1. He fakakite ia 3 Ioane 3, 4, ko e heigoa ne taute a tautolu ke fiafia?

MANAMANATU LA ke he fiafia he aposetolo ko Ioane he logona ko lautolu ne lagomatai e ia ke fakaako e kupu mooli ne matutaki ke fekafekau fakamooli ki a Iehova. Fehagai a lautolu mo e loga e tau lekua, ti eketaha a Ioane ke fakamalolō e tua he tau Kerisiano fakamooli nei ne onoono a ia ki ai ko e tau fanau fakaagaaga haana. Pihia foki e fiafia ha tautolu ka tukulele he tau tama fanau po ke tau tama fakaagaaga ha lautolu a tau momoui ki a Iehova mo e fakatumau ke fekafekau ki a ia.​—Totou 3 Ioane 3, 4.

2. Ko e heigoa e kakano he tau tohi ne fakamau hifo e Ioane?

² He 98 V.N., liga nofo a Ioane i Efeso po ke tata atu ki ai. Liga hiki atu a ia ki ai he mole e fakatoka mai he fale puipui he motu ko Patamo. Kavi ke he magaaho ia, omoomoi he agaaga tapu ha Iehova a ia ke fakamau hifo e tau tohi tolu ia. Ko e kakano he tau tohi ia ke fakalagalaga e tau Kerisiano fakamooli ke fakatumau e tua ha lautolu mo e tumau ke ō he kupu mooli.

3. Ko e heigoa e tau hūhū ka tali e tautolu?

³ Ko Ioane e aposetolo fakahiku ne moui, ti tupetupe a ia ke he tau fakaohoohoaga kelea ne fakatupu he tau faiaoga pikopiko ke he tau fakapotopotoaga. * (1 Ioa. 2:18, 19, 26) Talahau he tau tagata tiaki taofiaga ia kua iloa e lautolu e Atua, ka e nakai omaoma a lautolu ke he tau poakiaga ha Iehova. Kia fakatutala a tautolu ke he fakatonuaga omoomoi ne foaki e Ioane. He fakatutala a tautolu, to tali e tautolu tolu e hūhū: Ko e heigoa e kakano ke ō he kupu mooli? Ko e heigoa e tau lekua ne fehagai mo tautolu? Ti lagomatai fēfē e tautolu e taha mo e taha ke fakatumau ke he kupu mooli?

4. Ia 1 Ioane 2:3-6 mo e 2 Ioane 4, 6, ko e heigoa kua putoia he ō he kupu mooli?

⁴ Ke ō he kupu mooli, lata a tautolu ke iloa e kupu mooli i loto he Tohi Tapu. Lafi ki ai, lata ke “omaoma [a tautolu] ke he tau poaki” ha Iehova. (Totou 1 Ioane 2:3-6; 2 Ioane 4, 6.) Fakatoka e Iesu e fakafifitakiaga mitaki katoatoa he omaoma ki a Iehova. Ti ko e taha puhala aoga ke omaoma ki a Iehova ko e mumui atu fakatata ke he tau tuagahui ha Iesu.​—Ioane 8:29; 1 Pete. 2:21.

5. Ko e heigoa kua lata a tautolu ke mauokafua ki ai?

⁵ Ke ō he kupu mooli, lata a tautolu ke mauokafua ko Iehova ko e Atua he kupu mooli ti ko e tau mena oti ne talahau e ia ki a tautolu mai he Kupu haana ko e Tohi Tapu kua mooli. Ti lata foki a tautolu ke mauokafua ko Iesu ko e Mesia ne mavehe mai. Tokologa mogonei kua fakauaua na fakauku a Iesu ko e Patuiki he Kautu he Atua. Hataki e Ioane ne “tokologa a lautolu kua fakahehe,” mo e takitaki kehe e tau tagata ne nakai talitonu katoatoa ke he kupu mooli ki a Iehova mo Iesu. (2 Ioa. 7-11) Tohi e Ioane: “Ko hai kia e tagata pikopiko, ka nakai ko ia ni kua fakatikai, pehe, Ko Iesu nakai ko e Keriso a ia?” (1 Ioa. 2:22) Ko e puhala ni ke kalo kehe mai a tautolu he fakahehē ko e fakaako e Kupu he Atua. Ka taute pihia to iloa e tautolu a Iehova mo Iesu. (Ioane 17:3) Ko e magaaho laia ka mauokafua kua moua e tautolu e kupu mooli.

