1, 2. Ko e heigoa kua igatia a tautolu mo e lata ke mauokafua ki ai? (Kikite fakatino he kamataaga.)

KUA fakatutala a tautolu he vala tala fakamua ko e Tiapolo ne talahau kua nakai tonuhia a Iehova ke pule ke he tau tagata. Pehē a ia kua nakai tonu e pule ha Iehova ti fiafia lahi e tau tagata ka pule na lautolu ki a lautolu. Hako nakai a Satani? Manamanatu kaeke kua pule e tau tagata ki a lautolu ni ti momoui tukulagi. To fiafia lahi nakai a lautolu ane mai pule he Atua? To fiafia lahi nakai a koe ka moui tukulagi ti vevehe kehe katoatoa mai he Atua?

² Nakai fai tagata ke tali e tau hūhū nei ma haau. Igatia a tautolu mo e lata ke manamanatu fakahokulo ki ai. Ti lata ai ke maaliali ko e puhala pule ha Iehova kua mua ue atu ti tonuhia a ia ke moua e lalagoaga katoatoa ha tautolu. Maeke a tautolu ke mauokafua ke he mena ia ha kua totou e tautolu he Tohi Tapu. Onoono la tautolu ke he talahauaga he Tohi Tapu ke he  tonuhia ha Iehova ke pule ke he lagi mo e lalolagi katoa.

3. Ko e ha ne tonuhia a Iehova ke eke mo Pule Katoatoa?

³ Ko Iehova hokoia e Pule Katoatoa he lagi mo e lalolagi katoa ha ko ia ko e Atua mo e Tufuga malolō ue atu. (1 Nofoaga he Tau Patuiki 29:11; Gahua 4:24) He fakakiteaga he lagi, ko e tau patuiki ne 144,000 he Keriso ne pehē: “Ko e Iki [Iehova] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.” (Fakakiteaga 4:11) Tufuga e Iehova e tau mena oti kana, ti tonuhia a ia ke pule ke he tau tagata oti kana ne ha ha he lalolagi po ke he lagi.

4. Ko e ha e tokanoa ke fifili kua nakai tuku mai ki a tautolu e tonuhia ke totoko e Atua?

⁴ Nakai tufuga e Satani ha mena taha. Ti nakai tonuhia a ia ke pule ke he lagi mo e lalolagi katoa. Ko Satani mo e hoa fakamua ne liuliu he totoko ke he pule katoatoa ha Iehova. (Ieremia 10:23) Ko e tokanoa kia ha lautolu ke fifili kua foaki ki a lautolu e tonuhia ke totoko e pule ha Iehova? Nakai. Ko e tokanoa ke fifili kua foaki ke he tagata e tonuhia ke taute e tau fifiliaga ka e nakai ko e tonuhia ke totoko e Tufuga ko Iehova. Maaliali ai, he totoko ke he Atua ko e fakaaoga fakahehē he tokanoa ke fifili. Ha ko e tau tagata, lata a tautolu mo e pule mo e takitakiaga ha Iehova.

5. Ko e ha e tau fifiliaga he Atua kua tonu tumau?

⁵ Manamanatu ke he taha kakano foki ne tonuhia a Iehova ke pule. Fakaaoga e ia e pule haana he puhala fakafili tonu katoatoa. Pehē a ia ki a tautolu: “Ko au ni ko Iehova, kua eke e tau mena fakaalofa, mo e fakafiliaga, mo e mahani tututonu ke he lalolagi; ha ko e tau mena kua fiafia au ki ai.” (Ieremia 9:24) Nakai lata a Iehova ke moua e tau matafakatufono he tagata ke lagomatai a ia ke fifili e mena hako. Ka e fakatoka e ia e tuaga ma e mena kua hako. Fakavē ai ke he fakafili tonu katoatoa ha Iehova, ne tuku mai e ia e tau matafakatufono ke he tau tagata. Pehē e salamo: “Ko e tututonu mo e fakafiliaga ne tumau ai hāu a nofoaiki.” Ti ko e tau matafakatufono, tau matapatu fakaakoaga, mo e tau fifiliaga takitaha ne moua mai ia Iehova kua hako. (Salamo 89:14; 119:128) Talahau e Satani kua nakai ko e Pule tonu a Iehova. Ka e nakai maeke a ia ko Satani ke tamai e fakafili tonu ke he lalolagi.

