1-3. (a) Liga ko e magaaho fe ne tohi e Salamo 147? (e) Ko e heigoa ka iloa e tautolu mai he fakaako e Salamo 147?

FA MAHANI a tautolu ke fakaheke e tagata kua nava e tautolu ha ko e mena ne talahau po ke taute e ia. To fakalagalaga lahi mahaki foki a tautolu ke fakaheke a Iehova ko e Atua! Fakaheke e tautolu a ia ha ko e haana a malolō ne mua kua kitia ai ke he tufugatiaaga homo ue atu haana, ti fakaheke a tautolu ki a ia ma e fakaalofa hokulo haana ki a tautolu kua kitia ai ke he poa lukutoto he Tama ni haana.

² Ka totou e tautolu e Salamo 147, maaliali ai ki a tautolu kua hokulo e manako he tagata tohia ke fakaheke a Iehova. Fakamafana foki e ia e falu ke fakalataha mo ia he fakaheke e Atua.​—Totou Salamo 147:1, 7, 12.

³ Nakai iloa e tautolu ko hai ne tohi e Salamo 147. Ka e liga moui e tagata tohia he magahala ne liliu e tau Isaraela ki Ierusalema he mole e fakatoka e Iehova a lautolu mai i Papelonia. (Salamo 147:2) Fakaheke he salamo a Iehova ha kua liu foki e tau tagata Haana ke tapuaki ki a ia he motu ni ha lautolu. Ti foaki he salamo e falu kakano ke fakaheke a Iehova. Ko e heigoa e tau  mena ia? Ti ko e heigoa e tau kakano ke ui atu a koe “Haleluia,” po ke “Fakaheke a Ioha!”?​—Salamo 147:1, matahui tala NW.

4. He fakatoka mai he Patuiki ko Kuresa e tau Isaraela, liga fēfē e logonaaga ha lautolu, ti ko e ha?

⁴ Manamanatu ke he tau logonaaga he tau Isaraela he nonofo paea a lautolu i Papelonia. Ko e tau tagata ne tamai a lautolu ke he matakavi ia ne vaiga ki a lautolu mo e pehē: “Kia lologo mai a mutolu e falu a lologo Siona.” Ka e nakai fia lologo e tau Iutaia. Ko Ierusalema e kakano mua ue atu ma lautolu ke fiafia, ka kua moumou tuai. (Salamo 137:1-3, 6) Kua malipilipi e tau loto ha lautolu ti kua lata a lautolu ke moua e fakamafanaaga. Ka e tuga ni ne talahau tuai he kupu he Atua, ne lagomatai e Iehova e tau tagata haana. Fēfē? Fofō he Patuiki ko Kuresa i Peresia a Papelonia mo e pehē hagaao ki a Iehova: “Kua poaki mai foki a ia kia au ke ta e au e fale māna i Ierusalema.” Tala age foki a Kuresa ke he tau Isaraela: “Ko ia ha ha ia mutolu mai hana motu oti, ne ha ia ia a Iehova hana Atua, kia hake ai a ia.” (2 Nofoaga he Tau Patuiki 36:23) Liga fakamafana mooli he mena nei e tau Isaraela i Papelonia!

5. Ko e heigoa ne talahau he salamo hagaao ke he malolō ha Iehova ke fakamaulu a tautolu?

⁵ Fakamafana e Iehova e motu ko Isaraela ti pihia foki ke he tau Isaraela takitokotaha. Taute pihia foki e Iehova ma tautolu mogonei. Tohi he salamo, ko e Atua “kua fakamalolo e ia a lautolu ne malipilipi e tau loto; kua pipi e ia ha lautolu a tau motu.” (Salamo 147:3) Ka gagao po ke fakaatukehe a tautolu, maeke a tautolu ke mauokafua to leveki e Iehova a tautolu. Makai a Iehova ke fakamafana a tautolu mo e fakamaulu e tau mamahi he tau logonaaga ha tautolu. (Salamo 34:18; Isaia 57:15) Foaki e ia ki a tautolu e pulotu mo e malolō ke fahia ke he ha lekua ne fehagai mo tautolu.​—Iakopo 1:5.

