1. He tau puhala fe kua kitia e tautolu e tote he fakaalofa mogonei?

KUA talahau tuai he Tohi Tapu he tau aho fakamui to tote e “fakaalofa” he tau tagata. (2 Timo. 3:1, 3) Kitia e tautolu e perofetaaga nai kua fakamooli mogonei. Ma e fakatai, tokologa e magafaoa ne tau vevehe e tau matua ha ko e feitaaki ha laua ti logona hifo he tau fanau e nakai fai fakaalofa he tau matua. Ko e tau magafaoa foki ne nonofo he taha e fale ne liga eke mo tau tagata kehe. “Ko e matua fifine, matua taane, mo e tau fanau ne nakai fetutalaaki ka e matutaki ni ke he komopiuta, tau tepelete, tau selafoni, po ke tau pelē vitiō,” he ui he taha tagata fakatonu he magafaoa. “Pete kua nonofo e tau magafaoa nei he taha e fale, ne nakai feiloaki a lautolu.”

2-3. (a) Ia Roma 12:10, ko hai kua lata ke fakafeheleaki ki ai? (e) Ko e heigoa ka fakatutala a tautolu he vala tala nei?

² Nakai manako a tautolu ke fakahakohako he aga nakai fakaalofa he lalolagi. (Roma 12:2) Ka e lata a tautolu ke feaki e fakafeheleaki ke he tau tagata he magafaoa ha tautolu mo lautolu foki kua faoa ki a tautolu he tua. (Totou Roma 12:10.) Ko e heigoa e fakafeheleaki? Ko e talahauaga ne fakamaama pauaki e kapitiga mafanatia he tau tagata he magafaoa tata. Ko e fakaalofa pihia kua lata ke feaki e tautolu ke he magafaoa fakaagaaga, ko e tau matakainaga Kerisiano ha tautolu. Ka fakakite e tautolu e fakafeheleaki, kua lagomatai a tautolu ke fakatumau e kaufakalataha ko e vala aoga lahi he tapuakiaga mooli.​—Mika 2:12.

 ³ Ke lagomatai a tautolu ke feaki mo e fakakite e fakafeheleaki, kia kitekite a tautolu ke he tau mena ka fakaako e tautolu mai he tau fakafifitakiaga he Tohi Tapu.

4. Lagomatai fēfē he Iakopo 5:11 a tautolu ke loto fakaaue ke he hokulo he fakaalofa ha Iehova?

⁴ Fakakite he Tohi Tapu e tau mahani mitaki ha Iehova. Ma e fakatai, “ko e Atua ko e fakaalofa.” (1 Ioa. 4:8) He iloa e tautolu e manatu ia kua futia a tautolu ki a Iehova. Ka e talahau foki he Tohi Tapu ko Iehova kua “fakaalofa fakalahi.” (Totou Iakopo 5:11.) Ko e puhala mafanatia ke talahau e hokulo he logonaaga ha Iehova ki a tautolu!

5. Fakakite fēfē e Iehova e fakaalofa hofihofi noa, ti maeke fēfē a tautolu ke fifitaki a ia?

⁵ Mailoga kua matutaki he Iakopo 5:11 e fakaalofa fakalahi ha Iehova ke he taha mahani kua futia a tautolu ki a Ia​—ko e fakaalofa hofihofi noa haana. (Esoto 34:6) Taha puhala kua fakakite e Iehova e fakaalofa hofihofi noa ki a tautolu ko e fakamagalo e tau hepehepe ne taute e tautolu. (Sala. 51:1) He Tohi Tapu, ko e fakaalofa hofihofi noa kua lahi atu e mena ne putoia ke he fakamagalo. Ko e fakaalofa hofihofi noa ko e logonaaga malolō ne puna mai i loto he tagata, ka kitia e ia e taha kua matematekelea nukua fakalagalaga a ia ke lali ke lagomatai e tagata ia. Fakamaama e Iehova e manako lahi mahaki haana ke lagomatai a tautolu tuga e logonaaga lahi mahaki he matua fifine ke he haana tama. (Isaia 49:15) Ka matematekelea a tautolu, kua omoomoi he fakaalofa hofihofi noa ha Iehova a ia ke lagomatai a tautolu. (Sala. 37:39; 1 Kori. 10:13) Fakakite e tautolu e fakaalofa hofihofi noa ke he tau matakainaga ha tautolu he fakamagalo a lautolu mo e nakai fakafualoto ka fakaita e lautolu a tautolu. (Efeso 4:32) Ka ko e puhala ne mua atu ka fakakite e tautolu e fakaalofa hofihofi noa ko e lalago e tau matakainaga ha tautolu kua fehagai mo e tau tuaga uka. Ka omoomoi he fakaalofa a tautolu ke fakaalofa hofihofi noa ke he falu to mumuitua e tautolu a Iehova, ko e fakafifitakiaga homo ue atu he fakaalofa fakalahi.​—Efeso 5:1.