6. Ko e heigoa taha kakano ne ha ha ia Iehova e tonuhia ke pule?

⁶ Taha kakano foki ne tonuhia a Iehova ke pule ha kua ha ha ia ia e iloilo mo e pulotu ke leveki aki e lagi mo e lalolagi katoa. Kitia e tautolu e mena nei he puhala ne tuku age e ia ke he Tama haana e lotomatala ke fakamaulu e tau gagao ne nakai maeke e tau ekekafo ke fakamaulu. (Mataio 4:23, 24; Mareko  5:25-29) Pete ko e tau mana anei ki a tautolu, nakai ko e tau mana a ia ki a Iehova. Maama e ia e gahuahuaaga he tino ti maeke ke fakamaulu e tau matafatia. Maeke foki a ia ke fakaliu tu mai e tau tagata mamate mo e taofi e tau matematekelea pauaki neke tupu.

7. Lahi atu fēfē e pulotu ha Iehova ke he ha tagata he lalolagi a Satani?

⁷ Ko e lalolagi ne pule e Satani kua nakai fai mafola ke he motu po ke vahāloto he tau motu. Ko Iehova hokoia ne pulotu ke tamai e mafola ke he lalolagi. (Isaia 2:3, 4; 54:13) Logona hifo a tautolu tuga e aposetolo ko Paulo he pehē a ia: “Oi, oi! ko e hokulo he tanakiaga he iloilo mo e fioiaaga he Atua! Kua nakai maeke ni ia taha ke kumi hana tau fakafiliaga; kua nakai maeke foki ke iloa hana tau haeleaga.”​—Roma 11:33.

8. Fēfē e logonaaga haau ke he puhala pule ha Iehova?

⁸ He kitia e tautolu, kua fakakite fakamaali he Tohi Tapu kua tonuhia a Iehova ke pule. Fakakite foki i ai e kakano ko ia ko e Pule mua ue atu. Taha kakano kua ha ha i ai e fakaalofa ke he pule haana. Logona e tautolu e tata ki a ia ka manamanatu a tautolu ki a ia kua “fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli.” (Esoto 34:6) Kua fakamatalahi mo e fakalilifu he Atua a tautolu. Leveki fakamitaki e ia a tautolu. Pehē e Tiapolo kua taofi e Iehova e tau mena mitaki mai he tau fekafekau Haana, ka ko e pikopiko anei. Kua foaki mai he Atua e Tama fuataha haana ke maeke a tautolu ke moua e amaamanakiaga he moui tukulagi.​—Totou Salamo 84:11; Roma 8:32.

9. Iloa fēfē e tautolu kua leveki he Atua a tautolu takitokotaha?

⁹ Fakaalofa a Iehova ke he matakau he tau tagata oti haana. Ka e fiafia lahi a ia ke he tau tagata takitokotaha foki. Manamanatu ke he mena ne tupu i tuai. Kavi ke he tolu e teau tau kua mole ne fakaaoga e Iehova e tau fakafili ke takitaki e motu haana mo e foaki ki a lautolu e kautūaga ke he tau fī ha lautolu. Ka e he tau magaaho oti nei, ne mataala agaia a Iehova ke he tau tagata takitaha. Taha ia lautolu nei ko e fifine ko Ruta. Nakai ko e Isaraela a ia, ti tuku kehe e ia e tau mena loga ke maeke ke tapuaki ki a Iehova. Ne palepale e Iehova a ia he foaki ki a ia e taane mo e tama taane. Ka e mua atu ai, ne eke e tama taane ha Ruta mo vala he tupumaiaga he magafaoa ne takitaki atu ke he Mesia. Ti fakamau foki e Iehova e tala ke he moui ha Ruta he Tohi Tapu ne tohi ai ke he higoa ni haana. Fēfē e manatu haau ke he logonaaga ha Ruta ka liu tu mai a ia ke he moui ti iloa hagaao ke he tau mena nei?​—Ruta 4:13; Mataio 1:5, 16.

10. Ko e ha kua pehē a tautolu kua nakai pāpā maō e pule ha Iehova?

¹⁰ Nakai pāpā maō e pule ha Iehova. Ka ko lautolu ne omaoma ki a ia ne logona e atāina mo e fiafia. (2 Korinito 3:17) Pehē a Tavita hagaao ki a Iehova: “Ha ha i mua hana e fakahekeaga mo e fulufuluola; ha ha he haeleaga hana e malolo mo e fiafia.” (1 Nofoaga he Tau Patuiki 16:7, 27) Tohi  he salamo ko Etano: “Uhoaki e motu kua iloa e leo fiafia; Iehova na e, to o fano a lautolu ke he maama he hāu a fofoga. To fiafia a lautolu ke he hāu a higoa ke he aho oti; ko e hāu a tututonu foki ke fakamatalahi ai a lautolu.”​—Salamo 89:15, 16.

