Ne fanau au i St. Paul, Minnesota i Amerika he 1954 ke he magafaoa tokotoko mitaki he lotu Katolika Roma. Ko e tama ke uaaki au he tokolima e tama. He vahā tote, ne fano au he aoga Katolika mo e lagomatai e au e pātele he fale tapu. Ka e nakai lahi e mena haaku ne iloa ke he Tohi Tapu. Pete kua talitonu au na fai Atua ne tufugatia e tau mena oti kana, ne galo katoatoa e falanaki haaku ke he lotu ia.

He tau fakamua haaku he William Mitchell College of Law, ahiahi mai e Tau Fakamoli a Iehova ke he kaina haaku. Lavelave au he unu ti talia fiafia e hoa ke liliu mai. He liliu mai a laua, kua mautali au mo e ua e hūhū: “Ko e ha e tau tagata mitaki ne nakai kautū he lalolagi?” mo e “Maeke fēfē e tau tagata ke fiafia mooli?” Talia e au e tohi The Truth That Leads to Eternal Life mo e New World Translation of the Holy Scriptures, ne fuluola he lanu laukou e kili. Talia foki e au ke fakaako e Tohi Tapu. Hafagi mooli he mena nei e tau mata haaku. Fiafia lahi au ke iloa ko e Kautu he Atua e fakatufono ka pule ke he lalolagi. Mailoga e au  ko e pule he tagata kua kaumahala katoatoa ti kua puke e lalolagi he mamahi, matematekelea, mo e nakai fakafili tonu.

Tukulele e au e moui haaku ki a Iehova he mataulu he tau 1982 ti papatiso he tau taha ia ni he Fonoaga “Kingdom Truth” ne fakahoko he St. Paul Civic Center. Liu atu au ke he matakavi ia he faahi tapu hake ke taute e kamatamata ke he fakaakoaga loea ha Minnesota. He mataulu ia Oketopa ne iloa e au kua kautū e kamatamata haaku, kakano kua maeke au ke gahua loea.

He Fonoaga “Kingdom Truth” ia, ne feleveia au mo Mike Richardson, ko e matakainaga he Peteli i Brooklyn ne fakamaama kua fakatū e ofisa loea he matapatu ofisa. Manatu e au e tau kupu he eunuka Aitiope ne fakamau ia Gahua 8:36 ti hūhū ki a au ni, ‘Ke lekua he ha ke ole au ke gahua he Ofisa Loea?’ Ti tuku e tohi ole haaku ke gahua he Peteli.

Nakai fiafia e tau matua haaku ha kua eke au mo taha he Tau Fakamoli a Iehova. Hūhū e matua taane haaku ko e heigoa he Watchtower ka taute ke he feua loea haaku. Fakamaama age e au to taute au he gahua foaki noa. Tala age e au to moua e au $75 he mahina, ko e tupe ne moua he tau matakainaga he Peteli he tau mahina takitaha.

Ko e fakakatoatoa laia e gahua tupe haaku he hopoaga, ti kamata e fekafekauaga haaku he Peteli i Brooklyn, New York he 1984. Kotofa au ke he Ofisa Loea. Ki a au, kua hako tonu e magaaho ia.

Ko e Stanley Theater i Jersey City, New Jersey, ne fakatau ia Novema 1983. Ne ole e tau matakainaga ke moua e tau pemita ke fakafoou e tau fakatokaaga hila mo e palama he fale ia. He fono a lautolu mo e tau takitaki he matakavi, ne fakamaama he tau matakainaga kua amanaki a lautolu ke fakaaoga e Stanley Theater mo fale fono he Tau Fakamoli a Iehova. Kua fai lekua e mena ia. Ko e fakatufono he taone ia kua fakakaupā e tau fale he tapuakiaga ke he matakavi ne nonofo ai e tau tagata. Toka e Stanley Theater he lotouho he taone ne loga e tau pisinisi, ti nakai talia e tau takitaki he taone ke age e tau pemita. Ole e tau matakainaga ke liu kitekite ke he fifiliaga nei, ka kua nakai talia.

He faahi tapu fakamua haaku he Peteli, uta he fakatokatokaaga e mena nei ke he hopoaga ke iloa e kakano ne nakai talia e tau pemita. Ne ua e tau haaku ne gahua he hopoaga i St. Paul, Minnesota, ti mahani lahi au  mo e tau mena ia. Taha he tau loea ha tautolu ne talahau kua fakaaoga e Stanley Theater ma e tau toloaga kehekehe, mai he tau kifaga ke he tau konesete. Ko e ha mogoia kua nakai fakaatā e tau mena fakalotu? Fakatutala e hopoaga he faahimotu ke he matakupu ia ti fifili kua moumou he Jersey City e atāina fakalotu ha tautolu. Poaki he hopoaga e Jersey City ke foaki e tau pemita kua lata, ti kamata au ke kitia e puhala kua fakamonuina e Iehova e fakatokatokaaga haana he fakaaoga e tau hopoaga ke fakaholo ki mua e gahua haana. Fiafia lahi au he fai vala ki ai.

