Kua fakamau he tau kupu tohi ia hiva e aga Kerisiano: “Ko e fua he Agaga ko e fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.” Ka e nakai kuenaia he tau aga mitaki kua lagomatai he agaaga he Atua a tautolu ke feaki.

Mailoga e mena ne tohi e Paulo he tau kupu tohi fakamua: Ko e “tau gahua he tino, . . . ko e faivao, ko e feuaki, ko e mahani kelea, ko e matahavala, ko e hufeilo ke he tupua, ko e eke lagatau he taulaatua, ko e feitaaki, ko e taufetoko, ko e ita tafuā, ko e vale, ko e lagalagahou, ko e feveheveheaki, ko e tau veveheaga, ko e mahekeheke, ko e keli tagata, ko e konahia, ko e tafeauhi, mo e tau mena pihia.” (Kala. 5:19-21) Ti liga maeke a Paulo ke talahau foki falu “gahua he tino,” tuga ne hagaao ki ai e Kolose 3:5. Pihia foki, he oti e tohi hiva e aga mitaki, pehē a ia: “Kua nakai fai fakatufono ke he tau mena pihia.” Ti kua nakai lali a Paulo ke tohi oti e tau aga mitaki kua maeke a tautolu ke feaki he lagomatai he agaaga tapu.

Kitia e tautolu e mena nei ka fakatatai ai ke he tau kupu ha Paulo ke he fakapotopotoaga i Efeso: “Ko e fua he [“maama,” NW], ko e mahani mitaki oti kana ia, mo e tututonu, mo e tau kupu moli.” (Efeso 5:8, 9) Ē, ko e “mahani mitaki,” fakalataha mo e tututonu mo e kupu mooli, ko e vala he ‘fua he maama,’ ti ko e vala foki he “fua he Agaga.”

Pihia foki, ne omoomoi e Paulo a Timoteo ke “tutuli e tututonu, mo e mahani Atua, mo e tua, mo e fakaalofa, mo e fakauka, mo e mahani molu”​—ono e aga mitaki lahi. (1 Timo. 6:11) Fā he tau mena ia (tua, fakaalofa, fakauka, mo e mahani molu) ne totoku ko e tau vala he “fua he Agaga.” Ka e manako foki a Timoteo ke lagomatai he agaaga ke feaki e falu aga ne kua totoku: ko e tututonu mo e mahani Atua.​—Fakatatai Kolose 3:12; 2 Peteru 1:5-7.

Ko e mena ia, nakai tohi he Kalatia 5:22, 23 e tau aga oti kua lata e tau Kerisiano ke feaki. Maeke e agaaga he Atua ke lagomatai a tautolu ke feaki e tau aga ne hiva he “fua he Agaga.” Ka e loga foki e aga kua lata ke feaki ke eke mo tau Kerisiano kua motua fakaagaaga mo e “tapulu . . . ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.”​—Efeso 4:24.