6. Ko e heigoa e taha lekua ne fehagai mo e tau fuata Kerisiano?

⁶ Lata e tau Kerisiano oti ke puipui mai neke fakahehē he pulotu he tagata. (1 Ioa. 2:26) Mua atu ke he tau fuata Kerisiano e lata ke mataala ke he matahele nei. Ko Alexia, * ko e matakainaga fifine mai Falani ne 25 e tau ne pehē: “He fuata mui au, ne fakagogoa au ke he tau fakaakoaga he lalolagi ke tuga e tupumainoa mo e pulotu he tagata. Falu magaaho, tuga kua mitaki e tau fakaakoaga ia ki a au. Logona hifo e au kua nakai maeke au ke fanogonogo hokoia ke he tau mena ne fakaako he aoga ka e lata foki ke iloa e talahauaga ha Iehova.” Fakaako e Alexia e tohi Life​—How Did It Get Here? By Evolution or by Creation? Fai faahi tapu he  mole, ne galo noa e tau fakauaua haana. Pehē a Alexia: “Ne maeke au ke talia katoatoa kua ha ha he Tohi Tapu e kupu mooli. Ti mailoga e au ko e moui fakatatau ke he tau tuaga ia ka foaki ki a au e fiafia mo e mafola.”

7. Ko e heigoa e peehi kua lata a tautolu ke totoko, ti ko e ha?

⁷ Lata e tau Kerisiano oti ne fuata mo e motua ke totoko e peehiaga ke ua e puhala moui. Fakakite e Ioane kua nakai maeke a tautolu ke ō he puhala he kupu mooli ka e he magaaho taha kua moui mahani feuaki. (1 Ioa. 1:6) Ke talia he Atua a tautolu mogonei mo e he vahā i mua, lata a tautolu ke manatu tumau na kitia e Iehova e tau mena oti ne taute e tautolu. Kakano ai, kua nakai fai agahala fufū ha kua tokanoa ki a Iehova e tau mena oti ne taute e tautolu.​—Hepe. 4:13.

8. Ko e heigoa kua lata a tautolu ke tiaki?

⁸ Kua lata a tautolu ke tiaki e onoonoaga he lalolagi ke he agahala. Tohi he aposetolo ko Ioane: “Kaeke ke pehe a tautolu, Nakai fai hala a tautolu, kua hehe tuai a tautolu kia tautolu.” (1 Ioa. 1:8) He vahā ha Ioane, talahau he tau tagata tiaki taofiaga na maeke e tagata ke muitua pauaki ke he puhala agahala ka e fai fakafetuiaga agaia mo e Atua. He mogonei kua nonofo a tautolu mo e tau tagata ne pihia e onoonoaga. Tokologa ne talahau kua talitonu a lautolu ke he Atua ka e nakai talia e lautolu e onoonoaga ha Iehova ke he agahala, mua atu ka putoia e matakupu he mahani fakataane mo e fifine. Ko e tau mena kua agahala ki a Iehova ne fakahigoa ai e lautolu ko e manako fakatagata, po ke taha puhala moui foki.

9. Aoga fēfē e tau fuata he pipiki mau ke he tau taofiaga ha lautolu ne fakavē ke he Tohi Tapu?

⁹ Mua atu ke he tau fuata Kerisiano ne liga logona hifo e peehiaga ke talia e onoonoaga he tau kapitiga aoga po ke tau kapitiga gahua ha lautolu hagaao ke he mahani feuaki. Ko e mena ia ne tupu ki a Aleksandar. Pehē a ia: “Falu  tama fifine he aoga ne fakaohooho au ke momohe mo lautolu. Pehē a lautolu ha kua ai fai kapitiga fifine au, liga fai kapitiga taane au.” Ka fehagai a koe mo e tau kamatamata pihia, kia manatu ka pipiki mau a koe ke he tau taofiaga haau ne fakavē ke he Tohi Tapu to puipui haau a lilifu fakatagata, malolō tino, mitaki e logonaaga, mo e fakafetuiaga mo Iehova. Ti ko e tau magaaho takitaha ka totoko e koe e kamatamata, to mukamuka fakahaga ke taute e mena hako. Manatu foki, ko e onoonoaga fakakeukeu he lalolagi hagaao ke he mahani fakataane mo e fifine kua mai ia Satani. Ti ka nakai talia a koe ke muitua ki ai, “kua kautu foki [a koe] kia ia ne mahani kelea.”​—1 Ioa. 2:14.

