Ko Haykanush, ko e tagata fakailoa nakaila papatiso i Armenia ne moua e pasipoti ne tata ke he kaina haana. I loto he pasipoti ko e falu debit card mo e tupe lahi. Tala age e ia ke he taane haana, ko e tagata fakailoa nakaila papatiso foki, e mena ne moua e ia.

Lekua lahi mahaki e hoa ke he tuaga fakatupe ha ko e tau kaitalofa. Ka e fifili a laua ke uta e tupe ke he kaina ne tū ai he pasipoti. Ofo e tagata taane ne galo e pasipoti ti pihia mo e magafaoa haana. Fakamaama e Haykanush mo e taane haana kua mahani fakamooli a laua ha ko e tau mena ne fakaako e laua he Tohi Tapu. Fakaaoga mogoia e laua e magaaho ke tutala hagaao ke he Tau Fakamoli a Iehova mo e foaki falu tohi ke he magafaoa.

Ne manako e magafaoa ke age taha tupe ki a Haykanush ko e palepale, ka e nakai talia e ia. He aho hake, ne aahi atu e hoana ki a Haykanush mo e taane haana he kaina ke fakakite e loto fakaaue haana, ti eketaha a ia ke talia e Haykanush e mama maka kikila tea.

Ke tuga e magafaoa ia, tokologa e tagata ka ofo ke he mahani fakamooli ne fakakite e Haykanush mo e taane haana. Ka e ofo nakai a Iehova? Onoono fēfē a Ia ke he mahani fakamooli ha laua? Aoga lahi nakai e mahani fakamooli ha laua?

Ko e tau tali ke he tau hūhū ia kua nakai uka? Ko e ha? Ha kua iloa he tau fekafekau he Atua ko e fifitaki ke he tau mahani ha Iehova kua mua atu e uho ki a Ia ke he tau maka kikila tea, auro, po ke falu koloa fakatino. Ē, ko e tau mena ne uho ki a Iehova kua kehe he tau mena ne uho ke he laulahi he tau tagata. (Isaia 55:8, 9) Ti logona hifo he tau fekafekau haana ko e tau laliaga ha lautolu ke fifitaki e tau mahani ha Iehova kua uho lahi.

Maeke a tautolu ke kitia e mena nei mai he mena ne talahau he Tohi Tapu hagaao ke he pulotu mo e iloilo. Pehē e Tau Fakatai 3:13-15: “Uhoaki e tagata kua moua e iloilo, mo e tagata foki kua moua e pulotu; Ha kua mua he mitaki e mena ne fakafua aki a ia ke he mena ne fakafua aki e ario; mo e tau mena ke moua ai kua mua ia ke he auro. Kua mua hana mitaki ke he mitaki he tau penina; mo e hāu a tau mena fulufuluola oti kua nakai ni tatai mo ia.” Maaliali ai, mua atu e uho ki a Iehova e tau mahani pihia ke he ha koloa uho fakatino.

Ka e kua mogoia e mahani fakamooli?

Mahani fakamooli a Iehova. Ko ia kua “nakai maeke ke pikopiko.” (Tito 1:2) Ti omoomoi e ia e aposetolo ko Paulo ke tohi ke he tau Kerisiano i Heperu he senetenari fakamua: “Kia liogi a mutolu ma mautolu; ha kua taofi e mautolu ha ha ia mautolu e loto manamanatu hifo mitaki, kua loto a mautolu ke mahani mitaki [fakamooli] ke he tau mena oti kana.”​—Heperu 13:18.

Ne fakatoka e Iesu Keriso e fakafifitakiaga mitaki he mahani fakamooli. Tuga anei, ko e Ekepoa ne Mua ko Kaiafa ne pehē, “Kua tala atu fakamakamaka e au kia koe ke he higoa he Atua moui, kia tala mai e koe kia mautolu, po ke Keriso a koe, ko e Tama he Atua,” ne fakamooli a Iesu mo e fakakite a ia ko e Mesia. Talahau e ia e mena mooli pete ne iloa e ia to tukupau e lautolu he Saneheturini a ia he vagahau kelea mo e to takitaki atu e mena nei ke he kelipopoaga haana.​—Mataio 26:63-67.

Ka e kua a tautolu? Kaeke ko tautolu he tuaga ne liga lagomatai ki a tautolu ke he puhala fakatino he nakai tala age ke he taha tagata e tau tala oti po ke hikihiki e tala, to mahani fakamooli agaia nakai a tautolu?

Maeke ke uka ke mahani fakamooli he tau aho fakamui nei ka tokologa a lautolu ne ‘ofaofa ni a lautolu, to velevele koloa.’ (2 Timoteo 3:2) Ka ha ha ai e lekua fakatupe po ke ka uka ke moua e tau gahua, tokologa ne iloilo he mulefu, kaihā, po ke taute falu mena nakai fakamooli. Ko e puhala manamanatu pehenei kua mahani mau ha kua tokologa ne logona hifo ko e puhala ni a ia ke monuina fakatino ka nakai mahani fakamooli. Taute foki he falu Kerisiano e tau fifiliaga kelea mo e “lagatau kelea” ti galo noa e matahigoa mitaki ha lautolu he fakapotopotoaga.​—1 Timoteo 3:8; Tito 1:7.