6. Aoga fēfē a tautolu mai he tau kupu he salamo ia Salamo 147:4? (Kikite fakatino he kamataaga.)

⁶ Matutaki atu ai, ne onoono hake e salamo ke he lagi ti pehē ko Iehova “kua totou e ia e tau fetu poke ne fiha” ti “kua ui e ia ha lautolu a tau higoa oti kana.” (Salamo 147:4) Kitia he salamo e tau fetū ka e nakai maama e ia ko e fiha he katoa. Ko e tau saienetisi mogonei ne iloa kua piliona e tau fetū he fuhifuhi fetū. Ti liga tiliona (trillion) e tau fuhifuhi fetū he lagi mo e lalolagi katoa! Nakai maeke e tau tagata ke totou oti e tau fetū ka ko e Tufuga ni. Iloa mitaki e Ia e tau fetū takitaha ti igatia a lautolu mo e higoa ne foaki age e Ia. (1 Korinito 15:41) Ko e Atua ne iloa e tau fetū takitaha kua iloa foki a koe. Iloa tumau e ia e nofoaga haau, logonaaga haau, mo e manako haau!

7, 8. (a) Ko e heigoa kua maama e Iehova hagaao ki a tautolu? (e) Talahau e fakataiaga ne fakakite e fakaalofa hofihofi noa ha Iehova.

⁷ Maama e Iehova e mena ne tupu ki a koe ti ha ha ia ia e malolō ke lagomatai a koe mo e tau lekua haau. (Totou Salamo 147:5.) Liga manatu a koe kua uka lahi foki e tuaga haau ti nakai maeke a koe ke fahia ki ai. Maama he Atua e tau kūkū ha tautolu mo e “manatu e ia  ko e kelekele ni a tautolu nai.” (Salamo 103:14) Nakai mitaki katoatoa a tautolu ti taute tumau e tautolu e tau hehē taha ia mo e liga logona hifo e tautolu e loto lolelole. Tokihala mooli a tautolu ke he falu mena ne talahau e tautolu, tau manako hepe ne manatu e tautolu, po ke tau logonaaga mahekeheke ne moua e tautolu! Nakai fai lolelole a Iehova ka e maama katoatoa e ia e tau logonaaga ha tautolu.​—Isaia 40:28.

⁸ Kua logona nakai e koe e lima malolō ha Iehova ne lagomatai a koe ke fahia mai he tau kamatamata? (Isaia 41:10, 13) Tupu e mena nei ke he paionia ne higoa ko Kyoko. He hiki atu a ia ke he kotofaaga foou haana, ne loto lolelole lahi a ia. Ka e iloa fēfē e Kyoko na maama e Iehova e tau lekua haana? He fakapotopotoaga foou haana, tokologa e tagata ne kua maama e tau logonaaga haana. Logona hifo e ia kua pehē age a Iehova: “Ofania e au a koe, nakai ni ha ko e paionia a koe ka e pihia foki ko koe ko e tama fifine haaku kua fakatapu ke lata mo au. Manako au ki a koe ke fiafia e moui haau ko e taha he haaku a Tau Fakamoli!” Fakakite fēfē e Iehova ki a koe kua “nakai maeke ke fakamatala hana iloilo”?

9, 10. Ko e heigoa e puhala aoga lahi ka lagomatai e Iehova a tautolu? Talahau e fakatai.

⁹ Lata oti a tautolu ke moua e tau mena tuga e tau mena kai, tau mena tui, mo e tau mena ke nonofo ai. Liga tupetupe a koe to nakai lahi e mena ke kai. Ka e tufuga e Iehova e lalolagi ke tupu mai e tau mena kai loga ma e tau tagata, ti pihia mo e “tau punua oreva ka tagi atu kia ia.” (Totou Salamo 147:8, 9.) Ka fagai e Iehova e tau punua oreva, maeke a tautolu ke mauokafua to foaki mai e ia e tau levekiaga fakatino ma tautolu.​—Salamo 37:25.

