1, 2. He 2018, ko e heigoa e toloaga ka fakalataha a tautolu he puhala mua ue atu, ti ko e ha? (Kikite fakatino he kamataaga.)

IA Mati 31, 2018, totou miliona e tau tagata he lalolagi katoa ka o atu ke he toloaga ne fakahoko lagataha ni he tau. He mole e tō he laā, to fakapotopoto e Tau Fakamoli a Iehova mo e tokologa foki ke fakamanatu e poa ne taute e Iesu ma tautolu. He tau tau takitaha, ko e Fakamanatuaga he mate he Keriso ne fakalataha e tau tagata he puhala ofoofogia, ne nakaila fai toloaga pihia he lalolagi.

² Kua fiafia mooli a Iehova mo Iesu he kitia e tau miliona tagata ne o atu ke he toloaga pauaki ia he tau tulā takitaha he lalolagi katoa. Fakamaama he Tohi Tapu “ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe,” hane tauui: “Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.” (Fakakiteaga 7:9, 10) Ko e mena homo ue atu he Fakamanatuaga he tau tau takitaha ha kua tokologa e tagata ne fakaheke a Iehova mo Iesu ma e tau mena mitaki lahi ne taute e laua!

3. Ko e heigoa e tau hūhū ka tali he vala tala nei?

 ³ He vala tala nei, to moua e koe e tau tali ke he fā e hūhū nei: (1) Mautauteute fēfē au ma e Fakamanatuaga ke aoga mooli au mai i ai? (2) He tau puhala fe kua lagomatai he Fakamanatuaga e tau tagata oti he Atua ke kaufakalataha? (3) Ko e heigoa haaku ka taute ke fakaholo ki mua e kaufakalataha he tau tagata he Atua? (4) To oti nakai e Fakamanatuaga? Ka oti ai, he magaaho fe?

4. Ko e ha kua aoga ma tautolu ke o atu ke he Fakamanatuaga?

⁴ Ko e ha kua aoga ma tautolu ke o atu ke he Fakamanatuaga? Taha kakano ko e o atu ke he tau feleveiaaga ko e puhala kua tapuaki a tautolu ki a Iehova. Iloa e tautolu na mailoga e Iehova mo Iesu a ia kua eketaha ke hoko atu ke he feleveiaaga aoga lahi he tau. Manako a tautolu ki a Iehova mo Iesu ke kitia ko tautolu he Fakamanatuaga ato fai mena pauaki ati nakai hoko atu. Ka fakakite he tau gahua ha tautolu kua mua e aoga he tau feleveiaaga ki a tautolu, foaki e tautolu e taha kakano foki ki a Iehova ke tumau e tau higoa ha tautolu ke he haana a “tohi ke fakamanatu.” Fakahigoa foki e tohi nei ko e “tohi he moui.” Ha ha i loto e tau higoa oti ha lautolu ne manako a Iehova ke moua e moui tukulagi.​—Malaki 3:16; Fakakiteaga 20:15.

5. He tau faahi tapu to hoko e Fakamanatuaga, maeke fēfē ke tumau e “kamatamata e mutolu a mutolu, po kua ha ha i ai a mutolu ke he tua”?

⁵ Fai faahi tapu ato hoko e Fakamanatuaga, maeke a tautolu ke fakaaoga fakalahi e magaaho ke liogi mo e manamanatu fakahokulo ke he malolō he fakafetuiaga ha tautolu mo Iehova. (Totou 2 Korinito 13:5.) Tala age he aposetolo ko Paulo ke he tau Kerisiano: “Kia kamatamata e mutolu a mutolu, po kua ha ha i ai a mutolu ke he tua.” Taute fēfē e tautolu e mena ia? Maeke a tautolu ke hūhū hifo: ‘Talitonu mooli nakai au ko e fakatokatokaaga ni anei ne fifili e Iehova ke taute haana finagalo? Eketaha nakai au ke fakamatala mo e fakaako atu e tala mitaki? Fakakite nakai he tau mahani haaku kua talitonu mooli au hane nonofo a tautolu he tau aho fakamui ti kua tata mai e fakaotiaga ke he pule ha Satani? Mauokafua agaia nakai e falanaki haaku ki a Iehova mo Iesu tuga he magaaho fakamua ne kamata au ke fekafekau ki a Iehova?’ (Mataio 24:14; 2 Timoteo 3:1; Heperu 3:14) He manamanatu ke he tau tali ke he tau hūhū nei ka lagomatai a tautolu ke “kumikumi hifo” tumau ki a tautolu.

