1. Tali mai he fakavēaga, ko e heigoa e aga ne fakakite e tau gahua he Atua?

KUA kaufakalataha a Iehova mo Iesu mai he fakavēaga he lalolagi. Ne tufuga e Iehova a Iesu ato tufugatia e ia e tau mena oti ne toe. Ti gahua a Iesu mo Iehova ti ha ha i ai mo Ia e “tufuga,” po ke iki gahua. (Tau Fakatai 8:30) Ne kauauloa foki e tau fekafekau ha Iehova he gahua ne lata a lautolu ke taute. Ma e fakatai, ne tā auloa e Noa mo e magafaoa haana e vaka. Fakahiku, ne gahua auloa e tau Isaraela ke ati hake e faituga, ke tuku hifo ki lalo, mo e hiki ai ke he taha matakavi mo e taha matakavi. He faituga, ne lologo mo e tā auloa e lautolu e tau leo fakatagitagi mo e tau leo kofe fulufuluola ke fakaheke aki a Iehova. Maeke he tau tagata ha Iehova ke taute e tau mena oti nei ha kua kauauloa a lautolu.​—Kenese 6:14-16, 22; Numera 4:4-32; 1 Nofoaga he Tau Patuiki 25:1-8.

2. (a) Ko e heigoa ne mailoga lahi hagaao ke he fakapotopotoaga Kerisiano fakamua atu? (e) Ko e heigoa e tau hūhū ka fakatutala a tautolu ki ai?

 ² Ko e tau Kerisiano he senetenari fakamua ne kauauloa foki. Fakamaama he aposetolo ko Paulo pete ne kehekehe e tau lotomatala mo e tau kotofaaga ha lautolu, kua kaufakalataha a lautolu. Mumui oti a lautolu ke he ha lautolu a Takitaki ko Iesu Keriso. Kua fakatatai e Paulo a lautolu ke he tino ne kehekehe e tau tutaki ka kua gahua fakalataha ai. (Totou 1 Korinito 12:4-6, 12.) Ka e kua a tautolu mogonei? Maeke fēfē a tautolu ke kauauloa he gahua fakamatala, he fakapotopotoaga, mo e he magafaoa?

3. Ko e heigoa e fakakiteaga ne moua he aposetolo ko Ioane?

³ He senetenari fakamua, ne kitia he aposetolo ko Ioane e fakakiteaga he tau agelu ne fitu ne ulo e tau pū. He ulo he agelu ke limaaki e pū haana, ne kitia e Ioane “e fetu kua to mai he lagi ke he lalolagi.” Ko e “fetu” ia ne fakaaoga e kei ke hafagi aki e gutuhala ke he pahua nakai gata mai. Fakamua, ne hake mai he pahua ia e ahua ti felele mai e tau hē akerisi. He nakai moumou e tau akau po ke tau laukou, ne moumou e lautolu e tau tagata ne “nakai toka ai e fakamailoga he Atua ke he tau matale ha lautolu.” (Fakakiteaga 9:1-4) Iloa e Ioane ko e loga he tau hē akerisi ka fakatupu e moumouaga lahi; ha kua taute pihia e lautolu i Aikupito he magahala ha Mose. (Esoto 10:12-15) Ko e tau hē akerisi ne kitia e Ioane ne hukui he tau Kerisiano fakauku hane fakamatala e fekau malolō lahi ke he lotu fakavai. Ti totou miliona e falu kua amaamanaki atu ke he moui he lalolagi kua fakalataha mo lautolu. Kua kauauloa a lautolu he gahua fakamatala nei. Lagomatai he gahua nei e tau tagata tokologa ke tiaki e lotu fakavai mo e ke tokanoa mai he pule ha Satani.

4. Ko e heigoa e gahua kua lata he tau tagata he Atua ke taute, ti ko e puhala fe ni kua maeke a lautolu ke taute e mena nei?

⁴ Ha ha ia tautolu e kotofaaga ke fakamatala e “tala mitaki” ke he tau tagata he lalolagi katoa ato hoko mai e moumouaga. Ko e gahua lahi mahaki anei! (Mataio 24:14; 28:19, 20) Lata ia tautolu ke uiina a lautolu oti kua “fia inu” ke he “vai he moui,” kakano kua lata ia tautolu ke fakaako e kupu mooli he Tohi Tapu ki a lautolu oti kua manako ke maama ai. (Fakakiteaga 22:17) Ka e maeke a tautolu ke taute e mena nei kaeke “kua fakamau, mo e tutaki fakalataha” e tau tagata oti he fakapotopotoaga.​—Efeso 4:16.

