Puhala he perofeta ko Esekielu, ne tala age tuai e Iehova to liliu e tau tagata haana ke he Motu he Maveheaga mo e to eke a lautolu mo taha e motu. Talahau tuai foki he perofetaaga ia ko lautolu ne tapuaki ke he Atua he tau aho fakamui nei to fakalataha ke he taha e motu.

Ne tala age a Iehova ki a Esekielu ke tohi ua e akau. Ke tohi e ia he taha akau, “Ma Iuta, mo e fanau a Isaraela ko e hana tau matakainaga haia.” Mo e he taha akau, “Ma Iosefa, ko e akau a Efaraimo, katoa mo e magafaoa oti a Isaraela ko e hana tau matakainaga haia.” Kua eke e ua e akau [kākau] “mo akau taha” he lima ha Esekielu.​—Esekielu 37:15-17.

Ko e heigoa e kakano he higoa “Efaraimo”? Ko e magafaoa Efaraimo ne talahaua lahi he tau magafaoa hogofulu he kautu  ha Isaraela. Ti ko e patuiki fakamua ne pule ke he kautu ia, ko Ierepoamo ne mai he magafaoa ha Efaraimo. (Teutaronome 33:13, 17; 1 Tau Patuiki 11:26) Ko e magafaoa ne tupu mai ia Efaraimo ko e tama taane ha Iosefa. (Numera 1:32, 33) Na moua e Iosefa e monuina pauaki mai he matua haana ko Iakopo. Ti kua latatonu ke he “akau a Efaraimo” ne hukui e tau magafaoa hogofulu he kautu he faahi tokelau. He tau 740 ato fai Keriso, leva tuai ato talahau e Esekielu, ne kautū e tau Asuria ke he kautu he faahi tokelau ha Isareala mo e uta fakapaea e tau tagata. (2 Tau Patuiki 17:6) Fai tau he mole, ne fakakaumahala he tau Papelonia e tau Asuria. Ti ko e mogo ne tohi e Esekielu e perofetaaga ke he ua e akau, laulahi he tau Isaraela ia ne nonofo fano he Atu Motu Papelonia.

He tau 607 ato fai Keriso, ne kautū a Papelonia ke he ua e kautu he faahi toga ha Iuta ti uta e tau tagata ki Papelonia. Liga uta foki a lautolu ne toe mai he kautu he faahi tokelau ha Isaraela. Ko e tau patuiki he kautu he faahi toga ne mai he magafaoa ha Iuta. Ne nonofo foki e tau ekepoa i Iuta ha kua fekafekau a lautolu he faituga i Ierusalema. (2 Nofoaga he Tau Patuiki 11:13, 14; 34:30) Ti felauaki tonu ai ko e akau “ma Iuta” ne hukui e tau magafaoa ua he kautu he faahi toga.

Magaaho fe ne tuku fakalataha e tau akau ua? Tupu e mena nei he tau 537 ato fai Keriso, he mogo ne liliu e tau hukui he kautu he faahi toga mo e kautu he faahi tokelau ki Ierusalema mai he fakapaeaaga ke liu ati hake e faituga. Nakai liu e motu ha Isaraela ke veveheua ai. Ati liliu e tau Isaraela ke tapuaki auloa ki a Iehova. (Esekielu 37:21, 22) Ko e kaufakalataha nei ne fitā foki he talahau tuai he tau perofeta ko Isaia mo Ieremia.​—Isaia 11:12, 13; Ieremia 31:1, 6, 31.

Ko e heigoa he perofetaaga ha Esekielu ne talahau tuai hagaao ke he tapuakiaga mooli? To omoomoi e Iehova a lautolu ne tapuaki ki a ia ke “eke foki mo akau taha.” (Esekielu 37:18, 19) Kua fakamooli kia e maveheaga nei he tau magaaho kū kua mole? Ē. Kamata e perofetaaga ke fakamooli he 1919. To hoko e mena ia ne lali a Satani ke vevehe katoatoa e tau tagata he Atua. Ka e he 1919, ne liu fakatokatoka mo e liu kaufakalataha fakahaga a lautolu.

He magaaho ia, laulahi he tau tagata he Atua ne amaamanaki ke eke mo tau patuiki mo e tau ekepoa he lagi mo Iesu. (Fakakiteaga 20:6) Tuga e akau ma Iuta a lautolu. Ka e tokogahoa a lautolu ne amaamanaki ke momoui tukulagi he lalolagi. He fai magaaho he mole, ko lautolu ne moua e amaamanakiaga nei ne tupu lahi. (Sakaria 8:23) Tuga e akau ma Iosefa a lautolu.

He magaaho nei, ua e matakau ne fekafekau ki a Iehova. Ti taha ha lautolu a Patuiki ko Iesu Keriso. He perofetaaga ha Esekielu, ne hagaao ki a ia “ko e haku a fekafekau foki ko Tavita.” (Esekielu 37:24, 25) Liogi a Iesu ke he Matua haana hagaao ke he tau tutaki haana: “Kia taha a lautolu oti ke tuga a koe, ma Matua na e, ha i loto ia au, ko au foki ha i loto ia koe.” * (Kikite matahui tala.) (Ioane 17:20, 21) Talahau tuai foki e Iesu ko e fuifui mamoe tote haana he tau tutaki fakauku to “taha ai e fuifui mamoe” mo e ‘tau mamoe kehe’ haana. To mumui a lautolu ke he “leveki mamoe ne tokotaha.” (Ioane 10:16) Tuga ni he fakamaama e Iesu, kua fakalataha auloa e tau tagata he Atua he vahā nei, he amaamanaki atu a lautolu ke momoui tukulagi he lagi po ke he lalolagi!