1, 2. Ko e heigoa e kakano ke haga ki a Iehova?

KUA nonofo a tautolu he “tau aho uka.” (2 Timoteo 3:1) To uka lahi e moui ato moumou e Iehova e lalolagi kelea nei mo e tamai e mafola mooli ke he lalolagi. Kakano hanei kua lata a tautolu ke hūhū hifo, ‘Ko hai kua haga au ki ai ma e lagomatai mo e takitakiaga?’ Liga mafiti a tautolu ke pehē, “Ki a Iehova,” ti ko e tali mitaki lahi mahaki a ia.

² Ko e heigoa e kakano ke haga ki a Iehova? Ti maeke fēfē a tautolu ke mailoga kua haga tumau a tautolu ki a ia ka fehagai mo e tau lekua? He vahā i tuai, taha e tagata tohia he Tohi Tapu ne fakamaama e lata mooli ke haga ki a Iehova ka manako lagomatai a tautolu. (Totou Salamo 123:1-4.) Pehē a ia ka haga a tautolu ki a Iehova, kua tuga e fekafekau ne haga ke he iki haana. Puhala fe? Ko e fekafekau kua haga, po ke  falanaki ke he iki haana ke foaki e tau mena kai mo e ke puipui a ia. Ka e lata foki a ia ke onoono tumau ke he iki haana ke maama e mena ne manako e iki haana ke taute e ia, ti kua lata a ia ke taute. He puhala pihia, lata a tautolu ke fakaako fakamatafeiga e Kupu he Atua he tau aho takitaha ke maama e mena ne manako a Iehova ke taute e tautolu, ti kua lata mogoia a tautolu ke taute. Iloa tonu mogoia e tautolu to lagomatai e Iehova a tautolu ka manako lagomatai a tautolu.​—Efeso 5:17.

3. Ko e heigoa ka fakatauhele a tautolu mai he haga ki a Iehova?

³ Pete he iloa e tautolu kua lata a tautolu ke haga tumau ki a Iehova, falu magaaho ne liga fakatauhele a tautolu. Ko e mena tonu ia ne tupu ke he kapitiga tata ha Iesu ko Mareta. “Kua fakafita a Mareta he tuegutu.” (Luka 10:40-42) Kaeke ke fakatauhele e tagata tua fakamooli tuga a Mareta pete ko Iesu ne ha ha ai mo ia, nakai lata a tautolu ke ofo ka fakatauhele foki a tautolu. Ti ko e heigoa ka fakatauhele a tautolu mai he haga ki a Iehova? He vala tala nei, to fakatutala a tautolu ke he puhala ka fakatauhele a tautolu ha ko e tau mena ne taute he falu. To fakaako foki a tautolu ke he puhala ke haga tumau ki a Iehova.

4. Ko e ha kua liga ofo a tautolu he galo e lilifu ha Mose ke hu atu ke he Motu he Maveheaga?

⁴ Haga mooli a Mose ki a Iehova ma e takitakiaga. Talahau he Tohi Tapu ki a tautolu kua “fakauka a ia tuga ne mena kua kitia e ia a ia nakai kitia.” (Totou Heperu 11:24-27.) Talahau ai foki “kua nakai tu mai foki ha perofeta i Isaraela ke tuga na Mose, ne fehagaoaki a laua mo Iehova.” (Teutaronome 34:10) Pete ko Mose ko e kapitiga tata ha Iehova, galo e ia e lilifu ke hu atu ke he Motu he Maveheaga. (Numera 20:12) Ko e heigoa e hehē?

5-7. Ko e heigoa ne tupu nakai leva he mole e toka he tau Isaraela a Aikupito, ti ko e heigoa ne taute e Mose?

⁵ Teitei ke ua e mahina he mole e toka he tau Isaraela a Aikupito, mo e to hohoko foki a lautolu ke he Mouga ko Sinai, fai mena lahi ne tupu. Kamata e tau tagata ke loma ha kua nakai fai vai. Ne gūgū agataha a lautolu ki a Mose mo e ita lahi ai ati “tagi atu ai a Mose kia Iehova, kua pehe atu, To eke ha e au ke he motu nai, toe tote ti tauliti maka mai e lautolu au?” (Esoto 17:4) Tuku age e Iehova e fakatonuaga maaliali ki a Mose. Tala age a Iehova ki a ia ke uta e tokotoko mo e tā aki e maka i Horepa. Pehē e Tohi Tapu: “Ti eke ai pihia e Mose ki mua he tau patu a Isaraela.” Ti tafe mai e vai mo e lahi e vai ke inu e tau Isaraela, ti mafola e lekua.​—Esoto 17:5, 6.

