1, 2. Fakamafana fēfē e Iehova a tautolu he ha tautolu a tau kamatamata, ti ko e heigoa e maveheaga ne moua e tautolu he haana Kupu?

KO E matakainaga taane fuata ne nakaila mau ne manamanatu hagaao ke he 1 Korinito 7:28, ko lautolu ne mau to “matematekelea ke he tino.” Ne tutala e matakainaga fuata ke he motua ne faihoana ti hūhū ki a ia: “Ko e heigoa e ‘matematekelea’ nei, ti fehagai fēfē au mo e mena ia ka faihoana au?” To tali e hūhū, tala age e motua ke he matakainaga fuata ke manamanatu ke he taha mena ne talahau he aposetolo ko Paulo: “Ko e Atua foki hana e tau fakamafanaaga oti, Ko ia kua fakamafana mai a mautolu ke he ha mautolu a tau matematekelea oti.”​—2 Korinito 1:3, 4.

² Iloa e tautolu ko Iehova ko e ha tautolu a Matua ne fakaalofa ki a tautolu ti fakamafana e ia a tautolu ka lauia he tau mena uka. Liga manatu e koe e tau magaaho pauaki ne lalago mo e takitaki e Iehova a koe puhala he haana Kupu. Maeke foki a tautolu ke iloa kua manako a ia ke moua e tautolu e mena ne  mua e mitaki tuga ni ne taute e ia ma e tau fekafekau haana i tuai.​—Totou Ieremia 29:11, 12.

3. Ko e heigoa e tau hūhū ka tali e tautolu he vala tala nei?

³ Fa mahani, kua mukamuka lahi ke fakauka ke he tau lekua mo e tau matematekelea kaeke kua iloa e tautolu e mena ne tupu mai ai. Ti ko e ha kua moua e tautolu e matematekelea he fakamauaga po ke magafaoa ha tautolu? Ko e heigoa e tau fakafifitakiaga mai he vahā Tohi Tapu mo e magahala ha tautolu ka lagomatai a tautolu ke moua e fakamafanaaga kua lata mo tautolu? Kia tali e tautolu e tau hūhū nei ti kitia e puhala ka fakauka a tautolu ke he tau kamatamata.

4, 5. Ko e heigoa e tau matematekelea ka liga moua he taane mo e hoana?

⁴ He mole e tufuga e Iehova e fifine fakamua, ne tamai e ia e fifine ke he tagata taane ti eke ai mo hoana haana. Ti pehē a Iehova: “Ke toka ai he tane hana matua tane mo e hana matua fifine, ka e pipiki ke he hana hoana; ti eke ai a laua mo tino taha.” (Kenese 2:24) Mooli, nakai mitaki katoatoa a tautolu oti he vahā nei. (Roma 3:23) Ha ko e mena nei, ka mau e tagata taane mo e fifine, liga amanaki a laua ke fehagai mo e tau lekua. Ma e fakatai, ato fai taane kua liga mahani e fifine ke omaoma ke he tau matua haana. Ka e pehē e Kupu he Atua he mole e fakamauaga, kua eke e taane mo ulu he haana hoana. (1 Korinito 11:3) Magaaho fakamua, liga uka he taane ke tala age e tau mena ke taute he hoana haana. Ti liga uka e hoana ke talia e takitakiaga he taane haana ka nakai mai he tau matua haana. Ka mau laia e hoa, liga fehagai a laua mo e tau fekehekeheaki ha ko e tau matua fugavai ha laua ti liga ko e kamatamata foki anei.

⁵ Manamanatu foki ke he logonaaga he taane mo e hoana ka iloa to fanau e laua e tama. Liga to fiafia lahi a laua, ka e fa tupetupe foki a laua. To manamanatu a laua to fakafua mitaki nakai, ti liga manamanatu foki a laua ke he malolō tino he tama mukemuke. Iloa foki e laua to loga atu e mena ke totogi. He mole e fanau e tama, lata e hoa ke taute falu hikihikiaga. Liga to lahi e magaaho he matua fifine ka leveki e tama mukemuke. Ti liga nakai maeke e taane mo e hoana ke lahi e magaaho ma laua ni tuga fakamua. Liga lahi foki e tau matagahua he matua taane. Lata foki a ia ke mailoga kua moua he hoana mo e tama haana e tau levekiaga kua lata.