6. (a) Ko e heigoa ni e puhala ma tautolu ke moua e moui tukulagi? (e) Mautauteute fēfē taha motua he tau tau takitaha ke lata mo e Fakamanatuaga, ti taute fēfē e koe e taha mena pihia?

⁶ Taha puhala ka mautauteute ma e Fakamanatuaga ko e totou mo e manamanatu ke he tau vala tala kua fakamaama e kakano ne aoga lahi e toloaga nei. (Totou Ioane 3:16; 17:3.) Ko e puhala ni ke moua e tautolu e moui tukulagi ko e iloa a Iehova mo e tua ke he haana Tama ko Iesu. Ke mautauteute ma e Fakamanatuaga, maeke a tautolu ke fifili e tau vala tala ke fakaako ka lagomatai a tautolu ke tata lahi e logonaaga ki a laua. Ko e mena nei ne taute he taha matakainaga ko e  motua ke he loga e tau tau. Kua leva tuai he fakaputu e ia e tau vala tala he Watchtower ne fakatutala ke he Fakamanatuaga mo e fakaalofa ne fakakite e Iehova mo Iesu ki a tautolu. He tau faahi tapu ato hoko e Fakamanatuaga, ne liu a ia totou ai e tau vala tala mo e manamanatu fakahokulo ke he kakano ne aoga lahi e toloaga nei. Falu mogo ne lafi e ia taha po ke ua e vala tala ke he fakaputuaga haana. Totou mo e manamanatu fakahokulo foki a ia ke he totouaga Tohi Tapu he Fakamanatuaga. Talahau he motua ko e taute he tau mena oti nei kua iloa e ia e tau mena foou he tau tau takitaha. Mua atu e aoga kua lagomatai he fakaako haana a ia ke fakaalofa fakalahi ki a Iehova mo Iesu. Ka fakaako a koe he puhala ia to lahi atu foki e fakaalofa haau ki a Iehova mo Iesu. To fakaaue lahi foki a koe ke he tau mena ne taute e laua ti lahi atu e aoga kua moua e koe mai he Fakamanatuaga.

7. (a) Ko e heigoa ne liogi a Iesu ki ai he pō ne fakahoko fakamua e Kaiaga Afiafi he Iki? (e) Ko e heigoa ne fakakite kua tali e Iehova e liogi ha Iesu?

⁷ He pō ne fakahoko fakamua e Kaiaga Afiafi he Iki, ne talahau e Iesu e liogi pauaki. Liogi a ia hagaao ke he fakalatahaaga uho he vahāloto haana mo e Matua. Liogi foki a Iesu to kaufakalataha e tau tutaki oti haana ke he puhala pihia. (Totou Ioane 17:20, 21.) Tali mooli e Iehova e liogi he Tama fakahele haana. Kehe mai he ha feleveiaaga, kua fakakite fakamaali he Fakamanatuaga e kaufakalataha he Tau Fakamoli a Iehova. He aho ia, totou miliona e tau tagata he tau motu kehekehe mo e tau lanu kehekehe ne feleveia auloa ke he lalolagi katoa mo e fakakite kua talitonu a lautolu na fakafano mai e Iehova haana Tama. He falu matakavi, matakehe lahi ma e tau tagata he tau lanu kehekehe ke feleveia auloa fakalotu, po ke ka feleveia auloa, ne logona hifo he falu kua nakai hako e mena nei. Ka e nakai pihia e logonaaga ha Iehova mo Iesu. Ko e mena fulufuluola e fakalataha auloa ha tautolu he Fakamanatuaga ki a laua.

