MANATU LA kua fano a koe he puhalatū he tulotopō. Ofo a koe he mailoga kua fai tagata ne mui ia koe. Ka tū a koe, ne tū foki e tagata i tua haau. Ka fano mafiti a koe ti pihia foki a ia. Poi agataha a koe ke he kaina he kapitiga ne tata mai. Ka hafagi he kapitiga e gutuhala ti tala atu ki a koe ke hau ki loto, kua logona e koe e totoka ha kua iloa e koe mogonei kua haohao mitaki a koe.

Liga nakaila tupu ha mena pihia ki a koe. Ka e liga fai tupetupe foki a koe he moui ati fakaatukehe a koe. Ma e fakatai, taufetului kia a koe ke he lolelole ne manako a koe ke kautū mai ai ka e liu tumau a koe taute e hehē taha ia? Leva kia he ai fai gahua a koe ti nakai moua ha gahua pete kua eketaha a koe ke kumi e gahua? Tupetupe kia a koe neke fuakau ti fehagai mo e tau lekua malolō tino he tau magaaho i mua? Po ke fai mena foki ne manamanatu lahi a koe ki ai?

Ko e heigoa ni e tau lekua haau, mitaki ke fai kapitiga ke tala age e tau tupetupe haau ki ai ti makai a ia ke lagomatai a koe. Fai kapitiga tata pihia nakai a koe? Ē, fai! Ko Iehova e kapitiga ia, tuga ni ne taute e ia ke he tagata tua fakamooli ko Aperahamo, ne tohi he Isaia 41:8-13. He kupu 10 mo e 13, kua mavehe e Iehova ki a tautolu takitokotaha: “Ua matakutaku a koe, ha kua fakalataha au mo koe; aua neke kitekite fano a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe; ko e moli, kua taofi e au a koe ke he haku a lima matau ne ha i ai e mahani tututonu. Ha ko au ko Iehova ko e Atua hau, ko ia kua taofi hau a lima matau; ko ia kua pehe atu kia koe, Ua matakutaku a koe ko au ni kua lagomatai kia koe.”

Kua mafanatia lahi e tau kupu a Iehova. Lali ke manamanatu e mena ne mavehe mooli e Iehova ki a tautolu. Nakai pehē e kupu tohi kua fano a koe he tapa ha Iehova mo e totō ke he haana a lima. Kaeke ke fano a koe he tapa ha Iehova, to totō he lima matau haana e lima hema haau. Ka kua fakaolo atu e Iehova haana a “lima matau ne ha i ai e mahani tututonu” mo e taofi “hau a lima matau,” ke tuga kua toho hake e ia a koe mai he tuaga vihi. Ka taofi e Iehova a koe ke he haana lima matau, kua fakamafana e ia a koe he pehē: “Ua matakutaku a koe ko au ni kua lagomatai kia koe.”

Kitia nakai e koe a Iehova ko e Matua mo e Kapitiga fakaalofa haau? Talitonu nakai a koe to lagomatai e ia a koe ka fehagai mo e tau mena vihi? Manamanatu mooli a Iehova ki a koe ti manako a ia ke lagomatai a koe. Ka fai lekua mo e fai mena vihi a koe, manako a Iehova ke logona e koe e haohao mitaki. Ko e ha? Ha kua fakaalofa lahi mahaki a ia ki a koe. Ko ia mooli ko e “lagomatai mua ue atu ke he tau mena matematekelea.”​—Salamo 46:1.

Falu ne manatu tumau e tau hepehepe ha lautolu kua mole ti tuahā po kua fakamagalo he Atua a lautolu. Ka logona hifo pihia a koe, manamanatu ke he tagata fakamooli ko Iopu. Talahau e ia na agahala a ia he vahā fuata haana. (Iopu 13:26) Logona pihia foki e salamo ko Tavita ti olelalo ki a Iehova: “Ua manatu e koe ke he haku a tau hala ke he vaha ne fuata ai au, mo e haku a tau holifono.” (Salamo 25:7) Ha kua nakai mitaki katoatoa, kua “hala e tau tagata oti kana, to nakai hoko ke he fakahekeaga mai he Atua.”​—Roma 3:23.