¹⁰ Mua atu e aoga, foaki e Iehova e tau mena kua lata mo tautolu ke tumau e malolō he tua ha tautolu, ti foaki mai e ia ki a tautolu e “monuina . . . he Atua kua mua ue atu ke he tau mena oti kua manamanatu ki ai.” (Filipi 4:6, 7) Ko e matakainaga taane ko Mutsuo mo e hoana haana ne kitia e puhala ne lagomatai e Iehova a laua. Ko e magaaho ne tō e tsunami ki Sapanī he 2011, ne hao fetamaki a laua he toli hake ke he tuafale ha laua. He aho ia, ne teitei galo e tau mena oti ha laua. Nonofo pouli a laua he pō he poko makalili he fata ke uaaki he kaina ha laua. He mogo pogipogi, ne kumi a laua ke he taha mena ke moua e mafanatia. Ko e mena ni kua moua e laua ko e 2006 Yearbook of Jehovah’s Witnesses. He fuke e Mutsuo e tau lautohi, ne kitia e ia e mataulu “Ko e Tsunami Matematekelea Lahi Mahaki Tali Mai i Tuai.” Tutala ai ke he mafuike i Sumatra he 2004, ne fakatupu e tsunami ne mua atu e hagahaga kelea. Tagi lahi a Mutsuo mo e hoana haana he totou e tau mena ne tutupu ke he tau matakainaga ha laua. Logona hifo e laua kua foaki e Iehova e fakamafanaaga ne lata mo laua. Kua leveki foki e Iehova a laua ke he falu puhala. Ko e tau matakainaga ha laua he falu faahi ha Sapanī ne foaki e tau mena kai mo e tau mena ke tui a laua. Ka ko e mena ne fakamalolō lahi a laua ko e tau ahiahi atu he tau matakainaga taane ne fakafano mai he fakatokatokaaga he Atua ke he fakapotopotoaga. Pehē a Mutsuo: “Logona hifo e au ko Iehova he tapa ha maua mo e kua leveki ki a maua. Ko e fakamafanaaga mooli!” Foaki fakamua he Atua e tau mena kua lata ke tumau e malolō he tua ha tautolu, ti leveki mogoia e ia e tau manako fakatino ha tautolu.

11. Ko e heigoa kua lata a tautolu ke taute ke aoga mai he lagomatai he Atua?

¹¹ “Kua lagaaki e Iehova e tau tagata matematekelea.” Kua fakaalofa a ia ki a tautolu ti mautali tumau ke lagomatai a tautolu. (Salamo 147:6a) Aoga fēfē a tautolu mai he lagomatai haana? Lata a tautolu ke moua e fakafetuiaga malolō mo ia. Ke moua ai, lata a tautolu ke mahani molū. (Sefanaia 2:3) Falanaki a lautolu ne mahani molū ki a Iehova ke fakahako e tau nakai fakafili tonu mo e utakehe e matematekelea ha lautolu. Talia e Iehova a lautolu.

12, 13. (a) Ke aoga mai he lagomatai he Atua, ko e heigoa kua lata a tautolu ke kalo kehe mai ai? (e) Ko hai kua fiafia a Iehova ki ai?

¹² He taha faahi, ko e Atua ne “liti hifo e ia e tau tagata mahani kelea ke he kelekele.” (Salamo 147:6e) Nakai manako a tautolu ke tupu e mena nei ki a tautolu! Manako a tautolu ke he Atua ke fakakite ki a tautolu e fakaalofa  fakamooli haana. Ti lata a tautolu ke fakavihia e mena kua fakavihia e ia. (Salamo 97:10) Ma e fakatai, lata a tautolu ke vihiatia e mahani feuaki. Kakano ai, kua lata a tautolu ke kalo kehe he tau mena ka takitaki atu a tautolu ki ai, putoia e tau mena fakatelefua. (Salamo 119:37; Mataio 5:28) Liga uka e tauaga nei, ka e aoga lahi e laliaga ha ko e mena to moua e tautolu e monuina ha Iehova.

¹³ Nakai maeke a tautolu ke tau he tauaga nei hoko tautolu ni. Lata a tautolu ke falanaki ki a Iehova. To fiafia nakai a ia ka falanaki a tautolu ke he tau mena ne onoono e tau tagata ki ai ke moua e lagomatai? Nakai, ko Iehova ne “nakai fiafia a ia ke he malolo he solofanua.” Lata nakai a tautolu ke falanaki ni ke he malolō ha tautolu po ke falu tagata? Ko Iehova kua “nakai mitaki foki kia ia e tau hui he tagata.” (Salamo 147:10) Ka e lata a tautolu ke matutaki ke liogi ki a Iehova ma e lagomataiaga, mo e olelalo ki a ia ke laveaki a tautolu mai he tau kūkū ha tautolu. Nakai lolelole a Iehova he logona e tau liogi nei. “Kua mitaki kia Iehova a lautolu kua matakutaku kia ia, ko lautolu kua amaamanaki ke he hana fakaalofa.” (Salamo 147:11) Ha kua fakamooli a ia ti fakaalofa a ia ki a tautolu, iloa e tautolu to lagomatai tumau e ia a tautolu ke kautū mai he tau manako hehē ha tautolu.