11. Maeke fēfē a tautolu ke talitonu mooli kua mua ue atu e pule katoatoa ha Iehova?

¹¹ Ko e lahi e manamanatu fakahokulo ha tautolu ke he mitaki a Iehova, ko e lahi e talitonu ha tautolu ko ia e pule mua ue atu. Logona hifo e tautolu tuga e salamo ne pehē ke he Atua: “Kua mua e mitaki he aho taha ke he hāu a tau lotopā, ke he taha afe e tau aho kehe.” (Salamo 84:10) Talaga mo e tufuga e Iehova a tautolu, ti iloa tonuhia e ia e mena ka fakafiafia a tautolu. Mua atu e fakamokoi haana ke he tau mena kua lata mo tautolu. Ko e ha mena ne ole e Iehova ki a tautolu ke taute ko e mitaki ni ma tautolu. Pete kaeke ke taute e tautolu e tau foakiaga, to fiafia tumau a tautolu kaeke ke omaoma ki a Iehova.​—Totou Isaia 48:17.

12. Ko e heigoa e kakano pauaki kua lalago e tautolu e pule katoatoa ha Iehova?

¹² Fakaako e tautolu he Tohi Tapu, he mole e Pule Afe Tau he Keriso to totoko e falu ke he pule katoatoa ha Iehova. (Fakakiteaga 20:7, 8) Ko e heigoa ka fakaohooho a lautolu ke taute e mena ia? He magaaho ia, to lali foki e Tiapolo ke omoomoi e tau tagata ke mahani lotokai. Kua fitā a ia he taute pihia. Liga lali a ia ke talitonu e tau tagata na maeke a lautolu ke momoui tukulagi ka e nakai omaoma ki a Iehova. To nakai mooli e mena nei. Ka e lata a tautolu ke hūhū hifo, ‘To talitonu nakai au ke he pikopiko tuga a ia?’ Ka fakaalofa mooli a tautolu ki a Iehova ti talitonu kua mitaki a ia mo e tonuhia a ia ke pule ke he lagi mo e lalolagi, to fakalialia e pikopiko pihia ki a tautolu. To manako a tautolu ke momoui ni i lalo he pule katoatoa ha Iehova ne ha ha ai e fakaalofa he pule.

13. Lalago fēfē e tautolu e pule katoatoa he Atua ka fifitaki e tautolu a ia?

¹³ He kitia e tautolu, tonuhia a Iehova ke pule ti ko e puhala pule haana kua mua ue atu. Latatonu a tautolu ke lalago katoa e pule katoatoa Haana. Lalago ai e tautolu he fakamooli a tautolu ki a Iehova mo e fifitaki a ia. Ka eketaha a tautolu ke mahani pihia tuga a Iehova, fakakite e tautolu kua fakaalofa mo e lalago e tautolu e puhala pule haana.​—Totou Efeso 5:1, 2.

14. Fifitaki fēfē he tau motua mo e tau ulu magafaoa a Iehova?

¹⁴ Fakaako e tautolu mai he Tohi Tapu kua fakaaoga tumau e Iehova e malolō haana he puhala totonu. To fifitaki he tau ulu magafaoa mo e tau motua ne fiafia ke he pule katoatoa ha Iehova a ia ti nakai pāpā maō po ke pule lahi. Eketaha e aposetolo ko Paulo ke fifitaki e Atua mo e Tama Haana. (1 Korinito 11:1) Nakai fakamā e ia e falu po ke poaki ki a lautolu ke taute e mena hako. Ka e omoomoi totonu e ia a lautolu ke taute e mena hako. (Roma 12:1; Efeso 4:1; Filemoni 8-10) He taute e mena nei, fifitaki e Paulo a Iehova. Ka fehagai fakaalofa a tautolu mo e falu, to lalago e tautolu e pule katoatoa ha Iehova.

15. Lalago fēfē e tautolu e pule ha Iehova he fakalilifu a lautolu ne ha ha ai e pule?

¹⁵ Lalago foki e tautolu e pule ha Iehova he fakalilifu mo e kaufakalataha mo lautolu ne tuku age e ia e pule ki ai. Pete ka nakai  maama po ke talia katoatoa e tautolu e fifiliaga ne taute e lautolu, kua lalago agaia e tautolu a lautolu. Nakai taute pihia he lalolagi, ka e taute pihia e tautolu he talia ko Iehova ko e Pule ha tautolu. (Efeso 5:22, 23; 6:1-3; Heperu 13:17) Ti fiafia a tautolu ha kua manako e Atua ma e mena mitaki lahi ma tautolu.

