1. Logona hifo fēfē e koe e fakaalofa he Atua?

“KO E Atua ko e fakaalofa a ia,” he tohi he aposetolo ko Ioane. (1 Ioa. 4:8) Ko e talahauaga mukamuka ia kua fakamanatu ki a tautolu e matapatu kupu mooli: Ko e Atua ko e Punaaga he moui ti pihia foki ko e Punaaga he fakaalofa. Na fakaalofa mooli a Iehova ki a tautolu! Ko e fakaalofa haana kua logona e tautolu e haohao mitaki, fiafia, mo e makona e loto.

2. Ia Mataio 22:37-40, ko e heigoa e tau poakiaga ua ne mua atu, ti ko e ha ne liga uka a tautolu ke omaoma ke he poakiaga ke uaaki?

² Kua latatonu ni he tau Kerisiano ke fakakite e fakaalofa ha ko e poakiaga a ia. (Totou Mataio 22:37-40.) Ka iloa mitaki e tautolu a Iehova, to liga mukamuka a tautolu ke omaoma ke he poakiaga fakamua. Kua mitaki katoatoa a Iehova; ti manamanatu mo e totonu e puhala ne fehagai a ia ki a tautolu. Ka e liga uka a tautolu ke omaoma ke he poakiaga ke uaaki. Ko e ha? Ha ko e tau matakainaga ha tautolu ko e tau katofia tata lahi ki a tautolu kua nakai mitaki katoatoa. Falu magaaho liga talahau mo e taute e lautolu e tau mena ne logona e tautolu kua nakai manamanatu mo e nakai totonu. Iloa e Iehova to fehagai a tautolu mo e paleko nei ti omoomoi e ia falu he tau tagata tohia he Tohi Tapu ke tohi e fakatonuaga pauaki ke he kakano mo e puhala kua lata a tautolu ke fakakite e fakaalofa ke he taha mo e taha. Ko e taha he tau tagata tohia ia ko Ioane.​—1 Ioa. 3:11, 12.

3. Ko e heigoa ne fakamaama e Ioane?

³ He tau tohi ha Ioane, ne fatiaki e ia kua lata e tau Kerisiano ke fakakite e fakaalofa. He tohi ha Ioane ke he moui ha Iesu, mua atu e fakaaoga e ia e tau kupu “fakaalofa,” “feofanaki,” mo e “ofania” ke he tau tohi he Evagelia tokotolu. Kua teitei taha e teau tau he moui ha Ioane he mogo ne tohi e ia e Evagelia mo e tau tohi tolu haana. Ko e tau tohi omoomoi ia ne  fakakite e fakaalofa kua lata ke fakalagalaga e tau mena oti ne taute he Kerisiano. (1 Ioa. 4:10, 11) Ka e fai magaaho a Ioane ke iloa e fakaakoaga ia.

4. Fakakite tumau kia e Ioane e fakaalofa ke he falu?

⁴ He mogo ne fuata a Ioane, nakai fakakite tumau e ia e fakaalofa. Ma e fakatai he taha magaaho, ne fenoga atu a Iesu mo e tau tutaki haana ki Ierusalema he hala Samaria. Ko e tau tagata he maaga tote i Samaria ne nakai fakakite e fakamokoi ki a lautolu. Ko e heigoa ne taute e Ioane? Ole a ia ke hifo mai e afi he lagi ke fakaotioti e tau tagata he maaga ia! (Luka 9:52-56) He taha magaaho, kaumahala a Ioane ke fakakite e fakaalofa ke he tau aposetolo ne gahua mo ia. Tala age foki a ia mo e taha lafu haana ko Iakopo ke he matua fifine ke ole ki a Iesu ke foaki age ki a laua e tau tuaga tokoluga he Kautu. Mogo ne iloa he falu aposetolo e mena ne taute e Iakopo mo Ioane, ita lahi a lautolu! (Mata. 20:20, 21, 24) Pete ni e tau hehē ha Ioane, kua ofania e Iesu a ia.​—Ioane 21:7.