10. Lagomatai fēfē he 1 Ioane 1:9 a tautolu ke fekafekau ki a Iehova mo e loto manamanatu meā?

¹⁰ Talia e tautolu kua tonuhia a Iehova ke talahau ko e heigoa e mahani agahala. Ti eketaha a tautolu ke nakai taute e agahala. Ka e magaaho ka agahala a tautolu, fakakite e tautolu e hehē ki a Iehova he liogi. (Totou 1 Ioane 1:9.) Ka taute e tautolu e agahala kelea lahi, kumi e tautolu e lagomatai he tau motua ne kotofa e Iehova ke leveki a tautolu. (Iako. 5:14-16) Ti nakai lata a tautolu ke lahi mahaki e tau logonaaga agahala ke he tau hepehepe kua mole. Ko e ha? Ha kua foaki he Matua fakaalofa ha tautolu e poa lukutoto he haana Tama ke fakamagalo e tau agahala ha tautolu. Talahau e Iehova to fakamagalo e ia e tau tagata ne fakatokihala, to fakamooli a ia ki ai. Ti kua nakai fai mena ke taofi a tautolu mai he fekafekau ki a Iehova mo e loto manamanatu meā.​—1 Ioa. 2:1, 2, 12; 3:19, 20.

11. Puipui fēfē e tau loto ha tautolu mai he tau fakaakoaga ka fakahagahaga kelea e tua ha tautolu?

¹¹ Kua lata a tautolu ke fakaheu e tau fakaakoaga tiaki taofiaga. Tali mai he kamataaga he fakapotopotoaga Kerisiano, tokologa e tau tagata fakahehē kua fakaaoga he Tiapolo ke fakauaua e tau loto he tau fekafekau fakamooli he  Atua. Ti lata a tautolu ke iloa e puhala ke kitia e kehekehe he tau mena mooli mo e tau pikopiko. * Liga fakaaoga he tau fī ha tautolu e Initanete po ke social media he lali ke fakalolelole e tua ha tautolu ki a Iehova mo e fakaalofa ke he tau matakainaga ha tautolu. Manatu ko hai i tua he tau talahauaga ia, ti tiaki ai!​—1 Ioa. 4:1, 6; Fakakite. 12:9.

12. Ko e ha kua lata a tautolu ke fakahokulo e loto fakaaue ke he tau kupu mooli kua fakaako e tautolu?

¹² Ke totoko e tau laliaga ha Satani ke fakalolelole e tua ha tautolu, lata a tautolu ke fakahokulo e falanaki ki a Iesu mo e puhala ne fakaaoga e Iehova a ia ke taute e finagalo Haana. Lata foki a tautolu ke falanaki ke he halavaka ni kua fakaaoga e Iehova mogonei. (Mata. 24:45-47) Fakahokulo e falanaki ha tautolu he fakaako tumau e Kupu he Atua. Ti tatai e tua ha tautolu mo e akau ne hokulo hifo e tau vaka ke he kelekele. Talahau pihia foki e Paulo he tohi ke he fakapotopotoaga i Kolose. Pehē a ia: “Tuga ne talia e mutolu a Keriso Iesu, ko e Iki, kia o fano ai a mutolu ia ia; Kua fai vaka a mutolu ia ia, mo e ati hake kia ia, ti fakatumau ke he tua.” (Kolo. 2:6, 7) Nakai fai mena a Satani po ko lautolu ne fakaohooho e ia ke taofi e Kerisiano ne kua fakamalolō e tua ni haana.​—2 Ioa. 8, 9.

13. Ko e heigoa kua amanaki a tautolu ki ai, ti ko e ha?

¹³ Amanaki a tautolu ke vihiatia he lalolagi. (1 Ioa. 3:13) Fakamanatu e Ioane ki a tautolu “ko e lalolagi oti ha he pule hana kua mahani kelea.” (1 Ioa. 5:19) He tata e fakatokaaga nei ke he fakaotiaga, kua ita lahi mahaki a Satani. (Fakakite. 12:12) Nakai fakaaoga hokoia e ia e tau totokoaga fakagalogalo tuga e feuaki po ke tau pikopiko he tau tagata tiaki taofiaga. Ka e fakaaoga foki e ia e favaleaga mamahi. Iloa e Satani kua tote lahi haana vahā ne toe he lali ke taofi e gahua fakamatala po ke moumou e tua ha tautolu. Ti nakai ofo ai ha kua fakakaupā po ke pā malu e gahua ha tautolu he falu motu. Pete ia, kua fakauka e tau matakainaga ha tautolu he tau motu ia. Fakakite e lautolu ko e ha mena ka taute he Tiapolo ki a tautolu to kautū ni a tautolu!

