1-2. (a) Ko e ha kua nakai ofo a tautolu ka pā e tapuakiaga ha tautolu? (e) Ko e heigoa ka fakatutala a tautolu ki ai he vala tala nei?

HE 2018, molea e 223,000 he tau tagata fakailoa he tala mitaki ne nonofo he tau motu ne pā po ke fakakaupā e tau matagahua fakaagaaga ha tautolu. Nakai ofo ai. He fakaako e tautolu he vala tala fakamua, amanaki e tau Kerisiano mooli ke lauia he tau favaleaga. (2 Timo. 3:12) Mena fe ni ne nonofo a tautolu, liga amanaki e tau fakatufono ti pā a tautolu he tapuaki ke he ha tautolu a Atua fakaalofa ko Iehova.

² Ka fifili e fakatufono he matakavi ne nofo a koe ke pā e tapuakiaga ki a Iehova, liga hūhū hifo e koe e tau hūhū nei: ‘Kakano kia e favaleaga kua galo e tautolu e taliaaga he Atua? To taofi kia he pāaga e tapuakiaga ha tautolu ki a Iehova? Lata nakai au ke hiki ke he taha motu ke atāina ke tapuaki ke he Atua?’ He vala tala nei, to fakatutala a tautolu ke he tau hūhū ia. To manamanatu foki ke he puhala ka fakatumau a tautolu ke tapuaki ki a Iehova ka pā e gahua ha tautolu mo e tau matahele kua lata ke kalo kehe a tautolu i ai.

3. Hagaao ke he 2 Korinito 11:23-27, ko e heigoa e favaleaga ne lauia e aposetolo fakamooli ko Paulo, ti ko e heigoa ne fakaako e tautolu mai he fakafifitakiaga haana?

³ Ka pā he fakatufono e tapuakiaga ha tautolu, liga manamanatu ai kua nakai fakamonuina he Atua a tautolu. Ka e manatu, ko e favaleaga ne nakai kakano kua nakai fiafia a Iehova ki a tautolu. Tuga e fakatai ke he aposetolo ko Paulo. Kua  talia mooli he Atua a ia. Moua e ia e lilifu ke tohia 14 e tohi he Tau Tohiaga Tapu Heleni Kerisiano, ti ko ia e aposetolo ke he tau motu kehe. Ka e fehagai a ia mo e favaleaga vevela. (Totou 2 Korinito 11:23-27.) Fakaako e tautolu mai he mena ne tupu ke he aposetolo ko Paulo kua fakaatā e Iehova ke favale ke he tau fekafekau fakamooli haana.

4. Ko e ha kua vihiatia he lalolagi a tautolu?

⁴ Fakamaama e Iesu e kakano kua lata a tautolu ke amanaki ke he totokoaga. Pehē a ia to vihiatia ki a tautolu ha kua nakai fai vala a tautolu ke he lalolagi. (Ioane 15:18, 19) Ko e favaleaga ne nakai ko e fakamailoga kua nakai fakamonuina e Iehova a tautolu. Ka kua fakakite ai hane taute e tautolu e mena kua hako!

5. Maeke nakai e tau tagata ke taofi e tapuakiaga ki a Iehova? Fakamaama.

⁵ Nakai maeke e tau tagata totoko ke taofi e tapuakiaga ke he Atua malolō ue atu ko Iehova. Tokologa ne lali ka e kaumahala. Manamanatu ke he mena ne tupu he Felakutaki II he Lalolagi. He magahala ia, ko e tau fakatufono he tau motu loga ne favale vevela ke he tau tagata he Atua. Ne nakai ni pā he matakau Nazi i Sihamani e gahua he Tau Fakamoli a Iehova ka e pā foki he tau fakatufono i Ausetalia, Kanatā, mo e falu motu. Ka e mailoga e mena ne tupu. He kamata e felakutaki he 1939, ne 72,475 e tagata fakailoa he lalolagi katoa. Fakakite he tau hokotaki he matahiku he felakutaki he 1945, ne 156,299 e tagata fakailoa ha kua fakamonuina e Iehova. Ko e numera he tau tagata fakailoa ne molea e fakalahiua!