6-8. Liga fēfē e logonaaga he hoa mau ka nakai fai fanau a laua?

⁶ Falu hoa mau ne lauia foki he taha matematekelea. Manako lahi a laua ke fai fanau, ka e nakai maeke. Ka nakai fakafua tama e hoana, liga to mamahi lahi e logonaaga haana. (Tau Fakatai 13:12) He vahā Tohi Tapu, uho lahi ma e tau fifine ke faitaane mo e fanafanau. Ko e mena haia he hoana ha Iakopo ko Rahela ne fakaatukehe lahi mahaki he nakai maeke a ia ke fai tama, ka e fai e taokete haana. (Kenese 30:1, 2) He falu motu he vahā nei, tokologa ne talitonu kua uho lahi ke loga e tama. Fa hūhū e tau tagata ke he tau misionare ne nonofo he tau motu ia ke he kakano ne nakai fai tama a laua. Pete he lali e tau misionare ke fakamaama fakamitaki e kakano ka kua pehē agaia e falu, “Ae, to liogi a mautolu ma mua!”

 ⁷ Manamanatu ke he taha fakataiaga. Ko e matakainaga fifine i Igilani ne manako tumau ke fai tama. He mailoga e ia kua nakai maeke a ia ke fanau he fakatokaaga nei ne fakaatukehe lahi a ia. Ti fifili a ia mo e taane haana ke hiki tama. Ka e maanu agaia a ia he falu mogo. Pehē a ia, “Iloa e au ko e hiki tama to nakai tatai mo e fanau ne au haaku tama.”

⁸ Pehē e Tohi Tapu ko e fifine to “fakamoui a ia ke he fanauaga he tau tama.” (1 Timoteo 2:15) Ka e nakai kakano e mena nei to moua e ia e moui tukulagi ha kua fai tama a ia. Ti ko e heigoa e kakano he kupu tohi nei? Kua lavelave lahi e matua fifine he leveki he fanau haana mo e kaina. Lagomatai he mena ia a ia ke kalo kehe he tau mena tuga e loma po ke putoia he tau mena ne nakai ko e tau mena haana. (1 Timoteo 5:13) Pete ia, liga moua agaia e ia e tau lekua he fakamauaga mo e magafaoa haana.

9. Ko e heigoa falu matematekelea ne liga moua he tau tagata ne faitaane mo e faihoana?

⁹ He tau matematekelea foki ne liga moua he tau tagata ne faitaane mo e faihoana ko e mate he hoa. Pete kua liga manatu a lautolu to nakai tupu e mena nei ki a lautolu, tokologa ne fakauka ke he tuaga vihi lahi nei. Talitonu mauokafua e tau Kerisiano ke he maveheaga he liu tu mai ti logona hifo e lautolu e loto mafanatia lahi. (Ioane 5:28, 29) He haana Kupu, loga e tau maveheaga he ha tautolu a Matua ko Iehova ne taute kua fakamafana a tautolu he tau magaaho vihi. Kitekite la a tautolu ke he falu he tau fekafekau a Iehova ne logona hifo e mafanatia ia mo e puhala ne lagomatai a lautolu.

10. Fakamafana fēfē a Hana? (Kikite fakatino he kamataaga.)

¹⁰ Manamanatu ke he mena ne tupu ke he hoana fakahele ha Elekana, ko Hana. Manako a ia ke fai tama ka e nakai maeke a ia. Ka ko e taha hoana he taane haana ko Penina ne loga e fanau. (Totou 1 Samuela 1:4-7.) Ke fakaauatu e kelea, ne vaiga e Penina a Hana ha ko e mena nei ke he “taha tau mo e taha tau.” Fakamamahi lahi mahaki he mena ia a Hana. Ko e heigoa ne taute e ia ke moua e mafanatia? Liogi a ia ki a Iehova. Fano foki a Hana ke he fale ha Iehova he tapuakiaga mo e loa e liogi. Ole a ia ki a Iehova ke foaki ki a ia e tama taane ti falanaki a ia to lagomatai he Atua a ia. He oti e liogi haana, ne totoka e logonaaga ti “nakai tuai mata momoko a ia.” (1 Samuela 1:12, 17, 18) Iloa e Hana to age e Iehova ki a ia e tama taane po ke fakamafana ki a ia he falu puhala foki.