5. Ko e heigoa ka kumikumi a tautolu he vala tala nei?

⁵ He vala tala nei, to kumikumi a tautolu ke he fakafifitakiaga ha Ioane mo e falu mena ne tohi e ia hagaao ke he fakaalofa. He taute pihia to fakaako e tautolu e puhala ke fakakite e fakaalofa ke he tau matakainaga ha tautolu. To fakaako foki e tautolu e puhala aoga lahi ke he ulu he magafaoa ke fakakite kua fakaalofa a ia ke he magafaoa haana.

6. Fakakite fēfē e Iehova e fakaalofa haana ki a tautolu?

⁶ Fa mahani a tautolu ke manamanatu ke he fakaalofa ko e logonaaga mafanatia ne fakakite he tau kupu totonu. Ka e ke mooli e fakaalofa, lata foki ke kitia ke he tau gahua totonu. (Fakatatai Iakopo 2:17, 26.) Ma e fakatai, kua fakaalofa a Iehova ki a tautolu. (1 Ioa. 4:19) Ti fakakite e ia e fakaalofa haana puhala he tau kupu atihake he Tohi Tapu. (Sala. 25:10; Roma 8:38, 39) Ka e talitonu a tautolu kua fakaalofa e Atua ki a tautolu he nakai ni ko e tau mena ne talahau e ia ka e pihia foki mo e tau mena ne taute e ia. Tohi e Ioane: “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia.” (1 Ioa. 4:9) Fakaatā e Iehova e Tama fakahele haana ke mamahi mo e mate ma tautolu. (Ioane 3:16) To fakauaua nakai a tautolu kua fakaalofa mooli a Iehova ki a tautolu?

7. Ko e heigoa ne taute e Iesu ke fakakite e fakaalofa haana ki a tautolu?

⁷ Tala age a Iesu ke he tau tutaki haana kua fakaalofa a ia ki a lautolu. (Ioane 13:1; 15:15) Fakakite e ia e hokulo he fakaalofa haana ki a  lautolu mo tautolu ke he tau mena ne talahau e ia ti pihia mo e tau mena ne taute e ia. “Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki hana tau kapitiga,” he ui e Iesu. (Ioane 15:13) Ka manamanatu a tautolu ke he mena ne taute e Iehova mo Iesu ma tautolu, lauia fēfē a tautolu?

8. Ko e heigoa ne talahau he 1 Ioane 3:18 kua lata a tautolu ke taute?

⁸ Fakakite e tautolu kua fakaalofa a tautolu ki a Iehova mo Iesu he omaoma ki a laua. (Ioane 14:15; 1 Ioa. 5:3) Ti poaki pauaki e Iesu ki a tautolu ke feofanaki. (Ioane 13:34, 35) Nakai ni fakakite e tautolu e fakaalofa ke he tau matakainaga ha tautolu ke he tau kupu ka e fakakite foki e tautolu e fakaalofa ki a lautolu ke he tau mena ne taute e tautolu. (Totou 1 Ioane 3:18.) Ko e heigoa e mena pauaki ka taute ke fakakite kua fakaalofa a tautolu ki a lautolu?