6. He nakai fakamatakutaku a tautolu, ko e heigoa kua taute he totokoaga? Talahau e fakatai.

⁶ He nakai fakamatakutaku a tautolu, omoomoi he totokoaga a tautolu ke fekafekau fakalahi ki a Iehova. Ma e fakatai, taha e hoa ne fai tama tote ne nonofo he motu ne fifili e fakatufono ke pā e tapuakiaga ha tautolu. He nakai tolomuli ki tua, kamata e hoa ke paionia tumau. Ne toka foki he hoana e gahua tupe mitaki haana ke paionia. Talahau he taane, ha ko e pāaga ne tokologa e tagata kua fia iloa hagaao ke he Tau Fakamoli a Iehova. Ko e fua, mukamuka lahi a ia ke kamata e tau fakaako Tohi Tapu. Lauia mitaki foki e falu ha ko e pā he gahua. Ko e motua he motu taha ia ne talahau kua tokologa ne oti e fekafekau ki a Iehova ka kua liliu mai mogonei ke he tau feleveiaaga ti liu kamata foki ke fakamatala.

7. (a) Ko e heigoa ne fakaako e tautolu mai ia Levitika 26:36, 37? (e) Ko e heigoa haau ka taute ka pā e tapuakiaga?

 ⁷ Ka pā he tau fī e tapuakiaga ha tautolu, amanaki a lautolu to matakutaku a tautolu ke tapuaki ki a Iehova. Lafi ke he pā, fakatutū e lautolu e tau tala pikopiko, fakafano e tau leoleo ke veu e tau kaina ha tautolu, uta a tautolu ke he fakafiliaga, po ke tuku falu ha tautolu he fale puipui. Amanaki a lautolu to matakutaku a tautolu ha kua tuku e lautolu e falu ha tautolu ke he fale puipui. Ka fakaatā e tautolu a lautolu ke fakamatakutaku a tautolu, to liga kamata foki a tautolu ke “pā” e tapuakiaga ni ha tautolu. Nakai manako a tautolu ke tuga a lautolu ne fakamaama ia Levitika 26:36, 37. (Totou.) To nakai fakaatā e tautolu e matakutaku ke fakatupu a tautolu ke fakamanou hifo po ke nakai taute e tau matagahua fakaagaaga ha tautolu. Falanaki katoatoa a tautolu ki a Iehova ti nakai talia ke hopoate. (Isaia 28:16) Liogi a tautolu he kumi ke he takitakiaga ha Iehova. Iloa e tautolu ha ko e lalagoaga haana, to nakai maeke he ha fakatufono malolō he tagata ke taofi a tautolu mai he tapuaki fakamooli ke he Atua ha tautolu.​—Hepe. 13:6.

8-9. (a) Ko e heigoa e fifiliaga fakatagata kua lata ke igatia e ulu he magafaoa po ke tau tagata takitokotaha ke taute? (e) Ko e heigoa ka lagomatai e tagata ke taute e fifiliaga kua tonu?

⁸ Ka pā he fakatufono he matakavi ne nofo a koe e tapuakiaga ha tautolu, to manatu a koe liga lata kia a koe ke hiki ke he taha motu ke atāina ke fekafekau ki a Iehova. Ko e fifiliaga fakatagata anei ne nakai maeke ha tagata ke taute ma haau. Falu ne liga lagomatai he manamanatu ke he tau mena ne taute he tau Kerisiano he senetenari fakamua he mogo ne favale ki a lautolu. He taulitimaka he tau fī a Setefano ti mate, ne hiki atu e tau tutaki i Ierusalema ki Iutaia mo Samaria mo e pihia foki ki Foinike, Kuperu, mo Anetioka. (Mata. 10:23; Gahua 8:1; 11:19) Ka e liga mailoga he falu he mole e tau favaleaga ne matematekelea e tau Kerisiano he senetenari fakamua, ne fifili e aposetolo ko Paulo ke nakai hiki he tau matakavi ne totoko e gahua fakamatala. Ne fakahagahaga kelea e ia e haohao mitaki he moui haana ke fakailoa e tala mitaki mo e ke fakamalolō e tau matakainaga he tau maaga ne matematekelea he favaleaga vevela.​—Gahua 14:19-23.