Ne lahi e matagahua fakafoou ne taute he tau matakainaga, ti fakahoko e kautūaga he vahega ke 79 aki ha Kiliata he Fale Toloaga ha Jersey City ia Sepetema 8, 1985, he nakaila katoa e tau he kamata e fakafoou. Logona hifo e au e lilifu he maeke ke fakaholo ki mua e tau mena he Kautu ko e vala he matakau loea, ti mua atu e fiafia haaku mogonei ka fakatatai ke he gahua loea fakamua haaku to hau au ke he Peteli. Nakai iloa e au kua loga atu foki e kotofaaga kua amaamanaki a Iehova ke taute e au.

He tau atu tau 1980, fa mahani e tau ekekafo mo e tau fale gagao ke nakai fakalilifu e ole he Fakamoli ke moua e tuluiaga ka e nakai fagai toto. Mua atu e uka ke he tau fifine fatu ha kua fa logona hifo he tau ikifakafili kua nakai tonuhia e tau fifine ke nakai talia e fagai toto. Pehē e tau ikifakafili ka nakai fagai toto e matua fifine, to liga mate a ia ti nakai fai matua e tama mukemuke haana.

Ia Tesemo 29, 1988, ko e Matakainaga Fifine ko Denise Nicoleau ne lahi mahaki e toto ne tafe he mole e fanau he tama taane haana. Ne tō hifo haana hemoglobin ke nakai molea e 5.0, ti ole e ekekafo haana ke talia e ia e fagai toto. Nakai talia he Matakainaga ko Nicoleau. He pogipogi hake, ne kumi atu e fale gagao ke he ikifakafili ke fakaatā e tau tagata gahua he fale gagao ke fagai toto e matakainaga ha kua manatu a lautolu kua lata ke taute pihia. Ne nakai fai fakatutalaaga e ikifakafili po ke fakailoa ke he Matakainaga ko Nicoleau po ke taane haana, ka e fakaatā e ia e fale gagao ke fakahoko e fagai toto.

He Aho Faraile ia Tesemo 30, ne fagai toto he tau tagata gahua he fale gagao e Matakainaga ko Nicoleau pete e nakai talia he taane mo e falu tagata he magafaoa haana ne ha ha mo ia. He afiafi ia, fai he magafaoa mo e taha po ke ua e motua ne tapaki he tukupau kua poloka e lautolu e mohega he Matakainaga ko Nicoleau ke ua fakahoko e fagai toto. He pogipogi Faiumu ia Tesemo 31, fakapuloa he tau  nusipepa, TV, mo e tau leo taogo i New York City mo Long Island e mena ia ne tupu.

He pogipogi Gofua, tutala au ke he ikifakafili lahi ko Milton Mollen. Tala age e au e mena ne tupu, ti fakamaama fakamaaliali kua saini he ikifakafili e fagai toto ka e nakai fai fakatutalaaga. Pehē e Ikifakafili ko Mollen ki a au ke hau ke he ofisa haana he afiafi ia ke fakatutala ke he tau matafakatufono kua latatonu. Ko Philip Brumley ko e leveki haaku he faahi gahua ne ō mo au ke he ofisa he Ikifakafili ko Mollen he afiafi ia. Uiina he ikifakafili e loea he fale gagao ke hau foki. Malolō lahi e fakatutalaaga ha mautolu. He taha magaaho, ne tohi hifo he Matakainaga ko Brumley he pepa tohitohi haana he tala mai ki a au kua lata au ke “tukutuku hifo e leo.” Ko e fakatonuaga mitaki a ia ha kua ita lahi au he lali ke fakakite kua hepe e loea.

Kavi ke he taha e tulā he mole, pehē e Ikifakafili ko Mollen ko e hopoaga fakamua a ia ka taute a pogi. He toka e mautolu e ofisa he Ikifakafili ko Mollen, pehē a ia ko e gahua he loea he fale gagao to “mamafa lahi a pogi.” Kakano to uka lahi ke he loea ke fakamaama e tonuhia ha lautolu ke fakahoko e fagai toto. Logona hifo e au kua fakamafana e Iehova au to kautū a mautolu. Fakatokolalo e manamanatuaga haaku ha kua fakaaoga e Iehova a mautolu ke taute e finagalo Haana.