9. Ko e heigoa he fakaalofa ne omoomoi a Ioane ke taute?

⁹ Na maeke a Ioane ke nofo mo e matua taane haana mo e gahua tupe he pisinisi takafaga ika he magafaoa. Ka e foaki e ia e vala ne toe he moui haana ke lagomatai e falu ke fakaako e kupu mooli hagaao ki a Iehova mo Iesu. Ko e moui ne fifili e Ioane ne nakai mukamuka. Kua matematekelea a ia he favale. Ko e magaaho fakahiku ne teitei hoko ke he fakaotiaga he senetenari fakamua he vahā fuakau haana, ne fakapaea a ia. (Gahua 3:1; 4:1-3; 5:18; Fakakite. 1:9) He nofo a Ioane he fale puipui ha ko e fakamatala hagaao ki a Iesu, ne fakakite e ia kua manamanatu a ia ke he falu. Ma e fakatai, he motu ko Patamo ne tohi e ia e fakakiteaga ne moua e ia ti fakafano atu ke he tau fakapotopotoaga ke maeke a lautolu ke iloa e mena “kua lata ke hohoko vave mai.” (Fakakite. 1:1) Ti liga he mole e fakatoka mai a Ioane i Patamo, ne tohi e ia e Evagelia haana he moui mo e fekafekauaga ha Iesu. Tohia foki e ia tolu e tohi ke fakamafana mo e fakamalolō e tau matakainaga haana. Fifitaki fēfē e koe e puhala moui foaki noa ha Ioane?

10. Fakakite fēfē e koe kua fakaalofa a koe ke he tau tagata?

¹⁰ Fakakite e koe kua fakaalofa a koe ke he tau tagata ha ko e tau mena ne fifili e koe ke taute he moui. Ko e fakatokaaga ha Satani kua manako ki a koe ke fakaaoga e magaaho mo e malolō katoa haau ke lata ni mo koe he lali ke gahua tupe po ke moua e higoa talahaua. Ka ko e tau matakainaga foaki noa ne fakamatala e Kautu he lalolagi katoa ne lahi e magaaho ke fakamatala e tala mitaki mo e lagomatai e tau tagata ke fakatata ki a Iehova. Falu foki ne maeke ke gahua mau ke fakamatala mo e fakaako atu.

11. Fakakite fēfē he tau matakainaga fakailoa fakamooli kua fakaalofa a lautolu ki a Iehova mo e tau matakainaga?

¹¹ Tokologa e tau Kerisiano fakamooli kua lata ke gahua tupe tumau ke leveki aki a lautolu mo e tau magafaoa ha lautolu. Pete ia, ko e tau matakainaga fakailoa fakamooli nei kua lalago e fakatokatokaaga he Atua he puhala kua maeke a lautolu. Tuga anei, falu ne lagomatai ke he matagahua matematekelea tupu fakaofo, falu ne gahua ke he tau talagaaga he tau fale tapuaki, mo e maeke e tau tagata oti ke foaki e tau tupe ke he gahua he lalolagi katoa. Taute e lautolu e tau mena nei ha ko e fakaalofa ha lautolu ke he Atua mo e tau matakainaga ha lautolu. He tau faahi tapu takitaha, fakakite e tautolu kua fakaalofa a tautolu ke he tau matakainaga he fakalataha ke he tau feleveiaaga mo e fai vala i ai. Pete kua liga lolelole a tautolu ka e hohoko  atu agaia ke he tau feleveiaaga. Pete kua liga hopoate a tautolu ka e fai tali agaia. Ti pete kua igatia a tautolu oti mo e tau lekua, ka e fakamafana e tautolu e falu ato kamata po ke ka hili e feleveiaaga. (Hepe. 10:24, 25) Ko e fakaaue ha ia ha tautolu ke he gahua ne taute he tau matakainaga fakailoa ha tautolu!

12. Ko e heigoa e taha puhala kua fakakite e Ioane e fakaalofa haana ke he tau matakainaga?

¹² Fakakite e Ioane e fakaalofa haana ke he tau matakainaga he nava ki a lautolu mo e fakatonu foki a lautolu. Tuga anei, he tau tohi ha Ioane ne nava e ia e tau matakainaga haana ha ko e tua mo e tau gahua mitaki ha lautolu, ka e fakatonu fakahako foki e ia a lautolu hagaao ke he agahala. (1 Ioa. 1:8–2:1, 13, 14) Pihia foki, lata a tautolu ke nava e tau matakainaga ha tautolu ha ko e tau mena mitaki ne taute e lautolu. Kaeke ke fai tagata ne feaki e aga kelea, fakakite e tautolu e fakaalofa he tala age totonu ki a ia e mena kua lata a ia ke logona. Lata ke moua e loto malolō ke fakatonu e kapitiga, ka e talahau he Tohi Tapu ko e tau kapitiga mooli kua fakamata, po ke fakahako he taha e taha.​—Fakatai 27:17.

