1. Ko e heigoa e kakano uho ati fiafia a tautolu?

KUA fiafia lahi a tautolu ke logona e puhala ne fakakikila he tau fekafekau he Atua e maama ha lautolu! He tau kua mole, ne molea 10,000,000 he tau fakaako Tohi Tapu ne taute he tau tagata ha Iehova. Totou miliona a lautolu ne foou kua fiafia ne o mai ke he Fakamanatuaga mo e fakaako hagaao ke he mena fakaalofa ha Iehova he lukutoto.​—1 Ioane 4:9.

2, 3. (a) Ko e heigoa ne nakai taofi a tautolu he “mahani tuga ne tau mena kua fakamaama aki”? (e) Ko e heigoa ka fakatutala a tautolu he vala tala nei?

² He lalolagi katoa, loga e vagahau kehekehe ne vagahau he Tau Fakamoli a Iehova. Ka e nakai taofi he mena nei a tautolu he fakaheke a Iehova ko e magafaoa ne taha. (Fakakiteaga 7:9) Pete ni ko e vagahau fe po ke matakavi fe ne nonofo a tautolu, maeke a tautolu ke kikila atu mo “fakamaama aki e lalolagi.”​—Filipi 2:15.

³ Ko e ha tautolu a gahua fakamatala, kaufakalataha faka-Kerisiano, mo e fakamafiti kua tamai e fakahekeaga ki a Iehova.  Fakakikila fēfē e maama ha tautolu ke he tau faahi nei ne tolu?​—Totou Mataio 5:14-16.

4, 5. (a) Lafi ke he fakamatala, fakakikila fēfē e maama ha tautolu? (e) Ko e heigoa e tau fua mitaki ha ko e mahani totonu? (Kikite fakatino he kamataaga.)

⁴ Ko e fakamatala mo e taute tutaki ko e puhala aoga lahi ke fakakikila e maama ha tautolu. (Mataio 28:19, 20) He 1925, ko e vala tala “Light in the Darkness” ne talahau he tau aho fakamui nei, nakai fai tagata ne fakamooli ke he Iki ka nakai fakaatā e ia e “magaaho ke fakakikila e maama haana.” Ti pehē foki: “Lata a ia ke taute e mena nei he tala age e tala mitaki ke he tau tagata he lalolagi, mo e fakalautatai a ia ke he tau puhala he maama.” (The Watch Tower, Iuni 1, 1925) Lafi ke he fakamatala ha tautolu, tamai he mahani ha tautolu e fakahekeaga ki a Iehova. Tokologa e tagata ne kitia a tautolu ka fakamatala. Ka mamali a tautolu ki a lautolu ti fakafeleveia mafanatia atu, lagomatai he mena nei a lautolu ke manamanatu mitaki ki a tautolu mo e Atua ne tapuaki e tautolu.

⁵ Tala age a Iesu ke he tau tutaki haana: “Ka hūhū atu a mutolu ke he taha magafaoa kia fakaalofa atu a mutolu ki ai.” (Mataio 10:12) He matakavi ne fakamatala a Iesu, ko e mahani he tau tagata ke uiina e tau tagata kehe ke he tau kaina ha lautolu. He tau matakavi loga he vahā nei, kua hiki tuai e mahani. Fa hopoate po ke hogohogo manava e tau tagata ka kitia e tagata kehe he gutuhala ha lautolu. Kaeke ke fakakapitiga mo e totonu a tautolu to liga logona hifo e lautolu e fakatotoka. Ka fakamatala a koe ke he toloaga tagata he fakaaoga e peleō tohi, mailoga nakai e koe ka mamali mo e feleveia fakakapitiga a koe ke he tau tagata, to mukamuka a lautolu ke o mai mo e uta e tau tohi? Liga manako foki a lautolu ke kamata e fakatutalaaga!