6. Fakakite fēfē e Ionatana mo Tavita e fakafeheleaki ha laua?

⁶ Talahau he Tohi Tapu e tau tagata nakai mitaki katoatoa kua fakakite e fakafeheleaki. Manamanatu ke he fakafifitakiaga ha Ionatana mo Tavita. Pehē e Tohi Tapu: “Ti pipiki taha ai e loto a Ionatana ke he loto a Tavita, ti fakaalofa atu a Ionatana kia ia, tuga ne fakaalofa a ia kia ia ni.” (1 Samu. 18:1) Fakauku a Tavita ke patuiki he mole atu a Saulo. Ka kua ita lahi a Saulo ki a Tavita ti tatao ke kelipopo a ia. Ka e nakai lago a Ionatana ke he matua haana he lali ke tamate a Tavita. Mavehe a Ionatana mo Tavita ke fakatumau ke kapitiga mo e felalagoaki.​—1 Samu. 20:42.

7. Ko e heigoa e taha mena ka taofi a Ionatana mo Tavita he eke mo tau kapitiga?

⁷ Ko e fakafeheleaki he vahāloto ha Ionatana mo Tavita ko e mena ke ofo lahi ka fakatutala a tautolu ke he falu puhala ka taofi a laua he eke mo tau kapitiga. Ma e fakatai, kavi ke he 30 e tau he moui ha Ionatana ne fakamua ia Tavita. Maeke a Ionatana ke talahau kua nakai fai mena ne tatai a ia mo e tama fuata nei ne nakai lahi e iloaaga ke he moui. Ka e nakai kitia po ke onoono hifo a Ionatana ki a Tavita.

8. Ko e ha kua manatu a koe, ko e kapitiga mitaki a Ionatana ki a Tavita?

⁸ Na maeke a Ionatana ke mahekeheke ki a Tavita. Ha ko Ionatana ko e tama he Patuiki ko Saulo, kua tonuhia a ia ke eke mo patuiki. (1 Samu. 20:31) Ka e mahani fakatokolalo a Ionatana ti fakamooli ki a Iehova. Ti lalago katoatoa e ia e fifiliaga ha Iehova ki a Tavita ko e patuiki he mogo fakamui. Kua fakamooli foki a ia ki a Tavita pete he fakaita he mena nei a Saulo.​—1 Samu. 20:32-34.

9. Mahekeheke kia e onoonoaga ha Ionatana ki a Tavita? Fakamaama.

⁹ Kua fakaalofa lahi a Ionatana ki a Tavita ti nakai mahekeheke ki a ia. Ko Ionatana ko e toa loto malolō he fakaaoga e fanafiti. Talahaua a ia mo e matua haana ko Saulo he “mafiti ke he mafiti he tau aeto” mo e “malolo ke he malolo he tau leona.” (2 Samu. 1:22, 23) Ko e mena ia maeke a Ionatana ke fakatokoluga ha ko e loto toa haana. Ka e nakai aga fetoko po ke fakafualoto a Ionatana. Kua nava e Ionatana a Tavita ha ko e loto malolō mo e falanaki haana ki a Iehova. He mole e tamate e Tavita a Koliato ne kamata a Ionatana ke fakaalofa lahi ki a Tavita. Fakakite fēfē e tautolu e fakaalofa fakalahi pihia ke he tau matakainaga ha tautolu?