11. Maeke fēfē e liogi ke fakamafana a tautolu?

¹¹ Ha kua nakai mitaki katoatoa a tautolu ti nonofo he lalolagi a Satani, to matutaki a tautolu ke fehagai mo e tau kamatamata. (1 Ioane 5:19) Ka e moua e tautolu e lagomatai. Maeke a tautolu ke liogi ki a Iehova  “ko e Atua foki hana e tau fakamafanaaga oti.” Ko e mena ia ne taute e Hana. Tala age fakatonu e ia e logonaaga haana ki a Iehova ti olelalo ma e lagomatai. He puhala taha, ka matematekelea a tautolu, kua lata a tautolu ke lahi e mena ke taute he nakai totoku noa ni e tau lekua ki a Iehova. Lata a tautolu ke olelalo ki a ia ma e lagomatai ti tala age fakatonu ki a ia e logonaaga ha tautolu.​—Filipi 4:6, 7.

12. Ko e heigoa ne lagomatai a Ana ke fiafia pete ne tau kamatamata?

¹² Liga momoko lahi e logonaaga ha tautolu ha kua nakai fai tama po kua mate e fakahele ha tautolu. Ka e moua agaia e tautolu e mafanatia. Manamanatu ke he fakafifitakiaga ha Ana ne moui he vahā a Iesu. He mole e faitaane ha Ana ke fitu e tau, ne mate e taane haana. Ti tuga kua nakai fai tama a ia. Ka ko e heigoa ne lagomatai a ia? “Nakai fano kehe a ia he faituga.” Pete ni kua 84 e tau he moui ha Ana, ne fano agaia a ia ke he faituga ke liogi mo e tapuaki ki a Iehova. (Luka 2:37) Ko e mena nei ne fakamafana a ia mo e lagomatai a ia ke fiafia pete ne tau kamatamata haana.

13. Maeke fēfē e tau kapitiga mooli ke fakamafana a tautolu ka fakamamahi he tau magafaoa ha tautolu?

¹³ Maeke foki a tautolu ke moua e mafanatia mai he tau kapitiga mooli ne iloa e tautolu he fakapotopotoaga. (Tau Fakatai 18:24) Lima laia e tau he moui ha Paula he mogo ne nakai liu e matua fifine haana fekafekau ki a Iehova. Momoko lahi a Paula ti nakai mukamuka foki e tuaga ki a ia. Ka ko e matakainaga paionia ne higoa ko Ann ne atihake a ia ti fakakite e fakaalofa ki a ia. “Pete kua nakai ko e magafaoa a Ann ki a au, ne logona e au e manamanatu fakaalofa haana ne kua eke mo lagomatai lahi,” he fakamaama e Paula. “Lagomatai ai ki a au ke tumau e fekafekau ki a Iehova.” Tali mai mogoia, ne liu mai e matua fifine ha Paula ke he fakapotopotoaga ti fiafia lahi a Paula he mena nei. Fiafia foki a Ann ha kua lagomatai e ia a Paula ke matutaki ke fekafekau ki a Iehova.

14. Aoga fēfē ki a tautolu ka fakamafana e falu?

¹⁴ Ka lavelave a tautolu he taute e tau mena mitaki ma e falu tagata, fa nimo e tautolu  e tau lekua ni ha tautolu. Ma e fakatai, tokologa e matakainaga fifine ne faitaane po ke nakai faitaane, ne iloa ka fakailoa e lautolu e tala mitaki he Kautu ke he falu, kua gahua a lautolu mo Iehova mo e taute e finagalo Haana. Fakafiafia he mena nei a lautolu. Maeke a tautolu oti ke fakakite e logonaaga ma e falu he fakailoa e tala mitaki ki a lautolu. Ti ka taute e tautolu e tau mena mitaki ma e tau matakainaga ha tautolu, kua tata lahi a tautolu ki a lautolu. (Filipi 2:4) Ko e mena ia ne taute he aposetolo ko Paulo. Ne leveki e ia e falu tuga ni e “fifine fakahuhu tama kua leveki fakamitaki hana ni a fanau.” Fakamafana mo e atihake foki e Paulo e tau matakainaga haana “tuga ne matua tane ke he hana fanau.”​—Totou 1 Tesalonia 2:7, 11, 12.