13. Ko e heigoa ha tautolu kua nakai lata ke taute?

¹³ Falu magaaho kua fakakite e tautolu e fakaalofa ke he tau matakainaga ke he tau mena ne nakai taute e tautolu. Ma e fakatai, nakai mafiti a tautolu ke ita ke he tau mena ne talahau e lautolu. Manamanatu ke he mena ne tupu he tata ke he fakaotiaga he moui ha Iesu he lalolagi. Tala age a ia ke he tau tutaki haana, ke moua e moui kua lata a lautolu ke kai e kakano mo e inu e toto haana. (Ioane 6:53-57) Kua ofomate lahi e tokologa he tau tutaki he vagahau haana ti tiaki e lautolu a ia, ka e nakai pihia e tau kapitiga mooli haana, putoia ai a Ioane. Ne pipiki fakamooli a lautolu ki a Iesu. Nakai maama e lautolu e mena ne talahau e ia ti liga ofo foki a lautolu ha ko e tau kupu haana. Ka ko e tau kapitiga fakamooli ha Iesu ne nakai manamanatu ko e mena ne talahau e ia kua hepe ti ita ai. Ka kua falanaki a lautolu ki a ia he iloa kua talahau e ia e kupu mooli. (Ioane 6:60, 66-69) Aoga lahi ke ua mafiti a tautolu ke ita ke he mena ne talahau he tau kapitiga ha tautolu! Ka e fakaatā e tautolu a lautolu ke fakamaama e kakano he tala ha lautolu.​—Fakatai 18:13; Fakama. 7:9.

14. Ko e ha kua nakai lata a tautolu ke fakaatā e vihiatia ke tupu he tau loto ha tautolu?

¹⁴ Tomatoma foki e Ioane a tautolu ke ua vihiatia e tau matakainaga taane po ke tau  matakainaga fifine. Ka kaumahala a tautolu ke omaoma ke he fakatonuaga ia, kua fakaatā e tautolu a Satani ke fakaohooho a tautolu. (1 Ioa. 2:11; 3:15) Tupu e mena nei he matahiku he senetenari fakamua V.N. Kua eketaha a Satani ke fakaohooho e vihiatia mo e vehe e tau tagata he Atua. He magaaho ne tohia e Ioane e tau tohi haana, ko e tau tagata ne fakakite e aga pihia tuga ha Satani ne huhū mai ke he fakapotopotoaga. Tuga anei, ko Tioterefe ne vehe fakakelea e taha he tau fakapotopotoaga. (3 Ioa. 9, 10) Nakai fakalilifu e ia e tau matakainaga taane he kau fakatufono. Lali foki a ia ke tuku ki tua a lautolu he fakapotopotoaga ne mahani fakamokoi ke he tau tagata ne vihiatia e ia. Ko e mena fakateteki mooli! Eketaha agaia a Satani ke vehe mo e kautū ke he tau tagata he Atua he vahā nei. Kia nakai fakaatā e tautolu e vihiatia ke fakamavehevehe a tautolu.