8. Ko e heigoa e fekau ne foaki e Iehova ki a Esekielu?

⁸ Ha ko e tau tagata ha Iehova, nakai ofo a tautolu ha kua fakalataha a tautolu he puhala nei. Talahau tuai e Iehova e kaufakalataha nei he fekau haana ki a Esekielu. Tala age a ia ki a Esekielu ke uta ua e akau, taha akau “ma Iuta” mo e taha “ma Iosefa,” ti tutaki ua ai ke eke mo akau taha. (Totou Esekielu 37:15-17.) Ne fakailoa mai he Ko e Kolo Toko ia Iulai 2016 he “Tau Hūhū he Tau Tagata Totou”: “Puhala he perofeta ko Esekielu, ne tala age tuai e Iehova to liliu e tau tagata haana ke he Motu he Maveheaga mo e to eke a lautolu mo taha e motu. Talahau tuai foki he perofetaaga ia ko lautolu ne tapuaki ke he Atua he tau aho fakamui nei to fakalataha ke he taha e motu.”

9. He tau tau takitaha he Fakamanatuaga, kitia fēfē e tautolu e kaufakalataha ne talahau tuai he perofetaaga ha Esekielu?

⁹ Kamata he tau 1919, ko e magaaho fakamua ne liu fakatokatoka mo e liu fakalataha fakahaga e Iehova a lautolu ne fakauku. Kua tuga e akau “ma Iuta” a lautolu. Ti tokologa ia lautolu ne amaamanaki ke momoui tukulagi he lalolagi ne kamata ke kaufakalataha mo lautolu ne fakauku. Ko lautolu nei ne amaamanaki ke he lalolagi kua tuga e akau “ma Iosefa.” Mavehe a Iehova ke matutaki e tau akau ua nei mo e “to eke foki a lautolu mo akau taha” ke he lima Haana. (Esekielu 37:19) Ne tuku e ia a lautolu ne fakauku mo e ‘tau mamoe kehe’ ke eke mo “taha ai e fuifui mamoe.” (Ioane 10:16; Sakaria 8:23) Mogonei, ko e tau matakau ua ia kua kaufakalataha mo e fekafekau auloa ki a Iehova. Ti taha  e patuiki ha lautolu ko Iesu Keriso ne kua fakahigoa he perofetaaga ha Esekielu ko e “fekafekau foki ko Tavita.” (Esekielu 37:24, 25) He tau tau takitaha he Fakamanatuaga ka fakalataha auloa a tautolu ke fakamanatu e mate ha Iesu, kua kitia e tautolu e kaufakalataha he tau matakau ua nei ne talahau tuai e Esekielu. Ka ko e heigoa ha tautolu takitokotaha ka taute ke fakatumau mo e fakaholo ki mua e kaufakalataha he tau tagata he Atua?

10. Maeke fēfē a tautolu ke fakaholo ki mua e kaufakalataha he tau tagata he Atua?

¹⁰ Ko e heigoa e puhala fakamua ka fakaholo ki mua e tautolu e kaufakalataha he tau tagata he Atua? He gahua fakamalolō ke mahani fakatokolalo. He nofo a Iesu he lalolagi, tala age a ia ke he tau tutaki haana kua lata a lautolu ke mahani fakatokolalo. (Mataio 23:12) Fa mahani e tau tagata he lalolagi ke onoono ki a lautolu kua mua atu e aoga ke he falu. Kaeke ke mahani fakatokolalo a tautolu, to fakalilifu e tautolu e tau matakainaga taane ne leveki e fakapotopotoaga mo e to omaoma a tautolu ke he takitakiaga ha lautolu. Ko e mena ia ati kaufakalataha ai e fakapotopotoaga. Mua atu ai, to fakafiafia e tautolu e Atua ka tumau e mahani fakatokolalo ha tautolu ha kua “totoko he Atua ke he tau tagata fakatokoluga, ka e foaki mai e fakaalofa noa kia lautolu kua holoilalo.”​—1 Peteru 5:5.

11. Maeke fēfē he manamanatu ke he areto mo e uaina kua fakaaoga he Fakamanatuaga ke lagomatai a tautolu ke fakaholo ki mua e kaufakalataha?

