1. Ko e ha kua lata a tautolu ke fanogonogo ke he hatakiaga ha Iesu?

KE HE perofetaaga ha Iesu he tau aho fakamui, pehē a ia: “A mutolu neke pehia ha mutolu a tau loto, he . . . fakaatukehe he tau mena he mouiaga nai,” ne kakano ko e tupetupe ke he tau mena he moui he tau aho takitaha. (Luka 21:34) Lata a tautolu ke fanogonogo ke he hatakiaga ia. Ko e ha? He magaaho nei, lata a tautolu ke fehagai mo e tau vahega lekua pihia he fakaatukehe ne fehagai mo e tau tagata oti.

2. Ko e heigoa e tau lekua fakaatukehe ne fehagai mo e tau matakainaga ha tautolu?

² Falu magaaho kua fehagai a tautolu mo e loga e lekua fakaatukehe he taha ne magaaho. Manamanatu ke he tau fakafifitakiaga nai. Ko e Fakamoli ne higoa ko John, * ne matematekelea he gagao multiple sclerosis ne momoko lahi he toka he hoana haana a ia he mole e 19 e tau he fakamauaga. Ti oti e fekafekau he tau tama fifine tokoua haana ki a Iehova. Ka e kehe e paleko ne fehagai mo e hoa ne higoa ko Bob mo Linda. Nakai fai gahua tokoua a laua, ti nakai fai kaina foki a laua. Lafi ke he tau lekua ia, matematekelea a Linda he moua he gagao ate, mo e taha gagao foki ne kamata ke moumou e holoaga he malolō tino haana.

3. Ia Filipi 4:6, 7, ko e heigoa kua mauokafua a tautolu ki ai?

³ Mauokafua a tautolu kua maama he ha tautolu a Tufuga mo e Matua fakaalofa ko Iehova e fakaatukehe ne lauia a tautolu. Ti manako a ia ke lagomatai a tautolu ke fehagai mo e tau paleko ha tautolu. (Totou Filipi 4:6, 7.) Loga e tala kua fakamau he Kupu he Atua ne fakamaama e tau paleko ne fakauka ki ai e tau fekafekau haana. Fakamau foki i loto e puhala ne lagomatai e Iehova a lautolu ke fehagai mo e tau tutūaga fakaatukehe pihia. Fakatutala la a tautolu ke he falu fakafifitakiaga.

4. Ko e heigoa e tau paleko ne fehagai mo Elia, ti fēfē e logonaaga haana ki a Iehova?

⁴ Fekafekau a Elia ki a Iehova he magahala uka mo e fehagai ke he tau paleko kelea lahi. Ko e Patuiki ko Ahapo ko e taha he tau patuiki nakai fakamooli he fakamauaga tala i Isaraela, ne mau mo Iesepela ko e fifine mahani kelea ne tapuaki ki a Paala. Fakapuke e laua e motu ke he tapuaki ki a Paala mo e kelipopo e tau perofeta tokologa ha Iehova. Ka e maeke a Elia ke hola. Hao foki a ia he hoge lahi he falanaki ki a Iehova. (1 Patu. 17:2-4, 14-16) Lafi ki ai, falanaki a Elia ki a Iehova he feleveia a ia mo e tau perofeta mo e tau tagata tapuaki ki a Paala. Tomatoma e ia e tau Isaraela ke fekafekau ki a Iehova. (1 Patu. 18:21-24, 36-38) Loga e fakamooliaga ha Elia kua lalago e Iehova a ia he tau magaaho fakaatukehe pihia.

5-6. Ia 1 Tau Patuiki 19:1-4, fēfē e logonaaga ha Elia, ti fakakite fēfē e Iehova kua fakaalofa a ia ki a Elia?

