KUA nonofo a tautolu he lalolagi fakatupetupe, ti maeke ke uka ke moua e monuina, po ke mafola. Pete ka fai mafola, maeke a tautolu ke mukamuka ke galo ai. Ko e heigoa ne talahau he Tohi Tapu ka lagomatai a tautolu ke moua e mafola mooli mo e tukulagi? Lagomatai fēfē e tautolu e falu ke moua ai?

Ke moua e mafola mooli, lata a tautolu ke logona hifo e haohao mitaki mo e puipuiaga. Lata a tautolu ke moua e tau kapitiga mitaki, mo e mua atu kua lata a tautolu ke fakatata ke he Atua. Taute fēfē e tautolu e mena ia?

Ko e tau poakiaga mo e tau matapatu fakaakoaga ha Iehova kua mitaki tumau ma tautolu. Ka omaoma ai e tautolu, fakakite ai kua falanaki a tautolu ki a Iehova ti manako ke moua e fakafetuiaga mafola mo ia. (Ieremia 17:7, 8; Iakopo 2:22, 23) To fakatata a Iehova ki a tautolu ti foaki mai e mafola he manamanatuaga. Pehē e Isaia 32:17: “Ko e mena ke tupu mai he mahani tututonu ko e monuina haia; to tupu mai foki he mahani tututonu e okioki mo e nakai haofia tukulagi.” Moua e tautolu e mafola mooli ka makai ke omaoma ki a Iehova.​—Isaia 48:18, 19.

Foaki mai foki e Iehova e mena fakaalofa uho ke lagomatai a tautolu ke fakatupu e mafola tukulagi. Ko e mena fakaalofa nei ko e agaaga tapu haana.​—Gahua 9:31.

Pehē e aposetolo ko Paulo ko e mafola ko e vala he “fua he Agaga.” (Kalatia 5:22, 23) Ha kua tupu mai e mafola he agaaga he Atua, lata a tautolu ke fakaatā e agaaga tapu ke takitaki a tautolu ka manako ke he mafola. Taute fēfē e tautolu e mena nei?

Fakamua, lata a tautolu ke totou tumau e  Kupu he Atua. (Salamo 1:2, 3) He manamanatu fakahokulo ke he mena ne totou, lagomatai he agaaga tapu a tautolu ke maama e manatu ha Iehova ke he tau matakupu kehekehe. Ma e fakatai, fakaako e tautolu e puhala kua fakatumau e mafola haana mo e kakano kua aoga lahi e mafola ki a ia. Ka fakagahua e tautolu e tau mena ne fakaako mai he Tohi Tapu, to lahi e mafola ka moua e tautolu ke he tau momoui.​—Tau Fakatai 3:1, 2.

Uaaki, lata a tautolu ke liogi ma e agaaga tapu he Atua. (Luka 11:13) Mavehe a Iehova ki a lautolu kua ole ma e lagomatai haana: “Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) Ka nonofo fakatata a tautolu ki a Iehova mo e falanaki ke he agaaga haana, to foaki e ia ki a tautolu e mafola mooli he manamanatuaga.​—Roma 15:13.

Kua lagomatai he Tohi Tapu e tau tagata tokologa ke hikihiki e tau momoui ha lautolu, ti moua e lautolu mogonei e mafola mo Iehova, mafola he manamanatuaga, mo e mafola mo e falu. Taute fēfē e lautolu e tau hikiaga nei?

Ato o mai ke he kupu mooli, falu he tau matakainaga ha tautolu ne ita mo e vale foki. Ka e gahua malolō a lautolu ke hiki, ti kua lahi e totonu, fakauka, mo e mafola a lautolu mogonei mo e falu. * (Kikite matahui tala.) (Tau Fakatai 29:22) Kitia e puhala he matakainaga taane ko David mo e matakainaga fifine ko Rachel ne hikihiki e tau mahani ha laua.

Ato hau a David ke he kupu mooli, fa tuhituhi a ia ke he falu ti vagahau vale ke he magafaoa haana. Ka e mailoga e ia kua lata a ia ke hiki. Moua fēfē e ia e mafola? Pehē a David, “Kamata au ke fakagahua e tau matapatu fakaakoaga he Tohi Tapu ke he moui haaku ti ko e fua, ne tupu e fakalilifu he vahāloto haaku mo e magafaoa.”

Ne lauia a Rachel he takatakaiaga ne tupu hake a ia. Fakamaama e ia, “Taufetului agaia au  mogonei mo e tau logonaaga ita ha kua feaki hake au he kaina ita.” Ko e heigoa ne lagomatai a Rachel ke moua e mafola? Pehē a ia, “Ko e falanaki ki a Iehova puhala he liogi.”