6. Ko e heigoa ne lagomatai e taha hoa motua ke tumau e makutu he gahua fakamatala?

⁶ Ko e hoa motua i England ne nakai lahi e fakamatala mai he taha fale ke he taha fale tuga fakamua ha kua nakai malolō e tau tino ha laua. Fakatū e laua e laulau ne tuku ai e tau tohi i fafo he fale ha laua. Nonofo tata a laua ke he aoga ti tuku e laua e tau tohi ne futia ke he tau matua ne o mai ke uta e tau fanau ha lautolu. Falu matua ne kua uta e tau tohi nei, putoia e Questions Young People Ask​—Answers That Work, Volume 1 mo e 2. Fa fakalataha e matakainaga fifine paionia mo e hoa nei. Mailoga he tau matua e aga kapitiga haana mo e manako mooli he hoa ke lagomatai e falu. Taha e matua ne kamata foki e fakaako Tohi Tapu.

7. Lagomatai fēfē e koe e tau tagata ne fehola mai ke he matakavi haau?

⁷ Nakaila leva ia, tokologa ne fehola mai he motu ha lautolu ti nonofo mogonei he falu motu. Ko e heigoa haau ka taute ke lagomatai a lautolu ia ne nonofo he matakavi haau ke fakaako hagaao ki a Iehova? Fakamua, maeke a koe ke fakaako ke talahau e fakafeleveia he vagahau ha lautolu. Lafi ki ai, fakaaoga e JW Language app ke fakaako falu talahauaga gahoa ne liga taute a lautolu ke tutū mo e tutala ki a koe. Maeke mogoia a koe ke fakakite e tau vitiō mo e tau tohi he  vagahau ha lautolu he jw.org.​—Teutaronome 10:19.

8, 9. (a) Lagomatai fēfē he tau feleveiaaga he vahā tapu a tautolu? (e) Maeke fēfē e tau matua ke lagomatai e fanau ha lautolu ke holo ki mua e tali ha lautolu he feleveiaaga?

⁸ Foaki e Iehova ki a tautolu e mena kua latatonu ka fakamatala a tautolu. Ma e fakatai, ko e mena ne fakaako e tautolu he Feleveiaaga ke he Moui mo e Fekafekauaga kua lagomatai a tautolu ke logona hifo e mauokafua lahi he taute e tau liu aahi atu mo e kamata e tau fakaako Tohi Tapu.

⁹ Ka o mai e tau tagata ahiahi ke he tau feleveiaaga ha tautolu, fa nava a lautolu ke he tau tali he tau fanau ha tautolu. Fakaako e koe e fanau haau ke tali he tau kupu ni ha lautolu. Futia mai e falu tagata ke he kupu mooli he logona e lautolu e tau fanau ne fakakite e tua he puhala mukamuka mo e mai he loto.​—1 Korinito 14:25.

10. Maeke fēfē e tapuakiaga magafaoa ke lagomatai e tau magafaoa ha tautolu ke lahi e kaufakalataha?

¹⁰ Ka eketaha a tautolu ke fakamahani e magafaoa ke gahua auloa he kaufakalataha mo e mafola, kua tamai e tautolu e fakahekeaga ki a Iehova. Ma e fakatai, kaeke ko e matua a koe, fakatoka ke taute tumau e Tapuakiaga he Magafaoa he afiafi. Loga e magafaoa ne kitekite auloa e JW Broadcasting, ti fakatutala fakamui ke he puhala ka fakaaoga e lautolu e tau mena ne fakaako ai. Manatu ko e takitakiaga kua lata mo e tama tote kua kehe mai he takitakiaga kua  lata mo e fuata mui. Taute e tau mena oti kua maeke a koe ke lagomatai e tau tagata takitaha he magafaoa haau ke aoga mooli mai he tapuakiaga magafaoa.​—Salamo 148:12, 13.

11-13. Maeke fēfē a tautolu ke lagomatai e fakapotopotoaga ke lahi e kaufakalataha?