16. Maeke fēfē e tau fifiliaga ne taute e tautolu ke fakakite kua lalago e tautolu e pule katoatoa he Atua?

¹⁶ Lalago foki e tautolu e pule katoatoa he Atua ha ko e tau fifiliaga ne taute e tautolu. Nakai tuku mai e Iehova e poakiaga pauaki ma e tau tuaga takitaha he moui. Ka kua tala mai e ia e puhala ne manamanatu a ia ki ai. Lagomatai he mena nei a tautolu ke maama e mena kua lata a tautolu ke taute. Ma e fakatai, nakai tuku mai e Iehova ke he tau Kerisiano e tau mena kua lata po ke nakai lata ia lautolu ke tui. Ka e fakamaama e ia kua lata a tautolu ke gali mo e lilifu ko e Tau Fakamoli haana. (1 Timoteo 2:9, 10) Manako a ia ki a tautolu ke manamanatu ke he puhala ka lauia e falu ha ko e tau fifiliaga ha tautolu. (1 Korinito 10:31-33) Ka taute e tautolu e tau fifiliaga ne fakavē ke he puhala ne manamanatu a Iehova, fakakite e tautolu kua fiafia mo e lalago e tautolu e puhala pule haana.

17, 18. Maeke fēfē he tau hoa mau ke fakakite kua lalago e laua e pule katoatoa ha Iehova?

¹⁷ Manamanatu ke he taha puhala ka lalago  he tau Kerisiano faitaane mo e faihoana e pule katoatoa ha Iehova. Liga nakai manatu e hoa mau to pihia e fakamauaga ha laua. To liga ha ha i ai e tau lekua hagahaga kelea foki. Ka pihia, to aoga ma laua he manamanatu ke he puhala ne fehagai a Iehova mo e motu ha Isaraela i tuai. Fakamaama e Iehova a ia kua tuga e taane ke he tau tagata haana. (Isaia 54:5; 62:4) Lagaloga e fakaita he motu a Iehova. Ko e fakafetuiaga ia kua tuga e fakamauaga vihi. Ka e nakai mafiti a Iehova ke tiaki a Isaraela. Fakamagalo tumau e ia a lautolu mo e fakamooli e tau maveheaga haana ki a lautolu.​—Totou Salamo 106:43-45.

¹⁸ Ko e tau Kerisiano ne faitaane mo e faihoana kua fakaalofa ki a Iehova ne lali ke fifitaki a ia. Pete ka lekua e fakamauaga ha laua, nakai kumi e laua e puhala ne nakai moua mai he Tohi Tapu ke fakaoti aki. Iloa e laua ko e onoonoaga ha Iehova ke he tau omonuo he fakamauaga kua uho lahi mahaki ti manako ke he taane mo e hoana ke “fakalataha” tokoua. Ko e mahani feuaki ko e kakano hokoia ni faka-Tohi Tapu ka vevehe e taha tagata ti tokanoa ke liu ke mau. (Mataio 19:5, 6, 9) Ka taute he tau Kerisiano e tau mena oti kua maeke a laua ke kautū e fakamauaga, kua lalago e laua e pule katoatoa ha Iehova.

19. Ko e heigoa kua lata a tautolu ke taute ka fai hehē a tautolu?

¹⁹ Kua nakai mitaki katoatoa oti a tautolu ti falu magaaho kua taute e tautolu e tau mena ne nakai fakafiafia a Iehova. Iloa e ia e mena nei, kakano haia ne foaki mai e ia e lukutoto he Keriso. Ka taute e tautolu e hehē, lata a tautolu ke ole ki a Iehova ma e fakamagaloaga. (1 Ioane 2:1, 2) He nakai ni kelea e logonaaga ke he tau hehē ha tautolu, maeke a tautolu ke lali ke fakaako mai ai. Manako a tautolu ke nonofo fakatata ki a Iehova, ko ia ka fakamagalo a tautolu mo e lagomatai a tautolu ke fakamalolō mo e fakatumau ke fekafekau ki a ia.​—Salamo 103:3.

20. Ko e lata he ha a tautolu ke lalago e pule katoatoa ha Iehova mogonei?

²⁰ He lalolagi foou, to pule a Iehova ke he tau tagata oti mo e to fakaako ke he tau puhala tututonu haana. (Isaia 11:9) Ka e lahi foki e mena ne fakaako e tautolu mogonei ke he puhala ne manamanatu a ia mo e puhala ne manako a ia ke fehagai a tautolu mo e tau tuaga. Nakai leva, to nakai liu taha ke hūhū noa ke he tonuhia he Atua ke pule. Kia taute e tautolu e tau mena oti mogonei ke lalago e pule katoatoa ha Iehova he omaoma ki a ia, fekafekau fakamooli ki a ia, mo e eketaha ke muitua a ia ke he tau mena oti ne taute e tautolu.