⁶ Tala mai he Tohi Tapu ki a tautolu na fakahigoa e Mose e matakavi ko Masa ne kakano “Kamatamata,” mo Meripa ne kakano “Taufetoko.” Ko e ha? “Ha ko e taufetoko he fanau a Isaraela, mo e ha lautolu a kamatamata kia Iehova, kua pehe, Ha ha ia tautolu a Iehova, po ke nakai?”​—Esoto 17:7.

⁷ Fēfē e logonaaga ha Iehova ke he mena ne tupu i Meripa? Logona hifo e ia kua totoko he tau Isaraela a ia mo e pule haana, nakai ni ki a Mose. (Totou Salamo 95:8, 9.) Ko e mena hehē lahi ne taute he tau Isaraela. Ka e taute e Mose e mena hako. Haga a ia ki a Iehova mo e muitua fakamatafeiga ke he tau fakatonuaga Haana.

8. Ko e heigoa ne tupu he tata ke he fakaotiaga he fenoga he tau Isaraela he tutakale?

 ⁸ Ka ko e heigoa ne tupu he tuaga pihia kavi ke he 40 e tau fakamui? Teitei tuai e tau Isaraela ke hoko ke he fakahikuaga he fenoga ha lautolu he tutakale. Hoko a lautolu ke he matakavi tata ki Katesa, ne tata atu ke he katofia he Motu he Maveheaga. Iloa foki e matakavi nei ko Meripa. * (Kikite matahui tala.) Ko e ha? Ha kua liu e tau Isaraela ke loma he nakai fai vai. (Numera 20:1-5) Ka ko e mogonei, taute e Mose e hehē kelea lahi mahaki.

9. Ko e heigoa ne tala age e Iehova ke taute e Mose, ka ko e heigoa ne taute e Mose? (Kikite fakatino he kamataaga.)

⁹ Ko e heigoa ne taute e Mose he mogo ne totoko e tau tagata? Liu a ia haga ki a Iehova ma e takitakiaga. Ka ko e mogonei kua nakai tala age a Iehova ki a Mose ke tā e maka. Tala age a ia ki a Mose ke uta e tokotoko haana, fakapotopoto mai e tau tagata ke he maka, ti vagahau a ia ke he maka. (Numera 20:6-8) Taute nakai e Mose e mena ia? Nakai. Ne lahi e hogohogo manava mo e ita haana ti tala age a ia ke he tau tagata: “Kia fanogonogo mai a mutolu ko mutolu kua fakafualoto; kia fakatafe mai kia e maua e vai mai he maka tumau nai ma mutolu?” Ti tā e ia e maka, nakai lagataha ka e lagaua.​—Numera 20:10, 11.

10. Tali atu fēfē a Iehova ke he mena ne taute e Mose?

¹⁰ Ne ita lahi a Iehova ki a Mose. (Teutaronome 1:37; 3:26) Ko e ha ne ita a Iehova? Taha kakano ha kua nakai omaoma a Mose ke he tau takitakiaga foou ne tala age e Iehova ki a ia.

11. He tā e maka, ko e ha ne liga taute e Mose e tau Isaraela ke manamanatu na nakai ko Iehova ne taute e mana?

¹¹ Liga ha ha i ai taha kakano foki ne ita a Iehova. Ko e tau maka lalahi i Meripa fakamua ne maō lahi. Pete he maō e tā he maka, nakai fai tagata ne amanaki to tafe mai e vai. Ka ko e tau maka i Meripa ke uaaki kua kehe lahi. Laulahi he tau maka ia kua fakahigoa ko e tau maka puga. Ko e maka puga kua molū, maeke e vai ke hu ki loto ti tafe mai he lalo fonua. Maeke e tau tagata ke keli e maka ke moua mai e vai nei. Ti ko e mogo ne tā e Mose e maka ka e nakai vagahau ki ai, liga manatu e tau Isaraela ko e mena tafe mai pauaki e vai ka e nakai ko Iehova ne taute e mana nei. * (Kikite matahui tala.) Nakai iloa tonu e tautolu.