¹¹ Kaeke ko e fuata a koe, maeke ia koe ke lagomatai e tau tagata oti he fakapotopotoaga ke logona hifo kua fakaalofa ki a lautolu. Taha puhala ko e kapitiga mo e tau matakainaga momotua. Hūhū ke he mena ne lagomatai a lautolu ke tumau e fekafekau ki a Iehova ke he tau tau loga. Maeke a lautolu ke fakaako a koe ke he tau fakaakoaga uho lahi. To fakamafana he mena nei a lautolu mo koe! Ko tautolu oti, fuata po ke momotua ka fakafeleveia e tau tagata ka ahiahi mai ke he ha tautolu a Fale he Kautu. Maeke a koe ke fakaalofa atu, mamali fakamitaki ki ai, lagomatai a lautolu ke kumi e nofoa, mo e uta ke feleveia mo e falu. Taute a lautolu ke mafanatia e logonaaga.

¹² Ka kotofa a koe ke taute e tau feleveiaaga ma e gahua he fonua, maeke a koe ke lagomatai a lautolu ne momotua ke kikila atu tumau e maama ha lautolu. Mailoga kua hagahaga mitaki e fonua ha lautolu. Fakatoka ke gahua mo lautolu ne fuata. Fa loto lolelole e tau matakainaga momotua mo lautolu ne nakai malolō e tau tino ha kua nakai lahi e gahua fakamatala ha lautolu tuga fakamua. Ka e mitaki e logonaaga ha lautolu ka iloa kua manamanatu a koe ki a lautolu mo e maama e tuaga ha lautolu. Pete kua momotua a lautolu po ke fiha e leva he kupu mooli, fakamalolō he mahani totonu haau a lautolu ke tumau e fakamatala fakamakutu.​—Levitika 19:32.

¹³ Fiafia e tau Isaraela ke tapuaki auloa ki a Iehova. Tohi he salamo: “Ko e mena mitaki lahi mo e fulufuluola, ke nonofo fakalataha e tau matakainaga.” (Totou Salamo 133:1, 2.) Fakatatai e ia e kaufakalataha ke he lolo fakauku nukua takai aki e tino mo e manogi. He puhala pihia, maeke a tautolu ke atihake e tau matakainaga ha tautolu he mahani mitaki mo e totonu. Taute he mena nei e fakapotopotoaga ke lahi e kaufakalataha. Maeke nakai a koe ke iloa mitaki e tau matakainaga he fakapotopotoaga haau?​—2 Korinito 6:11-13.

14. Maeke fēfē a koe ke fakakikila haau a maama ke he matakavi ne nofo ai a koe?

¹⁴ Maeke e maama haau ke kikila he ha mena ne ha ha i ai a koe. Maeke e mahani totonu haau ke manako e tau katofia kaina ke fakaako fakalahi hagaao ki a Iehova. Hūhū hifo: ‘Ko e heigoa e manatu he tau katofia kaina haaku ki a au? Maopoopo mo e meā nakai e kaina haaku? Mitaki nakai he tuutakaina? Ko e katofia lagomatai nakai au?’ Hūhū ke he falu matakainaga ko e lauia fēfē e mahani totonu mo e fakafifitakiaga mitaki ha lautolu ke he ha lautolu a tau magafaoa, tau katofia, tau kapitiga gahua, po ke tau kapitiga aoga.​—Efeso 5:9.

15. Ko e ha kua lata a tautolu ke tumau e mataala?

¹⁵ Ka manako a tautolu ke tumau ai e kikila  lahi he maama, kua lata ke mataala ke he magaaho kua nonofo a tautolu. Lagaloga ne tala age a Iesu ke he tau tutaki haana: “Kia mataala.” (Mataio 24:42; 25:13; 26:41) Ka logona hifo e tautolu kua mamao lahi agaia e ‘matematekelea lahi,’ to nakai mataala a tautolu ke he tau magaaho takitaha ke lagomatai e falu ke fakaako hagaao ki a Iehova. (Mataio 24:21) He nakai kikila lahi e maama ha tautolu to lolelole fakahaga ai ti liga galo foki.

16, 17. Ko e heigoa haau ka taute ke tumau e logonaaga fakamafiti?

