1-2. Ko e heigoa e mena ofoofogia ne tupu he aho Penetekoso 33 V.N.?

KO E pogipogi Tapu i Ierusalema. Ko e aho Penetekoso anei he tau 33 V.N. Kavi ke he 120 e tutaki ne fakapotopoto he poko i luga he fale. (Gahua 1:13-15; 2:1) He tau aho gahoa fakamua, poaki a Iesu ki a lautolu ke nonofo i Ierusalema ha ko e mena to moua e lautolu e mena fakaalofa pauaki. (Gahua 1:4, 5) Ko e heigoa e mena ka tupu mogonei?

² “Ati fakaofo mai ai he tomumu mai he lagi tuga ne matagi kua havili lahi mai.” Kua puke oti e fale he leo tomumu ia. Ti ko e “tau alelo tuga ne afi” kua nofo ki luga he tau ulu he tau tutaki, ti “fakapuke foki a lautolu oti ke he Agaga Tapu.” (Gahua 2:2-4) He puhala ofoofogia nei, liligi e Iehova e agaaga tapu haana ki luga ha lautolu. (Gahua 1:8) Ko lautolu fakamua haia ne fakauku he agaaga tapu * ti foaki ki ai e amaamanakiaga ke pule mo Iesu he lagi.

3. Nakai fakauaua he ha a lautolu he Penetekoso kua fakauku a lautolu he agaaga tapu?

³ Kaeke ko koe taha he tau tutaki ia ne fakapotopoto he poko i luga he aho ia, to nakai nimo e koe. Taha mena ne tuga e alelo afi ne nofo i luga he ulu haau, ti kamata a koe ke vagahau kehe! (Gahua 2:5-12) To nakai fakauaua a koe kua fakauku  he agaaga tapu a koe. Ka ko lautolu oti kia ne fakauku he agaaga tapu kua moua e fakaukuaga ha lautolu he puhala ofoofogia he magaaho taha he tau momoui ha lautolu? Nakai. Iloa fēfē e tautolu?

4. Taha ni kia e magaaho ne fakauku a lautolu oti ne fakauku he senetenari fakamua? Fakamaama.

⁴ Fakatutala la tautolu ke he magaaho. Nakai ni ko lautolu ko e tau Kerisiano ia ne kavi ke he 120 ne fakauku he agaaga tapu he Penetekoso 33 V.N. He aho ia foki, kavi ke he 3,000 ne moua foki e agaaga tapu ne mavehe ki ai. Fakauku a lautolu he mogo ne papatiso ai. (Gahua 2:37, 38, 41) Ka e he tau tau fakamui, nakai fakauku oti e tau Kerisiano fakauku he papatisoaga ha lautolu. Fakauku e tau Samaria he mole e papatisoaga ha lautolu. (Gahua 8:14-17) Ti ko e mena ofoofogia lahi ne tupu, ko Konelio mo e magafaoa haana ne fakauku fakamua to papatiso.​—Gahua 10:44-48.

5. Ia 2 Korinito 1:21, 22, ko e heigoa kua tupu ka fakauku he agaaga tapu e tagata?

⁵ Fakatutala la foki a tautolu ke he mena ne tupu ka fakauku e tagata he agaaga tapu. Falu ne fakauku ne liga uka he magaaho fakamua ke talia kua fifili e Iehova a lautolu. Liga manatu a lautolu, ‘Ko e ha ne fifili he Atua au?’ Falu ne liga nakai logona hifo pihia. Pete ni he pihia, fakamaama he aposetolo ko Paulo e mena kua tupu ki a lautolu oti ne fakauku: “Kua tua tuai a mutolu, ti fakamau fakamailoga * ai a mutolu he Agaga Tapu, ko ia ne talahaua mai, Ko e fakamoli haia he mena ke eke ma tautolu.” (Efeso 1:13, 14) Ti fakaaoga e Iehova e agaaga tapu haana ke fakakite fakamaaliali ke he tau Kerisiano nei kua fifili e Iehova a lautolu. He puhala nei, ko e agaaga tapu “ko e fakamoli [maveheaga]” ne foaki ke fakailoa ki a lautolu to momoui tukulagi a lautolu he lagi anoiha ka e nakai he lalolagi.​—Totou 2 Korinito 1:21, 22.