12. Liga ko e heigoa foki e kakano ne ita a Iehova ki a Mose mo Arona?

¹² Liga fai kakano agaia foki ne ita lahi a Iehova ki a Mose mo Arona. Tala age a Mose ke he tau tagata: “Kia fakatafe mai kia e maua e vai mai he maka tumau nai  ma mutolu?” He pehē a Mose “maua,” liga hagaao a ia ki a ia mo Arona. Ko e mena ne ui e Mose kua nakai fakalilifu ha kua nakai tuku atu e ia e tau lilifu oti kana ki a Iehova ha ko e mena ofoofogia ne tupu. Pehē e Salamo 106:32, 33: “Ne fakatupu foki e lautolu hana ita ke ha vai, ko Meripa, ne kelea ai foki a Mose ha ko lautolu. Ha kua fakahogohogomanava e lautolu a ia, ti vagahau fakatepetepe a ia ke he hana tau laugutu.” * (Kikite matahui tala.) (Numera 27:14) Nakai tuku atu e Mose e lilifu ki a Iehova ne lata mo Ia. Tala age a Iehova ki a Mose mo Arona: “Totoko mai a mua ke he haku a kupu.” (Numera 20:24) Ko e agahala kelea lahi mahaki a ia!

13. Ko e ha e puhala ne fakahala e Iehova a Mose kua hako mo e tonu?

¹³ Lahi e mena ne amanaki a Iehova ki a Mose mo Arona ha kua takitaki e laua e tau tagata Haana. (Luka 12:48) Nakai fakaatā e Iehova e atuhau katoa a Isaraela he vahā i tuai ke huhū atu ke he Motu he Maveheaga ha kua totoko e lautolu a Ia. (Numera 14:26-30, 34) Ti kua hako mo e tonu he magaaho ne totoko a Mose, ne fakahala e Iehova a ia he puhala taha. Tuga ni e falu tagata ne totoko, nakai fakaatā a Mose ke hu atu ke he Motu he Maveheaga.

14, 15. Ko e heigoa ne fakatupu a Mose ke totoko a Iehova?

¹⁴ Ko e heigoa ne fakatupu a Mose ke totoko ki a Iehova? Mailoga foki e mena ne talahau ia Salamo 106:32, 33: “Ne fakatupu foki e lautolu hana ita ke ha vai, ko Meripa, ne kelea ai foki a Mose ha ko lautolu. Ha kua fakahogohogomanava e lautolu a ia, ti vagahau fakatepetepe a ia ke he hana tau laugutu.” Ti pete he totoko e tau Isaraela ki a Iehova, ko Mose ne loto kona, po ke ita. Nakai fakakite e ia e manako fakalatalata ka e vagahau mo e nakai manamanatu ke he fua ka tupu mai.

¹⁵ Nakai liu a Mose haga ki a Iehova ka e fakaatā e ia e tau mahani he falu ke fakatauhele a ia. Ko e mogo fakamua ne loma e tau tagata ha ko e vai, ka e taute e Mose e mena hako. (Esoto 7:6) Ka e liga lolelole mo e hogohogo manava a ia ha kua leva lahi e totoko he tau Isaraela. Liga kua manamanatu ni a Mose mogonei ke he tau logonaaga ni haana ka e nakai ke fakaheke a Iehova.

16. Ko e ha kua lata a tautolu ke manamanatu ke he mena ne taute e Mose?

¹⁶ Ka fakatauhele ti agahala e perofeta fakamooli tuga a Mose, to mukamuka foki e mena nei ke tupu ki a tautolu. Teitei a Mose ke hu atu ke he Motu he Maveheaga, ti amanaki foki a tautolu ke huhū atu ke he lalolagi foou. (2 Peteru 3:13) Nakai manako mooli a tautolu ke galo e lilifu pauaki ia. Ka ko e huhū atu ke he lalolagi foou, lata a tautolu ke matutaki ke haga ki a Iehova mo e omaoma tumau ki a ia. (1 Ioane 2:17) Ko e heigoa e tau fakaakoaga ka ako e tautolu mai he hehē ha Mose?