⁹ Ko e heigoa ne fakaako e tautolu mai he tau tala nei? Igatia e ulu he magafaoa mo e lata ke taute e fifiliaga fakatagata ke hiki ke he taha matakavi. Ato taute e fifiliaga, lata a ia ke liogi mo e manamanatu fakamitaki ke he tau tutūaga he magafaoa haana mo e tau lauiaaga mitaki mo e kelea he hiki ka lauia a lautolu. Ke he tuaga nei, igatia e Kerisiano mo e lata ke “fua hana ni a kavega.” (Kala. 6:5) Nakai lata a tautolu ke fakafili e falu ha ko e fifiliaga ne taute e lautolu.

10. Ko e heigoa e fakatonuaga ka foaki he la ofisa mo e tau motua?

¹⁰ Maeke fēfē a koe ke matutaki ke tapuaki ki a Iehova ka e pā e gahua? To foaki he la ofisa e tau fakatonuaga mo e tau lagomatai aoga ke he tau motua he fakapotopotoaga hagaao ke he puhala ke moua e tau mena kai fakaagaaga, puhala ke feleveia auloa ke tapuaki, mo e puhala ke fakamatala e tala mitaki. Ka nakai maeke e la ofisa ke matutaki ke he tau motua, to lagomatai he tau motua a koe mo lautolu oti he fakapotopotoaga ke matutaki ke he tapuakiaga ki a Iehova. To foaki e lautolu e fakatonuaga ne lagotatai mo e takitakiaga he Tohi Tapu mo e tau tohi faka-Kerisiano ha tautolu.​—Mata. 28:19, 20; Gahua 5:29; Hepe. 10:24, 25.

11. Ko e ha kua iloa tonu e koe to moua ai e tau mena kai fakaagaaga, ti ko e heigoa haau ka taute ke puipui e tau mena kai fakaagaaga ia?

¹¹ Mavehe e Iehova to makona fakaagaaga e  tau fekafekau haana. (Isaia 65:13, 14; Luka 12:42-44) Maeke a koe ke iloa tonu to taute he fakatokatokaaga haana e tau mena oti ke foaki e fakamafanaaga fakaagaaga kua lata mo koe. Ko e heigoa ka taute e koe? Ka pā e gahua, kumi e matakavi mitaki ke fufū e Tohi Tapu mo e ha tohi foki haau. Kia fakaeneene ke nakai toka e tau koloa aoga pihia​—ne lomi po ke haia he tau matini utafano​—he matakavi ne mukamuka ke kitia. Igatia a tautolu mo e taute e tau lakaaga aoga ke fakatumau e malolō fakaagaaga.

12. Maeke fēfē he tau motua ke fakatoka e tau feleveiaaga ke ua mafiti ke mailoga?

¹² Ka e kua e tau feleveiaaga he tau faahi tapu takitaha? To fakatoka he tau motua e tau feleveiaaga ke fina atu a koe he puhala kua nakai mafiti ke mailoga. Liga hataki e lautolu a koe ke feleveia he matakau tote, mo e to liga hiki tumau e lautolu e tau magaaho mo e tau matakavi ke feleveia. Maeke a koe ke lagomatai ke puipui e tau matakainaga haau he tutala fakaeneene ka o mai po ke toka e tau feleveiaaga. Lata foki a koe ke tauteute he puhala ke ua mafiti ke mailoga.