¹⁶ Lata a tautolu ke mua atu e tumau he mataala mogonei. Ko e tau tuaga he lalolagi kua matutaki ke holo ki mua e kelea. Ka e iloa e tautolu to hoko mai e fakaotiaga he magaaho tonu ha Iehova ne fifili. (Mataio 24:42-44) Ato hoko e magaaho ia, lata a tautolu ke fakauka mo e hagaaki ke he ha tautolu a vahā i mua. Totou e Tohi Tapu he tau aho takitaha, mo e fakatumau ke liogi ki a Iehova. (1 Peteru 4:7) Fakaako mai he tau matakainaga ne kua leva e fekafekau ki a Iehova. Ma e fakatai, totou e koe e tau mena tutupu he moui, tuga e vala tala “Fitugofulu e Tau he Tōtō Atu e Kala Tapulu he Tagata Iuta,” ne tohi he Ko e Kolo Toko ia Aperila 15, 2012, lau 18-21.

 ¹⁷ Fakatumau ke fekafekau ki a Iehova. Taute e tau mena mitaki ma e falu, ti fai magaaho mo e tau matakainaga haau. To fiafia a koe, ti tuga na mafiti e mole he tau magaaho. (Efeso 5:16) Lahi e mena ne taute he tau fekafekau ha Iehova he taha e teau tau kua mole. He vahā nei, kua mua atu e lavelave ha tautolu. Tupu lahi e gahua ha Iehova nakai tuga e mena ne manamanatu a tautolu ki ai. Kua kikila lahi mooli e maama ha tautolu!

18, 19. Maeke fēfē e tau motua ke lagomatai a tautolu ke fekafekau fakamakutu ki a Iehova? Talahau e fakatai.

¹⁸ Pete kua loga e tau hehē ne taute e tautolu, fakaatā e Iehova a tautolu ke fekafekau ki a ia. Ke lagomatai a tautolu, foaki e ia e “tau mena fakaalofa ke he tau tagata,” ko e tau motua he fakapotopotoaga. (Totou Efeso 4:8, 11, 12.) Ti ka ahiahi atu e tau motua ki a koe, fakaaoga e magaaho haau mo lautolu ke fakaako mai he ha lautolu a pulotu mo e fakatonuaga.

¹⁹ Ma e fakatai, ko e hoa i England ne fai lekua e fakamauaga ha laua ti ole ke he tokoua e motua ma e lagomataiaga. Logona hifo he hoana kua nakai takitaki he taane haana e fekafekauaga ki a Iehova. Logona hifo he taane kua nakai ko e faiaoga mitaki a ia ti pehē kua nakai fakatoka e ia ke taute tumau e tapuakiaga he magafaoa. Lagomatai he tau motua e hoa ke manamanatu ke he fakafifitakiaga ha Iesu. Fakamafana e laua e taane ke fifitaki e puhala ne leveki e Iesu e tau tutaki haana. Fakamafana e laua e hoana ke fakamanavalahi ke he taane haana. Talahau foki e laua falu lagomataiaga ke he puhala ka taute he hoa e tapuakiaga magafaoa mo e fanau tokoua ha laua. (Efeso 5:21-29) Gahua malolō e taane ke eke mo ulu mitaki he magafaoa. Fakamafana he tau motua a ia ke nakai fakalolelole mo e tumau e falanaki ke he agaaga ha Iehova. Ko e fakaalofa mo e totonu ne fakakite he tau motua ne lagomatai mooli e magafaoa ia!

20. Ko e heigoa e fua ka fakakikila e koe haau a maama?

²⁰ “Uhoaki a lautolu oti kua matakutaku kia Iehova, ko lautolu ne o ke he hana tau puhala.” (Salamo 128:1) To fiafia a koe ka fakakikila e koe haau a maama. Kia fakaako e falu hagaao ke he Atua, taute e tau mena oti kua maeke a koe ke lagomatai haau a magafaoa mo e fakapotopotoaga ke kaufakalataha, ti tumau ke mataala. To kitia he falu e fakafifitakiaga mitaki haau mo e to manako foki ke fakaheke ke he ha tautolu a Matua ko Iehova.​—Mataio 5:16.