6. Ko e heigoa kua lata e Kerisiano fakauku ke taute ke moua e palepale haana ke he lagi?

⁶ Ka fakauku e Kerisiano, to moua moolioli kia e ia e palepale haana ke he lagi? Nakai.  Mauokafua a ia kua fifili a ia ke hake ke he lagi. Ka e lata a ia ke manatu e tomatomaaga nei: “Ko e tau matakainaga na e, kia au atu ai he lalilali a mutolu ke fakamau ha mutolu a uiaga mo e ha mutolu a fifiliaga, ha ko e mena ka eke e mutolu e tau mena ia, ti nakai tuai veveli a mutolu.” (2 Pete. 1:10) Ti pete kua fifili, po ke moua he Kerisiano fakauku e uiaga ke hake ke he lagi, to moua e ia e palepale haana ka fakatumau a ia ke fakamooli.​—Filipi 3:12-14; Hepe. 3:1; Fakakite. 2:10.

7. Iloa fēfē e lautolu ne fakauku kua moua e lautolu e uiaga ke he lagi?

⁷ Ka e iloa fēfē he tagata kua moua e ia e uiaga ke he lagi? Maaliali e tali ne kitia ke he tau kupu ha Paulo ki a lautolu i Roma ne eke “mo tau tagata fakatapu.” Tala age a ia ki a lautolu: “Kua nakai moua e mutolu e Agaga ke fakatupa ai ke liu foki matakutaku ai a mutolu; ka kua moua e mutolu e Agaga ke hiki tama, ko ia kua tauui atu ai a tautolu, Ava, ko e Matua na e. Kua fakamoli mai e Agaga ia ni ke he tau agaga ha tautolu, ko e fanau he Atua a tautolu.” (Roma 1:7; 8:15, 16) Ti puhala he agaaga tapu Haana, ne talahau fakamaaliali he Atua ki a lautolu ne fakauku kua moua e lautolu e uiaga nei ke he lagi.​—1 Tesa. 2:12.

8. Fakakite fēfē he 1 Ioane 2:20, 27 kua nakai lata e falu ke tala age ke he tau Kerisiano fakauku kua fakauku tuai a lautolu?

⁸ Nakai fakauaua a Iehova ke iloa e lautolu kua moua e uiina Haana ke o hake ke he lagi. (Totou 1 Ioane 2:20, 27.) Lata mooli e tau Kerisiano fakauku ke fakaako e Iehova puhala he fakapotopotoaga tuga ni e tau tagata oti. Ka e nakai lata a lautolu ke tala age he ha tagata kua fakauku a lautolu. Fakaaoga e Iehova e malolō mua ue atu he lagi mo e lalolagi katoatoa ko e agaaga tapu haana ke fakakite fakamaaliali ki a lautolu kua fakauku tuai a lautolu!

9. Ka fakauku e taha, ko e heigoa e hikiaga haana ne fakamaama he Efeso 1:18?

⁹ Laulahi he tau fekafekau he Atua he vahā nei ne liga uka ke maama e mena kua tupu ke he taha tagata ka fakauku he Atua. Ko e mena mahani mau anei ha kua nakai fakauku a lautolu. Ne tufuga he Atua e tau tagata ke momoui tukulagi he lalolagi, nakai ke he lagi. (Kene. 1:28; Sala. 37:29) Ka kua fifili e Iehova falu ke nonofo he lagi. Ti ka fakauku e ia a lautolu, kua hiki e ia e amaamanakiaga mo e puhala manamanatu ha lautolu, ti kua onoono lahi atu a lautolu ke he moui he lagi.​—Totou Efeso 1:18.

10. Ko e heigoa e kakano ke “liu foki fanau”? (Kikite foki e matahui tala.)

¹⁰ Ka fakauku e tau Kerisiano aki e agaaga tapu, kua “liu foki fanau,” po ke fanau mai i luga a lautolu. * Fakakite foki e Iesu kua nakai maeke ke fakamaama fakatonu ke he taha tagata ne nakai fakauku e logonaaga ke “liu foki fanau,” po ke kua fanau mai he agaaga.​—Ioane 3:3-8.