Ko e tau kupu mafanatia ia Isaia veveheaga 41 ne tohi ma e tau Isaraela. Kua kelea lahi mahaki e tau agahala ha lautolu ati tala age a Iehova to fakahala e ia a lautolu he fakapaea ai ki Papelonia. (Isaia 39:6, 7) He magaaho taha, ne mavehe e Atua to fakamoui e ia a lautolu ka fakatokihala ti liliu ki a ia! (Isaia 41:8, 9; 49:8) Fakakite e Iehova e fakaalofa mo e fakaalofa hofihofi pihia he vahā nei ki a lautolu kua fakatokihala mooli ti manako ke fakafiafia a ia.​—Salamo 51:1.

Manamanatu ke he mena ne tupu ki a Takuya, * ne lali ke kautū mai he tau aga nakai meā he kitekite ke he tau fakatino telefua mo e mahani mulumō. Lagaloga e kaumahala haana. Fēfē e logonaaga haana? “Logona hifo katoatoa e au e fakateaga lahi, ka e fina atu au ki a Iehova he liogi ke olelalo ma e fakamagaloaga haana, ti lagaki hake e ia au he tuaga holifono haaku.” Taute fēfē e Iehova e mena ia? Tala age e tau motua he fakapotopotoaga ha Takuya ki a ia ke hea atu ki a lautolu he telefoni kaeke kua mahala a ia ke he aga nei haana. Pehē a ia: “Nakai mukamuka ke hea atu ki a lautolu, ka ko e mogo ka taute e au kua fakamalolō au.” Fakatoka mogoia he tau motua ma e leveki takaiaga ke ahiahi atu ki a Takuya. Tala age e leveki takaiaga ki a ia: “Nakai hau noa ni au. Hau au ha ko e manako he tau motua. Fifili e lautolu a koe ke moua e ahiahiaga leveki nei.” Pehē a Takuya: “Ko au ne agahala, ka e tuku mai e Iehova puhala he tau motua e lagomatai ki a au.” Nakai liu a Takuya he mogo fakamui ke he tau aga kelea haana, ka kua eke mo paionia tumau, ti fekafekau mogonei he la ofisa. Tuga ni he lagomatai he Atua e matakainaga nei, to lagomatai e ia a koe ka taute e tau hepehepe.

Falu ne tupetupe ha kua nakai fai gahua a lautolu ti nakai maeke ke moua e gahua. Manamanatu la ke he uka ka fakaheu tumau e tau takitaki gahua ke atu e gahua ki a koe. Ka fehagai e falu mo e tuaga uka nei, ne fakateaga e logonaaga ha lautolu. Liga lagomatai fēfē e Iehova a koe? Liga nakai foaki atu e ia e gahua kua lata ki a koe mogonei, ka e maeke a ia ke lagomatai a koe ke manatu e tau kupu ha Tavita: “Ne fuata au, ka kua motua tuai au ainei; ka e nakai kitia e au ha tagata tututonu kua tiaki, po ke hana fanau kua ole mena kai.” (Salamo 37:25) Uho lahi a koe ki a Iehova ti fakaolo atu e ia haana a “lima matau ne ha i ai e mahani tututonu” ke maeke a koe ke tumau e fekafekau ki a ia.