17. Kalo kehe fēfē a tautolu neke galo e manako fakalatalata ka hogohogo manava a tautolu?

¹⁷ Ua galo e manako fakalatalata haau ka hogohogo manava a koe. Falu mogo kua tupu tumau e lekua taha. Ka e pehē e Tohi Tapu: “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.” (Kalatia 6:9; 2 Tesalonia 3:13) Ka fakahogohogo manava tumau e taha mena po ke taha tagata ki a tautolu, manamanatu nakai a tautolu to vagahau? Tautaofi nakai e ita ha tautolu? (Tau Fakatai 10:19; 17:27; Mataio 5:22) Ka fakaita he falu a tautolu, lata a tautolu ke fakaako ke “fakatokatoka atu ke he ita,” po ke fakaatā a Iehova ke fakakite e ita haana. (Totou Roma 12:17-21.) Ko e heigoa e kakano he mena ia? He nakai ita, fakatali fakatekiteki a tautolu ki a Iehova ke taute taha mena hagaao ke he lekua ha tautolu he magaaho ka manamanatu a Ia kua lata. Ka lali a tautolu ke taui ka e nakai haga ki a Iehova, to nakai fakalilifu e tautolu a ia.

18. Ko e heigoa kua lata ke manatu e tautolu hagaao ke he muitua he tau takitakiaga?

¹⁸ Muitua fakamatafeiga e tau takitakiaga foou. Muitua fakamooli nakai e  tautolu e tau takitakiaga foou ne foaki mai e Iehova? Nakai lata a tautolu ke taute tumau e tau mena he puhala ne fa mahani ki ai a tautolu he vahā fakamua, ti kua aga foki a tautolu he taute pihia. Ka e lata a tautolu ke fakamafiti ke muitua e tau takitakiaga foou ne foaki e Iehova puhala he fakatokatokaaga haana. (Heperu 13:17) Lata foki a tautolu ke fakaeneene ke nakai ‘mua ha manatu ke he mena kua tohi.’ (1 Korinito 4:6) Ka muitua fakamatafeiga e tautolu e tau takitakiaga ha Iehova, kua haga tumau a tautolu ki a ia.

19. Kalo kehe fēfē a tautolu he fakaatā e tau hehē he falu ke moumou e tuaga kapitiga ha tautolu mo Iehova?

¹⁹ Ua fakaatā e tau hehē he falu ke moumou e tuaga kapitiga haau mo Iehova. Ka matutaki a tautolu ke haga ki a Iehova, to nakai moumou e tuaga kapitiga ha tautolu mo Ia po ke ita ha ko e tau mena ne taute he falu. Uho lahi e mena nei, tuga a Mose, kua fai matagahua a tautolu he fakatokatokaaga he Atua. Mooli, igatia a tautolu mo e lata ke gahua fakamalolō mo e omaoma ki a Iehova ke moua e moui. (Filipi 2:12) Ka lahi e matagahua kua moua e tautolu, to lahi e mena ne amanaki a Iehova mai ia tautolu. (Luka 12:48) Kaeke ke fakaalofa mooli a tautolu ki a Iehova, to nakai tupetupe po ke vevehe kehe a tautolu mai he fakaalofa Haana.​—Salamo 119:165; Roma 8:37-39.

20. Ko e heigoa kua lata a tautolu ke eketaha ke taute?

²⁰ Nonofo a tautolu he tau magaaho uka mo e paleko. Ti aoga lahi ke haga tumau a tautolu ki a Iehova “kua haele ke he lagi,” ke maama e mena ne manako a ia ke taute e tautolu. Nakai lata a tautolu ke fakaatā e tau mahani he falu ke moumou e tuaga kapitiga ha tautolu mo Iehova. Ko e mena ne tupu ki a Mose kua fakaako ki a tautolu e fakatonuaga aoga lahi nei. He nakai molea e ita ka taute he falu e tau hehē, kia eketaha a tautolu ke “haga hake ke he ha tautolu a Atua ko Iehova ato fakaalofa mai a ia kia tautolu.”​—Salamo 123:1, 2.