Ka e laulahi he tau Kerisiano kua fifitaki a Iesu. Mailoga e lautolu ko e moua he tau mahani tuga he Atua kua mua atu e aoga ke he ha maukoloa po ke tau monuina. Kakano haia ne nakai kaihā e tau Kerisiano ikiiki ke moua e tau ola mitaki he aoga. (Tau Fakatai 20:23) Nakai moua tumau he mahani fakamooli e palepale ke tuga a Haykanush. Ka ko e mahani fakamooli e mena  ne talahau he Atua kua hako, ti kua fakaatā a tautolu ke moua ai e loto manamanatu meā, ko e taha mena ne uho mooli.

Ko e fakafifitakiaga ha Gagik ne fakakite e mena ia. Pehē a ia: “Ato eke au mo Kerisiano, ne gahua au ma e kamupanī lahi ne kalo e takitaki gahua ke totogi e tau tukuhau he hokotaki ni e vala tote he tupe he kamupanī. Ha ko au ko e takitaki ne leveki, amanaki ki a au ke fai ‘maveheaga’ mo e tagata taute tukuhau he fakavaivai a ia ke fakagalo noa e tau aga kaihā he kamupanī. Ti ko e fua, moua e au e matahigoa ne kua nakai mahani fakamooli. Magaaho ne fakaako e au e kupu mooli, ne nakai liu au taute e mahani ia, pete ne mitaki lahi e totogi he gahua ia. Ka e taute ne au e pisinisi haaku. Mai he aho fakapā, ne fakamau matafakatufono e au e kamupanī haaku ti totogi oti e tau tukuhau haaku.”​—2 Korinito 8:21.

Pehē a Gagik: “Teitei hafa e totogi haaku ne tō hifo, ti ko e paleko ke leveki e magafaoa haaku. Ka kua logona e au e fiafia lahi mogonei. Meā e loto manamanatu haaku ki mua ha Iehova. Ko e fakafifitakiaga mitaki au ke he tau tama taane tokoua haaku, ti kua moua e au e falu kotofaaga he fakapotopotoaga. Fakalataha mo e tau tagata taute tukuhau mo e falu ne taute pisinisi mo au, moua e au mogonei e matahigoa ko e tagata mahani fakamooli.”

Fakaalofa a Iehova ki a lautolu ne fakaheke a ia he fifitaki e tau mahani homo ue atu haana, putoia e mahani fakamooli. (Tito 2:10) Ka taute e tautolu e mena nei, to mavehe a ia ke lagomatai a tautolu. Omoomoi e ia e Patuiki ko Tavita ke talahau: “Ne fuata au, ka kua motua tuai au ainei; ka e nakai kitia e au ha tagata tututonu kua tiaki, po ke hana fanau kua ole mena kai.”​—Salamo 37:25.

Kitia e mena ia ne tupu ki a Ruta nukua tua fakamooli. Fakamooli a ia he nofo mau mo e matua fugavai haana ko Naumi, ka e nakai tiaki a ia ha kua fuakau. Ne fano a Ruta ki Isaraela ke maeke a ia ke tapuaki ke he Atua mooli. (Ruta 1:16, 17) Ne fakamooli mo e gahua malolō a ia ke oko fua karite, he muitua e fakatokaaga he Fakatufono ma lautolu ne nonofogati. Ti nakai kehe mai he mena ne tupu ki a Tavita he mogo fakamui, ne nakai tiaki e Iehova a Ruta mo Naumi. (Ruta 2:2-18) Lahi atu foki e mena haana ne taute ma Ruta he nakai ni leveki a ia fakatino. Fifili e ia a Ruta ke eke mo vala he laini he magafaoa he Patuiki ko Tavita mo e he Mesia ne mavehe!​—Ruta 4:13-17; Mataio 1:5, 16.

Liga uka lahi ma e falu he tau fekafekau ha Iehova ke lahi e tupe ka moua ke lata mo e tau levekiaga tino. He nakai lali ke moua e tali mukamuka ka e nakai fakamooli, ne gahua malolō mo e makutu a lautolu. He taute e mena nei, fakakite e lautolu ko e tau mahani homo ue atu he Atua, putoia e mahani fakamooli kua mua atu e uho ki a lautolu ke he ha koloa fakatino.​—Tau Fakatai 12:24; Efeso 4:28.

Ke tuga a Ruta, ko e tau Kerisiano he lalolagi katoa kua fakakite e tua ke he malolō ha Iehova ke lagomatai a lautolu. Ne falanaki katoatoa a lautolu ki a Ia ne mavehe: “Nakai tuai toka ni e au a koe, nakai tuai tiaki ni e au a koe.” (Heperu 13:5) He tau magaaho oti, fakakite e Iehova kua maeke mo e to lagomatai e ia a lautolu ne mahani fakamooli he tau magaaho oti. Fakamooli tumau a ia ke he maveheaga haana ke foaki e tau levekiaga tino ma e tau fekafekau haana.​—Mataio 6:33.

Ē, to uho lahi ke he tau tagata e tau maka kikila tea mo e falu koloa foki. Ka e mauokafua a tautolu kua mua atu e uho ke he Matua ha tautolu he lagi e mahani fakamooli ha tautolu mo e falu mahani mitaki ke he ha koloa uho!