IA Kenese veveheaga 22, pehē e Tohi Tapu na tala age he Atua ki a Aperahamo ke o atu ke he matakavi mamao mai he kaina haana ke taute e poa. Pehē mai: “Ne uta foki e Aperahamo e gaafi ke eke aki e poa huhunu, ti fakatoka kia Isaako hana tama, ti uta e ia ke he hana lima e afi mo e titipi; ti o ai fakalataha a laua tokoua.”—Kenese 22:6.

Nakai fakamaama he Tohi Tapu e puhala ha lautolu i tuai ne tafu aki e afi. Ti tugi kia e Aperahamo mo Isaako e afi mo e uta e mulamula afi mo laua? Taha e tagata talahau hagaao ke he Tohi Tapu ne pehē ko e mula afi kua liga nakai “tumau ke puho he fenoga loa.” Ka e liga uta e Aperahamo mo e tama haana e tau mena oti ne lata ia laua ke fakamata aki e afi.

Ka e pehē falu kua nakai mukamuka ke tafu e afi he magahala ia. Ti ka maeke, to tafu he tau tagata e afi he uta e tau malala kakā mai he afi ne fitā he vela, liga ko e malala mai he afi he tuutakaina. Tokologa e tau pulotu ne talitonu na uta e Aperahamo e malala kakā mai he afi ne puho ato fenoga a ia. Liga tuku e ia he kapiniu kelekele ne liga tautau ai he filifili ti uta mo ia he fenoga. (Isaia 30:14) Liga fakaaoga e ia e tau malala kakā mo e tau malamala gaafi ka lata a ia ke fakamata aki e afi.