KO E magaaho ne fakaako e Iesu e tau tutaki haana ke fakamatala e tala mitaki, hataki e ia a lautolu to nakai manako tumau e tau tagata ke fanogonogo ki a lautolu. (Luka 10:3, 5, 6) Pihia foki ke he gahua fakamatala ha tautolu. Falu tagata ne feleveia e tautolu ne liga hemu po ke vale foki. Ka mahani pihia a lautolu, liga uka a tautolu ke moua e fakaalofa hofihofi noa mo e manako ke fakamatala ki a lautolu.

Ko e tagata fakaalofa hofihofi noa ne kitia e tau manako mo e tau lekua he falu, logona e momoko ki a lautolu, ti manako ke lagomatai. Ka ko e heigoa ka tupu ka galo e fakaalofa hofihofi noa ha tautolu ma e tau tagata ne feleveia e tautolu he gahua fakamatala? To galo e makutu ha tautolu, kakano to nakai makai a tautolu ke fakamatala ki a lautolu ti nakai maeke a tautolu ke lagomatai a lautolu. Maeke ke fakatatai e makutu ha tautolu ke he afi. Ke kakā e afi, lata ke hokoti tumau aki e tau gaafi. Pihia foki, ke malolō e makutu ha tautolu, lata a tautolu ke moua e fakaalofa hofihofi noa!​—1 Tesalonia 5:19.

Fakaako fēfē a tautolu ke lahi e fakaalofa hofihofi noa, pete ka uka? Kia fakatutala a tautolu ke he tolu e fakafifitakiaga ka fifitaki e tautolu: Ko Iehova, Iesu, mo e aposetolo ko Paulo.

Ke he afe he tau tau, talahau he tau tagata e tau pikopiko kelea hagaao ki a Iehova. Ka e fakatumau a ia ke “ofaofa e tau tagata vale, katoa mo lautolu ne mahani kelea.” (Luka 6:35) Fakakite fēfē e ia e mahani totonu? Kua fakauka a ia ke he tau tagata oti. Manako a Iehova ke he “tau tagata oti kana” ke momoui. (1 Timoteo 2:3, 4) Pete he vihiatia he Atua e mahani kelea, uho lahi e tau tagata ki a ia ti nakai manako a ia ke he taha ia lautolu ke mate.​—2 Peteru 3:9.

Iloa e Iehova kua mitaki lahi a Satani he taute e tau tagata ke talitonu ke he tau pikopiko. (2 Korinito 4:3, 4) Tokologa ne kua fakaako hagaao ke he tau pikopiko ke he Atua tali mai he ikiiki a lautolu. Ti ko e puhala ne manamanatu mo e logona hifo e lautolu ne liga uka ke talia e kupu mooli. Ka e makai a Iehova ke lagomatai a lautolu. Iloa fēfē e tautolu?

Tuga ma e fakatai ke he puhala ne logona hifo a Iehova ke he tau tagata he maaga ko Nineva. Pete kua favale a lautolu, pehē a Iehova ki a Iona: “Ka e nakai kia fakaalofa au ki Nineva ko e maga lahi, ha ha i ai e tau tagata kua mua he tokologa ke he taha teau uafulu e afe, kua nakai iloa e lautolu po ko fe e lima matau ha lautolu, po ko fe e lima hema ha lautolu.” (Iona 4:11) Logona e Iehova e fakaalofa ke he tau tagata ia ne nakai iloa e kupu mooli hagaao ki a ia. Ti fakafano e ia a Iona ke hataki a lautolu.

Pihia e logonaaga ha tautolu ke he tau tagata, tuga ha Iehova. Uho lahi a lautolu. Tuga a Iehova, makai a tautolu ke lagomatai a lautolu ke iloa hagaao ki a ia pete kua tuga to nakai talia e lautolu e kupu mooli.

 Ka nakai talia he tau tagata e fekau ha tautolu, kua lata a tautolu ke eketaha ke maama e kakano ne pihia ai. Liga hepe e manatu ha lautolu hagaao ke he Tohi Tapu po ke hagaao ke he tau Kerisiano ha kua kitia e lautolu ko e falu ne ui ko e tau Kerisiano a lautolu kua taute e tau mena kelea. Falu ne liga logona e tau pikopiko ke he taofiaga ha tautolu. Ka e liga matakutaku e falu neke vaiga he tau magafaoa po ke tau tagata he maaga a lautolu ka tutala mo tautolu.

Falu tagata ne feleveia mo tautolu ne liga kelea e tau momoui ha lautolu ti lauia lahi e tau logonaaga. Ko e misionare ne higoa ko Kim ne talahau kua tokologa e tagata he matakavi haana ne hao he felakutaki ti galo e tau mena oti. Nakai fai amaamanakiaga mooli a lautolu ke he vahā anoiha. Kua hogohogo manava a lautolu ti nakai falanaki ke he ha tagata. Ko e tau tagata he matakavi nei kua fa taofi e Tau Fakamoli ke ua fakamatala. Taha magaaho ne fakamatakutaku a Kim he gahua fakamatala a ia.

