kotofa age e pule? (Kikite puha “ Kakano ne Liga Uka a Tautolu ke Kotofa Age e Gahua.”)

⁴ Nakai mukamuka tumau ma lautolu ne takitaki ke kotofa age e gahua ke he tau tagata taane fuata. Maeke he tau matakainaga taane ke momoko he manamanatu kua galo e kotofaaga ne fiafia lahi a lautolu ki ai. Liga fakamamahi ki a lautolu ke manatu kua nakai liu a lautolu ke taute e gahua pauaki ne moua e lautolu. Po ke liga tupetupe a lautolu ka nakai takitaki e lautolu e gahua, to nakai taute fakamitaki ai. Liga logona hifo e lautolu kua nakai fai magaaho ke fakamahani e falu. He magaaho taha, lata e tau tagata taane fuata ke fakauka ka nakaila kotofa age ki a lautolu e falu matagahua.

5. Ko e heigoa e tau hūhū ka fakatutala a tautolu ki ai he vala tala nei?

⁵ Ko e ha mogoia kua aoga ma lautolu ne momotua ke lagomatai a lautolu ne fuata ke taute foki falu matagahua? Maeke fēfē a lautolu ke taute e mena nei? (2 Timoteo 2:2) Ti ko e ha kua lata a lautolu ne fuata ke moua e aga hako ke gahua fakalataha mo e tau matakainaga taane lotomatala kua momotua mo e fakaako mai ia lautolu? Ke kamata aki, kitekite a tautolu ke he puhala ne lagomatai he Patuiki ko Tavita haana tama ke mautali ma e gahua uho lahi.

6. Ko e heigoa ne manako e Patuiki ko Tavita ke taute? Ko e heigoa ne tala age e Iehova ki a ia?

⁶ Loga e tau tau ne favale ki a Tavita ti hiki mogoia he taha matakavi ke he taha matakavi. Ti he mole e patuiki a ia ne nofo a ia he fale monuina. Tala age a ia ke he perofeta ko Natano: “Kitiala, kua nofo ai au ke he fale arasi, ka ko e puha he maveheaga a Iehova, kua toka ai i lalo he tau ie puipui.” Ne manako lahi a Tavita ke ati e faituga fulufuluola ma Iehova. Tala age a Natano ki a ia: “Kia eke a e koe e tau mena oti kua finagalo a koe ki ai, ha kua fakalataha e Atua mo koe.” Ka e nakai ko e mena nei ne manako a Iehova ki ai. Poaki a Iehova ki a Natano ke tala age ki a Tavita: “Nakai ta e koe e fale ke nofo ai au.” Pete ne mavehe a Iehova ki a Tavita to fakalataha tumau a Ia mo Tavita, iloa e ia to taha he haana tau tama taane ka ati e faituga. Fēfē e tali atu ha Tavita?—1 Nofoaga he Tau Patuiki 17:1-4, 8, 11, 12; 29:1.

7. Tali atu fēfē a Tavita ke he takitakiaga ha Iehova?

⁷ Manako mooli a Tavita ke ati e faituga  ma Iehova, ti liga nakai fiafia a ia. Ka e lalago katoatoa agaia e ia e matagahua ka takitaki he tama haana ko Solomona. Lagomatai a Tavita ke fakatokatoka e tau tagata gahua mo e fakaputu e tau lapatoa, apakula, ario, auro, mo e akau. Nakai tupetupe a ia ko hai ka moua e matalahi he ati e faituga, ne iloa ai ko e faituga ha Solomona. Ka e fakamafana e ia a Solomona, he pehē: “Hanai, haku tama na e, kia ha ha ia koe a Iehova, kia monuina a koe, mo e ta ai e koe e fale ma Iehova hau a Atua, ke lata mo e hana kupu kia koe.”—1 Nofoaga he Tau Patuiki 22:11, 14-16.

8. Ko e ha kua liga manatu a Tavita kua nakai lotomatala a Solomona ke ati e faituga? Ka ko e heigoa ne taute e Tavita?

⁸ Totou 1 Nofoaga he Tau Patuiki 22:5. Liga logona hifo e Tavita kua nakai mautali a Solomona ke takitaki e matagahua uho ia. Lata e faituga ke “lahi,” ka ko Solomona kua “tote a ia mo e lolelole.” Ka e iloa e Tavita to lagomatai e Iehova a Solomona ke taute e gahua pauaki nei. Ti taute e Tavita e tau mena oti kana ke lagomatai a ia ke tauteute ke lata mo e matagahua makimaki ia.