⁵ Totou 1 Tau Patuiki 19:1-4. Ka e matakutaku a Elia he lali e Patuiki Fifine ko Iesepela ke kelipopo a ia. Ti hola a ia ke he matakavi ko Peresepa. Ne lolelole lahi e logonaaga haana ti “ole atu a ia ke mate.” Ko e ha ne logona hifo pihia a ia? Ko Elia ko e tagata nakai mitaki katoatoa, “ko e tagata haia tuga na tautolu.” (Iako. 5:17) Liga molea e fakaatukehe haana mo e mategūgū e tino. Liga manatu a Elia ko e tau laliaga haana ke fakaholo ki mua e tapuakiaga meā kua fakateaga, ti nakai fai mena i Isaraela kua mitaki, ti ko ia ni tokotaha ne fekafekau agaia ki a Iehova. (1 Patu. 18:3, 4, 13; 19: 10, 14) Liga ofo a tautolu he tali he perofeta fakamooli nei. Ka e maama e Iehova e tau logonaaga ha Elia.

⁶ Nakai ita a Iehova he fakakite e Elia e tau logonaaga haana. Ka e lagomatai e ia a Elia ke liu moua e malolō. (1 Patu. 19:5-7) He mogo fakamui ne hikihiki totonu e Iehova e manamanatuaga ha Elia he fakakite e malolō ofoofogia Haana. Tala age e Iehova ko e 7,000 he tau tagata Isaraela ne nakai talia agaia ke tapuaki ki a Paala. (1 Patu. 19:11-18) Mai he tau fakafifitakiaga nei, fakakite e Iehova kua fakaalofa a ia ki a Elia.

7. Ko e heigoa e mauokafua ne moua e tautolu mai he puhala ne lagomatai e Iehova a Elia?

⁷ Hane fehagai kia a koe mo e tuaga fakaatukehe? Mafanatia mooli ma tautolu ke iloa kua maama e Iehova e tau logonaaga ha Elia! Mauokafua ai a tautolu ha kua maama e ia e taufetului he tau manamanatuaga ha tautolu. Iloa e ia e tau kūkū ha tautolu ti iloa foki e ia e tau mena ne manamanatu mo e logona hifo e tautolu. (Sala. 103:14; 139:3, 4) Ka fifitaki e tautolu a Elia he falanaki ki a Iehova, to lagomatai e ia a tautolu ke fehagai mo e tau lekua ne fakatupu e fakaatukehe ha tautolu.​—Sala. 55:22.

8. To lagomatai fēfē e Iehova a koe ke fehagai mo e fakaatukehe?

⁸ Fakatupu foki he fakaatukehe a koe ke manamanatu kelea he taute a koe ke lolelole e logonaaga. Ka tupu e mena ia, manatu to lagomatai e Iehova a koe ke fehagai mo e fakaatukehe. Lagomatai fēfē e ia a koe? Uiina e ia a koe ke tala age haau a tau tupetupe ki a ia. To tali e ia e tau ole haau ma e lagomatai. (Sala. 5:3; 1 Pete. 5:7) Liogi tumau ki a Iehova hagaao ke he tau lekua haau. To nakai vagahau fakahako a ia ki a koe tuga ne taute e ia ki a Elia, ka e to vagahau a ia ki a koe puhala he haana a Kupu ko e Tohi Tapu mo e haana fakatokatokaaga. Ko e tau fakamauaga ne totou e koe he Tohi Tapu ka fakamafana a koe ke moua e amaamanakiaga haau. Ti maeke foki e tau matakainaga haau ke fakamafana a koe.​—Roma 15:4; Hepe. 10:24, 25.

9. Maeke fēfē he kapitiga tata ke lagomatai a tautolu?

⁹ He mogo ne tala age a Iehova ki a Elia ke age falu matagahua ki a Elisaio, foaki e Ia ki a Elia e kapitiga mitaki ke lagomatai a ia ke fahia he logonaaga loto lolelole haana. Pihia foki, ka tutala a tautolu ke he kapitiga tata lahi, maeke a ia ke lagomatai a tautolu ke fahia ke he tau logonaaga loto lolelole ha tautolu. (2 Patu. 2:2; Fakatai 17:17) Ka logona hifo e koe kua nakai fai tagata ke tutala ki ai, liogi ki a Iehova ke lagomatai a koe ke moua e matakainaga Kerisiano motua fakaagaaga ke fakamafana a koe.