Fakatumau fēfē a Kim ke fakaalofa hofihofi noa pete ne taute fakakelea he tau tagata? Eketaha tumau a ia ke manatu e Tau Fakatai 19:11, ne pehē: “Kua fakatuai e tagata ke ita, ha ko e hana loto manamanatu.” Ka manamanatu a ia ke he tau mena ne lauia e tau tagata he matakavi haana, kua lagomatai a ia ke fakaalofa hofihofi noa ki a lautolu. Nakai kapitiga e tau tagata oti ne feleveia mo ia. He matakavi taha ia, ne fai liu aahi atu mitaki a ia.

Hūhū hifo ki a tautolu: ‘Ka nakai iloa e au e kupu mooli, to fēfē au ka o mai e Tau Fakamoli a Iehova ke fakamatala ki a au?’ Ma e fakatai, ka e kua ka logona e tautolu e tau pikopiko loga hagaao ke he Tau Fakamoli? Liga to tali fakakelea foki a tautolu ti lata ke fakakite e fakaalofa hofihofi noa. Pehē a Iesu kua lata a tautolu ke taute e falu ke he puhala kua loto a tautolu ke taute mai ki a tautolu. Ti kua lata ke lali a tautolu ke maama e logonaaga he falu mo e fakauka ki ai, pete he uka.​—Mataio 7:12.

Fakakite foki he aposetolo ko Paulo e fakaalofa hofihofi noa ke he tau tagata ne favale ke he gahua fakamatala haana. Ko e ha? Ha kua manatu a Paulo na pihia a ia fakamua. Pehē a ia: “Ko au ne vagahau kelea fakamua, to favale, to fakakelea atu; ka kua ofania au, ha kua eke pihia e au ke he haku a nakai iloa, mo e nakai talia fakatonu.” (1 Timoteo 1:13) Iloa e Paulo kua lahi e fakaalofa noa a Iehova mo Iesu ki a ia. Maeke a ia ke maama e tau tagata ne loto ke taofi e gahua fakamatala haana, ha kua logona pihia foki a ia he taha magaaho tuga a lautolu.

Falu mogo, feleveia a Paulo mo e tau tagata ne malolō e taofiaga ke he tau fakaakoaga fakavai.  Fēfē e logonaaga haana ke he mena nei? Ia Gahua 17:16 ne totou e tautolu ko ia i Atenai, ti kua “hukia lahi hifo hana loto, he kitia e ia e māga kua puke ke he tau tupua.” Ka e fakaaoga e Paulo e mena tonu ia ne hogohogo manava ki ai ko e puhala ke fakaako e tau tagata. (Gahua 17:22, 23) Ne hikihiki e ia e puhala fakamatala haana, ti vagahau a ia ke he taha puhala foki ke he tau tagata he tau tupumaiaga kehekehe ke hokotia a ia ke “momoui ai ni falu.”​—1 Korinito 9:20-23.

Ka fakamatala a tautolu ke he tau tagata ne tali fakakelea po ke hepe e tau taofiaga, maeke a tautolu ke taute e mena ne taute e Paulo. Fakaaoga e tautolu e mena ne iloa hagaao ki a lautolu ke lagomatai ai ke iloa e “tala mitaki.” (Isaia 52:7) Ko e matakainaga fifine ne higoa ko Dorothy ne pehē: “He matakavi ha mautolu, tokologa ne fakaako kua pāpā maō mo e aga fakafili e Atua. Nava e au e tau tagata pihia ma e taofiaga malolō ha lautolu ke he Atua ti takitaki atu ai ke he mena ne talahau he Tohi Tapu hagaao ke he mahani fakaalofa ha Iehova mo e tau maveheaga haana ma e vahā anoiha.”

Lata foki a tautolu ke lali ke fakamafana e tau matakainaga he gahua fakamatala mo lautolu. Pehē a Jessica ka fano a ia he gahua he fonua mo e falu ti kelea e mena ne tupu ke he taha ia lautolu, nakai lali a ia ke hagaaki ke he mena ia. Ka e tutala a ia ke he taha mena atihake, tuga e tau fua mitaki he gahua fakamatala ha tautolu pete he tali fakakelea e falu.

Iloa mitaki e Iehova kua uka he falu mogo ma tautolu ke fakamatala. Ka e fiafia lahi a ia ka fifitaki e tautolu e fakaalofa noa haana! (Luka 6:36) Mooli, to nakai fakaalofa hofihofi noa mo e fakauka tukulagi a Iehova ke he tau tagata he lalolagi nei. Talitonu a tautolu na iloa tonuhia e ia e magaaho ke fakahoko e moumouaga. Ato hoko e magaaho ia, mafiti e gahua fakamatala ha tautolu. (2 Timoteo 4:2) Kia matutaki a tautolu ke fakamatala fakamakutu mo e moua e fakaalofa hofihofi noa mooli ma e “tau tagata oti kana.”