11. Fakamaama e hikiaga he manamanatuaga ka hoko ka fakauku e tagata.

¹¹ Kamata fēfē e tau Kerisiano ke manamanatu he puhala kua kehe ka fakauku? Ato fakauku e Iehova e tau Kerisiano nei, tokiofa e lautolu e amaamanakiaga he moui tukulagi ke he lalolagi. Amaamanaki lahi atu a lautolu ke he magaaho ka utakehe e Iehova e tau mahani kelea oti kana ti taute e lalolagi ke eke mo parataiso. Liga manamanatu a lautolu ke liu fakafeleveia e tagata he magafaoa po ke  kapitiga ne mate. Ka e he mole e fakauku ha lautolu, ne kamata a lautolu ke kehe e manamanatuaga. Ko e ha ne kehe ai? Kua nakai fakaatukehe a lautolu mo e amaamanakiaga ia ke he lalolagi. Nakai hiki e tau manamanatuaga ha lautolu ha ko e logonaaga fakaatukehe po ke matematekelea lahi. Nakai amanaki ni a lautolu ti manamanatu kua ahumate ke momoui tukulagi he lalolagi. Ka kua fakaaoga e Iehova e agaaga tapu haana ke hiki e puhala ne manamanatu a lautolu mo e palepale ne tokiofa e lautolu.

12. Ia 1 Peteru 1:3, 4, fēfē e logonaaga he tau Kerisiano fakauku ke he amaamanakiaga ha lautolu?

¹² Ko e taha tagata kua fakauku ne liga logona hifo e nakai aoga ke he lilifu uho nei. Ka e nakai fakauaua a ia kua fifili mooli e Iehova a ia. Kua puāpuā e fiafia mo e loto fakaaue haana ka manamanatu a ia ke he amaamanakiaga ke moui ke he lagi.​—Totou 1 Peteru 1:3, 4.

13. Fēfē e logonaaga ha lautolu ne fakauku ke he moui ha lautolu he lalolagi nei?

¹³ Ti kakano kia e mena nei kua manako a lautolu ne fakauku ke mamate? Tali he aposetolo ko Paulo e hūhū ia. Fakatatai e ia e tino tagata ha lautolu ke he fale api ti pehē: “Ha ko mautolu ni ha ha he fale api nai, kua oi a mautolu he pehia; ha kua nakai loto a mautolu ke vevete kehe e tapulu ka kia fakatapulu ai, kia mahala e mena mole vave ke he moui.” (2 Kori. 5:4) Nakai galo he tau Kerisiano nei e fiafia he moui ke he lalolagi nei ti manako mafiti a lautolu ke mamate. Ka e fiafia a lautolu ke he moui ti manako ke fakaaoga e tau aho takitaha ke fekafekau ki a Iehova fakalataha mo e tau magafaoa mo e tau kapitiga ha lautolu. Pete ne tau mena ne taute e lautolu, manatu tumau e lautolu e amaamanakiaga mua ue atu ha lautolu ma e vahā anoiha.​—1 Kori. 15:53; 2 Pete. 1:4; 1 Ioa. 3:2, 3; Fakakite. 20:6.