10. Foaki fēfē he mena ne tupu ki a Elia e amaamanakiaga ki a tautolu, ti maeke fēfē he maveheaga ia Isaia 40:28, 29 ke lagomatai a tautolu?

¹⁰ Lagomatai e Iehova a Elia ke fahia ke he tau fakaatukehe mo e fekafekau fakamooli ke he loga e tau tau. Ko e mena ne tupu ki a Elia kua foaki ki a tautolu e amaamanakiaga. Liga lauia a tautolu he falu magaaho he tau fakaatukehe lahi mahaki ti logona hifo e tupetupe fakatino mo e manamanatuaga ha tautolu. Kaeke ke falanaki a tautolu ki a Iehova, to foaki e ia ki a tautolu e malolō kua lata mo tautolu ke tumau e fekafekau ki a ia.​—Totou Isaia 40:28, 29.

11-13. Lauia fēfē e tau fekafekau tokotolu he Atua i tuai he fakaatukehe?

¹¹ Fai tagata foki he Tohi Tapu ne fehagai mo e fakaatukehe lahi. Ma e fakatai, ko Hana ne fakauka ke he mamahi he nakai fai tama ti vaiga he taha hoana he taane haana. (1 Samu.  1:2, 6) Taute he fakaatukehe lahi mahaki nei a Hana ke loto kona ti tagi a ia mo e nakai fia kai.​—1 Samu. 1:7, 10.

¹² Falu mogo, ne molea e fakaatukehe he Patuiki ko Tavita. Manamanatu ke he tau paleko ne fehagai mo ia. Ne pehia a ia he agahala ke he tau hehē loga ne taute e ia. (Sala. 40:12) Ko e tama fakahele haana ko Apisaloma ne totoko ki a ia, ne takitaki ke he mate ha Apisaloma. (2 Samu. 15:13, 14; 18:33) Taha he tau kapitiga tata ha Tavita ne nakai fakamooli ki a ia. (2 Samu. 16:23–17:2; Sala. 55:12-14) Loga e tau salamo ne tohi e Tavita ne fakakite e tau logonaaga haana he loto lolelole mo e falanaki katoatoa haana ki a Iehova.​—Sala. 38:5-10; 94:17-19.

¹³ Magaaho fakamui ne kamata e salamo ke mahekeheke he puhala moui he tau tagata mahani kelea. Liga ko ia mai he magafaoa ha Asafo ko e Levi ti kua fekafekau a ia he “faituga he Atua.” Matematekelea e salamo nei he fakaatukehe e logonaaga haana ti fakatupu a ia ke nakai fiafia mo e tupetupe. Kamata foki a ia ke fakauaua ke he tau monuina ne moua mai he fekafekau ke he Atua.​—Sala. 73:2-5, 7, 12-14, 16, 17, 21.

14-15. Ko e heigoa kua fakaako mai e tautolu he tau fakafifitakiaga tolu he Tohi Tapu he ono atu ki a Iehova ma e lagomatai?

¹⁴ Ko e tau fekafekau tapuaki mooli tokotolu ne totoku laia ne falanaki oti ke he lagomatai ha Iehova. Tala age e lautolu e tau fakaatukehe ha lautolu ki a Ia puhala he liogi fakamakamaka. Atāina a lautolu he tala age ki a Ia e tau kakano ne fakaatukehe lahi a lautolu. Ti matutaki a lautolu ke o atu ke he fale he tapuakiaga ha Iehova.​—1 Samu. 1:9, 10; Sala. 55:22; 73:17; 122:1.