Gahua mule a maua ti hoko ke he pō he tauteute e tau mena ke talahau he pogipogi hake. Tata lahi e fale hopo ke he Peteli i Brooklyn, ti laulahi ia lautolu he Ofisa Loea ha mautolu ne o atu hui ki ai. He mole e logona he tau ikifakafili tokofā e tau talahauaga ha mautolu, ne fifili a lautolu kua nakai lata ke fakahoko e fagai toto. Kua talia he hopoaga tokoluga e manako he Matakainaga ko Nicoleau ti talahau ko e moumou he matafakatufono e tonuhia he tagata kaeke ke taute pulenoa e taha mena ka e nakai fai talahauaga e tagata gagao.

Ne talia he hopoaga tokoluga ha New York e tonuhia he Matakainaga ko Nicoleau ke moua e tuluiaga ka e nakai fagai toto. Ko e tau fifiliaga fakamua anei ne fā hagaao ke he toto ne taute he tau hopoaga tokoluga ne moua e au e lilifu ke fai vala i ai. (Kikite puha “ Kautūaga he Hopoaga Tokoluga Lahi  he Motu.”) Fai vala foki au mo e falu loea he Peteli ke he tau hopoaga ne putoia e levekiaga he tama, tau vevehe, tau fonua mo e tau fale, mo e tau katofia.

He feleveia fakamua e au e hoana haaku ko Dawn, ne kua tau vevehe a ia mo e taane haana ti feaki tokotaha e fanau tokotolu. Gahua tupe a ia mo e paionia. Uka e moui haana, ti nava lahi mahaki au ke he fifiliaga haana ke fekafekau ki a Iehova. He 1992, ne ō a maua he Fonoaga Faahimotu “Light Bearers” i New York City ti ole au ki a ia ke kapitiga. Ne mau a maua he tau hake. He moua e hoana manamanatu fakaagaaga mo e aga fiafia ko e mena fakaalofa mai ia Iehova. Fakamonuina mooli e Dawn au aki e tau aho oti kua mitaki he ha maua a nonofo tokoua.​—Fakatai 31:12.

He mau a maua, ko e tau fanau ne 11, 13, mo e 16 e tau tau he moui. Manako au ke eke mo matua taane mitaki ki a lautolu, ti totou fakamitaki mo e fakagahua e au e tau mena oti kua maeke ke moua he tau tohi ha tautolu hagaao ke he matua ke uaaki. Ha ha i ai e tau paleko he tau tau kua mole, ka e fiafia au ha kua talia he fanau au ke eke mo kapitiga uho mo e matua taane ofania ha lautolu. Hafagi tumau e kaina ha maua ke he tau kapitiga he tau fanau ti fiafia lahi ha kua puke e fale he tau fuata mui ne alaga moui.

He 2013, ne hiki atu a Dawn mo au ki Wisconsin ke lagomatai ke leveki e tau mamatua fuakau ha maua. Ofo au ha kua nakai oti e gahua haaku he Peteli. Uiina au ke matutaki e lagomatai matafakatufono ke he fakatokatokaaga ha tautolu he fekafekau foaki noa fakakū.

Ia Sepetema 2018, mailoga e au kua venevene tumau e kakia haaku. Fuafua he ekekafo au ka e nakai iloa e lekua. Fakamui, talahau he taha ekekafo ke fano au ke kitia e ekekafo ne kumikumi ke he tau hokohoko (neurology). Ia Ianuari 2019, tala mai he taha ekekafo ki a au kua liga moua au he gagao progressive supranuclear palsy kua nakai fa mahani ti nakai leva to lauia kelea e tino katoa haaku.

Tolu e aho he mole, ne mapaki e tepulima matau haaku he heke aisa. Na heke aisa au he moui katoa haaku; ti iloa lahi e au. Mailoga mogoia e au kua nakai maeke au ke tautaofi e tau alaga haaku. Ofo lahi ha kua mafiti e tupu he gagao haaku ti lauia haaku a puhala vagahau, gahuahuaaga he tino, mo e folo.

Fiafia lahi au ha kua maeke au ke lagomatai e fakatokatokaaga ha Iehova he gahua haaku ko e loea. Fiafia foki au ke tohi loga e tau vala tala he tau mekasini ma e tau ekekafo, tau loea, mo e tau ikifakafili, ti pihia mo e tutala ke he tau fonoaga he lalolagi katoa ke lalago e tonuhia he tau tagata ha Iehova ke fifili e tau tuluiaga fakaekekafo, ka e nakai fakaaoga e fagai toto. Ke talahau fakakū e Luka 17:10: ‘Ko e fekafekau nakai aoga au. Ko e tau mena kua lata ke eke e au kua eke e au.’