5, 6. Kaufakalataha fēfē a tautolu he fakamatala e tala mitaki?

⁵ Ke maeke ke hokotia ke he tau tagata tokologa, kua lata a tautolu ke fakatokatoka fakamitaki he gahua fakamatala ha tautolu. Ko e takitakiaga ne moua e tautolu mai he fakapotopotoaga kua lagomatai a tautolu ke taute e mena nei. Ka mole e feleveia ha tautolu ke lata mo e gahua he fonua, o atu a tautolu ke tutala ke he tau tagata hagaao ke he tala mitaki he Kautu. Kua foaki foki e  tautolu ki a lautolu e tau tohi hagaao ke he Tohi Tapu. Ti kua loga lahi mahaki e tohi kua tufatufa e tautolu ke he lalolagi katoa. Falu mogo ne ole ki a tautolu ke fakalataha ke he tau matagahua fakamatala pauaki. Ka taute e koe e gahua nei, kua fakalataha a koe mo e toko miliona foki he lalolagi katoa hane fakamatala e fekau taha nei! Kua gahua foki a koe mo e tau agelu hane lagomatai e tau tagata he Atua ke fakamatala e tala mitaki.​—Fakakiteaga 14:6.

⁶ Ko e fiafia ha ia ke totou he Yearbook hagaao ke he tau fua he gahua fakamatala he lalolagi katoa! Manamanatu foki ke he puhala kua kaufakalataha a tautolu he lalolagi katoa he uiina e tautolu e tau tagata ke he tau fonoaga ha tautolu. Kua tatai mogoia e vala tala ha tautolu ne fanogonogo ki ai. Atihake he tau lauga, tau taute tala, mo e tau fakatātāaga a tautolu ke foaki katoatoa a tautolu ki a Iehova. Kua kaufakalataha foki a tautolu mo e tau matakainaga ha tautolu he lalolagi katoa ka ō a tautolu ke he Fakamanatuaga he tau tau takitaha. (1 Korinito 11:23-26) Kua taha ne aho ne feleveia auloa a tautolu ia Nisana 14, he mole e toaga laā ke fakakite e loto fakaaue ke he mena ne taute e Iehova ma tautolu mo e ke omaoma ke he poakiaga ha Iesu. He tau faahi tapu ato hoko e Fakamanatuaga, kua gahua auloa a tautolu ke uiina e tau tagata tokologa ke fakalataha mo tautolu ke he matafekau pauaki nei.

7. He gahua auloa a tautolu, ko e heigoa kua maeke a tautolu ke taute?

⁷ Ko e taha e hē akerisi kua nakai lahi mahaki e mena ka moumou. He gahua tokotaha a tautolu, kua nakai maeke a tautolu ke fakamatala ke he tau tagata oti. Ka e he gahua fakalataha a tautolu, kua maeke a tautolu ke tala age ke he tau miliona tagata hagaao ki a Iehova mo e ke lagomatai e falu ke fakaheke mo e fakalilifu a Ia.

8, 9. (a) Ko e heigoa e fakatai ne fakaaoga e Paulo ke fakaako aki e tau Kerisiano ke kaufakalataha tumau? (e) Kauauloa fēfē a tautolu mo e fakapotopotoaga?

⁸ Fakamaama e Paulo ke he tau Efeso e puhala kua fakatokatoka e fakapotopotoaga, ti pehē a ia kua lata he tau fakapotopotoaga oti ke “tutupu . . . ke he tau mena oti kana.” (Totou Efeso 4:15, 16.) Fakaaoga e Paulo e fakataiaga ke he tino ke fakamaama kua maeke he tau Kerisiano takitaha ke lagomatai e fakapotopotoaga ke fakatumau e kaufakalataha mo e ke muitua a Iesu, ko e Takitaki he fakapotopotoaga. Pehē a ia ko e tau vala takitaha he tino kua tutaki fakalataha “he tau fatia takitaha.” Ti he fuata po ke momotua a tautolu, mitaki po ke nakai mitaki e malolō tino, ko e heigoa kua lata ia tautolu takitokotaha ke taute?

⁹ Kua kotofa e Iesu e tau motua ke taki e fakapotopotoaga, ti manako a ia ki a tautolu ke fakalilifu a lautolu mo e muitua e takitakiaga ne tuku mai e lautolu ki a tautolu. (Heperu 13:7, 17) Nakai mukamuka tumau e mena nei ke taute. Ka e maeke a tautolu ke ole ki a Iehova ma e lagomatai. Maeke he  agaaga tapu haana ke lagomatai a tautolu ke omaoma ke he tau takitakiaga ne tuku mai he tau motua ki a tautolu. Manamanatu foki hagaao ke he lahi he lagomataiaga ha tautolu ke he fakapotopotoaga kaeke ke fakatokolalo mo e kauauloa a tautolu mo e tau motua. To kaufakalataha e fakapotopotoaga ha tautolu, mo e to tupu malolō e fakaalofa ha tautolu ke he taha mo e taha.