13. Ko e heigoa ka fakaako e tautolu mai he tau matakainaga ha tautolu he Soviet Union fakamua?

¹³ Hagaao ke he gahua fakamatala, to kehekehe e tau tutūaga he taha matakavi ke he taha matakavi. Ka e fakaalofa a tautolu ki a Iehova ti fiafia ke tala age ke he falu hagaao ke he Kautu haana, ti to kumi e tautolu e puhala ke fakamatala. (Luka 8:1; Gahua 4:29) He tutala hagaao ke he gahua fakamatala he Tau Fakamoli a Iehova he Soviet Union fakamua, ko e tagata fakamau tala ko Emily B. Baran ne pehē: “Ko e mogo ne tala age e fakatufono ke he Tau Fakamoli a Iehova kua nakai maeke a lautolu ke fakamatala e tua ha lautolu ke he falu, ne kamata e Tau Fakamoli ke tutala [mo e] tau katofia, tau tagata gahua, mo e tau kapitiga ha lautolu. He tuku e Tau Fakamoli he tau kemuaga pagotā ha ko e tau gahua nei, eketaha a lautolu ke fakamatala ke he tau tagata i loto he fale puipui.” Pete ni e pā, ne nakai oti e fakamatala he tau matakainaga ha tautolu he Soviet Union fakamua. Ka pā e gahua fakamatala he matakavi ne nofo a koe, kia eketaha a koe ke taute pihia!

14. Ko e heigoa e hatakiaga he Salamo 39:1 ka lagomatai a tautolu?

¹⁴ Kia mataala ke ua talahau e tau vala tala. Ka pā e gahua, lata a tautolu ke mailoga e ‘magaaho ke fakanono ai.’ (Fakama. 3:7) Lata a tautolu ke puipui e tau vala tala ne nakai lata ke talahau fakahanoa, tuga e tau higoa he tau matakainaga ha tautolu, tau matakavi kua feleveia a tautolu, puhala kua taute e tautolu e gahua fakamatala, mo e puhala kua moua e tautolu e tau mena kai fakaagaaga. To nakai fakakite e tautolu e tau vala tala nei ke he tau tui ne mua; po ke tala age e tautolu ke he tau kapitiga po ke tau magafaoa ha tautolu he motu po ke falu motu. Ka talahau e tautolu e tau mena  nei, to fakahagahaga kelea e tautolu e haohao mitaki he tau matakainaga ha tautolu.​—Totou Salamo 39:1.

15. Ko e heigoa ka lali a Satani ke taute ki a tautolu, ti maeke fēfē a tautolu ke kalo kehe he matahele haana?

¹⁵ Ua fakaatā e tau lekua ikiiki ke vevehe a tautolu. Iloa e Satani kua nakai mauokafua e kaina mavehevehe. (Mare. 3:24, 25) To lali tumau a ia ke fakatupu e feveheaki he vahāloto ha tautolu. He puhala ia, amanaki a ia to kamata a tautolu ke felatauaki ka e nakai tau atu ki a ia.

16. Ko e heigoa e fakafifitakiaga mitaki ne fakatoka he Matakainaga Fifine ko Gertrud Poetzinger?

¹⁶ Lata foki e tau Kerisiano motua fakaagaaga ke mataala ke nakai mokulu ke he matahele nei. Manamanatu ke he fakataiaga he tau matakainaga fifine fakauku tokoua ko Gertrud Poetzinger mo Elfriede Löhr. Tuku tokoua a laua mo e falu matakainaga fifine Kerisiano he kemuaga pagotā Nazi. Mahekeheke a Gertrud ke he tau tutalaaga fakamafana ha Elfriede ke he falu matakainaga fifine he kemuaga. Fakamui, ne mā a Gertrud ti olelalo ki a Iehova ma e lagomatai. Tohi e ia: “Kua lata a tautolu ke fakaako ke talia ai ka lahi atu e lotomatala po ke moua he falu e tau kotofaaga loga.” Kautū fēfē a ia he mahani mahekeheke haana? Hagaaki a Gertrud ke he tau mahani mitaki mo e aga kapitiga ha Elfriede. He puhala nei, ne liuaki mai e fakafetuiaga mitaki haana mo Elfriede. Ne hao mai a laua he kemuaga pagotā mo e fekafekau fakamooli ki a Iehova ato fakakatoatoa e matagahua ha laua he lalolagi. Ka gahua fakalahi a tautolu ke kautū mai he tau fekehekeheaki mo e tau matakainaga ha tautolu, to kalo kehe a tautolu he matahele ke feveheveheaki.​—Kolo. 3:13, 14.