Ko David mo Rachel ko e ua ni anei he tau fakafifitakiaga he tau tagata ne moua e mafola mogonei, ha kua fakagahua e laua e tau matapatu fakaakoaga he Tohi Tapu mo e falanaki ke he agaaga tapu. Pete kua nonofo a tautolu he lalolagi ita, maeke a tautolu ke moua agaia e mafola he manamanatuaga. To fakamukamuka he mena nei ke femataaki mo e tau tagata he magafaoa ha tautolu mo e tau matakainaga he fakapotopotoaga. Ka e tala mai a Iehova ki a tautolu “kia nonofo fakamitaki [po ke, mafola] mo e tau tagata oti kana.” (Roma 12:18) Maeke mooli kia e mena ia? Ti ko e ha kua lata a tautolu ke lali ke moua e mafola mo e falu?

Ke he gahua he fonua, fakamatala e tautolu e fekau mafola hagaao ke he Kautu he Atua. (Isaia 9:6, 7; Mataio 24:14) Tokologa ne fiafia ke he fekau nei ti talia ai. Ko e fua, nakai liu a lautolu ke logona hifo e fakateaga po ke ita ha ko e tau mena ne tutupu he lalolagi. Moua e lautolu mogonei e amaamanakiaga mooli ma e vahā anoiha, ti taute he mena nei a lautolu ke manako ke “kumi atu ke he mafola.”​—Salamo 34:14.

Ka e nakai fiafia agaia e tau tagata oti ke he fekau ha tautolu ke he mogo fakapā. (Ioane 3:19) Pete ne puhala ne tali mai e tau tagata, tuku mai he Atua ki a tautolu e agaaga haana. Lagomatai ai ki a tautolu ke fakatumau e mafola mo e fakalilifu ka fakamatala a tautolu. He puhala nei, muitua e tautolu e fakatonuaga ha Iesu: “Ka hūhū atu a mutolu ke he taha magafaoa kia fakaalofa atu a mutolu ki ai. Kaeke foki kua lata e magafaoa ia, to hoko atu ki ai ha mutolu a fakamonuina; kaeke foki kua nakai lata, ti liliu mai ai kia mutolu ha mutolu a fakamonuina.” (Mataio 10:11-13) Ka ha ha ia tautolu e aga nei, maeke a tautolu ke fakatumau e mafola pete e mena ne talahau po ke taute he falu. Ti manatu e tautolu liga moua agaia e tautolu e magaaho ke lagomatai e tau tagata ia he mogo i mua.

Fakatupu ki mua foki e tautolu e mafola he fakalilifu ka tutala mo e tau tui ne mua, pete ka totoko e lautolu e gahua ha tautolu. Ma e fakatai, he taha motu i Aferika ne nakai fakaatā he fakatufono e tau matakainaga ke tā e tau Fale he Kautu. Iloa he tau matakainaga kua lata a lautolu ke lali ke fakamafola e lekua nei he puhala totoka. Fakafano e lautolu e matakainaga taane ko e misionare he taha magahala he motu ia ke kitia e Komisina Tokoluga i London, England ke tala age ki ai hagaao ke he gahua mafola ne taute he Tau Fakamoli a Iehova.

Pehē e matakainaga taane: “He hū atu au ke he ofisa i mua, ne manamanatu au ha ko e puhala tauteute he fifine ne tali telefoni, ko ia mai he magafaoa he vagahau ne iloa e au. Ti fakafeleveia e au a ia ke he vagahau haana. Ofo a ia ti hūhū mai ki a au, ‘Ko e heigoa e kakano ne hau a koe?’ Tala age totonu au kua manako au ke kitia e Komisina Tokoluga. Ne hea atu e fifine he telefoni ki ai ti hau a ia mo e feleveia ki a au he vagahau motu. Oti ai mogoia, fanogonogo fakamitaki a ia he fakamaama age e au e matagahua mafola he Tau Fakamoli.”

He logona he Komisina Tokoluga e mena ne tala age he matakainaga taane, ne maama mitaki e ia e gahua ha tautolu ti nakai onoono hifo a ia tuga fakamua. Nakai leva, hiki e fifiliaga he fakatufono ia ti fakaatā e Tau Fakamoli a Iehova ke tā e tau Fale he Kautu. Fiafia mooli e tau matakainaga! Maaliali ai, ka fakalilifu e tautolu e falu, kua fakaholo ki mua e tautolu e mafola.

He vahā nei, fiafia he tau tagata ha Iehova e parataiso fakaagaaga he tapuaki e lautolu a Ia he takatakaiaga mafola. Igatia a tautolu mo e lafi ke he mafola nei he gahua ke fakatupu ki mua e mafola he tau momoui ha tautolu. Ti mauokafua a tautolu kua fiafia a Iehova ki a tautolu. He lalolagi foou haana, to foaki mai e ia ki a tautolu e mafola tukulagi.​—2 Peteru 3:13, 14.