9. Mitaki fēfē e logonaaga ha lautolu ne momotua he tuku age e tau matagahua ke he falu? Talahau e fakatai.

⁹ Lata e tau matakainaga taane momotua ke nakai fakalolelole ka lata a lautolu ke age falu matagahua ke he tau tagata taane fuata. Mailoga oti e tautolu ko e mena kua mua e aoga mogonei ko e gahua ha Iehova. Ko e fakamahani e tau tagata taane fuata ke taute e tau matagahua to lagomatai ke fakakatoatoa e gahua nei. Manamanatu ke he mena nei. He tote a koe, liga kitekite a koe ke he matua taane haau ne fakaholo he motokā. He lahi hake a koe, ne fakamaama atu e ia e mena ne taute e ia. Mogonei, moua e koe e laisini ti kamata ke fakaholo e motokā.  Pete ia, tala atu agaia ni he matua taane e fakatonuaga ki a koe. Po ke fakafetokaki a mua ke fakaholo. Ka e he motua fakahaga e matua taane haau, kua lahi ni ke fakaholo e koe. Ita kia e matua taane haau? Nakai, liga fiafia a ia he fakaholo e koe a ia. Pihia foki, fiafia e tau matakainaga taane momotua ke kitia e tau tagata taane fuata ne fakamahani e lautolu kua mautali ke taute e tau matagahua he fakatokatokaaga ha Iehova.

10. Fēfē e logonaaga ha Mose he moua e lilifu mo e pule?

¹⁰ Lata a tautolu ke fakaeneene ke nakai mahekeheke he tau kotofaaga he falu. Maeke a tautolu ke fakaako mai he tali ha Mose he mogo ne kamata e falu Isaraela ke tuga ko e tau perofeta a lautolu. (Totou Numera 11:24-29.) Manako a Iosua ke taofi a lautolu ka e pehē a Mose: “Kua mahekeheke kia a koe ha ko au? kua manako ni au ke eke e motu oti a Iehova mo tau perofeta, mo e foaki atu ai e Iehova hana Agaga kia lautolu.” Iloa e Mose kua takitaki e Iehova e gahua. He nakai kumi e fakahekeaga ma Mose ni, ne manako a ia ke he tau fekafekau oti ha Iehova ke moua e tau kotofaaga. Ka e kua a tautolu? Fiafia nakai a tautolu ka moua he falu e tau kotofaaga he fekafekauaga ha Iehova?

11. Ko e heigoa ne talahau he taha matakainaga taane he age e matagahua ke he falu?

¹¹ Tokologa e matakainaga taane ne gahua malolō ne totou tau he fekafekau ki a Iehova ti kua fakamahani e tau tagata taane fuata ke taute falu matagahua. Ma e fakatai, kia manamanatu la ke he matakainaga ko Peter. He 74 e tau haana he gahua mau, ne 35 e tau haana ne fekafekau he la ofisa i Europa. Leva lahi e leveki haana ke he Faahi Gahua he Fekafekauaga. Ti age mogoia e kotofaaga nei ki a Paul, ko e fuata ne fakamahani e Peter. Ita kia a Peter ha ko e hikiaga nei? Nakai. Pehē a ia: “Fiafia lahi au ha kua ha ha i ai e tau matakainaga taane ne kua fakamahani ke talia e tau matagahua loga ti hane fa e taute fakamitaki e tau gahua.”

12. Ko e heigoa ka fakaako e tautolu mai he fakafifitakiaga a Rehopoamo?

¹² He mogo ne patuiki e tama taane a Solomona ko Rehopoamo, ne ole a ia ke he tau patu ma e fakatonuaga ke taute aki e kotofaaga foou haana. Ka kua nakai talia e ia e fakatonuaga ha lautolu! Muitua ni a ia ke he fakatonuaga he tau tagata taane fuata  ne tutupu hake mo ia. Ti kelea lahi mahaki e fakahikuaga. (2 Nofoaga he Tau Patuiki 10:6-11, 19) Ko e heigoa ka fakaako e tautolu? Pulotu ke ole ma e fakatonuaga mai ia lautolu ne momotua mo e lotomatala lahi. Nakai lata a lautolu ne fuata ke logona e peehiaga ke taute fakatonu e tau mena oti tuga he mogo fakamua. Ka e lata a lautolu ke fakalilifu mooli e tau manatu ha lautolu ne momotua ti nakai lata ke mafiti ke manamanatu kua nakai aoga e puhala taute mena ha lautolu ne momotua.

13. Kua lata ke gahua fakalataha fēfē a lautolu ne fuata mo lautolu ne momotua?

¹³ Falu mogo, kua age e matagahua ki a lautolu ne fuata ke leveki e gahua ne taute he tau matakainaga taane lotomatala ne momotua. Kua pulotu ma lautolu ke fakaako mai ia lautolu nei ne momotua. He fakataiaga ne tutala a tautolu ki ai fakamua, ne hukui e Paul a Peter ko e leveki he faahi gahua he Peteli, pehē a ia, “Lahi e magaaho ne kumi fakatonuaga au ki a Peter, ti fakamafana e au falu he faahi gahua ke taute pihia foki.”