17. Ko e ha kua lata a tautolu ke kalo kehe he fakaikaluga?

¹⁷ Kalo kehe he fakaikaluga. Ka omaoma a tautolu ke he takitakiaga ne moua mai he tau matakainaga taane ne leveki mo e fakamooli, to kalo kehe a tautolu he tau lekua. (1 Pete. 5:5) Ma e fakatai, he motu ne pā e gahua, ko e tau matakainaga taane ne leveki kua tala age ke he tau tagata fakailoa ke ua toka e tau tohi he gahua fakamatala. Ka ko e matakainaga taane paionia he matakavi ne nakai muitua e takitakiaga ia ti tufa e tau tohi. Ko e heigoa e fua? He oti e gahua fakamatala he magaaho noa haana mo e falu foki, hūhū toko he tau leoleo a lautolu. Kua mumui e tau leoleo ia lautolu ti maeke ke kitia e tau tohi ne tufa e lautolu. Ko e heigoa kua fakaako e tautolu mai he mena nei ne tupu? Lata a tautolu ke muitua ke he takitakiaga pete kua nakai talia ai e tautolu. Fakamonuina tumau e Iehova a tautolu ka kaufakalataha mo e tau matakainaga taane ne kua kotofa e ia ke takitaki a tautolu.​—Hepe. 13:7, 17.

18. Ko e ha kua lata a tautolu ke kalo kehe he taute e tau matafakatufono nakai fai aoga?

 ¹⁸ Ua taute ha matafakatufono nakai fai aoga. Ka taute he tau motua e tau matafakatufono nakai fai aoga, to fakamamafa e lautolu e falu. Manatu he Matakainaga ko Juraj Kaminský e mena ne tupu he pā e gahua i Czechoslovakia fakamua: “He tapaki e tau matakainaga tūkotofa mo e tau motua tokologa, falu ne takitaki e tau fakapotopotoaga mo e tau takaiaga ne kamata ke fakatū e tau matafakatufono he mahani ma e tau tagata fakailoa he tohi hifo e tau mena ke taute mo e tau mena ke nakai taute.” Nakai foaki mai e Iehova e pule ki a tautolu ke taute e tau fifiliaga fakatagata ma e falu. Ko e tagata kua taute e tau matafakatufono nakai fai aoga kua nakai puipui e haohao mitaki he matakainaga haana, ka kua lali a ia ke pule ke he tua he matakainaga haana.​—2 Kori. 1:24.

19. Pete e tau laliaga ha Satani, ko e heigoa e kakano ma e mauokafua ne foaki he 2 Nofoaga he Tau Patuiki 32:7, 8?

¹⁹ Ko e fī ne mua ha tautolu ko Satani ko e Tiapolo, to nakai oti e lali ke favale ke he tau fekafekau fakamooli ha Iehova. (1 Pete. 5:8; Fakakite. 2:10) Ko Satani mo e tau matakau haana to lali ke pā e tapuakiaga ha tautolu ki a Iehova. Ka e nakai fai kakano ma tautolu ke matakutaku! (Teu. 7:21) Ko Iehova he faahi ha tautolu, mo e to matutaki a ia ke lalago a tautolu pete ka pā e gahua ha tautolu.​—Totou 2 Nofoaga he Tau Patuiki 32:7, 8.

20. Ko e heigoa e fifiliaga haau?

²⁰ Kia moua e tautolu e fifiliaga pihia tuga e tau matakainaga ha tautolu he senetenari fakamua, ne tala age ke he tau takitaki he magahala ia: “Po ke tonu nakai ki mua he Atua, ke fanogonogo a maua kia mutolu ka e nakai fanogonogo a maua ke he Atua, ati fifili a a mutolu. Ha kua nakai maeke ke fakamamate a maua ke he tau mena ne kitia e maua, mo e fanogonogo a maua ki ai.”​—Gahua 4:19, 20.