10. Ko e heigoa e kakano ke “feofanaki fakalahi . . . mai he loto mea”?

¹⁰ Pehē e Tohi Tapu “kia feofanaki fakalahi ai a [ta]utolu mai he loto mea.” (1 Pete. 1:22) Fakatoka e Iehova e fakafifitakiaga ma tautolu. Ko e fakaalofa haana kua malolō lahi kaeke ke fakamooli a tautolu ki a ia, to nakai fai mena ke taofi e pipiaga ia. (Roma 8:38, 39) Ko e kupu Heleni ne kakano “fakalahi” kua fakamaama e kakano ke fakaloa atu po ke fakatumau foki. He falu mogo, lata a tautolu ke “fakaloa atu” mo e “fakatumau” ke fakaalofa lahi po ke fakafeheleaki mo e matakainaga. Ka fakaita he falu a tautolu, lata a tautolu ke fakatumau ke “fakauka . . . ko e taha ke he taha mo e fakaalofa, kia lalilali atu . . . ke toto mau e loto fakalataha ha he Agaga ke he pipiaga he mafola.” (Efeso 4:1-3) Ka gahua a tautolu ke fakatumau e “pipiaga he mafola,” to nakai hagaaki a tautolu ke he tau hepehepe he tau matakainaga. To eketaha a  tautolu ke onoono ke he tau matakainaga ha tautolu tuga he onoono a Iehova.​—1 Samu. 16:7; Sala. 130:3.

11. Ko e ha ne liga uka ke feaki e fakafeheleaki he falu magaaho?

¹¹ Nakai mukamuka tumau ke fakakite e fakafeheleaki ke he tau matakainaga ha tautolu, mua atu ka mailoga e tautolu e tau hepehepe ha lautolu. Ko e paleko anei ke he falu Kerisiano he senetenari fakamua. Ma e fakatai, ko Evotia mo Sunetuke kua liga nakai lekua ke gahua “fakalataha mo [Paulo] ke he tala mitaki.” Ka e fai kakano ne uka a laua ke fakafeheleaki. Ti tomatoma e Paulo a laua “kia manamanatu a laua ke he mena taha ke he Iki.”​—Filipi 4:2, 3.

12. Feaki fēfē e tautolu e fakafeheleaki mo e tau matakainaga?

¹² Feaki fēfē e tautolu e fakafeheleaki mo e tau matakainaga he vahā nei? Ka iloa mitaki e tautolu e tau matakainaga, to mukamuka lahi ke maama a lautolu mo e fakatupu e fakafeheleaki. Maeke a tautolu ke kapitiga mo lautolu pete ne tau tau he moui mo e tau aga fakamotu. Manatu, na 30 e tau tau he moui ha Ionatana ne fakamua ia Tavita; ka e feaki e ia e kapitiga tata mo Tavita. Fai nakai ne motua po ke fakamui ia koe kua maeke a koe ke kapitiga? Ka taute pihia e koe, to fakakite e koe e “fakaalofa ke he tau matakainaga.”​—1 Pete. 2:17.

13. Ko e ha ne nakai tata lahi a tautolu ke he tau tagata oti he fakapotopotoaga?

¹³ Ko e fakafeheleaki mo e tau matakainaga kia kua kakano to tatai e tata ha tautolu ke he tau tagata oti he fakapotopotoaga? Nakai maeke e mena ia. Ti nakai hepe ke tata lahi ke he falu, ka e nakai tata ke he falu, ha kua tatai e tau mena ne fiafia ki ai. Hagaao a Iesu ke he tau aposetolo oti haana ko e “tau kapitiga,” ka e lahi mahaki e fakaalofa haana ki a Ioane. (Ioane 13:23; 15:15; 20:2) Ka e nakai mahomo atu e fiafia ha Iesu ki a Ioane. Tuga anei, he mogo ne ole a Ioane mo Iakopo ke he tuaga tokoluga ke he Kautu he Atua, pehē a Iesu ki a laua: “Ke nofo he haku a fahi matau mo e haku a fahi hema, nakai ko e haku ia ke ta atu.” (Mare. 10:35-40) He fifitaki ki a  Iesu, nakai lata a tautolu ke mahomo atu e fiafia ke he tau kapitiga tata ha tautolu. (Iako. 2:3, 4) He taute pihia to fakaohooho e aga mavehevehe, ko e mena ne nakai lata ke tupu he fakapotopotoaga Kerisiano.​—Iuta 17-19.