 ¹¹ Ko e heigoa e puhala ke uaaki ka fakaholo ki mua e tautolu e kaufakalataha? He manamanatu fakamitaki ke he kakano mooli he areto mo e uaina. Lata ke taute e tautolu e mena nei ato hoko e Fakamanatuaga ti mua atu he pō ia. (1 Korinito 11:23-25) Ko e areto nakai fakaea kua hukui he tino mitaki katoatoa ne foaki e Iesu ko e poa. Ko e uaina kula ne hukui e toto haana. Ka e lata ke lahi atu e mena ke taute e tautolu he maama hokoia ni e tau fakaakoaga nei. Lata ke manatu e tautolu ko e poa lukutoto ha Iesu kua putoia e ua he aga fakaalofa mua ue atu. Foaki mai e Iehova e Tama haana ma tautolu, ti foaki makai e Iesu e moui haana ma tautolu. Ka manamanatu a tautolu ke he fakaalofa ha laua, to fakalagalaga a tautolu ke fakaalofa ki a laua. Mo e fakaalofa ha tautolu oti ki a Iehova to fakamalolō e kaufakalataha ha tautolu.

12. He tala ke he patuiki mo e tau fekafekau haana, fakakite fakamaali fēfē e Iesu kua manako a Iehova ki a tautolu ke fakamagalo e falu?

¹² Ko e heigoa e puhala ke toluaki ka fakaholo ki mua e tautolu e kaufakalataha? He atāina ke fakamagalo e falu. Ka taute pihia e tautolu, fakakite e tautolu kua fakaaue a tautolu ha kua fakamagalo e Iehova e tau agahala ha tautolu ni ha ko e poa ha Iesu. Ke fakakite e kakano kua aoga ke fakamagalo, ne talahau e Iesu e tala hagaao ke he patuiki mo e tau fekafekau haana. Fakamolemole totou e Mataio 18:23-34 ti hūhū hifo: ‘Kua fakalagalaga nakai au ke taute e mena ne fakaako e Iesu? Kua fakauka nakai au mo e maama e tau matakainaga haaku? Mautali nakai au ke fakamagalo a lautolu ne fakaita mai au?’ Mooli, falu he tau agahala kua mua atu e kelea. Mo e falu agahala kua liga uka lahi ma tautolu ko e tau tagata nakai mitaki katoatoa ke fakamagalo. Ka e fakaako he tala ha Iesu ki a tautolu e mena ne manako a Iehova ke taute e tautolu. (Totou Mataio 18:35.) Fakakite fakamaali e Iesu to nakai fakamagalo e Iehova a tautolu ka nakai fakamagalo e tautolu e tau matakainaga ha tautolu kaeke ke fakatokihala mooli a lautolu. Ko e mena kua lata mooli ia tautolu ke manamanatu fakamitaki ki ai. Ke puipui mo e fakatumau e kaufakalataha uho ha tautolu, kua lata a tautolu ke fakamagalo e falu tuga ni ne fakaako e Iesu.

13. Fakaholo ki mua fēfē e tautolu e kaufakalataha ka mafola tumau mo e falu?

¹³ Ka fakamagalo e tautolu e falu, kua mafola tumau a tautolu mo e tau matakainaga ha tautolu. Pehē e aposetolo ko Paulo kua lata a tautolu ke gahua fakamalolō ke fakatumau e kaufakalataha mo e falu ti moua e mafola. (Efeso 4:3) He teitei hoko ke he Fakamanatuaga, mua atu foki ke he pō ia, kia manamanatu fakahokulo ke he puhala ne taute e koe e falu. Hūhū hifo: ‘Maaliali nakai ki a lautolu ne iloa au kua nakai ita tumau au ke he tau tagata ne fakaita au? Kitia nakai he tau tagata kua eketaha au ke taute e mafola mo e fakaholo ki mua e kaufakalataha?’ Ko e tau hūhū hokulo lahi anei ke manamanatu ki ai.