15. Ko e heigoa he ulu he magafaoa kua lata ke manatu?

¹⁵ Taha puhala aoga lahi kua maeke e ulu he magafaoa ke fakakite e fakaalofa ke he magafaoa haana, ko e leveki fakatino a lautolu. (1 Timo. 5:8) Ka e lata a ia ke manatu ko e tau koloa fakatino kua nakai fakamakona e tau manako fakaagaaga he magafaoa haana. (Luka 11:28) Mailoga e fakafifitakiaga ne fakatoka e Iesu ma e tau ulu he magafaoa. He Evagelia ha Ioane, kua teitei mate a Iesu he akau fakakikiveka ka e manamanatu agaia a ia ke he magafaoa haana. Ko Ioane mo e matua fifine ha Iesu ko Maria kua tutū tata ke he mena ka tamate a Iesu. Pete he mamahi lahi mahaki, ole a Iesu ki a Ioane ke leveki a Maria. (Ioane 19:26, 27) Fai lafu a Iesu kua maeke ke leveki e tau manako fakatino ha Maria ka e tuga kua nakaila fai ia lautolu kua eke mo tau tutaki haana. Ti manako a Iesu ke fai tagata ke leveki fakatino mo e fakaagaaga a Maria.

16. Ko e heigoa e tau matagahua aoga ha Ioane?

¹⁶ Loga lahi e tau matagahua aoga ha Ioane. Ha ko ia ko e taha he tau aposetolo, ne fakamakutu a ia he gahua fakamatala. Liga faihoana foki a ia ti lata ke fakalagotatai e levekiaga fakatino he magafaoa haana mo e foaki ke lata ma e tau manako fakaagaaga ha lautolu. (1 Kori. 9:5) Ko e heigoa e fakaakoaga ma e tau ulu he magafaoa he vahā nei?

17. Ko e ha kua aoga ma e ulu he magafaoa ke leveki e tau manako fakaagaaga he magafaoa haana?

¹⁷ Ko e matakainaga taane ko e ulu he magafaoa ne loga e tau matagahua aoga. Tuga anei,  lata a ia ke fakamakutu he gahua tupe haana ke maeke e mahani haana ke fakaheke a Iehova. (Efeso 6:5, 6; Tito 2:9, 10) Liga ha ha ia ia e tau matagahua he fakapotopotoaga, tuga ke leveki e tau matakainaga mo e taki e gahua fakamatala. He magaaho taha, aoga ke fakaako tumau e ia e Tohi Tapu mo e hoana mo e fanau haana. To loto fakaaue lahi a lautolu ke he tau laliaga haana ke fakatumau e malolō fakatino, logonaaga, mo e fakaagaaga.​—Efeso 5:28, 29; 6:4.

18. Ko e heigoa ne mauokafua a Ioane ki ai?

¹⁸ Loga lahi e tau mena tutupu ofoofogia he moui ha Ioane. Fehagai a ia mo e tau paleko kehekehe ne maeke ke fakalolelole e tua haana. Ka e eketaha tumau a ia ke muitua ke he tau poakiaga ha Iesu, putoia e poaki ke fakaalofa ke he tau matakainaga haana. Kakano ia ati iloa e Ioane ko Iehova mo Iesu ne fakaalofa ki a ia ti ko laua kua foaki ki a ia e malolō ke kautū ke he ha kamatamata. (Ioane 14:15-17; 15:10; 1 Ioa. 4:16) Nakai fai mena ne taute e Satani po ke fakatokaaga haana ke taofi a Ioane he logona hifo, talahau, mo e fakakite e fakaalofa.

19. Ko e heigoa kua fakamafana he 1 Ioane 4:7 ki a tautolu ke taute, mo e ko e ha?

¹⁹ Tuga a Ioane, nonofo a tautolu he lalolagi ne pule a Satani ko e atua vihiatia he fakatokaaga nei. (1 Ioa. 3:1, 10) He manako a ia ki a tautolu ke ua fakaalofa ke he tau matakainaga ha tautolu, nakai maeke a ia ke taute e mena nei ato fakaatā e tautolu a ia. Kia eketaha a tautolu ke fakaalofa ke he tau matakainaga, ke fakakite e fakaalofa ia he tau mena ne talahau e tautolu mo e tau mena ne taute e tautolu. Ti to moua e tautolu e fiafia he fai vala he magafaoa ha Iehova mo e moui kua mua e aoga.​—Totou 1 Ioane 4:7.