14. Ko e heigoa e taha puhala ke lagomatai e tau matakainaga ha tautolu ke fakatumau ke he kupu mooli?

¹⁴ Ke lagomatai e tau matakainaga ha tautolu ke fakatumau ke he kupu mooli, lata a tautolu ke fakakite e fakaalofa hofihofi noa. (1 Ioa. 3:10, 11, 16-18) Lata a tautolu ke fakaalofa ke he taha mo e taha, nakai ni he tau magaaho ka holo mitaki ka e pihia foki ka tutupu e tau lekua. Ma e fakatai, fai tagata nakai a koe ne iloa kua mate e fakahele ti lata ke fakamafana po ke lagomatai? Po kua logona e koe kua lauia e tau matakainaga he matematekelea tupu pauaki ti lata ke lagomatai ke liu tā e tau Fale he Kautu po ke tau kaina ha lautolu? Fakakite e tautolu e hokulo he fakaalofa mo e hofihofi noa ke he tau matakainaga ha tautolu he tau mena ne talahau ka e mua atu ke he tau mena ne taute e tautolu.

15. He fakamau ia 1 Ioane 4:7, 8, ko e heigoa kua lata a tautolu ke taute?

¹⁵ Fifitaki e tautolu e Matua fakaalofa ha tautolu he lagi he fakakite e fakaalofa ke he taha mo e taha. (Totou 1 Ioane 4:7, 8.) Ko e puhala aoga ke fakakite e tautolu e fakaalofa ke fakamagalo e taha mo e taha. Ma e fakatai, liga fakamamahi he taha a tautolu ka e fakamolemole mogoia. Fakakite e tautolu e fakaalofa he fakamagalo a ia mo e fakanimonimo e hehē haana. (Kolo. 3:13) Ko e matakainaga taane ko Aldo ne fehagai mo e kamatamata nei he logona e taha matakainaga taane ne fakalilifu e ia kua talahau e mena mamahi hagaao  ke he aga fakamotu haana. Pehē a Aldo, “Liogi tumau au ki a Iehova ke lagomatai au ke ua moua e tau logonaaga kelea ke he matakainaga nei.” Ka e fai mena foki a Aldo ne taute. Fifili a ia ke tala age ke he matakainaga ke ō mo ia he fonua. He gahua a laua, fakamaama e Aldo kua mamahi lahi a ia ke he mena ne talahau he matakainaga. “Mogo ne iloa he matakainaga e logonaaga haaku hagaao ke he talahauaga mamahi haana,” he ui e Aldo, “ne fakamolemole a ia. Mai he puhala he leo haana kua maeke au ke kitia kua tokihala lahi a ia ke he mena ne talahau e ia. Ti mavehe a maua ko e tau kapitiga mo e tuku e lekua ki tua ha maua.”

16-17. Ko e heigoa e fifiliaga ha tautolu?

¹⁶ Ko e aposetolo ko Ioane ne lahi e manamanatu fakaalofa ke he tuaga fakaagaaga he tau matakainaga haana, ti kitia maaliali e logonaaga ia he fakatonuaga ne fakamau e ia he tolu e tohi omoomoi haana. Mafanatia ha ia ke iloa ko e tau tagata taane mo e tau fifine ne tuga a ia, kua fakauku ke pule fakalataha mo Keriso!​—1 Ioa. 2:27.

¹⁷ Kia tokaloto e fakatonuaga kua fakatutala a tautolu ki ai. Ti fifili ke ō he kupu mooli he omaoma ki a Iehova he tau faahi oti he moui ha tautolu. Fakaako e Kupu haana ti falanaki ki ai. Atihake e tua malolō ki a Iesu. Fakaheu e tau pulotu he tagata mo e tau fakaakoaga tiaki taofiaga. Totoko e peehiaga ke ua e puhala moui mo e nakai agahala. Moui fakatatau ke he tau tuaga tokoluga ha Iehova he mahani mitaki. Lagomatai e tau matakainaga ha tautolu ke fakatumau e malolō he fakamagalo a lautolu ne fakamamahi a tautolu mo e lagomatai a lautolu kua lata. Ti pete ne tau taufetului ne fehagai mo tautolu, to tumau a tautolu ke ō he kupu mooli.