10. Lagomatai fēfē he tau fekafekau lagomatai e fakapotopotoaga ke kaufakalataha? (Kikite fakatino he kamataaga.)

¹⁰ Lagomatai foki e tau fekafekau lagomatai ke tumau e kaufakalataha he fakapotopotoaga. Gahua lahi a lautolu ke lagomatai e tau motua, ti loto fakaaue a tautolu ke he tau mena oti kua taute e lautolu. Ma e fakatai, iloa mitaki he tau fekafekau lagomatai kua loga e tau tohi ha tautolu ke fakaaoga he gahua he fonua, mo e fakafeleveia e lautolu e tau tagata ahiahi ne o mai ke he tau feleveiaaga ha tautolu. Eketaha foki a lautolu ke leveki e Fale he Kautu mo e tumau ai e meā. Ka kauauloa a tautolu mo e tau matakainaga nei, kua fakalataha mo e fekafekau a tautolu ki a Iehova he puhala fakatokatoka.​—Fakatatai Gahua 6:3-6.

11. Ko e heigoa ka taute e lautolu ne ikiiki ke lagomatai e fakapotopotoaga ke kaufakalataha?

¹¹ Falu motua ne totou tau he gahua malolō he fakapotopotoaga. Ka kua liga nakai lahi e mena ne taute e lautolu mogonei tuga fakamua ha kua momotua a lautolu. Maeke he tau matakainaga taane fuata ke lagomatai. Ka fakamahani a lautolu, maeke a lautolu ke leveki e falu matagahua foki he fakapotopotoaga. Ti ka gahua malolō e tau fekafekau lagomatai, maeke ia lautolu ke fekafekau ko e tau motua he tau magaaho i mua. (1 Timoteo 3:1, 10) Falu he tau motua fuata ne holo ki mua foki. Kua fekafekau a lautolu mogonei ko e tau leveki takaiaga ti kua lagomatai e tau matakainaga he tau fakapotopotoaga loga. Loto fakaaue a tautolu kua makai e tau tagata fuata ke fekafekau ke lata mo e tau matakainaga.​—Totou Salamo 110:3; Fakamatalaaga 12:1.

12, 13. Ko e heigoa ka lagomatai e tau tagata oti he magafaoa ke kauauloa?

¹² Maeke fēfē a tautolu ke lagomatai e tau tagata he magafaoa ha tautolu ke kauauloa? Maeke he tapuakiaga he magafaoa he tau faahi tapu takitaha ke lagomatai a tautolu. Ka fai magaaho auloa e tau matua mo e tau fanau ke fakaako hagaao ki a Iehova, to tupu lahi e malolō he fakaalofa ha lautolu ke he taha mo e taha. He magaaho ia, maeke a lautolu ke fakamahani ke he mena ka talahau e lautolu he gahua he fonua, ka lagomatai a lautolu oti ke mautauteute mitaki. Ti ka logona e lautolu e taha kua tutala hagaao ke he kupu mooli ti kitia kua fakaalofa oti a lautolu he magafaoa ki a Iehova ti manako ke fakafiafia a Ia, kua fetataaki lahi a lautolu.

¹³ Maeke fēfē e taane mo e hoana ke felagomataiaki? (Mataio 19:6) Ka fakaalofa  tokoua a laua ki a Iehova mo e fekafekau tokoua ki a Ia, to fiafia mo e kaufakalataha a laua he fakamauaga ha laua. Kua lata foki a laua ke fefakakiteaki e fakaalofa ki a laua, tuga ne taute e Aperahamo mo Sara, Isaako mo Repeka, mo Elekana mo Hana. (Kenese 26:8; 1 Samuela 1:5, 8; 1 Peteru 3:5, 6) Ka taute he taane mo e hoana e mena nei, kua kaufakalataha a laua ti tata lahi atu ki a Iehova.​—Totou Fakamatalaaga 4:12.

14. Ka nakai fekafekau e taane po ke hoana haau ki a Iehova, ko e heigoa haau ka taute ke tumau e malolō he fakamauaga haau?