Ko Sara ne nofo i Colombia ne kitia e lagomataiaga ha Iehova ki a ia. Loga e tupe haana he gahua  mau he kamupanī talahaua. Ka e manako a ia ke lahi e mena ke taute he fekafekauaga ha Iehova, ti toka e ia e gahua haana ka e kamata ke paionia. Kua uka ke moua e gahua vala magaaho ne lata mo ia. Fakatū mogoia e ia e fale asekulimi ka e nakai leva ti oti e tupe haana ti pā e pisinisi haana. Pehē a ia, “Tolu e tau he mole, fakaaue ki a Iehova ha kua maeke au ke fakauka.” Iloa e Sara e tau mena kua lata mooli mo ia mo e kalo kehe he fakaatukehe ke he aho a pogipogi. (Mataio 6:33, 34) Ne hea he takitaki gahua fakamua haana a ia he mogo fakamui ti age ki a ia e gahua tuai haana. Pehē a ia to talia ni e ia e gahua vala magaaho mo e kaeke kua fakaatā a ia ke fai magaaho ke fano ke he tau feleveiaaga, tau toloaga, mo e tau fonoaga. Nakai lahi e tupe ha Sara ne moua mogonei tuga fakamua ka e maeke a ia ke matutaki ke paionia. Pehē a ia kua logona e ia e lima fakaalofa ha Iehova he tau magaaho uka ia.

Tokologa ne tupetupe ha kua fuakau fakahaga a lautolu mo e nakai leva ti litaea. Manamanatu a lautolu kaeke kua lahi e tupe ke moui tokotoko mitaki. Tupetupe foki a lautolu hagaao ke he tau tuaga malolō tino he tau mogo i mua. Liga olelalo e Patuiki ko Tavita ki a Iehova: “Aua neke tiaki e koe au ke he vaha fuakau; aua neke tiaki e koe au ka mole atu haku a malolo.”​—Salamo 71:9, 18.

Maeke fēfē ia lautolu ne momotua ke logona hifo e mauokafua ke he vahā i mua? Lata ia lautolu ke fakamalolō tumau e tua ke he Atua mo e falanaki to leveki e ia a lautolu ke he tau mena oti. Ka e olioli he falu e tau monuina he magaaho ne loga e tupe ha lautolu, ti kua lata ia lautolu ke maeke ke fakaako ke moui fakamukamuka mo e fiafia he nakai loga e tau koloa. Liga mailoga foki e lautolu ko e kai e “tufaaga he tau lakau kai” ka e nakai ko e “povi mai he fale povi” ka mitaki ma e malolō tino ha lautolu! (Tau Fakatai 15:17) Ka hagaaki a koe ke fekafekau ki a Iehova, to mailoga a ia ki ai kua moua e koe e tau mena oti kua lata mo koe ka fuakau.

Manamanatu ki a José mo Rose ne fekafekau mau ki a Iehova ke molea e 65 e tau. He magaaho ia ne loga e tau paleko ha laua. Ne leveki e laua e matua taane ha Rose ne lata ke lagomatai tumau. Ti fakauka foki a José ha kua iihi ha ko e kenesā mo e chemotherapy. Fakaolo age fēfē e Iehova e lima matau haana ke he hoa fakamooli nei? Fakaaoga e ia e taha hoa Kerisiano ko Tony mo Wendy. Fai poko a laua ne manako ke age noa ke he tau paionia mau. Manatu e Tony e mogo ne fano a ia he aoga tokoluga, fa mahani a ia ke ono ki fafo he puhio ti kitia a José mo Rose ne fakamatala tumau he fonua. Ne fiafia lahi a Tony ke he makutu ne fakakite e laua, ti tokaloto tumau e ia. Ha kua foaki e José mo Rose e tau momoui ha laua ke fekafekau ki a Iehova, ne age e Tony mo Wendy e poko ki a laua. He 15 e tau kua mole, ne lagomatai e laua a José mo Rose, ne kavi ke he 85 e tau tau he moui mogonei. Logona hifo e José mo Rose ko e mena fakaalofa mai ia Iehova a Tony mo Wendy.

Mavehe a Iehova ki a koe: “Ua matakutaku a koe ko au ni kua lagomatai kia koe.” Kua fakaolo atu foki e ia ki a koe e “lima matau ne ha i ai e mahani tututonu.” To fakaolo atu nakai e lima haau ki a ia?