14. Ko e heigoa kua mooli ke he salamo?

¹⁴ Talahau e Iehova ki a tautolu to lagomatai e ia a tautolu ka fehagai mo e tau lekua. Mogo ne liliu e tau Isaraela ki Ierusalema, manatu he salamo e puhala ne lagomatai e Iehova a lautolu. Lologo he salamo: “Ha kua fakamao e ia e tau fakamau fakalava he hāu a tau gutuhala; kua fakamonuina e ia hāu a fanau ki loto ia koe. Ko ia ne fakatupu e mafola ke he hāu a katofia.” (Salamo 147:13, 14) Ha kua fakamaō e Iehova e tau gutuhala he maaga, ne logona he salamo e haohao mitaki. Kua fakamafana ki a ia to puipui e Iehova e tau tagata haana.

15-17. (a) Liga fēfē e logonaaga ha tautolu falu mogo hagaao ke he tau kamatamata ha tautolu, ka e fakaaoga fēfē e Iehova e Kupu haana ke lagomatai a tautolu? (e) Talahau e fakataiaga ne fakakite e puhala kua ‘mafiti lahi e poi atu’ he kupu he Atua ke lagomatai a tautolu.

¹⁵ Liga fakaatukehe a koe ha ko e tau lekua,  ka e foaki atu e Iehova ki a koe e pulotu ke fahia. Pehē e salamo, ko e Atua “kua fakafano e ia hana poaki ke he lalolagi, ne mafiti lahi hana tau kupu ne poi atu.” Ti talahau he salamo e kiona, hahau, mo e tau vai tuli ti hūhū: “Ko hai taha ke tu ki mua he hana makalili?” Ti pehē a ia ko Iehova “kua vagahau mai hana kupu, ti liu puke vai ai e tau mena ia.” (Salamo 147:15-18) Iloa he Atua ha tautolu e tau mena oti ti maeke ke taute ha mena, mo e maeke ke tautaofi e vai tuli mo e kiona, ka lagomatai mooli a koe ke kautū ke he ha lekua.

¹⁶ Mogonei, takitaki atu e Iehova a tautolu ke he haana Kupu ko e Tohi Tapu. Talahau he salamo kua ‘mafiti lahi e poi atu’ he kupu ha Iehova ke lagomatai a tautolu. Takitaki he Atua a tautolu he puhala hako mo e he magaaho hako. Manamanatu ke he puhala kua aoga a koe mai he Tohi Tapu, tau tohi he “fekafekau fakamoli mo e loto matala,” JW Broadcasting, jw.org, tau motua, mo e tau matakainaga haau. (Mataio 24:45) Kitia nakai e koe he moui haau e mafiti ha Iehova ke takitaki a koe?

¹⁷ Ko e matakainaga fifine ko Simone ne logona e puhala ne lagomatai he Kupu he Atua a ia. Logona hifo e ia e nakai aoga ti manatu a ia kua nakai fiafia a Iehova ki a ia. Ka e, he mogo ne loto lolelole a ia, ne liogi tumau a ia ki a Iehova ti olelalo ki a ia ma e lagomatai. Matutaki foki a ia ke fakaako e Tohi Tapu. Pehē a Simone: “Nakai lauia au he ha tuaga ne nakai logona e au e malolō ha Iehova mo e takitakiaga Haana.” Lagomatai he mena nei a ia ke lahi e aga mitaki.

18. Ko e ha ne logona e koe kua tata a Iehova ki a koe, ti ko e heigoa e tau kakano ati maeke a koe ke “Fakaheke a Ioha!”?

¹⁸ Iloa he salamo, na fifili e Iehova e motu ha Isaraela i tuai ke eke mo tau tagata haana mai he tau motu oti he lalolagi. Ko e motu ni a ia ne moua e “kupu” mo e “tau fakatufono” he Atua. (Totou Salamo 147:19, 20.) Mogonei, moua e tautolu e lilifu lahi he fakahigoa ke he higoa he Atua. Loto fakaaue a tautolu ha kua iloa e tautolu a ia, moua e tautolu e Kupu haana ke takitaki a tautolu, ti maeke a tautolu ke moua e fakafetuiaga tata mo ia. Tuga e tagata ne tohi e Salamo 147, loga e tau kakano haau ke “Fakaheke a Ioha!” mo e ke fakamalolō e falu ke taute pihia.