¹⁴ Talahau fakamaali he Tohi Tapu kua nakai lata a tautolu ke mau e tagata ne nakai fekafekau ki a Iehova. (2 Korinito 6:14) Ka e ha ha i ai e tau matakainaga ne mau ke he tagata ne nakai ko e taha he Tau Fakamoli a Iehova. Falu ne iloa e kupu mooli he mole e mau, ti nakai eke e hoa ha lautolu mo Fakamoli. Falu ne liga mau e fekafekau ha Iehova, ka e toka mogoia he taane po ke hoana ha lautolu e fakapotopotoaga. He tau tuaga nei, taute he tau Kerisiano e tau mena oti kua maeke ia lautolu ke tumau e fakamauaga ha lautolu ke malolō he omaoma ke he fakatonuaga mai he Tohi Tapu. Liga nakai mukamuka tumau e mena nei. Ma e fakatai, ko Mary mo e taane haana ko David ne fekafekau tokoua ki a Iehova. Ti nakai liu a David fano he tau feleveiaaga. Ka e lali agaia a Mary ke eke mo hoana mitaki mo e fakakite e tau mahani Kerisiano. Ti fakaako foki e ia e tau tama tokoono haana hagaao ki a Iehova mo e matutaki ke ō ke he tau feleveiaaga mo e tau fonoaga. Fai tau he mole he tutupu hake e tau fanau mo e toka e kaina, ne matutaki a Mary ke fekafekau ki a Iehova pete he uka lahi ma haana. Ka e kamata a David ke totou e tau mekasini ne tuku mai e Mary ma haana. Fai magaaho, ne kamata a ia ke liu fano ke he tau feleveiaaga. Ne toka tumau he mokopuna taane haana ne ono e tau he moui e nofoa ma David, ti ka nakai hau a ia, pehē e tama taane, “Misi e au a koe he feleveiaaga he aho nei ma Grandpa.” Ne liu mai a David ki a Iehova he mole e 25 e tau, ti kua fiafia a ia mo e hoana haana ha kua liu a laua mogonei ke fekafekau tokoua ki a Iehova.

15. Maeke fēfē he tau hoa mau kua momotua ke lagomatai e tau hoa fuata?

 ¹⁵ Kua totoko e Satani e tau magafaoa mogonei. Ko e taha kakano a ia kua lata he taane mo e hoana kua fekafekau ki a Iehova ke felagomataiaki a laua. Pete ni kua leva e mau ha mua, manamanatu hagaao ke he mena ka vagahau po ke taute e mua ke fakamalolō e fakamauaga ha mua. Kaeke ko e hoa mau kua momotua a mua, maeke a mua ke eke mo fakafifitakiaga mitaki ke he tau hoa fuata. Maeke ia mua ke uiina e hoa fuata ke taute auloa e tapuakiaga he magafaoa. To kitia e laua pete ne leva e mau he hoa, kua lata a laua ke fefakakiteaki e fakaalofa mo e kaufakalataha.​—Tito 2:3-7.

16, 17. Ko e heigoa kua amaamanaki e tau fekafekau kaufakalataha he Atua ki ai?

¹⁶ Ko e magaaho ne o hake e tau Isaraela ke he tau galue ha lautolu i Ierusalema, ne kauauloa a lautolu. Ne tauteute e lautolu e tau mena oti kua lata mo e fenoga. Ti fenoga auloa a lautolu mo e felagomataiaki. He faituga, ne fakaheke mo e tapuaki auloa a lautolu oti ki a Iehova. (Luka 2:41-44) Kua mautauteute a tautolu mogonei ma e moui he lalolagi foou, ti lata ia tautolu ke kaufakalataha mo e taute e tau mena oti kua maeke ia tautolu ke kauauloa. Maeke nakai a koe ke manamanatu ke he tau puhala ka taute fakalahi e koe e mena nei?

¹⁷ Kua fekehekeheaki e tau tagata he lalolagi nei ti latau foki hagaao ke he tau mena loga. Ka e loto fakaaue a tautolu kua lagomatai e Iehova a tautolu ke moua e mafola mo e ke maama e kupu mooli! Ko e tau tagata haana he lalolagi katoa kua tapuaki ki a ia he puhala kua manako a ia ki ai. Ti mua atu he tau aho fakamui nei, kua tupu lahi e kaufakalataha he tau tagata ha Iehova. Tuga ni he perofeta e Isaia mo Mika, kua o hake auloa a tautolu “ke he mouga a Iehova.” (Isaia 2:2-4; totou Mika 4:2-4.) Fiafia mooli a tautolu anoiha ka “fakamau, mo e tutaki fakalataha” e tau tagata oti he lalolagi mo e kauauloa ke tapuaki a Iehova!