14. Ko e heigoa kua fakaako e tautolu mai he puhala ne gahua fakalataha a Timoteo mo e aposetolo ko Paulo?

¹⁴ Fuata atu a Timoteo he aposetolo ko Paulo ka kua leva lahi e gahua tokoua ha laua. (Totou Filipi 2:20-22.) Tala age a Paulo ke he tau Korinito: “Kua fekau atu ai e au a Timoteo kia mutolu, ko e haku a tama fakahele haia, mo e fakamoli ke he gahua he Iki, to fakamanatu e ia a mutolu ke he haku a mahani ke he tau kupu a Keriso, tuga he fakaako atu au ke he tau mena oti ke he tau ekalesia oti.” (1 Korinito 4:17) Mai he mena nei maeke ia tautolu ke kitia maali kua gahua mitaki tokoua a Paulo mo Timoteo ti felagomataiaki a laua. Fakatoka e Paulo e magaaho ke fakaako ki a Timoteo e “mahani ke he tau kupu a Keriso,” ti maama mitaki e Timoteo. Ne fiafia a Paulo ki a Timoteo mo e mauokafua to leveki fakamitaki e ia e tau matakainaga i Korinito. Maeke e tau motua ke fifitaki e aposetolo ko Paulo he fakamahani e lautolu e falu tagata taane ke takitaki e fakapotopotoaga.

15. Lagomatai fēfē he Roma 12:3-5 a tautolu ke fehagai mo e hikiaga?

¹⁵ Kua momoui a tautolu he magahala ne loga e mena tutupu. Ko e vala he lalolagi he fakatokatokaaga ha Iehova kua tupu ke he tau puhala kehekehe. Kakano e mena nei to tumau ni e hikiaga. Falu he tau hikiaga nei kua lauia fakatagata a tautolu ti nakai mukamuka ke fehagai ki ai. To lagomatai a tautolu ka fakatokolalo mo e hagaaki a tautolu ke he mena kua mitaki ma e gahua he Kautu, ka e nakai ke he mena ne liga manako a tautolu ki ai. Ka taute pihia e tautolu, to tumau e kaufakalataha ha tautolu. Tohi e Paulo ke he tau Kerisiano i Roma: “Ko e mena tala atu e au kia mutolu oti, . . . aua neke homo e manatu he taha ke he mena kua lata ke manatu ai.” Ti fakamaama e ia tuga ni he kehekehe e gahuahuaaga he tau vala he tino ha tautolu, to igatia e tagata  he fakapotopotoaga mo e matagahua.—Roma 12:3-5.

16. Ko e heigoa he tau Kerisiano takitaha ka taute ke fakatumau e mafola mo e kaufakalataha he fakatokatokaaga ha Iehova?

¹⁶ Manako oti e tau tagata ha Iehova ke lalago e Kautu mo e taute e tau mena kua tala age ki a lautolu. Maeke e tau matakainaga taane momotua ke fakamahani a lautolu ne fuata. Maeke e tau matakainaga fuata ke taute falu matagahua mo e loto fakalatalata mo e fakalilifu. Ti loto fakaaue e tau matakainaga taane ne fai hoana ka lalago he tau hoana ha lautolu a lautolu ka hiki e tau tutūaga. Maeke he tau matakainaga fifine nei ke fifitaki a Pisila ne fakamooli he gahua fakalataha mo e taane haana ko Akula.—Gahua 18:2.

17. Ko e heigoa ne fakamahani e Iesu e tau tutaki haana ke taute?

¹⁷ Fakatoka e Iesu e fakafifitakiaga mitaki lahi mahaki he fakamakai ke fakamahani e falu. Iloa e Iesu kua lata he falu ke matutaki e gahua haana. Mooli, iloa e ia nakai mitaki katoatoa e tau tutaki haana. Ka e mauokafua a ia to folafola fakalaulahi e lautolu e tala mitaki. (Ioane 14:12) Ne fakamahani fakamitaki e ia a lautolu, ti maeke a lautolu ke fakamatala he tau motu oti ne maeke a lautolu ke o atu ki ai.—Kolose 1:23.

18. Ko e heigoa e gahua ka taute e tautolu anoiha? Ko e heigoa e gahua kua taute e tautolu mogonei?

¹⁸ He mole e mate ha Iesu, ne fakaliu tu mai e Iehova a ia ti age foki falu gahua ki a ia ke taute, ti pihia mo e pule “kua mua ke he tau iki lalahi oti kana, mo e tau pule, mo e tau toa, mo e tau iki.” (Efeso 1:19-21) Pete foki ka mamate a tautolu ko e tau fekafekau fakamooli ha Iehova ato hoko a Amaketo, to liu momoui a tautolu mo e loga e gahua ne fai kakano ka taute he lalolagi foou. Magaaho tonu nei kua ha ha ia tautolu oti e kotofaaga ofoofogia he fakamatala e tala mitaki mo e taute tutaki. Ko e fuata po ke motua a tautolu, igatia a tautolu mo e tumau ke “fakamakai nakai noa ke he gahua he Iki.”—1 Korinito 15:58.