¹⁵ Tali mafanatia atu a Iehova ki a lautolu takitokotaha. Moua e Hana e mafola he  manamanatuaga. (1 Samu. 1:18) Tohi e Tavita: “Loga e tau mena kelea ke hohoko ke he tagata tututonu; ka e laveaki e Iehova a ia mai he tau mena oti ia.” (Sala. 34:19) Logona hifo he salamo he mogo fakamui ko Iehova ne “toto e [haana] lima matau,” ti takitaki a ia aki e fakatonuaga totonu. Lologo e ia: “Ka ko au, ko e mitaki kia au ke fakatata ke he Atua; kua eke e au e Iki ko Iehova mo kolo haku.” (Sala. 73:23, 24, 28) Ko e heigoa kua fakaako e tautolu mai he tau fakafifitakiaga nei? Falu mogo, to pehia a tautolu he tau lekua ne fakatupu a tautolu ke fakaatukehe. Ka e maeke a tautolu ke fahia ka manamanatu ke he puhala ne lagomatai e Iehova e falu, falanaki ki a ia he liogi, mo e omaoma ki a ia he taute e tau mena ne ole mai a ia ke taute e tautolu.​—Sala. 143:1, 4-8.

16-17. (a) Ko e ha kua nakai lata a tautolu ke vevehe kehe e tautolu a tautolu? (e) Maeke fēfē a tautolu ke liu moua e malolō?

¹⁶ Ko e tau fakafifitakiaga tolu ia ne iloa e tautolu e taha fakaakoaga aoga foki​—nakai lata a tautolu ke vevehe kehe mai ia Iehova mo e tau tagata haana. (Fakatai 18:1) Ko Nancy ne fakaatukehe lahi mahaki he tiaki he taane haana, ne pehē: “Loga e aho ne nakai manako au ke kitia po ke tutala ke he ha tagata. Ka e he lahi e vevehe kehe e au a au, kua  lahi ni e momoko haaku.” Hiki ai e tuaga he mogo ne kumi e Nancy e tau puhala ke lagomatai e falu ne lauia he tau lekua. Pehē a ia: “Fanogonogo au he fakamaama he falu e tau taufetului ha lautolu. Mailoga e au ka lahi e fakaalofa haaku ki a lautolu, to tote e momoko haaku ki a au ni.”

¹⁷ Maeke a tautolu ke moua e malolō he o atu ke he tau fakapotopotoaga. Kaeke ko tautolu he fakapotopotoaga, to foaki mai e Iehova ki a tautolu e tau magaaho ke eke a ia mo “lagomatai mai, mo e fakamafana mai.” (Sala. 86:17) Fakamalolō e ia a tautolu puhala he haana a agaaga tapu, Kupu, mo e tau tagata. Foaki he tau fakapotopotoaga ki a tautolu e magaaho ke moua e “fefakamafanaaki.” (Roma 1:11, 12) Ko e matakainaga fifine ko Sophia ne pehē: “Ko Iehova mo e tau matakainaga ha tautolu ne lagomatai au ke tumau e fakauka. Mua atu ki a au e tau fakapotopotoaga. Mailoga e au ka lahi e fakalataha haaku ke he gahua he fonua mo e fakapotopotoaga, kua maeke au ke fehagai fakamitaki mo e fakaatukehe mo e tupetupe.”

18. Ka logona hifo e tautolu e loto lolelole, ko e heigoa ka foaki mai e Iehova ki a tautolu?

¹⁸ Ka logona hifo e tautolu e loto lolelole, kia manatu kua nakai ni mavehe mai e Iehova to utakehe tukulagi e ia e fakaatukehe he vahā i mua ka e foaki foki e ia ki a tautolu e lagomatai ke fehagai mo e fakaatukehe mogonei. Foaki mai e ia ki a tautolu e “loto ke he hana finagalo fakaalofa” ke kautū mai he tau logonaaga loto lolelole mo e nakai fahia.​—Filipi 2:13.

19. Ko e heigoa e maveheaga ne foaki mai he Roma 8:37-39 ki a tautolu?

¹⁹ Totou Roma 8:37-39. Fakamafana mai he aposetolo ko Paulo ki a tautolu to nakai fai mena ke vevehe a tautolu mai he fakaalofa he Atua. Maeke fēfē a tautolu ke lagomatai e tau matakainaga hane lali ke fahia mai he fakaatukehe? Ko e vala tala ka mui mai to hakahaka e puhala ka fifitaki e tautolu a Iehova he fakakite e fakaalofa hofihofi noa mo e lalago e tau matakainaga ha tautolu ka fakaatukehe a lautolu.