Fakakite he fakamooliaga ne eke a Iesu mo Ekepoa ne Mua he papatiso a ia he 29 V.N. Iloa fēfē e tautolu e mena nei? He papatiso a Iesu, fakakite e ia kua makai a ia ke poa e moui haana he fatapoa fakatai ne hukui e “finagalo” he Atua. (Kala. 1:4; Hepe. 10:5-10) Tali mai he fakatū e fatapoa fakatai he papatisoaga ha Iesu, ko e faituga fakaagaaga lahi ne fakakite e fakatokaaga he tapuakiaga meā ha Iehova ne fakavē ke he lukutoto, kua liga fakatū foki he magaaho ia. Ko e fatapoa e matapatu he faituga fakaagaaga ia.​—Mata. 3:16, 17; Hepe. 5:4-6.

He fakatū e faituga fakaagaaga lahi ia, lata ke fai ekepoa ne mua ke leveki ai. Ati fakauku e Iehova a Iesu aki e “Agaga Tapu mo e mana [malolō].” (Gahua 10:37, 38; Mare. 1:9-11) Ka e iloa mooli fēfē e tautolu na kotofa a Iesu ko e Ekepoa ne Mua ato mate mo e liu tū mai a ia? Moua e tautolu e kakano mauokafua ka manamanatu a tautolu ke he fakafifitakiaga ha Arona mo e tau ekepoa ne mua ne mumui mai ia ia i lalo hifo he Fakatufono faka-Mose.

Ko e Fakatufono ne age e Iehova ki a Mose, ko e ekepoa ne mua hokoia ka hū atu ke he Tapu Ue Atu. Vevehe he ie puipui e Tapu Ue Atu mai he mena Tapu. Hū atu ni e ekepoa ne mua ke he faahi atu he ie puipui he Aho he Fakafeiloaga. (Hepe. 9:1-3, 6, 7) Tuga ni he fakauku a Arona mo lautolu ne mumui mai ia ia mo tau ekepoa ne mua ato huhū atu he “ie puipui [mooli]” he faituga, liga fakauku a Iesu ko e Ekepoa ne Mua he faituga fakaagaaga lahi ha Iehova ato mate a ia mo e magaaho fakamui he hū atu a ia “ke he fahi atu he ie puipui, ko e hana tino haia” ke he moui he lagi. (Hepe. 10:20) Kakano nei ne hagaao e aposetolo ko Paulo ki a Iesu kua hau “ko e ekepoa ne mua” mo e hū atu “ke he fale uta fano kua mua he mitaki, mo e katoatoa, kua nakai eke he tau lima” mo e hoko atu ke he “lagi ni.”​—Hepe. 9:11, 24.

Nakai fai kehekehe e magaaho ne fakamooli mo e magaaho ne fakatū e maveheaga foou. Ko e ha? Magaaho ne hake a Iesu ke he lagi mo e foaki e moui mitaki katoatoa haana ke lata mo tautolu, ne fakatū e ia e puhala ke fakamooli e maveheaga foou. Ko e fakatokaaga taha ia foki ne fakatū, po ke fakagahua e maveheaga. Ko e heigoa e tau lakaaga ia?

Fakamua, tū atu a Iesu ki mua ha Iehova; ti foaki e Iesu e uho he poa haana ki a Iehova; mo e fakahikuaki, talia e Iehova e uho he toto ha Iesu ne fakamaligi. To nakai gahuahua e maveheaga foou ato taute e tau lakaaga nei.

Nakai talahau fakatonu he Tohi Tapu ki a tautolu e magaaho ne talia e Iehova e uho he poa ha Iesu. Ti ko e mena ia, kua nakai maeke a tautolu ke talahau e magaaho tonu ne fakamooli mo e gahuahua foki e maveheaga foou. Ka e iloa e tautolu na hake a Iesu ke he lagi he hogofulu e aho ato hoko e Penetekoso. (Gahua 1:3) He taha magaaho he mogo kū nei, ne foaki e ia e uho he poa haana ki a Iehova, ti talia e Iehova. (Hepe. 9:12) Kitia mooli e mena nei ne tupu he Penetekoso. (Gahua 2:1-4, 32, 33) Maaliali ai kua fakatū mo e gahuahua e maveheaga foou.

Ke fakakū ai, kua fakamooli mo e fakatū e maveheaga foou he mole e talia e Iehova e uho he toto ha Iesu ne fakamaligi. Ti ko e gahuahua laia e maveheaga ia he eke a Iesu mo Ekepoa ne Mua he fekafekau ko e Hulalo.​—Hepe. 7:25; 8:1-3, 6; 9:13-15.