15. Ha hai e matagahua ke fakaako e tau fanau ikiiki hagaao ki a Iehova?

¹⁵ Maeke fēfē a tautolu ke fakamafana e tau magafaoa i loto he fakapotopotoaga? Falu magaaho, liga hūhū a lautolu ne foou ki a tautolu ke lagomatai a lautolu ke fakaako e tau fanau ha lautolu hagaao ki a Iehova, po ke fakaako foki e Tohi Tapu mo e tau fanau ikiiki ha lautolu. Fakakite he Tohi Tapu kua tuku age e Iehova ke he tau matua e matagahua ke fakaako mo e fakamahani e tau fanau ha lautolu. (Tau Fakatai 23:22; Efeso 6:1-4) Ka e fai tuaga ne maeke he falu ke lagomatai, kua aoga lahi ma e tau matua ke fakaako ne lautolu e tau fanau ha lautolu. Lata he tau matua ke tutala tumau mo e tau fanau ha lautolu.

16. Ko e heigoa kua lata ke manatu ka lagomatai e tautolu e fanau?

¹⁶ Ka ole e matua ki a tautolu ke fakaako e Tohi Tapu mo e tama haana, kua mitaki ke manatu kua nakai ha ha ia tautolu e tonuhia tuga e matua. Falu mogo ne maeke a tautolu ke fakaako mo e tama ne nakai kupu mooli e tau matua. Ka fakaako a tautolu mo e tau fanau ne nakai ko e ha tautolu, kua pulotu ke fakaako mo lautolu i kaina ka haia e tau matua po ke ka fai Fakamoli motua i ai, po ke fakaako he matakavi ne hafagi ke he toloaga. He puhala nei, to nakai fakakite e tautolu ha manatu hepe ke he ha tagata. Fai magaaho mogoia, liga maeke e tau matua ke fakaako e fanau ha lautolu hagaao ki a Iehova.

17. Fakamafana fēfē he fanau e falu he magafaoa?

¹⁷ Ko lautolu ne ikiiki ne fakaako ke fakaalofa ki a Iehova ka fakamafana mo e atihake e tau tagata he magafaoa ha lautolu. Puhala fe? He fakalilifu ke he tau matua ha lautolu mo e eketaha ke lagomatai a lautolu ke he tau puhala kua aoga. Ka fakatumau foki e fanau ke mahani fakamooli ki a Iehova kua fakamalolō he mena nei e magafaoa katoa. Ato hoko e Fakapuke, ne tapuaki a Lameko ki a Iehova. Pehē a ia hagaao ke he tama haana ko Noa: “To fakamafanatia e ia a tautolu ke he ha tautolu a tau gahua [mo e] mamahi he tau lima ha tautolu, ha ko e kelekele kua fakamalaia e Iehova.” Fakamooli e perofetaaga ia he mole e Fakapuke ti utakehe e Iehova e malaia he kelekele. (Kenese 5:29; 8:21) Mogonei, ko e tau fanau ne fakatumau ke mahani fakamooli ki a Iehova ka fakamafana foki e magafaoa ha lautolu. Maeke a lautolu ke lagomatai e tau tagata oti he magafaoa ke fakauka ke he tau kamatamata mogonei mo e anoiha.

18. Ko e heigoa ka lagomatai a tautolu ke fakauka pete ne tau kamatamata?

¹⁸ Ko e tau tagata ha Iehova mogonei kua moua e mafanatia puhala he liogi, manamanatu fakahokulo ke he tau fakafifitakiaga he Tohi Tapu, mo e fakafetuiaga tata mo e tau matakainaga ha lautolu. (Totou Salamo 145:18, 19.) Iloa e tautolu kua mautali tumau a Iehova ke fakamafana a tautolu, mo e to lagomatai mooli e ia a tautolu ke fakauka ke he ha kamatamata ne liga fehagai mo tautolu!