14. Puhala fe ne nakai fakamooli kua fakauku he agaaga tapu e tagata?

¹⁴ Liga manamanatu fakauaua a koe kaeke kua fakauku he agaaga tapu a koe. Ka logona hifo pihia a koe, manamanatu ke he tau hūhū aoga nei: Manako lahi mahaki kia a koe ke taute e finagalo ha Iehova? Logona hifo nakai e koe kua mua atu e fakamakutu haau he gahua fakamatala? Fiafia mooli kia a koe he fakaako e Kupu he Atua mo e iloa e ‘tau mena hokulo he Atua’? (1 Kori. 2: 10) Logona hifo kia e koe kua foaki atu e Iehova ki a koe e tau fua homo ue atu he gahua fakamatala? Logona hifo nakai e koe e matagahua ke lagomatai fakaagaaga e falu? Kitia nakai e koe e fakamooliaga kua lagomatai e Iehova a koe ke he loga e tau puhala pauaki he moui haau? Ka tali e koe ē ke he tau hūhū nei, fakamooli kia he mena nei kua moua e koe mogonei e uiaga ke hake ke he lagi? Nakai pihia. Ko e ha? Ha kua maeke e tau fekafekau oti he Atua ke logona hifo pihia, he fakauku po ke nakai fakauku a lautolu. Puhala he agaaga tapu ha Iehova, maeke a Ia ke foaki e malolō pihia ke he ha fekafekau haana, pete ne palepale ha lautolu. Ti ka manamanatu teao a koe kua fakauku nakai he agaaga tapu a koe, ko e tau fakauaua pihia ne kakano kua nakai fakauku a koe. Ko lautolu ne moua e uiaga ha Iehova kua nakai manamanatu kua fakauku po ke nakai fakauku a lautolu! Iloa tonu e lautolu!

15. Iloa fēfē e tautolu kua nakai fifili oti a lautolu ne moua e agaaga he Atua ke o hake ke he lagi?

¹⁵ He Tohi Tapu, loga e fakafifitakiaga he tau tagata ne tua ne moua e agaaga tapu; ka e nakai moua e lautolu e amaamanakiaga ke momoui he lagi. Ne takitaki a Tavita he agaaga tapu. (1 Samu. 16:13) Lagomatai he agaaga tapu a ia ke maama e tau mena hokulo  hagaao ki a Iehova mo e omoomoi foki a ia ke tohi e tau vala he Tohi Tapu. (Mare. 12:36) Ka e pehē e aposetolo ko Peteru ne “nakai hake a Tavita ke he lagi.” (Gahua 2:34) Ko Ioane ko e Papatiso ne “fakapuke foki a ia ke he Agaga Tapu.” (Luka 1:13-16) Pehē a Iesu kua nakai fai tagata ne mua atu ia Ioane, ka e pehē foki a ia to nakai fakalataha a Ioane ke he Kautu he lagi. (Mata. 11:10, 11) Fakaaoga e Iehova e agaaga tapu haana ke foaki ke he tau tagata taane nei e malolō ke taute e tau mena ofoofogia, ka e nakai fakaaoga e agaaga ia ke fifili a lautolu ke nonofo he lagi. Kakano kia e mena nei kua tote e fakamooli ha lautolu he fakatatai ki a lautolu kua fifili ke pule he lagi? Nakai. Kakano ai to liu fakamomoui e Iehova a lautolu ke he Parataiso he lalolagi.​—Ioane 5:28, 29; Gahua 24:15.

16. Ko e heigoa e palepale kua amanaki e laulahi he tau fekafekau he Atua ki ai he vahā nei?

¹⁶ Laulahi he tau fekafekau he Atua he lalolagi he vahā nei kua nakai moua e amaamanakiaga ke momoui he lagi. Tuga a Aperahamo, Sara, Tavita, Ioane ko e Papatiso, mo e tokologa atu foki he tau tagata he vahā Tohi Tapu, kua amanaki a lautolu ke momoui he lalolagi ka pule e Kautu he Atua ki a lautolu.​—Hepe. 11:10.

17. Ko e heigoa e tau hūhū ka fakatutala a tautolu ki ai he vala tala ka mui mai?

¹⁷ He ha ha agaia e falu ne fakauku mo e tau tagata he Atua mogonei, kua lagā mai e tau hūhū pauaki. (Fakakite. 12:17) Ma e fakatai, lata ke fēfē e onoonoaga ha lautolu ne fakauku ki a lautolu ni? Kaeke ke kamata e taha tagata he fakapotopotoaga ha mutolu ke kai e falaoa mo e inu e uaina he Fakamanatuaga, lata ke fehagai fēfē a mutolu ki a ia? Ka e kua ka lahi fakahaga e numera ha lautolu ne talahau kua fakauku a lautolu? Lata kia a mutolu ke tupetupe ke he mena ia? To tali e tautolu e tau hūhū nei he vala tala ka mui mai.