14. Ia Filipi 2:3, ko e heigoa ka lagomatai a tautolu ke kalo mai he aga fetoko?

¹⁴ Ka fakakite e tautolu e fakafeheleaki, kua puipui e tautolu e fakapotopotoaga mai he aga fetotokoaki. Manatu, nakai lali a Ionatana ke fetoko mo Tavita he mahekeheke ki a ia neke eke mo patuiki. Maeke a tautolu oti ke muitua e fakafifitakiaga ha Ionatana. Ua mahekeheke ke he tau matakainaga ha ko e ha lautolu a tau lotomatala, “ka kia igatia . . . mo e manatu he loto fakatokolalo kua mua e faoa oti kia” koe. (Totou Filipi 2:3.) Tokaloto kua igatia e tagata he fakapotopotoaga mo e taha mena ke lagomatai. He tumau e onoonoaga fakatokolalo ki a tautolu, kitia e tautolu e mitaki he tau matakainaga mo e aoga mai he fakafifitakiaga fakamooli ha lautolu.​—1 Kori. 12:21-25.

15. Ko e heigoa ne fakaako e koe ke he mena ne tupu ki a Tanya mo e magafaoa?

¹⁵ Ka fehagai a tautolu mo e tau kamatamata fakaofo, kua fakamafana e Iehova a tautolu puhala he fakaalofa lahi mo e tau lagomataiaga aoga kua moua e tautolu mai he tau matakainaga. Manamanatu ke he mena ne tupu ke he taha magafaoa he mole e o atu ke he fakaholoaga he Aho Faiumu he “Love Never Fails!” ko e taha he tau International Convention i United States he 2019. Talahau e Tanya ko e matua fifine ne tolu e tama: “Liliu atu a mautolu ke he hotela ti pā e taha motokā ke he motokā ha mautolu. Ai fai tagata ne pakia ka e ofo lahi a mautolu, ti o mai  ki fafo he motokā mo e tutū he puhalatū. Fai tagata he taha faahi he puhalatū ne aloalo mai ki a mautolu ke o mai ke he motokā haana. Ko e taha he tau matakainaga ha tautolu ne toka laia e fonoaga. Ka e nakai ni ko ia ne tū. Tokolima e matakainaga i Sweden ne tutū foki. Ne peka mafanatia he tau matakainaga fifine e tama fifine haaku mo au ti fakatotoka he mena ia a maua! Tala age au ke he tau matakainaga kua mitaki a mautolu, ka e nakai ō a lautolu. Nonofo a lautolu ato hohoko mai e tau tagata gahua ekekafo ti mailoga kua moua e mautolu e lagomatai kua latatonu. He magaaho uka nei, logona hifo e mautolu e fakaalofa ha Iehova. Fakamalolō he mena nei ne tupu e fakaalofa ha mautolu ke he tau matakainaga, mo e fakahokulo e fakaalofa mo e loto fakaaue ha mautolu ki a Iehova.” Manatu nakai e koe e magaaho ne manako lagomatai a koe ti fakakite he matakainaga ki a koe e fakaalofa fakalahi?

16. Ko e heigoa e tau kakano ha tautolu ke fakakite e fakaalofa fakalahi ke he taha mo e taha?

¹⁶ Manamanatu ke he fua ka fakakite e tautolu e fakaalofa fakalahi po ke fakafeheleaki ko e taha ke he taha. Fakamafana e tautolu e tau matakainaga he tau magaaho matematekelea. Fakamalolō e tautolu e kaufakalataha he tau tagata he Atua. Fakakite foki ko e tau tutaki ha Iesu a tautolu, ti futia he mena nei a lautolu ne loto fakamooli ki a Iehova. Mua atu, kua fakaheke e tautolu e ‘Matua he fakaalofa hofihofi, ko e Atua foki he tau fakamafanaaga oti’ ko Iehova. (2 Kori. 1:3) Kia fakatumau ke feaki mo e fakakite e fakaalofa fakalahi!