14. Fakakite fēfē e tautolu e “fakauka . . . ko e taha ke he taha mo e fakaalofa”?

¹⁴ Ko e heigoa e puhala ke fāaki ka fakaholo ki mua e tautolu e kaufakalataha? He fifitaki ki a Iehova he fakakite e fakaalofa. (1 Ioane 4:8) To nakai talahau e tautolu, “Liga to fakaalofa au ke he tau matakainaga haaku, ka e nakai lata au ke fiafia ki a lautolu.” Ka manamanatu pihia a tautolu kua nakai muitua e  tautolu e fakatonuaga ha Paulo ke “fakauka . . . ko e taha ke he taha mo e fakaalofa.” (Efeso 4:2) Mailoga kua nakai ni pehē a Paulo kua lata a tautolu ke “fakauka . . . ko e taha ke he taha” ka e lata foki ke taute “mo e fakaalofa.” Ha ha i ai e kehekeheaga. Kua kehekehe e tau tagata he fakapotopotoaga ha tautolu ti futia mai e Iehova a lautolu oti ki a ia. (Ioane 6:44) Liga kitia e ia loga e kakano mitaki ke fakaalofa ki a lautolu. Ka uho e tau matakainaga ha tautolu ma e fakaalofa he Atua, maeke fēfē a tautolu ke talahau kua nakai uho a lautolu ma e fakaalofa ha tautolu? Kua lata a tautolu ke makai ke fakaalofa ki a lautolu he puhala kua manako a Iehova ke taute e tautolu.​—1 Ioane 4:20, 21.

15. Iloa fēfē e tautolu to ha ha i ai e Fakamanatuaga fakahiku?

¹⁵ Taha aho, to hoko e magaaho ke o atu fakahiku a tautolu ke he Fakamanatuaga. Iloa fēfē e tautolu? Tala age a Paulo ke he tau Kerisiano fakauku ka manatu e lautolu e mate ha Iesu he tau tau takitaha, “kua fakailoa atu ai e [lautolu] e matulei he Iki, ato haele mai a ia.” (1 Korinito 11:26) He perofetaaga ha Iesu ke he vahā he fakaotiaga, ne tutala a ia hagaao ke he “hau” haana. Tutala ai hagaao ke he matematekelea lahi ka nakai leva ti hoko mai, pehē a ia: “Ati kitia ai ke he lagi e fakamailoga he Tama he tagata; ti tagi tatuki ai e tau magafaoa oti he lalolagi, ti kitia ai e lautolu e Tama he tagata kua hau ke he tau aolagi, mo e malolo, mo e lilifu lahi. To fakafano atu foki e ia hana tau agelu mo e leo lahi he pu, ti fakapotopoto foki e lautolu a lautolu kua fifili e ia mai he tau matamatagi ne fa, ke kamata mai he taha patu lagi, kia hoko ke he taha patu lagi.” (Mataio 24:29-31) To “fakapotopoto foki e [Iesu] a lautolu kua fifili e ia” ko e tau Kerisiano fakauku oti ne haia agaia ke he lalolagi mo e tahake ai ke he lagi. To fakamooli e mena ia he mole e kamata he matematekelea lahi ka e fakamua to hoko e tauaga i Amaketo. He tauaga ia ko Iesu fakalataha mo lautolu oti ne 144,000 ka tau atu ke he tau patuiki he lalolagi ti kautū ai. (Fakakiteaga 17:12-14) Ko e Fakamanatuaga fakahiku ka o atu a tautolu ki ai ato “hau” a Iesu ke fakapotopoto a lautolu ne fakauku.

16. Ko e ha kua eketaha a koe ke fina atu ke he Fakamanatuaga he tau nei?

¹⁶ Kia eketaha ke fina atu ke he Fakamanatuaga ia Mati 31, 2018. Ole ki a Iehova ke lagomatai a koe ke taute e vala haau ke maeke ia tautolu ko e tau tagata haana ke fakatumau e kaufakalataha. (Totou Salamo 133:1.) Taha aho, to hoko e magaaho ke o atu fakahiku a tautolu ke he Fakamanatuaga. Ato hoko e aho ia, kia fakakite e tautolu kua uho lahi e fakalatahaaga fulufuluola ha tautolu he Fakamanatuaga ke he tau tau takitaha.